Tɩntɩŋŋaa 28
28
Pɔɔl hɛ Malɩta lɛ
1La sɩ lɩɩ lɩɩŋ niiŋ a laa la mɩɩsɩŋ ŋɩɩ, la na arɩ tinteeŋ nɛ lɩɩŋ gollo chu. Nɩalɩŋ sɩ hɛ lee-la bʋla pɩla arɩ tintee-la yɩrɩŋ nɛ Malɩta. 2Nɩalɩŋ kɛnla woruŋ lee-la, a pɛ la lɛ kɩŋkɛŋ. La sɩ hɛ nɩmɛ ŋɩɩ, duonuŋ suomo nɩnɩɩ, leriŋ fɩɛlɛ woruŋ. Ba hɛ nyiniŋ pɩla la wiwieni. 3Pɔɔl mʋ jaa daasɩŋ a kaa kʋ hɛ nyiŋ-la lɛ, dɩ dɩmɩŋ hɛ daasɩ-la lɛ. Wulumuŋ kɛŋ dɩŋ-la ʋ kʋ lɩɩ a dɩma pɛ Pɔɔl nɩsɩŋ lɛ. 4Nɩalɩŋ sɩ hɛ lee-la a na dɩ dɩŋ-la dɩma pɛ Pɔɔl nɩsɩŋ lɛ ŋɩɩ, ba bʋla pɩpɩ dɔŋɔ, “Ʋ naga baala deeŋ ŋaa nɩkpʋʋrʋ nɛ. Ʋ wuo lɩɩ lɩɩŋ tʋɔŋ a kɛŋ mɩɩsɩŋ, ama Wɩa bɩ sɛyɛ dɩ ʋ kɛŋ mɩɩsɩŋ.” 5Ŋɩɩ nɛ Pɔɔl kɛŋ dɩŋ-la kpesi ʋ tel nyiŋ-la tʋɔŋ, ama dɩŋ-la sɩ dɩmʋ ŋɩɩ, ʋ bɩ ʋ wɩɩkala ŋaa. 6Ba faa gbɛrɛ dɩŋ-la sɩ dɩŋ Pɔɔl ŋɩɩ dɩ ʋ ŋmɛrɛ, koo dɩ ʋ guu tele sʋʋ, dɩ ba na. Ba gbɛrɛ a dieni, ka ba bɩ na arɩ wɩɩkala ŋaa ʋ lɛ. Ba bɩrɩmɛ ba tʋɔbɩɩnaa a bʋl dɩ ʋ ŋaa vene nɛ.
7Tintee-la kuoro yɩrɩŋ nɛ fa Pubilias. Ʋ bagɩsɩŋ ma fa kpagɛ lee-la nɛ. Ʋ kɛnla kaa mʋ ʋ leriŋ, a kɛnla woruŋ tapʋlaa batori. 8Kuoru-la nyɩmma faa wɩɩlɛ nɛ a pɩŋ dɩa lɛ. Ʋ yaraa fa lɩma nɛ, aŋ ka ʋ nɩnɩgɩlɛ. Ŋɩɩ nɛ Pɔɔl jʋʋ naʋ ʋ dɩa lɛ a joŋ ʋ nɩsɩŋ daŋ ʋ lɛ a chʋɔlɛ Wɩa pʋ, ʋ duori. 9Pɔɔl fa sɩ ŋaa ŋɩɩ, puwuolo-la kala fa sɩ hɛ tintee-la lɛ lɩɩŋ sɩ gollo chu kɔ Pɔɔl teeŋ. Ʋ ŋaa ba duori. 10Ba fa zil la nɛ kɩŋkɛŋ. Bʋa-la lɛ la sɩɩ chɛ dɩ la sii jʋʋ lɩɩŋ daboro a duoro viiri, ba joŋ kɩalɩŋ kala la sɩɩ chɛ a hɛ lɩɩŋ daboro-la lɛ dɩ la kaa vɛŋ wombiiŋ.
