BOTHUBO 39
39
Josef nqo Potifar Nipu
1Josef ye Ijip lo saiqive. Tile kukaki ghukhemi shou keptein Potifar Ijipmi huno Josef qhuluve. 2AMPEU no Josef gholo ae eno paye phuyi thayikemi. Paye pa mipeu Ijipmi nokilo ache. 3AMPEU no Josef gholo akeu pa mipeu no ithulue eno pano mlakeu kumtsulo AMPEU no pa pelo heshekulu shilupe. 4Potifar no pa shou amlo kiqi auveno Josef pelo pa ghini shipenikeu shive. Ikehu pano Josef pelo pa kilo pano kiu pighi akeno kumtsu shou jukutsuu shipe. 5Josef pelo pa kilo eno pano kiu pighi akeno tipaqo kumtsu shou jukutsuu shipeke thiu ye AMPEU no Josef ghenguno Ijipmi kibo hu kumghatsue. AMPEU no pakilo pighiakeu eno pa lulo akeu kumtsu kumghatsue. 6Pawu kuakini khije akeno kumtsu pesu pano Josef ulo kulhuqhivetsu eno achuqupu chukeu kumoaye paye kiu anikelapi kumsukimgheyi keu kumu kuhave.
Josef ye choshiyi eno aju kivi. 7Ado kushuwa kumo lo pa mipeu nipuno Josef ju li lokutu auve, eno lino pa vilo, “Isasu zulo,” ipi. 8Ikemu pano tishimo pive eno li vilo ishi pi, “Impeu ye ino hile ani kehu kiu pighitsu ani kela tipaulo kumsukimgheyi keu kuhae. Pano kiu ani keno kumtsu ipelo jukuto anipe. 9Aki hipaulo inguno akijeu khumu kuhae eno paye kiu thime mu ilauno kusupe puamoe, olikhi kumoaye, kughengu nono pa nipu kehu. Imaye niye kishi puzu lhoksakugha hikithipu shi puzu Alhou zulo axine shini kya?” 10Li no tsala kipetsu Josef putsa anamu pano li tsa initsumo eno li sasu zumoe eno li gholo ngomoe. 11Ghulo lakhiye Josef no puzuu toi aghini pulo puakeu shiniye akilo ilo, eno sholokuu akilo kumlami lakhimu kuhano ae. 12Tile lino pa kuuphi lo tsuquluveno pi, “Isasu zulo.” Ikemu pano pakuuphi li-ulo phesuvetsuno khalaupo ipeve. 13Kughou pano pa ku-uphi li ulo phesuvetsuno khalau poipevekeu lino ithulu keno, 14pano kilo akemiqo kuno lino pi, “Hi julo! Ikimino Ibrimi hipau nikilo saghi puzu ni thaigha ani peke. Paye ilau iloghi puzu isasu zuniye shie ike ino ighamuku ighauve kehu 15pano chilu kemtsa pa ku-uphi iphivilo pheqhiveno khalau poipevae.”
16Pa mipeuno akilo ighimoke kuto lino Josef ku-uphi li phivilo kutsupe puae. 17tishieno lino pa kimi vilo hitoi shi-ghi pi, “Hi Ibrimi aqeu nono nikilo saghi keu huno ithaighaniye izuabolo iloghi. 18Ikemu ino igha kutamiqo kuke lauye pa ku-uphi iphivilo qhiveno paye khalau poipeveke.”
19Kughou Josef mipeuno pa nipuno pikeu tsa chilu eno lino “Oqeu no hitoi shi ghi ipeitha anie,” ipikeu chilukeno paloghu ideve. 20Pano Josef kugha sawo akughukilo suve, akukauw akughumi kughasawo qhikeu-alo eno paye tile ngoche. 21Ikemu AMPEU no Josef gholo ae eno pa shou kupukini ae, ikehu akughuki shou atou zulo paye amlo kiqi pushi ithuluve. 22Akughuki shou atouno Josef pelo akughukilo akughumi kumtsu shou jukuto keu shipe. Eno panonguno akughukilo mlaitha keu kumtsulo pano atsukupushi mlaitha. 23Josef kulhuqhive tsu kethiuye akughuki shou atouye kumu amlo lipikeu kuhae, kughengu AMPEU no Josef gholo ae eno pano mlaithakeu kumtsulo heshelu peke.
လက္ရွိေရြးခ်ယ္ထားမွု
BOTHUBO 39: SUMIBSI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.