Sawmus 69
69
Amnihun, Kiyavwiye, nah me miyamet
Mt 27.33; Lk 23.33; Jo 19.18
1Kiyavwiye Uhokri, amnihnanuba. Mmanawa in ke wotbe nah me aniksewmet ahakwa un, in kuwis danuh nubitamnew.
2In ke wotbe nah uruknene abet ibug mihadnene. Yuma ku kit nah awiyasa nukugkuh. Nah aynte ahakwa un kane amihnisima, nah aniksewnene, amiyanme tarisnene nah.
3Nah uyuhevye kuwis awaku mpiynevevye nah kabiman. Nukuvi madikte aravwip. Nuwtyak ka aynsima mabi awaku tihaki, nah wahepne nuwohkiga ayta amnihun.
4Ignes ku pariye namiyhetnivwi waditnevyenen igkis ka aynsima kibite mpiy nusemni nutewhaya. Nuvetunyavu kinetihwa wasaymakanenwa numinuh. Igkis detyevwinenwa hiyeg. Igkis mpiksaw nuwmepten. Igkis mpiksaptihun adahan nah diyuhkis ku pariye nah kane amevwi.
5Kiyavwiye Uhokri, nuvathawni ka ayamawnema piw. Pis hiyap ku samah nah ka patehwevye piwtrik.
6Kiyavwiye Uhokri Detye, ka ba isaksa neras kamaxwenevwi pivitit mpiyasa maraki nuhawkanavrikma! Pis Izhaewyenevwi giwohkigakis, ka ba isaksa nah maraka neras ku pariye kiyathenevwi piw!
7Mmanawa nubetki pikak keh nah mpiyasa mahivwihka pivatra. Nah awasvit akak maraki.
8Nah kewa pahavwi nawwotunyebe gitkis nukebyuvwi, nah kewa pahavwi kane hiyakanbe gavitkis gikebyuvwi.
9Nah kiyatha Uhokri Givin mpinevevye. Nah ka hiyepkere ariknawnema patahwaki parak atere. Ka sam. Nah amava ta nuvitit madikte ini mahivwihka ku pariye hiyeg awna pimin.
10Nah maxhaw. Nah ikaw tuwatevye. Ignesnewa mahivwihun.
11Nukawihni yuma nikiytani, in he saknenwa. Igkisme hiyapni hene, igkis miyathan.
12Igkisme hiyeg kiyatyevwi awna numinuh amadgew higiwap. Hawata hiyeg uwkiyavu paksabdihun akak mahivwihka.
13Nahme ka aritnema giwkis, Kiyavwiye Uhokri, nah iveg pivititnenwa abet nuviryepkawni pit. Kiyavwiye, uya kaytwa nuwnuh ku aysaw piswa pimawkan, mmanawa pis batek nukakuh ka aynsima. Uya amnihun ku samah pis kuwis ikakse nutuh.
14Ka ba isaksa nah digiswima abet ini kene ibugbe. Uya amnih wiwhun giwakutakis nuvetunyavu, ariw ini miyaka mihadnene kene unbe.
15Ka ba isaka ini kene parawbe hiyuhun. Ka ba isaksa nah digiswima abet amiyan. Ine kawnata isaksa imewti dakerevunma.
16Kiyavwiye Uhokri, uya kaytwa nuwnuh, mmanawa pis kibeyne. Ka aynsima batekka pimun. Uya parak abet nuhawkan, mmanawa pis ka aynsima pamnihra.
17Ka ba ayamwa giw pibuk. Kaytwanaba nuwnuh kuri, mmanawa nah ka aynsima wakaymni.
18Ba ayta, uya amnihun! Uya wiwhun giwakutakis nuvetunyavu!
19Pis hiyap madikte neras nuvetunyavu. Pis hiyak ku samah igkis mahivwihun. Hawata pis hiyak ini maraki ku pariye nah mpiyasa gihawkanavrikkis.
20Ini mahivwihka kiyimwihpen yuma hene akiw. Nah wahep ba ay hiyeg ku pariye amnihun, heneme waditnevyenen. Nah wahep ba ay hiyeg ayta adahan aydhan, heneme nah ka uti pahavwinema.
21Ku aysaw nah mativwevye, igkisme ike nutuh iveyti pahaywotniye. Ku aysaw nah arabyuvye un, igkisme ike nutuh win suwiyweye.
22Gitkis neras nuvetunyavu ku pariye hiyapkisenevwi inin mbeyne nutuh, igkis kuwis matekevun. Kurinewa igkis kehnes fet akak madikte gibetkis. Bawa igkis ka matakannek. Ini ku pariye kabay gitkis innewa hiyapkisnek mbayka gitkis adahan gibiykaseptenkis.
23Kiyavwiye Uhokri, uya motsevgikis! Uya pisenwa akak gidatnikis!
24Hiyapkisnaba gitkis ini pidagoni ku pariye kene tiketbe.
25Kehnaba givinbetkis misakwa barewarik, yuma pahavwinema hiyeg misekwene ayge.
26 Mmanawa igkis ka amnih hiyeg ku pariye huwivwihka. Kawk, igkis ivegva hiyeg ku pariye pis isaksa hiyap mbeyne adahan giwmeptenkis. Hawata igkis hiyaraptihpigkis awaku ku samah igkis hiyepne ini mbeyne.
27Hiyapkisnaba gitkis ku samah gitaraksankis; igkis ka kis adahan pis amnihgikis aynesnima.
28Igkis kis adahan pis mankise giwkis amadgatak kagta adahan dehetniki. Igkis ka kis adahan giwkis tamaka ku kiney hiyeg wadityevwi giwkis tamak.
29Nah ay kivun akak wakaymniki hawata akak kadniki. Kiyavwiye Uhokri, uya kannikasan; uya amnihun!
30Nahme paksanek piw akak avat. Nah kabayhanek pikiytani akak madikte nubetki.
31Ini ta pit in kabaytenek ariw ku nah kakanhewne pit akak pahavwi pak barewvitnene.
32Ayge nikwe ku aysaw hiyeg wakaymniyevwi hiyapnek ini igkis bateknek giminkis ka aynsima. Igkisme hiyeg kiyathenevwi Kiyavwiye Uhokri igkis batekenek ginaktinkis.
33Mmanawa ig Kiyavwiye Uhokri timap neras ku pariye yumanene arikna gidahankis hawata ig kaytwanek gihiyegavu giwnkis neras ku pariye kene aynte ariku parakseketbe abet kayahwaki.
34Kabayhanabay Kiyavwiye Uhokri, yis waxri akak inurik, yis parahwokwavyene akak madikte ku pariye ariknaviyene ay yivit!
35Ig amnihnek gihiyegavu avitya Jerusalem. Hawata ig kehnek akiw paytwempuviyene avit Judamnaw. Gihiyegavu misakwanek ayge avit ini waxri ikaksaki gitkis, inme misakwa gidahankis adahan avenenekwa.
36Igkis Kiyavwiye Uhokri gibukvig misakwanek ayge nivit. Madikte igkis ku pariye batekyevwi gikak misakwanek ayge avanenekwa.
လက္ရွိေရြးခ်ယ္ထားမွု
Sawmus 69: pluPB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018, Wycliffe Bible Translators, Inc. All rights reserved.