Ɛ̍sɔ̍dɔ̍ɔ̄ 2
2
A̍ vīōlɔ᷄ŋ Mūu̍sē wo̍ o̍kɔ̄ɔ̄
1Mi̍ ī yɔ̄nu᷄ŋ a̍ te̍le̍ŋ ko̍ŋ, mi̍ po̍ pi᷅lɛ̍ fūlāa̍ o̍ pūlāle̍ Līva̍īya̍ chōo̍ mbo̍ chūā la̍nɔ̍ɔ̍, ndu̍yɛ̍ la̍nɔ̍ o̍ chūa̍ ho̍ō wo̍ bɛ̍ɛ̍, o̍ pūlāle̍ pi᷅lɛ̍ lēŋ chōo̍ ko̍ni̍ ndu̍ o̍o̍ fu̍la̍ ni̍. 2Ndu̍yɛ̍, mi̍ chūa̍a̍ ho̍ō ō chūā yo᷄llo̍ mbo̍ vīālū pōo̍. Mɛ̄ɛ̍ chūa̍a̍ ho̍ō chē mɛ̄ɛ̍ pōo̍mbɔ̄ ndɔ̄ɔ̍ ho̍ō ō na᷄ŋ yɛ̍, mbo̍ vīāŋ ndu̍ yɔ̄ŋi̍ nda̍ a̍a̍ di̍i̍ ndu̍. Pāŋgo̍ŋ ŋ̄ ŋgāa̍ ō wa̍ ndu̍ o̍ bā ō vīāŋāā. 3Kɛ̍ mɛ̄ɛ̍ pāŋgu̍ŋ ŋgāa̍ mu̍ŋ ŋ̄ hīo̍u̍, mbo̍ chā māā ō nɔ̍lā lɛ̍ mbō vēŋ pōo̍mbɔ̄ɔ̍ ho̍ō le̍, o̍ ko̍ŋ mbo̍ chūā kāmbɛ̍i̍ nda̍ lɔ̄ a̍ tɛ̄i̍ yo̍, mbo̍ hōlī hōlī ma̍ŋga̍a̍ lēni᷄ŋ. Mbo̍ yīkpā ndu̍ nyɛ̍ kɛ̄ndɛ̄ tɔ̍lɔ̄kɔ̍ yɔ̄ŋi̍ mɛ̄ŋnda̍ŋ mā lūɛ̍i̍ le̍ni᷄ŋ. O̍ ko̍ŋ, mbō chūā pōo̍mbɔ̄ɔ̍ ho̍ō mbo̍ wōū ndu̍ o̍ kāmbɛ̍i̍ ko̍ŋ ni᷄ŋ. Mbo̍ chūā kāmbɛ̍i̍ ka̍lāa̍ mbo̍ kɔ̍ kɛ̍sī ndu̍ o̍ Pīo̍o̍ Na̍īl kɔ̍ŋgɔ̍ o̍ bīl bɛ̄ndōo̍ ni᷄ŋ. 4Mi̍ yēmāa̍ pōo̍mbɔ̄ɔ̍ ho̍ō sīm ti᷄ŋ la̍nda̍ŋ mbo̍ wā mɛ̄ŋgɛ̄lāa̍, le̍ mbō sīna̍ nyɛ̍ wa̍ yɔ̄nɔ᷄ŋ a̍ yēma̍ ndɔ̄ wo̍.
