Jona 4
4
Ivuemiovwo ri Jona Kugbe Arodọvwẹ rẹ Ọghẹnẹ
1Ẹkẹvuọvo ophu de mu Jona gangan, ivun de miovwo. 2Ọ da nẹ ẹrhovwo kẹ Ọrovwohwo ọ da ta, Me rẹ wẹ, Ọrovwohwo, ọnana dia obo re me tare re me vwọ obo orho mẹ? Ọye sorọ me vwọ djẹ kpo Tarshishi, Kidie me riẹnre nẹ wọwẹ Ọghẹnẹ rẹ ehrọre vẹ arodọvwẹ, wọ fobọ mu ophu-u, wọ vọnre vẹ ẹguọnọ ro jẹrhẹriẹ wọ me rha kparẹ ẹwẹn vrẹ emu ọbrabra ru wọ guọnọ ru. 3Vwẹ ọtiọye na, E Orovwohwo, reyọ arhọ mẹ nẹ uvwe oma, me rẹ wẹ kidie o yoma kẹ vwẹ ri mi vwo ghwu nọ ọ re me da rhọ. 4Ọrovwohwo da ta, Ku wọ riẹn ru rẹ ivun vwo miovwo uwe? 5Etiyin Jona da yan nẹ evun rẹ orere na o de re tidia vwẹ obaro ọnre rẹ orere na, ọ da bọn ogarivi kẹ oma rọye vwẹ etiyin. O de tidia vwẹ evun rẹ ophie
rọye, bẹsiẹ rọ cha vwọ mrẹ obo re cha phia kẹ orere na.
6Ọrovwohwo Ọghẹnẹ da vwẹ okankọn ọvo rhe, re ọ rhi si rhurhu Jona, rere ophie rọye vwo rhurho uyovwi, rere oma vwo jẹ ẹbajẹ. Ọtiọye na oma da vwerhe Jona gangan fiki rẹ okankọn na. 7Ẹkẹvuọvo ọke rẹ ọke vwo rhie vwẹ ẹdẹ rivẹ, Ọghẹnẹ da vwẹ ohori rhe, rhe riẹ okankọn na ọtiọye na o de vwioro. 8Ọke rẹ ọnre vwọ varhe, Ọghẹnẹ da vwẹ odju ọyaya rẹ obaro ọnre rhe, uvo na ko rhovwa mu Jona uyovwi ọtiọye na oma ko ron, kọ guọnọ nẹ ughwu gbe ghwe hwe ọye sievo, ọ da ta O yoma kẹ vwẹ ri mi vwo ghwu nọ ọ re me vwọ rhọ. 9Ẹkẹvuọvo Ọghẹnẹ da ta kẹ Jona, Ku wọ riẹn ru rẹ ivun vwo miovwo uwe fiki rẹ okankọn na? Ọ da ta, Me riẹn ru rẹ ivun vwo miovwo uvwe, ivun tobọ miovwo uvwe te ughwu dede. 10Ọrovwohwo da ta, Wọ re ehrọre rẹ okankọn ru wọ wian phihọ-ọ, eyẹ re wọ nẹrhe ọ djẹ-ẹ, rọ dje nẹ otọ rhe vwẹ ason, ro de rhe ghwu vwẹ ason yena ọvo. 11O gbi rhe fo re me re ehrọre ri Ninivẹ, orere rode yena, rẹ ihwo rọye bunọ uriori ujosan re riẹn obọrhe eyẹ obọhwẹre raye-en, kugbe uchuru buebu na?
လက္ရွိေရြးခ်ယ္ထားမွု
Jona 4: UBV77
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Urhobo © United Bible Societies, 1977.