Pɔɔl lɩɩ Malɩta lɛ a mʋ Rom tinteeŋ
11La hɛ nɩmɛ chɛnsɩŋ batori nɛ aŋ sii jʋʋ lɩɩŋ daboro a lɩɩ Alɛkɩzandɩrɩa. Lɩɩŋ daboro-la yɩrɩŋ nɛ veŋ-daalɩarɩŋ. Yibiiniŋ fa sɩ suomo, ba fa vɔɔ lɩɩŋ daboro-la a bil lɩɩŋ niiŋ nɛ. 12La sɩɩ mʋ ŋɩɩ, la mʋ yi taŋ kʋbala baa yɩrɛ Sɩrakas, a chʋa nɩmɛ tapʋlaa batori. 13La bɩra lɩɩ nɩmɛ a jʋʋ lɩɩŋ daboro, a duoro mʋ taŋ kʋbala baa yɩrɛ Rɩɩgɩam. Ʋ taŋ sɩ pʋla, peliŋ bɩra suomo lu a lɩɩ wɩɩpɔsʋŋ nadiiŋ. Tapʋl-lɩa chɛɛŋ nɛ la kʋ yi taŋ kʋbala baa yɩrɛ Putooli. 14La na nɩalɩŋ dɔnsʋŋ sɩ laa Yesu wɩaa dii nɩmɛ. Ba sɩ dɩ la chʋa ba teeŋ yɔbɔ. La chʋa. Ŋɩɩ nɛ la bɩra lɩɩ nɩmɛ a mʋ Rom. 15La naambiiri-la sɩ laa Yesu wɩaa dii Rom lɛ nɩɩ la wɩaa arɩ laa kɔ nɛ. Ba kʋ chenla dɩ-bolii, lere kʋbalaba baa yɩrɛ Apɩas Yɔbɔ arɩ Dɩɩsɩŋ batori Nʋhʋɔraa sɩɩ chʋa. Pɔɔl sɩ naba, ʋ nyuŋ nyaasɛ ʋ lɔllɛ Wɩa.
Pɔɔl hɛ Rom lɛ
16La sɩ yi Rom, ba pɩ Pɔɔl wombiiŋ dɩ ʋ jʋjʋʋ ʋ dʋndʋŋa dɩa, ka ba ŋaa laalɩyuoru kʋbala bibenu. 17Ʋ tapʋlaa batori chɛɛŋ Pɔɔl yɩrɛ Juu tɩŋŋaa kʋhɩasɩŋ taŋ-la lɛ ba kʋ hilimi. Ba sɩ kʋ hilimi ŋɩɩ, ʋ bʋla pɩba, “Mɩ naambiiriŋ, mɩ bɩ wɩɩkala ŋaa chei la nɩaa lɛ, mɩ bɩ la naabalɩmaba kɩsɩnɩŋ ma cheye. Ama ba kɛmmɛ a tɔ dɩa nɛ Jerusalɛm lɛ, aŋ bɩra jommi a hɛ Rom tɩŋŋaa ma nɩsɩŋ lɛ ŋ-la. 18Ba pɩɛsɛmɛ wɩaa a na dɩ mɩ bɩ wɩɩkala cheye a magɛ dɩ ba kpʋmɛ. Ŋɩɩ nɛ tɩɩ ba chɩchɛ dɩ ba jommi ta. 19Ama Juu tɩŋŋaa bɩ sɛyɛ dɩ ba jommi ta, ŋɩɩ nɛ fʋgɛmɛ mɩ sʋl wombiiŋ dɩ ba kɛmmɛ kaa kɔ kuoru-balɩŋ teeŋ dɩ ʋ diimi sarɩya. Ama mɩ-na bɩ wʋbɔŋ kala kɛnɛ dɩ mɩ bʋl a mʋ tɩgɛ mɩ nɩaa Juu tɩŋŋaa lɛ. 20Ŋ-la nɛ tɩɩ mɩ sɩ mɩ jaŋ nama dɩ la bʋl wɩaa. Ba kɛŋ chɔrʋmɔɔ deemba vɔɔmɛ a tɩŋ nɩɩ-la wɩaa ma Iziral tɩŋŋaa sɩɩ yɩɛlʋ arɩ ʋ jaŋ kɔ lɛ nɛ.” 21Pɔɔl sɩ bʋl ŋɩɩ, ba bʋla pʋ, “La bɩ teŋ kala laa a lɩɩ Judiya tinteeŋ a mʋ tɩgɛ ŋ lɛ. La naambiiriŋ kʋbala ma bɩ lee-la lɩɩ kʋ bʋl wʋbɔŋ a tɩgɛ ŋ lɛ. 22Ama la jɩma arɩ lee-na kala nɩaa yie bʋbʋl wʋbɔŋŋɔɔ a mʋ tɩgɛ Wɩɩchʋɔlɛ wombii-la ŋ sɩɩ to lɛ nɛ. Ŋɩɩ nɛ tɩɩ la chɩchɛ dɩ la nɩɩ wɩalɩŋ ŋ sɩ laa dii.”
