Rom Tɩŋŋaa 3
3
1Bɛɛ nɛ saa Juu tɩŋŋaa kaa kɩɩ nɩalɩŋ sɩ bɩ Juu tɩŋŋaa ŋaa? Ba sɩɩ keri ba pene-la ma, ʋ bʋbʋɔŋ nɛ bɛɛ? 2Wɩaa yʋga nɛ Juu tɩŋŋaa kaa kɩɩ nɩalɩŋ sɩ bɩ Juu tɩŋŋaa ŋaa. Wɩalɩŋ kala tʋɔŋ wʋbalɩŋ nɛ ŋ-la: Juu tɩŋŋaa nɛ Wɩa joŋ ʋ niiŋ wɩaa pa. 3Ka dɩ Juu tɩŋŋaa dɔnsʋŋ nɛ bɩ Wɩa niiŋ wɩalɩŋ laa dii, ʋ jaŋ wuo leŋ dɩ Wɩa sɩ́ wʋtɩtɩɩ kɛŋ koo? 4Aɩ, ŋɩɩ dee. Dɩ nɩaa kala nɛ paala ŋaa wʋnyɩɛra ma, Wɩa-na jaŋ kɛŋ wʋtɩtɩɩ. Ba ŋmʋnsɛ ŋɩɩ nɛ Wɩa teniŋ tʋɔŋ a tɩgɛ Wɩa lɛ. Ba sɩ,
“Dɩ ŋ nɩɩ bʋl wɩaa ba jaŋ na dɩ wʋtɩtɩɩ nɛ ŋ bʋbʋl,
dɩ ŋ nɛ dii nɩaa sarɩya ma, ba jaŋ na dɩ ŋ kɩaa sɩma nɛ.”
5Ka la wʋbɔmɔ-la la sɩɩ ŋaa nɛ chaasa dagɛ arɩ Wɩa kɛŋ wʋtɩtɩɩ, bɛɛ nɛ laa chɛ dɩ la bʋl? Mɩɩ chɛ dɩ mɩ bʋl nuhuobiine tʋɔbɩɩnaa wɩaa nɛ a pɩɛsɛ: Dɩ Wɩa nɛ dɔgɩsɛla a tɩŋ la wʋbɔŋŋɔɔ wɩaa, ʋ kɩaa bɩ sɩŋ ʋ sɩ ŋaa ŋɩɩ, koo? 6Ŋɩɩ dee. Dɩ Wɩa nɛ fa bɩ wʋtɩtɩɩ kɛnɛ, ɛɛ nɛ ʋ fa jaŋ wuo dii dʋnɩa nɩaa sarɩya? 7Ama dɩ mɩ wʋnyɩɛrɩ-la nɛ wuo leŋ dɩ Wɩa wʋtɩtɩɩ-la chaasa chɩŋ a laa yɩrɩŋ pʋ, bɛɛ nɛ saa tɩɩ ʋ jaŋ diimi sarɩya a bʋl dɩ mɩ ŋaa wʋbɔŋ ŋaarʋ nɛ, a joŋ cheeriŋ pɩmɛ? 8Dɩ ŋɩɩ nɛ fa, mɩ fa jaŋ bʋl dɩ má leŋ dɩ la ŋaa wʋbɔŋŋɔɔ a na wʋzɔŋŋɔɔ. Nɩaa dɔnsʋŋ paala tʋʋsɛla nɛ aŋ bʋl dɩ la daga arɩ nʋʋ nɛ ŋaa wʋbɔŋŋɔɔ, ʋ jaŋ na wʋzɔŋŋɔɔ. Dɩ Wɩa nɛ joŋ cheeriŋ pɩ nɩaa deemba, ʋ kɩaa jaŋ sɩŋ.
