Hosia 7
7
Orukuruku rẹ Izrẹl Kugbe Emuokpahọ Rọye
1Ọke mie vwo sivwi Izrẹl, emu ogbegbo rẹ Ifrem da rhe vwẹ oma phia,
kugbe umwemwu ri Samaria,
kidie ayen phiẹn ihwo,
oji bẹrẹ ẹchẹ ro uwevwi,
igbunegbu na re gborho vwẹ obo otafe.
2Ẹkẹvuọvo ayen gbi rhe roro-o
nẹ me karoho iruo ọbrabra raye-en.
Asakiephana uruemu rayen riariẹ ayen phihọ,
ayen hẹ obaro mẹ.
3Vwẹ oma rẹ umwemwu rayen kọye oma vwo muẹ ovie vwerha,
isun na vwẹ oma rẹ ozighi rayen.
4Ayen ejobi igberadja re kpae,
ayen họhọ enyerhanre rọ tuabọ gidi gidi,
rẹ ohwo rọ kakemu rha hra erhanre na tavwe rọ ke kake-e.
5Vwẹ ẹdẹ rẹ ovie re avwanre na,
isun na de she ọga fiki rẹ ọrhorho rẹ udi,
ọ vẹ otu re vwẹ ihwo jehwe gbe yoro obọ phia.
6Kerẹ enyerhanre ọtiọye udu rayen rhorha vẹ ọzighi
asọn ejobi yẹ ophu rayen ra riọ,
vwẹ irhiọke re o mi mu la kerẹ ẹkuerhanre.
7Ayen ejobi rhorha kerẹ enyerhanre,
ayen guọghọ ihwo ri sun ayen,
Ivie rayen ejobi sheri,
ayen ọvuọvo rhe kperẹ se vwe-e.
8Ifrem vwẹ oma rọye gua ihwo na,
Ifrem họhọ ikara ra rhẹriẹ re-e.
9Erhorha guọghọ ogangan rọye phihọ otọ, jẹ ọ riẹnre-e,
esha di mu djẹ vwẹ uyovwi rọye,
jẹ ọ riẹnre-e.
10Eheri rẹ Izrẹl ọvo se iseri hwe;
yẹ ayen ji rhivwi bru Ọrovwohwo Ọghẹnẹ rayen,
ayen je guọnọ fiki rẹ enana ejobi-i.
11Ifiem pha kerẹ ilekuku gheghẹn, djidji
o se Ijipt, o kpo Asiria.
12Ọtiobo rẹ ayen yanran na, yi mi phi ariri mẹ rhurhu ayen;
mi che si ayen rhiotọ kerẹ emephran rẹ irharheghe;
me cha fa ayen fiki rẹ uruemu ọbrabra rayen.
13Ekan kẹ ayen, kidie ayen ghwru nẹ obọ mẹ!
Ẹghwọrọ kẹ ayen kidie ayen mu kpahe ovwẹ!
manẹ me tan ayen hirhe, ẹkẹvuọvo ayen mu efian bare ovwẹ.
14Ukpere rẹ ayen nẹ ubiudu bru vwẹ rhe-e,
ẹkẹvuọvo ayen di beroma vwẹ enu rẹ ehwa rayen,
fiki rẹ eka vẹ idi kọye ayen vwo mu eta ta,
ayen mu kpahe ovwẹ.
15O wenẹ mi yono ayen me de ru obọ rayen gan,
ye ayen jẹ iroro ogbegbọ kpahe ovwẹ.
16Ayen rhivwi bru Baal
ayen họhọ umurhabọ ro brakpẹn,
a cha vwẹ ọlọkọ hwe isun rayen,
fiki rẹ arueyivwo rọ vọn unu rayen.
Ọna kọ dia ehwẹjẹ kẹ ayen vwẹ otọ rẹ Ijipt.
လက္ရွိေရြးခ်ယ္ထားမွု
Hosia 7: UBV77
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Urhobo © United Bible Societies, 1977.