Ndandililo 39
39
Che Yusufu ni ŵankwakwe Potifa
1Nipele, che Yusufu ŵanjawisye ku Misili, kweleko Potifa, juŵaliji jumo jwa achakulu ŵa ŵangondo ŵa Falao, ŵansumile kutyochela kwa Ŵaishumaeli. 2Ambuje Akunnungu ŵaliji pamo ni che Yusufu, ŵantesile ajendelechele yambone mu indu yakwe. Ŵatamaga mu nyuumba ja mbujegwe Mmisili. 3Potifa ŵaimanyilile kuti Ambuje Akunnungu akwakamusya che Yusufu ni kwakombolesya mu yose iŵaitendaga. 4Nipele, che Yusufu ŵakundikwe paujo pa Potifa, ni kutendekwa jwakutumichila jwa nsyene Potifa, ni kwaŵika aŵe jwakwimilila nyuumba jao ni indu yose yali nayo che Potifa. 5Kutandilila katema Potifa paŵammisile che Yusufu aŵe jwakwimilila nyuumba jakwe ni indu yose yakwete, Ambuje Akunnungu ŵaapele upile Potifa Mmisili jula ni nyuumba jao ligongo li che Yusufu. Ŵaipele upile indu yose ya panyuumba ni ya kumigunda. 6Potifa ŵaiŵisile indu yose mmakono ga che Yusufu. Nsyene ŵaliji nkulichenjeusya ni yakulya iŵalyaga pe. Che Yusufu ŵaliji jwanchanda jwakutindigala ni jwakusalala.
7Nipele pakupita moŵa gampepe, ŵankwakwe Potifa ŵammilile mata che Yusufu ni kunsalila, “Ngone ni une.” 8Che Yusufu ŵakanile ni kunsalila, “Mpilikane! Achimwene jwangu ngaakulichenjeusya ni chindu chachilichose pamusi pa, yose ambele kwimilila une. 9Pa musi pa ngapagwa ŵaali ni ulamusi kupunda undi nao une. Achimwene jwangu nganaasiŵilila chindu chachilichose ikaŵe mmwe pe, pakuŵa ndi ŵankwakwe. Sambano ngukombola chinauli kuutenda ugongomalo wanti yele ni kwaleŵela Akunnungu?” 10Namose jwankongwe jula jwapundile kwanyenga che Yusufu moŵa gose, nambo che Yusufu nganiŵasejelela atamuno kugona nao.
11Lyuŵa limo, Yusufu ŵajinjile munkati kukupanganya masengo gawo ni ŵakutumichila ŵane nganapagwa mu nyuumba mula. 12Nipele, ŵankwakwe che Potifa ŵakamwile nguo ja che Yusufu ni kunsalila, “Kungone ni une.” Nambo che Yusufu ŵaalechele nguo jila mmakono mwa jwankongwe jula, ni kuutuchila paasa. 13Jwankongwe jula paŵaiweni kuti che Yusufu alesile nguo jakwe mmakono mwao ni kuutuchila paasa, 14ŵaaŵilasile ŵakutumichila ŵane ŵala ni kwasalila, “Munnole! Muebulania jwatujigalile ŵankwangu akutujalusya. Ajinjile munkati mu, asachileje kungamulila, nambo nagumisile. 15Paŵapikene ngugumila, ŵalesile nguo jakwe, ni kuutuchila paasa.”
16Nipele, jwankongwe jula ŵagosile nguo jila mpaka paŵausile ŵankwakwe. 17Ŵaasalile ngani jila achitiji, “Jwakutumichila jwa Chiebulania jumujigalile ŵajinjile kuchuumba chetu kuti anyalusye! 18Nambo paŵapikene njigumilaga, ŵalesile nguo jakwe ni kuutuchila paasa.” 19Potifa paŵapikene maloŵe gaaŵechete ŵankwakwe kuti, jwakutumichila jwakwe atesile yeleyo yaachimile kwannope. 20Potifa ŵanjigele che Yusufu ni kwaŵika mu nyuumba ja kutaŵila ŵandu ŵaŵanneŵele mwenye. Che Yusufu paŵaliji munyumba ja kutaŵilwa mula, 21Nambo namose mu nyuumba jakutaŵilwa ŵandu mo, Ambuje Akunnungu ŵaliji pamo ni che Yusufu, ni kwatenda akundikwe paujo pa jwankulu jwa nyuumba ja kutaŵila. 22Kwayele jwankulu jula ŵammisile che Yusufu aŵe nkulu jwa wose ŵataŵikwe mwemula ni kila chindu chichatendekwaga mwemula nganichitendekwa pangali che Yusufu kusala. 23Jwankulu jwa nyuumba jakutaŵilwa ŵandu nganalichenjeusya sooni ni chilichose chachili mu ulamusi u che Yusufu, pakuŵa Ambuje ŵaliji pamo ni che Yusufu ni kwalongosya yose iŵaitendaga.
လက္ရွိေရြးခ်ယ္ထားမွု
Ndandililo 39: YBV
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Yao New Testament © The Word for the World Southern Africa and Pioneer Bible Translators, 2018.