5Mi̍ ī yɔ̄nu᷄ŋ mi̍ māsā bɛ̍ndōo̍ I̍chi̍pī chūā ndɔ̄ɔ̍ kūā pūlɔ᷄ŋndo̍ o̍ pīo̍o̍ ho̍ō. Te̍le̍ŋ o̍ wa̍ pūlɔ᷄ŋndo̍ wo̍, mi̍ bu̍ɛ̍i̍yāā ndūāā la̍a̍ndūa̍a̍ nda̍ kūā pīo̍o̍ dēmūllo̍. Chūa̍a̍ ho̍ō lo̍ pūlɔ᷄ŋndo̍, mbo̍ chā kāmbɛ̍i̍yo̍ o̍ bīllo̍ ni᷄ŋ. O̍ ko̍ŋ, mbo̍ vīām chūā bu̍ɛ̍i̍ wa̍ ndu̍ īkɛ̄i̍ yo̍ le̍ mbo̍ kɔ̍ chu̍ā kāmbɛ̍i̍ ko̍ŋ. 6Mɛ̄ɛ̍ chūā bu̍ɛ̍īyo̍ ho̍ō hīŋ a̍ kāmbɛ̍i̍yo̍, mi̍ māsā bɛ̍ndōo̍ chūā ndɔ̄ɔ̍ kūmbī kāmbɛ̍i̍yo̍ ho̍ō. O̍ ko̍ŋ, mbo̍ chā pōo̍mbɔ̄ɔ̍ īhīni̍ le̍ni᷄ŋ, ō wa̍ cha᷄ŋndo̍. Mi̍ nyīɛ̍ɛ̍ye̍ bīī ndu̍. Mbo̍ dīmī āā, “Hi̍būlūi̍ya̍, chɛ̄lɛ̄kpɛ̍ ndāa̍ cho̍ ho̍ō ni̍.”
7O̍ ko̍ŋ, mi̍ yēmāa̍ pōo̍mbɔ̄ɔ̍ ho̍ō kūā nāa̍ māsā bɛ̍ndōo̍ chūā ndɔ̄ɔ̍ ho̍ō chūā. Mbo̍ kɔ̍ nyu̍nā ndu̍ āā, “I̍ kɔ̍ mī kɔ̍ ve̍e̍lūl nu̍m wāŋ lāāndūāā Hi̍būlūi̍ya̍ ō pi᷅lɛ̍ mā hu᷄ŋ kē ndu̍ chɛ̄lɛ̄kpɔ̍ɔ̍ ho̍ō mbō mānda̍l nu̍m ndu̍?”
8Mi̍ chu̍a̍a̍ chɛ̄l āā, “E̍ī, kɔ̍ mā kɔ̍ ve̍e̍lūl la̍ ō pīlɛ̍.” Mi̍ chūāāmbɔ̄ɔ̍ kūā mbo̍ kɔ̍ ve̍e̍lu̍ kālāa̍ pōo̍mbɔ̄ɔ̍ ho̍ō. 9Mɛ̄ɛ̍ pōo̍mbɔ̄ɔ̍ ho̍ō ka̍la̍ ndɔ̄ hi᷄ŋ, mi̍ māsā bɛ̍ndōo̍ chūā ndɔ̄ɔ̍ dīmūl ndu̍ āā, “Ā chē chɛ̄lɛ̄kpɔ̍ɔ̍ ho̍ō mā kɔ̍ ma̍ndāl la̍ ndu̍. I̍ cho̍ nūm wā pāāwāa̍.” O̍ ko̍ŋ, mi̍ wāna̍ chi̍o̍o̍ ho̍ō chūā pōo̍mbɔ̄ɔ̍ ho̍ō mbo̍ kūā a̍ ndu̍. 10Mɛ̄ɛ̍ pōo̍mbɔ̄ɔ̍ ho̍ō su᷄l mbo̍ yɔ̄nu᷄ŋ ti᷄ŋ so̍ko̍lo̍, mi̍ ka̍la̍ ndɔ̄ chūa̍ ndu̍ mbo̍ kūā a̍ ndu̍ nāa̍ māsā bɛ̍ndōo̍ chūā ndɔ̄ɔ̍ chūā. O̍ ko̍ŋ, mi̍ māsā bɛ̍ndōo̍ chūā ndɔ̄ɔ̍ ho̍ō ō chūā ni̍ko̍ pōo̍mbɔ̄ɔ̍ ho̍ō māā po̍ ndɔ̄. Mbo̍ dīmī āā, “Pōo̍mbɔ̄ɔ̍ ho̍ō o̍ pēēlo̍ ya̍ so̍li̍ ndu̍ ni̍. Le̍la̍ŋ, dīōlā ndɔ̄la̍ŋ la̍ cho̍ ni̍ āā, ‘Mūu̍sē.’ ”#2:10 Mūu̍sē: Dīōla̍ŋ nda᷅ŋ lā vēla᷅ŋ a̍ dīōm māHi̍būlūi̍yo̍ āā, “Sōlīo̍o̍.”
