Joẹl 3
3
Ẹdjọeguo rẹ Ọrovwohwo Kpahe Ẹgborho na
1Kidiẹ nighere, vwẹ ẹdẹ yena kugbe ọke yena, re me da cha rhoma vwẹ ughwẹ ri Juda vi Jerusalẹm rhivwi rhe na, 2ke me ghwẹ ẹgborho na ejobi koko ke me vwẹ ayen rhe iyara ri Jehoshafat, kẹ etiyin me da vwẹ ayen gu ẹdjọ, fiki rẹ ihwo mẹ kugbe ireuku mẹ Izrẹl, fikiridie ayen hra ayen nene ẹgborho na ejobi. Ayen da ghare otọ mẹ reyọ. 3Ifiki rẹ ihwo mẹ we vwo duvwu itẹ. we de siobọ nẹ ọmọshare nẹ o gbe igberadja, wa da vwi fiki rẹ udi shẹ ọmọtẹ, rere ovwan sa da udi.
4Die ovwan epha kẹ vwẹ, E Taya vi Sidọn, kugbe ubrakpọ ri Filistia ejobi? Wọ rhoma hwa osa kẹ vwẹ fiki rẹ emuọvo? Ọ da dianẹ wọ rhoma hwa osa kẹ vwẹ, ye Me cha nọ ekpẹn rẹ uruemu wẹn vwẹ uyovwi wẹn kpata kpata. 5Kidie wọ reyọ idọnọ efuanfon Mẹ kugbe oro Mẹ, wọ da ghwẹ efe ọghaghare mẹ kpo uwevwi rẹ ẹdjọ wẹn. 6Wọ shẹ ihwo ri Juda vi Jerusalẹm kẹ ihwo ri Grik, wo de mu ayen yanran shesheri nẹ ughwru rayen. 7Ẹkẹvuọvo mẹ ra kpare ayen vrẹn nẹ asan ra she ayen ra na rhe, vwẹ uyovwi rẹ obọ wẹn Me da nọ ekpẹn rẹ uruemu wẹn na. 8Ke Me shẹ emeshare wẹn vẹ emetẹ wẹn ke emọ ri Juda, ayen ke rhoma she ayen kẹ ihwo ri Sabia, ẹgborho ro sheri gangan; kidie Ọrovwohwo tarọ nure.
9Ghwoghwo ọnana vwẹ ohri rẹ ẹgborho na:
Muegbe rẹ ofovwi,
Rhanriẹ udu rẹ egba na
Jẹn eshare rẹ ofovwi na ejobi si te obonẹ,
jẹn ayen rhe.
10Duvwu ighwro wẹn phihọ elọkọ,
ibiakpa wẹn phihọ ibiri;
jẹn ọvwiẹrẹ tanẹ, Mẹvwẹ ọgba ofovwi.
11Broma wọ rhe,
ovwan ẹgborho re kẹrobọ
ghwẹ oma rẹ ovwan koko vwẹ etiyin.
Reyọ otu rẹ ofovwi wẹn rhe, E Ọrovwohwo
12Gbe jẹn ẹgborho na jẹjẹ oma rayen,
rere ayen rhe iyara ri Jẹhoshafat,
kidie etiyin mi de che tidia de gu ẹdjọ
rẹ ẹgborho re riariẹ ovwan phihọ na.
13Chọrọ oda rẹ ivuevun phihọ,
kidie orhọ na ghwore.
Ro evun rọye chiyo,
kidie okọ ri vain na vọnre.
ikpotọ na vọn mwavwe hwẹ,
kidie umwemwu rayen rhoro gangan.
14Urogho, urogho,
vwẹ evun rẹ iyara rẹ orhiebro!
kidie ẹdẹ rẹ Ọrovwohwo na kẹrire
vwẹ evun rẹ Iyara rẹ orhiebro.
15Te ọnre vẹ emeranvwe muegho,
isio ri lo she divwi
Esivwo ri Juda
16Ọrovwohwo de do nẹ Zayọn rhe,
urhuru rọye da mra nẹ Jerusalẹm rhe,
odjuvwu vẹ akpọ na de mu kpogho
Ẹkẹvuọvo Ọrovwohwo hẹ odjahọ kẹ ihwo rọye,
ogba ọgangan kẹ ihwo rẹ Izrẹl.
17Ọtiọye ku wa cha riẹn nẹ Mẹvwẹ Ọrovwohwo Ọghẹnẹ wẹn,
rọ dia Zayọn, ugbenu ọfuanfon mẹ na.
Jerusalẹm kọ cha fon
erhorha gbe cha wanvrẹn bẹdẹ-ẹ.
18Vwẹ ẹdẹ yena
udi ọvwevwerhe ko che sun nẹ igbenu na rhe,
ame-ivie ki che sun nẹ igbenu itete na rhe,
ukpọkẹre ri Juda ejobi
ke cha djẹ ọkẹre rẹ ame,
ogbugbu ọvo kọ cha djẹ nẹ uwevwi rẹ Ọrovwohwo rhe
kọ cha kpọrhọ iyara ri Shitim.
19Ijipt kọ cha rhoma dia ofefe
Edom kọ cha dia aghwa ofefe ghevweghe,
fiki rẹ emu ogbarogba re ru kẹ ihwo ri Juda,
kidie ayen sun ọbara rẹ ekun te otọ vwẹ otọ rayen.
20Ẹkẹvuọvo ka dia Juda bẹdẹ,
Jerusalẹm nẹ uvwiẹ re te uvwiẹ
21Ki mi reihri rẹ ọbara rayen,
Me cha hworhẹ ihwo rẹ abe-e,
kidie Ọrovwohwo na re dia Zayọn.
လက္ရွိေရြးခ်ယ္ထားမွု
Joẹl 3: UBV77
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Urhobo © United Bible Societies, 1977.