Rom Tɩŋŋaa 5
5
A tɩŋ Yesu Kirisito wɩaa la dɩ Wɩa ŋaa sɩma nɛ
1Ŋɩɩ wɩaa, la sɩ laa Wɩa dii ŋɩɩ, Wɩa leŋe la ŋaa tʋɔpʋl tɩmma nɛ ʋ sɩpaaŋ. Wɩa to La Tɩɩna Yesu Kirisito lɛ nɛ a leŋ la ŋaa sɩma. 2La sɩ laa Yesu Kirisito wɩaa dii ŋɩɩ, ʋ leŋe la jʋʋ Wɩa lahɔrɩmɔ nɛ. Nɩmɛ nɛ la hɛ lɛɛlɛ aa jʋɔsɛ, a kɛŋ yɩɛlaa arɩ la jaŋ kpaa Wɩa yɩrɩ-la chɛɛ dɔŋ. 3Ŋɩɩ ma dʋndʋŋa dee, la haa jʋɔsɛ nɛ arɩ hɛɛ-la kala la ha sɩɩ na a tɩŋ Kirisito wɩaa, bɛɛ wɩaa hɛɛ-la jaŋ leŋ dɩ la wuo kɛŋ kenyiri. 4Dɩ la nɛ kɛŋ kenyiri, ʋ jaŋ wuo leŋ dɩ la kɛŋ mɛlɛ. Dɩ la nɛ kɛŋ mɛlɛ, la jaŋ kɛŋ yɩɛlaa. 5La sɩ kɛŋ yɩɛlaa ŋɩɩ, la bɩ jaŋ kɔ dɩ la dii hɩɩsɩŋ, bɛɛ wɩaa Wɩa chola nɛ kɩŋkɛŋ. Ʋ joŋ chono-la a hɛ la tʋɔŋ lɛ nɛ. Ʋ ŋaa ŋɩɩ ʋ Dɩŋ-zɔmʋŋ ʋ sɩ joŋo pɩla doluŋ lɛ nɛ.
6Bʋa-la lɛ la fa sɩ bɩ doluŋ kɛnɛ dɩ la wuo pɛ la tɩtɩa lɛ, Kirisito laa la wʋbɔŋ ŋaaraa nyuŋ sʋʋ nɛ. 7Ʋ ŋaa wʋhaa nɛ arɩ nʋʋ sɩ jaŋ laa tʋɔpʋl tɩɩna nyuŋ sʋʋ. Arɩ ŋɩɩ kala, ŋ bɩ pɔ nʋʋ jaŋ kɛŋ nyuduoŋ a wuo laa nɩpʋla nyuŋ sʋʋ. 8Ama ŋɩɩ Wɩa sɩ daga arɩ ʋ chola nɛ ŋ-la: Bʋa-la lɛ la ha sɩ ŋaa wʋbɔŋ ŋaaraa nɛ Kirisito sʋʋ la wɩaa. 9Kirisito sɩ sʋʋ ŋɩɩ a leŋ la kɛŋ tʋɔpʋla ʋ teeŋ, ŋɩɩ-na ʋ jaŋ bɩra laala ta tapʋlɩɩ-la Wɩa sɩ jaŋ na baanɩŋ dʋnɩa nɩaa nyuŋ. 10La dɩ Wɩa faa yuo dɔŋɔ nɛ. Ama ʋ leŋe la ŋaa sɩma nɛ a tɩŋ ʋ Bie sɩ sʋba wɩaa. La dɩ ʋ sɩ ŋaa sɩma ŋɩɩ, ʋ jaŋ to Kirisito mɩɩsɩŋ lɛ a laala ta. 11Ŋɩɩ ma dʋndʋŋa dee, laa jʋɔsʋ nɛ a tɩŋ Wɩa sɩ to La Tɩɩna Yesu Kirisito lɛ a leŋ la ŋaa sɩma.
Adam kɛŋ sʋʋŋ kɔ, Yesu Kirisito nɛ kɛŋ mɩɩsɩŋ kɔ
12Wʋbɔŋŋɔɔ to nɩbala lɛ nɛ a kʋ jʋʋ dʋnɩa. Wʋbɔmɔ-la nɛ tɩɩ sʋʋŋ jʋʋ dʋnɩa. Nɩbala sɩ kʋ ŋaa wʋbɔŋ ŋaarʋ, ŋɩɩ nɛ tɩɩ sʋʋŋ jʋʋ dʋnɩa nɩaa kala. 13Wʋbɔŋŋɔɔ fa hɛ dʋnɩa lɛ, ka wɩalɩŋ Wɩa sɩ joŋo pɩ Mosis dɩ nɩaa tuto na kɔ, ama bʋa-la lɛ ba fa bɩ cheeriŋ joŋo pɩ nɩalɩŋ sɩ bɩ Mosis nii-la jɩŋ. 14A chɩŋ Adam bʋa-la lɛ a kaa kʋkɔ Mosis ma mɩɩsɩŋ lɛ, sʋʋŋ nɛ laa dʋnɩa kala. Nɩaa dɔnsʋŋ fa hɛ nɩmɛ, ba wʋbɔŋŋɔɔ bɩ Adam wʋbɔmɔ-la naga, ama sʋʋŋ laa ba ma tɩɩ nɛ. Adam nɛ fa ŋaa nɩɩ-la sɩ jaŋ kɔ mɩmaarɩŋ.