23Ŋɩɩ nɛ ba hɛ tapʋlʋŋ pɩ Pɔɔl. Tapʋlɩɩ-la sɩ yie, nɩaa yʋga a kɔ lee-la Pɔɔl sɩɩ jʋʋ. Pɔɔl bʋl Wɩa kuorii-la wɩaa a pɩpɩba sɩɩfɩɛsɩŋ a lɩɩ chʋchʋɔŋ kala a kaa mʋmʋ dɩdaanɩŋ. Ʋ karɩmɛ wɩalɩŋ Mosis fa sɩ ŋmʋnsa bil dɩ nɩaa tuto, arɩ wɩalɩŋ Wɩa wʋlaabʋllaa fa sɩ ŋmʋnsa bil Wɩa teniŋ tʋɔŋ. Ʋ dagɛba ŋɩɩ a bʋl Yesu wɩaa pɩba, a wʋwalɩmɛ dɩ ba laa Yesu wɩaa dii. 24Nɩalɩŋ sɩ nɩɩ wɩalɩŋ ʋ sɩ bʋla, ba dɔnsʋŋ laa dii, dɔnsʋŋ ma bɩ laa dii. 25Wɩaa deemba nɛ Pɔɔl bʋl, ka ba kɛŋ wɩaa lɛrɛ dɔŋɔ lɛ a sii viiri. Ʋ bʋla pɩba, “Wɩalɩŋ Wɩa Dɩŋ-zɔmʋŋ fa sɩ to Wɩa wʋlaabʋlla Azaaya lɛ ʋ bʋla pɩ ma naabalɩmaba, ba ŋaa wʋtɩtɩɩba nɛ. 26Ʋ sɩ,
‘Mʋ nɩaa deemba teeŋ a bʋla pɩba:
Ma jaŋ jegile nɩnɩɩ wɩaa aŋ bɩ jaŋ kɔ dɩ ma jɩŋ ba bʋbʋɔŋ.
Ma jaŋ nɩna wɩaa aŋ bɩ jaŋ kɔ dɩ ma jɩŋ wɩɩ-la sɩɩ ŋaa,
27bɛɛ wɩaa nɩaa deemba tʋɔŋ dolie,
ba tɔ ba dɩgɩlaa nɛ dɩ ba sɩ́ wɩɩ nɩɩ.
Ba kɛŋ ba sɩaa ma tɔ nɛ dɩ ba sɩ́ kʋŋkala na.
Dɩ ŋɩɩ dee, ba sɩaa fa jaŋ nɩna,
dɩ ba dɩgɩlaa ma fa nɩnɩɩ wɩaa.
Ba nyuŋ ma fa jaŋ jɩjɩŋ wɩaa bʋbʋɔŋ.
Ba fa jaŋ bɩrɩma tomi
dɩ mɩ ŋaa dɩ ba duori.’ ”
28Ŋɩɩ nɛ Pɔɔl bɩra bʋla pɩba, “Ʋ maga dɩ ma jɩŋ arɩ ba bʋl Wɩa wʋzɔmɔ-la sɩ laa nɩaa tɩta a pɩpɩ nɩalɩŋ sɩ bɩ Juu tɩŋŋaa ŋaa nɛ. Ba jaŋ jegile nɩɩ.” 29Pɔɔl sɩ bʋl wɩaa deemba dɛrɛ, Juu tɩmma-la kɛŋ wɩalɩŋ lɛrɛ sɩɩfɩɛsɩŋ, a sii viiri.
30Pɔɔl hɔŋ Rom lɛ jɩsɩŋ balɩa, a laa dɩa a jʋjʋʋ. Nʋʋ na-kala sɩ kɔ dɩ ʋ naʋ, ʋ yie kɛnʋ woruŋ nɛ. 31Ʋ bʋl Wɩa kuorii-la wɩaa a pɩ nɩaa, a dagɛ La Tɩɩna Yesu Kirisito ma wɩaa arɩ nyuduoŋ a pɩ nɩaa. Nʋʋkala fa bɩ ʋ tɔ dɩ ʋ sɩ́ ŋɩɩ ŋaa.
လက္ရွိေရြးခ်ယ္ထားမွု
Tɩntɩŋŋaa 28: SIS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Ghana Institute of Linguistics Literacy and Bible Translation 1984, 2014