Nʋʋkala bɩ tʋɔpʋl tɩɩna ŋaa Wɩa sɩpaaŋ
9Ɛɛ nɛ saa? Ma bɩɩna la Juu tɩŋŋaa kpɩa nɩalɩŋ sɩ bɩ Juu tɩŋŋaa ŋaa nɛɛ? Aɩ, la bɩ ba kpɩa. Mɩ laa sɩpaaŋ bʋl arɩ nɩalɩŋ sɩ ŋaa Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala, ba ŋaa wʋbɔŋ ŋaara nɛ. 10Ba ŋmʋnsɛ ŋɩɩ nɛ Wɩa teniŋ tʋɔŋ a bʋl,
“Nʋʋkala bɩ tʋɔpʋl tɩɩna ŋaa Wɩa sɩpaaŋ, nɩbala ma bɩ tʋɔpʋl tɩɩna ŋaa.
11Nʋʋkala tuo a jɩŋ Wɩa wɩalɩŋ bʋbʋɔŋ, nʋʋkala ma bɩ Wɩa bee chɩchɛ.
12Nʋʋkala joŋ harɩŋ yɩa Wɩa nɛ a kala ŋɩŋaa wʋbɔŋŋɔɔ.
Nʋʋkala bɩ wʋzɔŋ ka ŋaa. Nɩbala ma tuo.
13Ba niiŋ wʋbʋlaa nagɛ bʋa-suruŋ sɩɩ sʋɔrɛ ŋɩɩ nɛ.
Ba bʋl wɩaa nyɩnyɩsɛ nɩaa.
Ba wʋbʋlaa ma kɛŋ huoŋ a nagɛ dɩ-kuuro.”
14“Ba niiŋ hɛyɛ, ba ŋmɩɛsa hɩhɛ nɩaa lɛ.”
15“Ba bɩ diene aŋ kpʋkpʋ nɩaa.
16Dɩ ba nɛ mʋ lee-na kala, ba yie chei lee-la nɛ a ŋaa nɩaa tʋɔŋ chei.
17Ba bɩ jɩŋ ba sɩ jaŋ ŋaa ŋɩɩ dɩ ba dɩ nɩaa sɩŋ.”
18“Ba bɩ Wɩa ma ka fá.”
19La jɩma arɩ wɩalɩŋ Mosis sɩ ŋmʋnsa bil dɩ nɩaa tuto, dɩ ʋ nɛ dagɛ wɩɩkala, nɩalɩŋ sɩɩ to wɩalɩŋ nɛ ʋ daga pɩpa. Ŋɩɩ wɩaa nʋʋkala bɩra bɩ jaŋ wuo bʋl wɩɩkala dɩ Wɩa nɛ dii dʋnɩa nʋʋkala sarɩya. 20Nʋʋkala bɩ jaŋ wuo to wɩalɩŋ Mosis sɩ bile lɛ a kɛŋ tʋɔpʋla Wɩa sɩpaaŋ. Ama wɩalɩŋ Mosis sɩ bile dɩ nɩaa tuto nɛ dagɛla la jɩŋ arɩ nʋʋkala ka ŋaa wʋbɔŋŋɔɔ nɛ.
