IPEKULU 5
5
Akukau Zulo Muse ngo Aron
1Tipathiu Muse ngo Aron pamaye Ijip lo akukau lau wuno pi, “Israil Lhou, AMPEU no pi anike, ‘Iwu timiqo pelo wuvepelo, tishi anguno panongu pelo asayeqha lono igihukeu michi shighi tiqhetini pinyi pelo.’ ”
2Ikemu akukauno pi, “AMPEU ye khuu kya? Niye kushiye patsa inini kya? eno Israilmi pelo wuvepeni kya? Niye AMPEU mthae eno niye Israilmi puwumoe.” 3Muse ngo Aron pamano pi, “Ibrimiqo Lhou ampi no nilau pephe piye vae. Ningu pelo atsala kuthu asayeqhalo izuwu no AMPEU lau lhoxu heqhipe akumllagho niLhou tsuwupelo. Ninguno tishimo aye pano kusukini momu aghukishi pesu ningu pithive nanike.”
4Akukauno Muse ngo Aron vilo pi, “Kiu kiqi lono nonguye timiqo pelo akumla kughuchove anipe kya? Aqemi hupaqo pelo ighino mulauve pelo! 5Nongu timi qoye Ijipmi nguno timi kumzapu shivae eno nonguye itehiye mulamoniye shi anike!” 6Tipanino akukauno Ijipmi aqemi heqhichekemi ngo Israilmi dolo kughukutsumi akeqo vilo ishi ahzatsu: 7“Itatu mlanike aghijini timiqo tsukevelo. Panoqo pelo wuno phusaghipelo. 8Tishie pinamu panoqo pelo puzuu itatu khije mla chenikeno tijehi shipelo; itatu lakhinomu tomokeu shipemoni. Panonguye akumla mlanike lukumkha kuha ke ghenguno pano Lhou lau akumllagho heqhipe mllanike wupelo pi ivilo iniju kichichi anike! 9Timi hipaqo pesu aka-agha shi mla pelo eno panoqo mighimughai mla apelo, tishianguno panonguye akimkitsa inikepu do kuha penike.”
10Ikehu aqemi heqhikemi eno Israilmi dolo kughu kutsumi akeqono wuno Israilmi vilo pi, “Akukauno pike hinguno alau ye paye aghijini tsumoa pivae. 11Pano pikeuno nonguno wupuzu khilauno phusughi nikeno tipau phusughi masa pike, ikemu puzuu itatu khije mulaqhilu chenikeno tijehi shima sae pike.” 12Ikehu timiqono Ijip lo aqha kumtsulo aghijini phuwuke. 13Aqemi heqhikemino tsuyikhomoi timiqo pelo puzuu aghijini tsuno itatu shi keulo jehi ghulo atsu-tsu itatu tijehi mlape nikeu shike. 14Ijipmi aqemi heqhikemino Israilmi dolo kughu kutsumi akeqo akumla shikeu jupeniye qhikeqo ghaqhicheke. Panongu no ishi pike, “Nongu timi qoye kushiye puzuu itatu mlaqhi keu jehi mlamo kya?”
15Tileno Israilmi dolo kughu kutsumino akukau vilo piwuke, “Akiqheu, noye kushiye nilau hitoi shi ani kya? 16Aghijini nitsumoe ikemu ni vilo itatu mulalo pike hiye kiu kya? eno itehiye nighaqhi anike; ikemu akipimiye nongu shou anike.” 17Akukauno ishi khochile, “Nonguye akipichi ke eno nongu ye akumla shimoniaye ivilo AMPEU lau akumllagho heqhipe mllawunike ghenguno nongu puwu lopi ivilo khu anike. 18Nonguye akumlalo wuvelo! aghijini kitilamu nongu tsumoke ikemu nonguye itatu puzuu jehi mlaqhi masake.” 19Kughukutsumi qono ithive keuno kughono panoqo vilo puzuu mla chekeu qhemi tsala kipetsu tijehi itatu mla lo pikeulo panonguye avekusalo auvekeu ithive. 20Panongu no ide chile wochekelo Muse ngo Aron pama sasu kusholu, pamaye panoqo kheaghike. 21Timiqono Muse ngo Aron pama vilo pi, “Nonguno kiu shivetsu keno AMPEU no ithuluveake eno akukau ngo pawu kijemiqo pelo nijumithi pekeu ghenguno nongu ghimeqhi nanike. Ni heqhive peniaye nonguno panoqo pelo jekukivi shivepeke.”
Muse no AMPEU lau Muchho
22Tile Muse no AMPEU lau idewo no pi, “AMPEU, noye kushiye owu timiqo peitha pusa ani kya? Noye kushiye hilau ipuwu kya? 23Ino oghenguno akukau vilo pitsuni aye wu kelauye pano timiqo ayikushu lono peithake eno noye kiumu panoqo kuphu kepu shitsumoe!”
လက္ရွိေရြးခ်ယ္ထားမွု
IPEKULU 5: SUMIBSI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.