Sawmus 86
86
Amnihnan mmanawa nah ka kabimne
1Kiyavwiye Uhokri, timapnanuba hawata kaytwanaba nuwnuh, mmanawa nah ka kabimne. Nah ka aynsima muwaka pis parak abet nuhawkan.
2Amnihnan ariw miyaka, mmanawa nah kamaxwene pivitit! Henewatbaki, uya amnihun, mmanawa nah pibuk! Nah kamaxwa pivit.
3Pis nuwohkiga. Uya amnihun, Kiyavwiye, mmanawa nah priyepkaw ta pit mataytak!
4Kiyavwiye, keh pibuk giyakni batek, mmanawa ta pitnenwa nah iki nuhiyekemni.
5Kiyavwiye, pisnewa kibeyne. Pis hawata bayahminakevutne. Pis kadahan ka aynsima pamnihra gikakkis ku pariye piriyepkewnevwi ta pit.
6Kiyavwiye, timapnaba nuviryepkawni. Timapnaba namnihswan pit.
7Abetnewa nuwakemni nah kabimen pit, mmanawa pisnewa kaytwa nubiman.
8Yuma pahavwinema uhokri kema pisma, Kiyavwiye. Yuma pahavwinema hiya akehka ku pariye pis keh.
9Madikte hiyegviyenevwi ku pariye pikehavan aytanek pivetunatnek, igkis paberetusawnek pitivut. Igkis kabayhanek ini pikiytani.
10Mmanawa pis ka pidatnisima, pis keh barewyevwinenwa annut. Pisnewa Uhokri pahavwiwa.
11Kiyavwiye Uhokri, uya kannuhun amin ku pariye pimawkan nah keh. Nahme ihpanek madikte piwn akak nukamaxwan. Uya kannuhun wew pikak akak madikte nubetki.
12Kiyavwiye nuwohkiga, nah kabayhapnek avititak nuyakni. Hawata nah kinetihwanek avanenekwa amin pikiytani.
13Pis ka aynsima pamnihra nukakuh! Pis ka isaksa nah muhuk ta miyakamnawit.
14Kiyavwiye, nah me kamaxwikamet gavitkis neras hiyegviyenevwi kawantiyavye. Pahabu awaykemni mbayavye igkis aharit nuwmepten, hiyegviyenevwi ku pariye kane timepkere pak.
15Heneme pis, Kiyavwiye, pis amnihka ahawkri. Pis ka aynsima pamnihra hawata ka piyaknisima. Pis hawata kibeyne, pis ka kinisakatruvyema.
16Ivegnaba numkanit akiw hawata uya amnihun! Iki pidatni nuvitit, uya amnihun, mmanawa nah wew kabayntiwa pikak hawata ku samah nnaguh wew pikak!
17Kiyavwiye Uhokri, uya akka nutuh pahat arakak pabay! Nikwe ku pariye namiyhetnivwi igkis marekevwebdinek ku aysaw igkis hiyapnek ku pis ay nukakuh nayavetni hawata pis naydhaptiten.
လက္ရွိေရြးခ်ယ္ထားမွု
Sawmus 86: pluPB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018, Wycliffe Bible Translators, Inc. All rights reserved.