Nʋʋkala sɩ laa Yesu wɩaa dii kɛŋ tʋɔpʋla Wɩa sɩpaaŋ
21Ama lɛɛlɛ Wɩa suri wombiiŋ nɛ dɩ nɩaa to a kɛŋ tʋɔpʋla ʋ sɩpaaŋ. Ʋ wombii-la bɩ wɩalɩŋ Mosis sɩ bile lɛ lɩa. Ama wɩalɩŋ Mosis sɩ bile arɩ wɩalɩŋ Wɩa wʋlaabʋllaa sɩ bʋla kala fa bʋl wombii-la wɩaa nɛ. 22Nɩalɩŋ sɩ laa Yesu Kirisito wɩaa dii, nɩalɩŋ sɩ ŋaa Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala, ba nɛ jaŋ kɛŋ tʋɔpʋla ʋ sɩpaaŋ. Ʋ bɩ ba kaa pɔrɛ, 23bɛɛ wɩaa nʋʋkala kɛŋ wʋbɔŋŋɔɔ nɛ a bɩ Wɩa wuo chɩna kpɩkpagɛ. 24Ama Wɩa lahɔrɩmɔ lɛ nɛ ʋ to Yesu Kirisito lɛ a laaba ta ba kɛŋ tʋɔpʋla ʋ sɩpaaŋ. Ʋ ŋaa ŋɩɩ chɔgɩta nɛ. 25Wɩa leŋe Yesu Kirisito sʋʋ nɛ a joŋ ʋ chalɩŋ jaasɛ la wʋbɔŋŋɔɔ wɩaa, dɩ nɩɩ-la kala sɩ laa Yesu wɩaa dii, Wɩa jaŋ joŋ ʋ wʋbɔŋŋɔɔ chɛʋ. Wɩa ŋaa ŋɩɩ a dagɛ arɩ ʋ kɛŋ wʋtɩtɩɩ nɛ. Faafaa ʋ kɛŋ kenyiri nɛ, a bee kieli nuhuobiinee wʋbɔŋŋɔɔ a bɩ ba dɔgʋsɔ. 26Ama lɛɛlɛ Wɩa dagɛ nɩaa wʋbɔŋŋɔɔ a pɩba nɛ. Ʋ ŋaa ŋɩɩ aa dagɛ arɩ ʋ kɛŋ wʋtɩtɩɩ nɛ, dɩ nʋʋkala nɛ laa Yesu wɩaa dii, ʋ jaŋ kɛŋ tʋɔpʋla Wɩa sɩpaaŋ.
27Wʋbɛɛ nɛ saa la jaŋ kaa bigisi la tɩtɩa lɛ? Wɩɩkala tuo. Bɛɛ nɛ tɩɩ? La sɩɩ to wɩalɩŋ Mosis sɩ ŋmʋnsa bil dɩ la tuto nɛ tɩɩ? Aɩ, ama la sɩ laa Yesu dii nɛ tɩɩ. 28La sɛyɛ arɩ nʋʋ jaŋ wuo na tʋɔpʋla Wɩa sɩpaaŋ a tɩŋ ʋ sɩ laa Yesu dii. Dɩ la nɩɩ to wɩalɩŋ Mosis sɩ ŋmʋnsa bil dɩ nɩaa tuto, la bɩ jaŋ wuo kɛŋ tʋɔpʋla deeŋ. 29Ma bɩɩna Wɩa ŋaa Juu tɩŋŋaa dʋndʋŋa Wɩa nɛɛ? Aɩ. Ʋ ŋaa nɩalɩŋ sɩ bɩ Juu tɩŋŋaa ŋaa ma Wɩa nɛ. 30Wɩa sɩ ŋaa kʋbala, ʋ jaŋ leŋ dɩ nɩalɩŋ sɩɩ keri ba penee kɛŋ tʋɔpʋla a tɩŋ ba sɩ laa Yesu wɩaa dii wɩaa. Nɩalɩŋ ma sɩ bɩ Juu tɩŋŋaa ŋaa, ʋ jaŋ leŋ dɩ ba ma kɛŋ tʋɔpʋla a tɩŋ ba ma sɩ laa Yesu wɩaa dii wɩaa. 31La saa jaŋ wuo joŋ wɩalɩŋ Mosis sɩ bile ta a tɩŋ la sɩ laa Wɩa dii wɩaa? Aɩ, ŋɩɩ bɩ wuo ŋaa, la Wɩa laa diiniŋ leŋe Mosis sɩ ŋmʋnsa wɩalɩŋ bil dɩ la tuto wasa zɔŋ nɛ.
လက္ရွိေရြးခ်ယ္ထားမွု
Rom Tɩŋŋaa 3: SIS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Ghana Institute of Linguistics Literacy and Bible Translation 1984, 2014