Hosia 13
13
A Cha Ghworo Ifrem re Tototo
1Ọke rẹ Ifrem vwọ ta ota, ihwo de kpogho;
a da kparọ kpenu vwẹ Izrẹl,
ẹkẹvuọvo rọ vwọ wan oma ri Baal re abe o de ghwu.
2Asakiephana kẹ ayen ruẹ umwemwu buẹ phihọ,
ayen de duvwu oma ra wranre kẹ oma rẹ ayen,
oma ra vwẹ idọnọ efuanfon vwo ru re bru ona phihọ,
ayen ejobi iruo rẹ ọwena.
We ze izobo kẹ enana, ayen me ta,
ihwo ke fiọnfiọn ema rẹ irhuẹn unu!
3Fiki rẹ ọtiọye ayen ke cha dia kerẹ evwru rẹ irhiọke
yẹrẹ irho ro krẹ ọke ya-a,
kerẹ iphopho ri tuẹ nẹ utuwevwi rẹ de wuye ọka
eyẹ kerẹ ivwirhi re wan evakpo ruẹ otafe.
4Mẹvwẹ Ọrovwohwo rẹ Ọghẹnẹ wẹn nẹ otọ rẹ Ijipt rhe;
wọ riẹn Ọghẹnẹ ọfa vrẹn vwẹ-ẹ
ọ dia omẹvwẹ-ẹ osivwi ọfa gbe herọ-ọ.
5Mẹvwẹ re riẹn wẹn vwẹ evun rẹ aghwa,
vwẹ otọ rẹ ame epha-a.
6Ẹkẹvuọvo rẹ evun vwọ vọn ayen nu,
oma ko mu ayen, udu rayen da kpare kpenu.
Ọye me da chọrọ ayen ẹro.
7Ọtiọye na ke me cha dia kerẹ okpohrokpo kẹ ayen,
kerẹ edjanakpo ro fiọnko vwẹ oma rẹ idjerhe.
8Mi che pho mu ayen kerẹ edjanakpo re mie emọ,
ke me chẹghẹ udu rayen rhie phihọ,
kẹ etiyin me da re ayen nu kerẹ okpohrokpo,
kirobo rẹ eranvwe rọ djọma chẹghẹ ayen.
9Me guọghọ owẹ, E Izrẹl,
kono sa chọ we uko?
10Tivọ ovie wẹn epha, ro sivwi uwe;
isun wẹn rhọ, re chọ ochọ wẹ
ihwo re wọ ta nẹ;
Kẹ vwẹ ovie kugbe isun?
11Me kẹ wẹ ovie vwẹ ophu mẹ,
vwẹ ivuemiovwo mẹ mi de si ayen nu.
12Orukuruku rẹ Ifrem a gba ayen koko,
umwemwu rọye a ghwẹrẹ koko.
13Obi rẹ uvwiẹ nuro oma rhe,
ẹkẹvuọvo ọmọ ogheghẹ o ruẹ,
asakiephana ọ gbe cha ohwarha-a
vwẹ asan unu rẹ ọmọ wan cha.
14Ke me tan ayen nẹ obọ rẹ ogangan rẹ Erivwi?
Me tan ayen nẹ obọ rẹ Ughwu?
E Ughwu, emiavwe wẹn rhọ?
E Erivwi, tivọ ẹguọghọ wẹn epha?
Ẹhrọre chọrọ ovwẹ ẹro.
15Owenẹ ọ rho bodo bodo kerẹ ẹgon,
odju rẹ obaro ọnre, odju rẹ Ọrovwohwo cha rhe,
ọ kpara nẹ obo aghwa cha;
ogbugbu rọye cha kpọ,
imigbo rọye cha yamu,
o che hwerhe kemu kemu
esiri rọ sẹro rọye nu ejobi kufia.
16Sameria kọ ghwa abe rọye,
kidie o mu kpahe Ọghẹnẹ rọye,
a cha vwẹ ọlọkọ hwe ayen,
a cha vwẹ emọ rayen fa otọ hwe,
ka cha bẹrẹ evun rẹ eya vẹ evun rhie phihọ.
လက္ရွိေရြးခ်ယ္ထားမွု
Hosia 13: UBV77
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Urhobo © United Bible Societies, 1977.