BOTHUBO 41
41
Josef no Farao Samo kiqi Pitsu
1Ampe kinia thiu Farao no asamo lakhi pumoe ike paye Nayil ghoki philo puthugho aghie. 2Ike aghoki lono amshiqu ajukivi eno athapubeike tsuni ipeghi no amtuni muza chuae. 3Tile amshiqu kutau tsuni aghoki lono ipeghie, tipaqoye aghikumsayi eno jusamitheyike. Tipaqono aghoki mukulo amshiqu kutauqo phivilo ighieno puthughove. 4Tishieno athapubeikeu tsuni hu munove. Ikehu Farao ye zuida ithughive. 5Pano zuhuve eno itaghi asamo akiniu pumoe. Ike aghipe tsuni abo lakhi lono ipeghi aghi eno tipaqoye chhikhoyi eno nimzuyi ae. 6Ikelo aghipe tsuni ichikhoi eno asayeli kulu mulhu no fukighiyive keu ghi lhoipeghie. 7Ichikhoi keu ghipe tsuni huno chhikhoi eno nimzuyi akeu ghipe tsuni hu munove. Farao no zuida ithughi kelo tiye asamo shi aghive. 8Inaqhe Farao ye amlo ighono kunachope auve ikehu Ijip yeghilo kuduumi eno alokutsumi kumtsu kusaghipe. Farao no panongu vilo pa samo lhe ikemu khuu nomu tipaqo kiqi hepho pesu pa tsumlave.
9Tileno Farao khu ajukhu kipeu atouno pi, “Ishino ino pimipuakeu kumsulu anie. 10Ghuthu lakhi Farao no pa qemi shou aloghu ideveno pano asho kumla atou ngo ikujo kughape kukaki ghukhemi shou keptein shichekeuno kilo akughushipeke. 11Kijili lakhi ikujo kinikujo asamo pumoe. Ikujo pututa shelo kututa kiqi akeu shighi pumoe. 12Ike tilehi Ibrimi apumi lakhi ikujo gholo ae, paye kukaki ghukhemi shou keptein qeuke, pavilo ikujo samo lheke. Pano ikujo vilo pututa samo hephopesu akiqi pitsue. 13Pano kishi hephotsu keno tihutoi shive: ipelo puzuu kumlalo sachilewo mlawuvepe eno asho kumlau atouye tsuqhi pithiveke.”
14Tile Farao no Josef kupuwue, ike panonguno akimighishi akughuki lono Josef saipeghi. Pano akutsusa ngo akichimhi miyeve eno aphimini kilive puzu Farao zulo ighi. 15Farao no Josef vilo pi, “Ino asamo lakhi pumo kemu khuu nomu tipau kiqi hephotsu mlano anie. Ivilo oghili pikeuno noye asamo ini puzu tipau kiqi hephotsulu nani pike.” 16Josef no khochile pi, “Ino kumono Alhou no Farao lokughunopu khochiletsu nani.” 17Farao no Josef vilopi, “Isamouno niye Nayil ghoki mukulo puthugho ae, 18ikelauye aghoki lono amshiqu ajukivi eno athapubeikeu tsuni ipeghi no amtu-ni muza chuae. 19Tile tipaqo tikhauno amshiqu tsuni qeyi, aghikumsayi eno jusamitheyike ipeghi. Lhoksakugha titoikeu Ijip yeghiqhalo khilemu niye ithumla aphie. 20Aghikumsayi keu amshiquqono atughiu athapu-beyikeu mishiqu tsunihu muno veche. 21Panonguno tipaqo munove namu panonguno tipaqo muno veakepi khunomu ithi moe, kughengu panonguye atughulo toi jusamitheyike. Tileno ino ida ithughiveke. 22Ino itaghi zuhu kelauye, isamouno aghipe tsuni abo lakhi lono ipeghi keu ithulue, tipaqoye chhikhoi eno nimzuyi ae. 23Tipathiu aghipe tsuni ichikhoi eno asayeli kulu mulhuno fukighiyive keu ghi lhoipeghi. 24Aghipe ichikhoi keqono chhikhoi keu ghipe tsuni hu munoveche. Ino hipau kuduumi vilo pi kemu khunomu tipa kiqi hepho itsumlae.”
25Josef no Farao vilo pi, “Farao samo huye aphiphi kena. Alhou no paye kiu shiniye kuto ani keno Farao vilo pive anike. 26Athapubeyi keu mishiqu tsuni ye ampe tsuni ke eno chhikhoi keu ghipe tsuni hu ghi ampe tsuni ke. Ti asamoye aphiphike. 27Aghikumsayi eno jusamitheyi keu mishiqu tsuni athiuno ipeghikeu hughi ampe tsuni ke, eno asayelikulu mulhuno fukighiyive keu ghipe tsuni huye ampe tsuni puqumiyeni keu ke. 28Ino Farao vilo piveano, Alhou no paye kiu shiniye ani keno opiye anie. 29Jualo, Ijip yeghiqha kumtsulo ampe tsuni shishe nibonilei nani. 30Tipathiu, ampe tsuni puqumiye nani, eno Ijip yeghiqha kumtsulo nibonilei keu kumsumaqhoive nani, eno puqumiye keuno aghakhu pitipuzaqhi nani. 31Aghakhulo nibonileyi keuye kiu kela mutha mitheve nani, kughengu puqumiye tipau ighiniye akeu huye shishe ihulo kumsapu kehue. 32Farao no ghuthu kini pumoide keu kiqi huye tipau shini putsakeu shi ghi Alhou no kughuva, eno kushuwa womono Alhou no ti ighipeni chenie.
