Sawmus 50
50
Kiyathaki ku pariye Uhokri amava
1Kiyavwiye Uhokri ku pariye kane gidatnisima ig humak gimkanit madikte hiyegviyenevwi ku pariye misekwenevwi amadga hawkri, ku samah niyesri inin waxri.
2Ig Kiyavwiye Uhokri hiyapkis gikiytani gitkis kewa abukribe ku pariye hamahwa aytontak avititak Jerusalém, paytwempu barewvitye hawata barewye.
3Ig uwohkigawiy nehmnik. Ig ka ayta tinworima. Gavitkig ayta paha tiket ku pariye pisenwevye akak madikte amadgaya inin hawkri. Ig ayta akak ka aynsima kamaygviye ganwa.
4Ig awnase madikte hiyeg inurikyenevwi payak gikakkis madikte hiyeg amedgenevwi inin adahan igkis humewnes gawnevevu gitivutkis gihiyegavu.
5Ig awna: “Pahadguhnay madikte nuhiyegavu ku pariye kamaxwenevwi nuvitit, neras ku pariye kuwisnene ahegbetnene nukakuh, mmanawa igkis kuwis ekke gitkis hiyeg ku igkis ikewnevwi nutuh.”
6Igkis inurikyenevwi hiyapni gihiyegavu hene, igkis awna ku Kiyavwiye Uhokri ig waditye, igwa kuri gihiyvetnikis gihiyegavu.
7Kuri avim inin ig Kiyavwiye Uhokri awna wotwiy, giwn: “Timapnay, nuhiyegavu, ku pariye nah awnene kuri yit. Nah akkite yit, izhaewyenevwi, ku pariye muwekne yit adahan yis misakwa avigkutavrik ku samah numawkan. Nahnewa Kiyavwiye Uhokri yiwohkiga.
8Yis yibetki kakanhaw puwikne nutuh, yis bukah puwikne pahavwite nuvetunat. In kabay. Nah ka himahyi avatra inin.
9Heneme ka innema yikan pak nutuh huwit avigkutavrikut ku samah numawkan. Nah ka muwaka pahavwinema yivig pak. Nah kawnata muwaka pahavwinema yivig kabrit.
10Mmanawa madikte puwiknebdi ahavwikunevwi igkis kuwis nudahan. Hawata madikte pak ku pariye misekwenevwi muwapuw waxribdiw.
11Madikte kuhivraviyenevwi ku pariye misekwenevwi avit waxri egnes nudahanekuye. Hawata madikte ku pariye misekwenevwi kariymadga.
12Wake nah mativwebe numinuh, nah ka ayapkam yit. Mmanawa madikte inin waxri in kuwis nudahan payak akak madikte ku pariye misekwenevwi nivit.
13Mmah yis ka hiyak ku nah ka ax pak arih? Hawata kabrit gimig nah kawnata higap.
14Nah aharitne kakanhawka ku pariye ka aynsima kabaytenene. Numawkan yis kabayhan adahan madikte ku pariye nah keh yikak. Ini humaw ke yikanbe nutuh. Hawata numawkan yis ka miniw ariw madikte ku pariye yikaksan nutuh, nah yiwohkiga kane nawaygisima.
15Hawata numawkan yis amnihswa nutuh avim ini ku aysaw yis abet kiyimwiki. Nahme mpithaynek niw. Nikwe yisme kabayhannek.”
16Heneme ig Kiyavwiye Uhokri awna nawenyewa hiyakemniki gitkis hiyeg ku pariye kane wewnevwima gikak. Giwn: “Mmeneki yit yis kinetihwa amin nukumadukan waditnevyenen? Mmeneki yit yis ayap nutuh inin kabayka ku pariye nukaksan gitkis nuhiyegavu?
17Yis ka muwaka nah bukih yitaraksan yiw. Yis ka ihpekere nuwnuh.
18Ku aysaw yis patiptak gikak pahavwi amepye yis tuguhkis yihiyekemni hehpekuye gikak. Hawata yis darihwak gikakkis hiyeg powkemnavye.
19Mbaykanenwa pes yibiyaptak. Yis kawih yibiy adahan kiniseknenwa.
20Yis yibetki wasaymaw gidahankis yikebyuvwi. Yis awna mbeyviyenenwa iwit giminkis.
21Yit nah ka aritnama ku aysaw yis kehne ini mbayka. Yivewkan ku nah hawata ke yisbe. Heneme kuri nah akatiwnihpitni yit. Nah kiyekisne yit madikte yitaraksan.
22Timapnay inakni nuwnuh kuri, yis ku pariye numyehpitnivwi, kahadbe nah ka pisenwepma yikak akak madikte nudagoni. Mmanawa ayteke yuma pahavwinema hiyeg hiya yamnihka.
23Pahavwi ku pariye kabayhan, igi ke wotbe ig kakanhewnebe nutuh. Inineki kiyathasan. Ku pariye hiyeg wewnevwi akak nuhiyekemni hene nah amnihgikisnek. Nah ka miyehgikisnek. Henewatbaki in.”
လက္ရွိေရြးခ်ယ္ထားမွု
Sawmus 50: pluPB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018, Wycliffe Bible Translators, Inc. All rights reserved.