15Ama Wɩa zile kʋ-la kɩɩ Adam wʋbɔŋ-la. Nɩaa yʋga nɛ a sʋʋ a tɩŋ nɩbala wʋbɔmʋŋ wɩaa. Ama Wɩa fá la nenige a joŋ ʋ zile kʋ-la pɩla, ʋ nɛ paala yʋga kɩɩ wʋbɔŋ-la. Yesu Kirisito nɛ ŋaa zile kʋ-la. Ʋ lahɔrɩmɔ lɛ ʋ pɛ nɩaa lɛ yʋgɛ kɩŋkɛŋ kɩŋkɛŋ. 16Wɩa zile kʋ-la ʋ sɩ joŋo pɩ nɩaa arɩ wɩɩ-la Adam wʋbɔŋ-la sɩ kaa kɔ dʋnɩa bɩ kʋbala ŋaa. A tɩŋ nɩbala wʋbɔŋ-la wɩaa nɛ Wɩa dii la sarɩya a joŋ cheeriŋ pɩla. Ama nɩaa sɩ yʋga a ŋaa wʋbɔŋ-la wɩaa nɛ, Wɩa joŋ ʋ zile kʋ-la pɩla a joŋ la wʋbɔŋŋɔɔ chɛla, a leŋ la kɛŋ tʋɔpʋla ʋ sɩpaaŋ. 17Nɩbala wʋbɔmʋŋ wɩaa nɛ leŋe sʋʋŋ laa dʋnɩa tɩɩ. Wɩɩ-la Yesu Kirisito sɩ ŋaa pɩ nɩaa nɛ yʋga kɩɩ nɩbala-la wʋbɔŋ-la. Nɩalɩŋ kala sɩ jʋʋ Wɩa lahɔrɩmɔ sɩ yʋga lɛ, ʋ leŋ ba kɛŋ tʋɔpʋla chɔgɩta ʋ sɩpaaŋ, ba jaŋ to Yesu lɛ a dii kuoruŋ ba mɩɩsɩŋ lɛ.
18Nɩbala wʋbɔmʋŋ sɩ wuo leŋ nʋʋkala laa cheeriŋ Wɩa teeŋ ŋɩɩ, ŋɩɩ nɛ nɩbala tʋɔpʋla wʋŋaalaa ma jaŋ wuo leŋ dɩ nʋʋkala kɛŋ tʋɔpʋla Wɩa sɩpaaŋ a kɛŋ mɩɩsɩŋ. 19Nɩbala sɩ vɩa Wɩa niiŋ nɛ leŋe nɩ-daŋ ŋaa wʋbɔŋ ŋaaraa. Ŋɩɩ tɩtɩa nɛ nɩbala sɩ to Wɩa niiŋ nɛ wuo ŋaa nɩaa yʋgɛ a kɛŋ tʋɔpʋla Wɩa sɩpaaŋ. 20Wɩalɩŋ Mosis fa sɩ bile dɩ nɩaa tuto nɛ kʋ wasa leŋ wʋbɔŋŋɔɔ pʋrɩgɛ dʋnɩa lɛ. Ama wʋbɔmɔ-la sɩ kʋ wasa pʋrɩgɛ, ŋɩɩ nɛ Wɩa lahɔrɩmɔ ma faasa yʋgɛ woruŋ la lɛ. 21Wʋbɔŋŋɔɔ sɩ kɛŋ doluŋ a laa dʋnɩa nɩaa tɩɩ ŋɩɩ, ŋɩɩ nɛ kɛŋ sʋʋŋ kaa kɔ. Ŋɩɩ tɩtɩa nɛ Wɩa lahɔrɩmɔ-la ma to tʋɔpʋla-la Wɩa sɩ leŋe la kɛŋ lɛ a yuo dii dʋnɩa. Ŋɩɩ leŋ la to La Tɩɩna Yesu Kirisito lɛ a kɛŋ mɩɩsɩ-la sɩ bɩ dɛrɛ.
လက္ရွိေရြးခ်ယ္ထားမွု
Rom Tɩŋŋaa 5: SIS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Ghana Institute of Linguistics Literacy and Bible Translation 1984, 2014