33“Ike itehino Farao ye tsaqutsaleyi kemi eno alokutsumi lakhi phusawo Ijip yeghi peitha luvepe kepue. 34Farao no hi shikepue, aghakhu kumtsulo kijemi su supe qhino hi ampe tsuni nibonileyi ke dolo tuxatini ipeghikeu kikije pungulo lakhi qhakutsu pelo. 35Panongu pelo kinikulu mipe chekeu dolono achuqupu kumtsu qhakutsu pelo, Farao qholono athi pekutsu pesu aphughiqolo pekutsupe qhipelo eno ti kheluve pelo. 36Achuqupu tipaqoye ampe tsuni puqumiye ighikelo sala shi pekike kepue, tishianguno puqumiye kelo Ijip lo akemiye thimo nani.”
Josef Ijip lo Ayehkipeu Shi
37Avehu hipau Farao zulo eno pa qholo ampemiqo zulo aloqhiyi ithuluve. 38Farao no pa qholo ampemiqo vilo iniju, “Alhou nguagha palolo kuami khileno timi hitoi ke ninguye phukulupu kya?” 39Ikehu Farao no Josef vilo pi, “Alhou no hi kumtsu ishi opiyeke, onguno tsaqu tsaleyi keu eno alokutsuu kutami kuhae. 40Ino opelo niyeghi peithapeni ke qhini eno iwu timi kumtsuno nono ahza tsukeu gholu nani. Ino akukau ke ghengu likhino ino onguno akijeu shini.” 41Tishieno Farao no Josef vilo pi, “Julo, ino itehino opelo Ijipmi yeghi shou ahng shiluvea peke.” 42Farao no pa u loti lono amchishi chishida chekeu nguthi sujopheno Josef ulotilo sutsue. Phuphuyikeu phimini kivi pesu pa puue, eno shuna-yila pa kuo lo xini pipe. 43Eno pa pelo akukau wu khurkulu akiniu lono pa xapupe eno timiqo pelo pa zulo ishi asheshu pe, “Ala shetsulo.” Tishi puzu Josef pelo Ijipmi kumtsu shou ayehkipeu shipeke. 44Farao no pavilo pi, “Ino Farao ke eno osumo keloye timi khumu a u peqhe momu apukhu suqhe mla nani.” 45Pano Josef je Tsafenat-Panea kutsu. Eno panipu shipeniye Asenat tsue, liye On lo achineu Potifera nonga ke. Tishino Josef no Ijip yeghiqha kumtsulo izuwue.
46Josef no Farao qholo akumla shikeu ghulokilo paye ampe shighi shia. Pano Farao gholo ngoano chesu wupuzu Ijip yeghiqha kumtsulo wue. 47Kinikulu mipe tsuni dolo shisheno a-mu kumzapu lu. 48Eno Ijip yeghilo nibonilei ake lono Josef no ampe tsuni achuqupu qhakutsue, eno aphughiqolo achuqupu pekutsusuwo qhie. 49Pano athi kumzapu pekikelu kehu tino azughilo saye yeghi akeu toiveke. Athi kumzapu shive kehu pano ti mighiju move, kughengu tishi akhamlaveke.
50Puqumiye keu mipe ighi mphi lono Josef ye anu kini shive, tiye On lo achineu Potifera nonga Asenat no punu tsue. 51Josef no anu anoghiu je Manase kutsu, pano ishi pi, “Kughengu Alhou no ipelo ighime eno ipuno bolomi kumtsu kumsumaluve peke.” 52Pano anu akiniu je Efraim kutsue. Pano ishipi, “Kughengu ishikighime qhikeu yeghi lo Alhou no itikughuko tsue.”
53Ijip yeghilo nibonilei keu mpe tsuni ashekha shive, 54eno ampe tsuni puqumiye keu ighive, Josef no pipuakeu hutoi. Ayeghiqha kutau kumtsulo puqumiye ae, ikemu Ijipmi yeghi loye achuqupu ae. 55Kughou Ijip yeghiqha kumtsulo puqumiye ighivekeno timiqo no Farao vilo ighasusu achuqupu phu ighie. Tile Farao no Ijipmi kumtsu vilo ishi pi, “Josef lau wulo eno pano nongu vilo kiu shilo pini keno ti shilo.” 56Ayeghiqha kumtsulo puqumiyeve ikehu Josef no abi-ale kumtsu khaqhi eno Ijipmi vilo athi jesu tsue, kughengu Ijip yeghilo puqumiye keuno shishe shisakeu shive. 57Ayeghiqha kumtsu lono athi qhuniye Ijip lo Josef lau ighi, kughengu ayeghiqha kumtsulo puqumiye keu lono shishe shisakeu shive.
လက္ရွိေရြးခ်ယ္ထားမွု
BOTHUBO 41: SUMIBSI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.