Mūu̍sē nya̍a̍nu̍ŋ o̍ lɛ̄ŋndē Mi̍dīāŋnde̍ŋ ni᷄ŋ
11Mi̍ Mūu̍sē o̍ hi̍ndū mbo̍ sīmnu᷄ŋ la᷅ŋu̍nɔ̄ kālā. Pāa̍le̍ pi᷅lɛ̍, mbo̍ kūā wānāā ndūa̍a̍ yīlɔ̄ɔ̄. Nda̍ yɔ̍nūŋ ni̍ māā Hi̍būlūi̍ya̍. O̍ ko̍ŋ, mbo̍ chā mɛ̄ɛ̍ nda̍ chō wānāā ndūa̍a̍ wa̍lta̍ ka᷅lā ka᷅la̍ŋ kīo̍o̍ le̍ tōsāa̍ yɛ̍. Mbo̍ chā vɛ̄lɛ̄ mi̍ I̍chi̍pīnɔ̄ɔ̍ ō wā Hi̍būlūi̍nɔ̍ɔ̍ lɔ̄ɔ̍. 12Mi̍ Mūu̍sē mɛ̍ɛ̍ndīa̍ŋ nya̍lākū nyālākū o̍ chi̍ wa̍nā le̍. O̍ ko̍ŋ, mbo̍ dīī I̍chi̍pīnɔ̄ wa̍ ko̍ŋ Hi̍būlūi̍nɔ̍ɔ̍ lɔ̄ɔ̍ wo̍, mbo̍ chɔ̄ ndu̍ o̍ si̍o̍ōŋnde̍ ni᷄ŋ. 13Dīi̍mā ndɔ̄ɔ̍ o̍ pīlɔ̄ɔ̍, mi̍ Mūu̍sē mi̍i̍ŋgū vɛ̄lɛ̄ nāa̍ wānāā ndūa̍a̍ chūā. Mbo̍ chā Hi̍būlūi̍ya̍ nda̍ ŋīɔ̍ɔ̍ŋ ā wa̍ sɔ̍ŋgɔ̄ɔ̍. Mbo̍ dīmūl ō ndu̍ o̍o̍ nɔ̍ di̍ le̍ wo̍ āā, “Vɛ᷅ ma̍ wā chāa̍ŋ nūm Hi̍būlūi̍nɔ̍ɔ̍ lɔ̄ɔ̍?”
14Mi̍ pōo̍ lō o̍ ko̍ŋ, mbo̍ dīmūl ndu̍ āā, “Nɛ̄ɛ̍nɛ̍ kɛ̍si̍ yɛ̄ nu̍m nāa̍ chōo̍ wa̍nā ba̍nā, mbo̍ sīīŋgūū nu̍m wāna̍ kɔ̍ɔ̍sā a̍ na̍a̍ wo̍? Bāā a̍ ye̍e̍ma̍ mā dīī ya̍ mɛ̄ɛ̍ ŋ̄ dīī chīɛ̍i̍ I̍chi̍pīnɔ̄ ko̍ŋ yɛ̍?” Mɛ̄ɛ̍ Mūu̍sē tu̍e̍i̍ nyɛ̄ pōo̍ ho̍ō ō dīmī wo̍, mi̍ sīōōŋnde̍ bīī ndu̍, mbo̍ yīya᷄ŋ māā, wāŋnda̍ kɛ̄ɛ̍ si̍nā a̍ sūɛ̍i̍ he̍ī o̍kɔ̄ɔ̄ le̍. 15O̍ ko̍ŋ kɔ̍ɔ̍lī, mɛ̄ɛ̍ Māsāa̍ I̍chi̍pī tūe̍i̍ a̍ nyɛ̄ Mūu̍sē to̍sa̍ ko̍ŋ ndo̍ o̍kɔ̄ɔ̄, mbo̍ kɛ̄ɛ̄sīāā le̍ Mūu̍sē dīyɔ̄ɔ̍. Kɛ̍ mi̍ Mūu̍sē nya̍a̍nu᷄ŋ o̍ lɛ̄ŋndē Mi̍dīāŋnde̍ŋ ni᷄ŋ.
