Насигьятар 27

1Закурин йигъʼинди тяриф мапӀан,

увуз аьгъдарвуз фу хуруш диди.

2Гъит жарари, хъа уву ваъ, яв тяриф апӀри;

яв ваъ, хъа жарарин ушвни.

3Гъван гъагъиб ву, гъумра пчӀуб дар,

аммаки гьадрартӀан хъа гъагъидар ву ахмакьрин тӀулар.

4Хъял инсафсузуб ву, гъизгъинвал гъурдаъ бисуз шлуб дар,

аммаки жилирин гъанихвалин улихь шилхьан дийигъуз шул?

5Машнаъ ачухъди кӀурур

зина ву ккебехънайи дусттӀан.

6Ккунири зиян апӀуру – марцци кӀваан,

душмни мак апӀуру – иблисвалиан.

7Тухъ гъахьири йиччвра ликриккан апӀиди,

хъа гашди айириз кьутӀкьлибра меэлди гьибгъди.

8Мукьʼан утӀубччву жакьвси,

ву инсанра багъри йишвар дирчну гъушур.

9ЮкӀв шад апӀуру мялгьямарина аьтрари –

гьаци кбалгуру дустран кӀваантӀан вуйи насигьят.

10КӀваълан магьаан я яв дустар, я яв адашдин дустар;

балайикк ккахъган – мягъян багахьлуйирихьна:

зина ву гъунши, багахь гъардаштӀан, ярхлаъ айи.

11Аькьюл ади йихь, жан бай, ва йиз юкӀв шад апӀин,

узхьанра хьибди тувуз жаваб гиран ктапӀдариз.

12Фикирлуйиз харжиб гъябкъиш – кӀул ккадабгъиди,

хъа авамар дидихьна диш дапӀну гъягъиди – хъасин хьиди чиб швумал.

13Чаз аьгъдру касдин буржарихъанди гаф туврурин палатра тадабгъиди,

жарарин хъпирихъди гъахьиризра гьациб хьибди.

14Гьир хьайизра гъуншдин тярифар вари сес идипну апӀуб,

агьрар апӀувалик гьисаб ву.

15Амси йигъан мархьси

ву улхру хпирра;

16думу дерккуб микӀ дебккбак гьисаб ву,

ясана гъурдаъ ччим чӀюбкьювалик.

17Рукь учӀру апӀуру рукьу,

хъа инсандикан инсан ктаура жара инсанари.

18Тартиб апӀрури инжир – йимиш ипӀиди,

чан агъайин гъайгъушнаъ айириз аьгъю хьибди гьюрмат.

19Шидʼан маш рябкъруси,

гьаци инсандиз чан юкӀвра рябкъюра жарарин кӀваъ.

20АбцӀруб дар гъачӀидарин дюнʼя –

гьаци инсандин уларра ацӀрудар дар.

21Баттлиъ арс ебцӀруси ва жаднакк гъизил убччвруси,

гьаци инсан ахтармиш апӀуру тярифнан гафари.

22Ахмакьур кьутаъ гъубччвишра

дяхнихъди сабси, ахмакьʼвал дугъхьан жара апӀуз хьибдар.

23Вари яв марччар увуз са-сабди аьгъюди йихь,

жвуван сюрйирин гъайгъушнаъ йихь;

24фицики гьич саб жюрейин девлетарра гьаммишандиз гъузрудар дар,

тажра насларихьна гьарган гъябгъюри шулдар.

25УкӀ гъеебццу – аммаки магьа хъана чрушин,

дуршвна укӀар хярариан;

26ччилар – увуз алабхьрубдиз,

мудрар – хутӀлихъанди тувру кьимат,

27ккунибкьан цӀигьран никк увуз хурагназ,

яв хизандиз ипӀрубдиз

ва тухъ апӀуз гъараваш дишагьлийир.

လက္ရွိေရြးခ်ယ္ထားမွု

Насигьятар 27: ТабГК

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

Гирами Китаб အေၾကာင္းကို ပို၍ သင္ယူပါ။

Насигьятар 27