Sawmus 72
72
Piriyepkawka gidahan ikivarat aytwenihpiye
1Kiyavwiye Uhokri, kannuhnaba ner ikivarat adahan ig hiyak akak hiyeg gitaraksankis avigkutavriknawa pihiyekemni waditye. Henewatbaki, kannuhnigba
2kahadbe ig hiyap pihiyegavu kabayntiwa hawata ig avuriw neras madiptavye akak waditka.
3Kahadbe kadahan kabaykanenwa ay avit paytwempu hawata adahan hiyegviyenevwi hiyavak akak waditka.
4Kahadbe ig ikivarat hiyak gikakkis madiptavye akak waditka. Hawata adahan ig ayava neras ku pariye kane aynsima muwaka gitkis. Hawata adahan ig misakkis neras ku pariye hiyapkisne mbeyne gitkis.
5 Kiyavwiye, amawka pihiyegavu kiyathap avanenekwa ku aysaw kamuw aytente ariku en, hawata kayg ayvarihte.
6Kahadbe ner ikivarat wadisasa gihiyegavu gihiyekemnikis hawata ku samah muwok wadisasa wamutra ku aysaw in wayk.
7Kahadbe wadityevwi gihawkankis kabayntiwa ku samah gayivwikis ay amadga inin, hawata gihiyekemnikis karisaw ku samah kayg gayivwi amadga en.
8Gikumadukan danuhnek ariwntak pahambatak parahwokwa danuhte pahambatak akiw hawata in kavusa ariwntak warik Ewfrates danuhte amaksemni waxri.
9Hiyeg ku pariye misakwa ayntehan amadga amatap mabukwanek givetunat, givetunyavume tuwatasawnek gitivut igkis mabukwanek gikihpurit abet wayk atabdabni.
10Ikivaratviyenevwi ariwntak Espanhamnaw akak nopsanyuvwi kewgihribdi igkis kakanhawnek git. Hawata neras ariwntak Arabyamnaw akak Etiópyamnaw.
11Madikte ignes ikivaratviyenevwi mabukwanek givetunat. Hawata madikte hiyegviyenevwi amadga wayk kumadukasawnek git.
12Ig ikivarat amnihnek madiptavye ku pariye amnihswenevwi git. Hawata neras ku pariye muweknevwi gitkis ig ayavigkisnek.
13Ig kayah gidahankis neras mabimnavye hawata neras ku pariye yumanene arikna gimunkis. Ig amnihgikis adahan igkis ka miyap.
14Ig wiwhgikis ariw kinisaka hawata ariw arewhaki; gidehetnikis in ka avigasima git.
15 Kibeyne, ner ikivarat kis adahan ig dahwa ayivwad amadga inin! Ig kis adahan ig ikepka karukri wahano ariwntak Arabyamnaw! Ig kis adahan gihiyegavu piriyepkaw gidahan hewkevye adahan ig Kiyavwiye Uhokri sarayhnenekwa gabay givitit.
16Kahadbe ka muwakti axka ay avit uwaxigwiy. Kahadbe uwaxigwiy misakwa awasvit akak amutribdi adahan egkis sarayhnos ka aynsima guwkis kewa aynte avitbe waxri Libanomnaw. Kahadbe paytwempuviyene misakwa kivunmadave akak hiyeg kewa pamatkabe hiyan amadga amatap.
17Amawka ukivarawiy giw ka miyehkanti. Hawata adahan gikumadukan dahwa ku aysaw kamuw aytente. Hawata amawka madikte hiyegviyenevwi ayepnekuye kabayka git Kiyavwiye Uhokri adahan igme iki kabayka gitkis. Hawata ku samah ig ikinene kabayka git ikivarat.
18Kabayhanay Kiyavwiye Uhokri, izhaewyenevwi giwohkigakis, mmanawa ignewa hiya akehka madikte ini annut barewye hene.
19Kabayhanay avanenekwa ini giw kane nikiytanisima. Hawata adahan gikiytani kivunsa pahatte niyesri waxri. Henewatbaki! Henewatbaki!
20Ay pisenwa ini giviryepkawni Davi, ku pariye Jesse gikamkayh.
လက္ရွိေရြးခ်ယ္ထားမွု
Sawmus 72: pluPB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018, Wycliffe Bible Translators, Inc. All rights reserved.