16Pāa̍le̍ pi᷅lɛ̍, mi̍ Mūu̍sē kɔ̍ cha᷅l o̍ so̍o̍ŋ māmɛ̄ŋndo̍ īkɛ̄i̍. Ndu̍yɛ̍, po̍ pi᷅lɛ̍ wa̍ o̍ lɛ̄ŋndē lēŋ ni᷄ŋ dīōla̍ŋ āā, Chɛ̍tu̍lō, wānā so̍līāā lāsa̍lāa̍ o̍ wa̍ ni̍. Ndu̍ o̍o̍ nɔ̍ chūāūwāā lāāndūa̍a̍ ā ŋɔ᷄mmɛ̍ū. Mi̍ ī yɔ̄nu᷄ŋ mi̍ chūāāmbūa̍a̍ ha̍ā kūā o̍ so̍o̍ŋ māmɛ̄ŋ kōŋ, le̍ mɛ̄ŋnda̍ŋ kɔ̄ndɔ̄ɔ̍ le̍ dɔ̄wɔ̄ɔ̍ o̍ nyɛ̄ nda̍ dōū chūīŋnda̍ a̍ sāa̍ fi̍nyā ndāa̍ mɛ̄ŋnda̍ŋ ndo̍ ni᷄ŋ. 17Kɛ̍ mi̍ wānāā māndāā lāsāa̍ ā pūm ā hūŋ, ma̍ hu᷄ŋ to̍ū chūāūwāā Chɛ̍tu̍lō wa̍. O̍ ko̍ŋ, mi̍ Mūu̍sē su̍ŋgū le̍ nda̍. Mbo̍ mālā nda̍. Mbo̍ kōndūl nda̍ mɛ̄ŋnda̍ŋ le̍ chɔ̄lūāā ndāa̍. 18Mɛ̄ɛ̍ nda̍ mīīŋgu̍ chi̍e̍e̍, mi̍ Chɛ̍tu̍lō#2:18 Chɛ̍tu̍lō: Dīōlā ndɔ̄la̍ŋ lā pīlɛ̍ la̍ŋ la̍ wa̍ ni̍ āā, “Lu̍e̍yūɛ̄ɛ̄.” fi̍nyā ndā nyu̍nā nda̍ āā, “Lā vɛ᷅ hāū ke̍lēŋā hūnɔ̄ɔ̍ ho̍ō?”
19Ma̍ dīmūl ndu̍ āā, “Fi̍nyā I̍chi̍pīnɔ̄ pi᷅lɛ̍ ma̍la̍ na̍a̍ ni̍. Mɛ̄ɛ̍ na̍a̍ ŋ̄ kūɛ̄, mi̍ wānāā māndāā lāsāa̍ pūm ā kɔ̍ to̍ū na̍a̍. Kɛ̍ mi̍ fi̍nyā kōŋ sūŋgū le̍ na̍a̍. Ndu̍ ko̍ni̍ bɛ̍ɛ̍ ko̍ndu̍l chɔ̄lūāā nāa̍ mɛ̄ŋnda̍ŋ ni̍.”
20Mi̍ Chɛ̍tu̍lō fi̍nyā ndā nyu̍nā nda̍ āā, “Ɔ̍ɔ̄ po̍ ka̍lāa̍? Vɛ᷅ lā hi᷄ŋ nya̍ nda̍ā le̍? Lā kɔ̍ mī lā kɔ̍ ve̍e̍lū ndu̍ mī ŋ̄ hu᷄ŋ di̍o̍nūŋ nyɛ̄ dīa̍a̍ na̍a̍ nda̍ā la̍tu̍lu̍.”
21O̍ ko̍ŋ, ma̍ kɔ̍ ve̍e̍lū Mūu̍sē. Ndu̍yɛ̍ mi̍ Mūu̍sē hi̍nī kɔ̄l le̍ mbō wa᷄ Chɛ̍tu̍lō o̍ bɛ̄ŋgu̍ cho̍o̍. O̍ ko̍ŋ, mi̍ Chɛ̍tu̍lō ke᷅ Mūu̍sē chūā ndɔ̄ɔ̍ ō pi᷅lɛ̍ dīōla̍ŋ āā, Sīpo̍o̍lūā, le̍ mā cha᷄l nda̍ ndu̍ o̍ nɔ̄ɔ̍ ni᷄ŋ. 22Mɛ̄ɛ̍ Sīpo̍o̍lūā chūa̍ yo᷄llo̍, mbo̍ vīlūl Mūu̍sē pōo̍. O̍ ko̍ŋ, mi̍ Mūu̍sē dīmī āā, “Mīāllo̍ ya̍ I̍ cho̍ o̍ lɛ̄ŋnde̍ŋ nde᷅ŋ ni᷄ŋ ni̍. Le̍la̍ŋ, I̍ cho̍ po᷄ nu̍u̍ ho̍ō dīōla̍ŋ kē āā, ‘Kɛ̍ɛ̍sīɔ̄m.’ ”#2:22 Kɛ̍ɛ̍sīɔ̄m: Dīōla̍ŋ nda᷅ŋ, lā vēla᷅ŋ a̍ dīōm māHi̍būlūi̍yo̍ āā, mīāllo̍, ɔ̄ɔ̄ wāna̍ lēkāa̍.
23O̍ ko̍ŋ kɔ̍ɔ̍lī, mɛ̄ɛ̍ wɔ̄sīlā fāŋgā lā hīo̍u̍, mi̍ māsā bɛ̍ndu̍ wa̍ o̍ lɛ̄ŋndē I̍chi̍pīle̍ŋ ni᷄ŋ ndo̍ ō wū. Kɛ̍ wāŋnda̍ I̍chi̍pī ā wa̍ wɔ̄ hīōūwɔ̄ɔ̍ lāchī a̍ wāŋnda̍ I̍sɔ̄lūɛ̄ī nyɛ̄ pālāa̍ tūsīo̍o̍ chōo̍, mā bīī nda̍ bīyɔ̄ɔ̄ lēchīɔ̍ɔ̍. O̍ ko̍ŋ, mi̍ wāŋnda̍ I̍sɔ̄lūɛ̄ī a̍ wa᷅ kōŋu̍llo̍ nāa̍ Mɛ̄lɛ̄ka̍ chūā le̍ mbō māla̍ nda̍. Ndu̍yɛ̍, mi̍ cha᷄ŋ ndāa̍ fūūlūū nāa̍ Mɛ̄lɛ̄ka̍ chūā. 24Mi̍ Mɛ̄lɛ̄ka̍ tūɛ̄ī pīɛ̄īlē ndāle̍ŋ, mbo̍ lōōnu᷄ŋ a̍ kpe̍ma̍ o̍ yīi̍ nda̍ E̍bīlāha᷅m, a̍ Āa̍se̍, a̍ Che̍kɔ̍pū wo̍. 25Le̍ he̍ī, mɛ̄ɛ̍ Mɛ̄lɛ̄ka̍ chē nyɛ̄ pālāā wāŋnda̍ I̍chi̍pī a̍ wa̍ wānāā ndūa̍a̍ tūsīo̍o̍ chōo̍ wo̍, mi̍ nyīɛ̍ɛ̍ye̍ ī bīī ndu̍ le̍ nda̍.
လက္ရွိေရြးခ်ယ္ထားမွု
Ɛ̍sɔ̍dɔ̍ɔ̄ 2: YM
အေရာင္မွတ္ခ်က္
မၽွေဝရန္
ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Kisi Bible © Bible Society in Liberia, 2015.