IPEKULU 1
1
Ijip lo Israilmi Shikighimeqhi
1Israil nulimiqo pututa kibolomi sasu Jakob gholono Ijip lo iqikemiqoye hipaqoke: 2Ruben, Simon, Levi, Juda, 3Isakhar, Zebulun, Benjamin, 4Dan, Naftali, Gad eno Asher. 5Jakob polo kughukomi hipaqo kumtsu kelo lhotsunike. Panu Josef ye Ijip lo aghiveke. 6Tishiche ke dolono Josef ngo pa thikuzumi eno tipa tiqhelimi kutami kumtsu thikhave, 7ikemu panoqo lagha kughukomi Israilmiye ati anuli kutomo shive eno kihikhamla kepu shive eno akumto shiuve kehu Ijip ye panoqono nhakhaluve.
8Tishi akelo Josef ghili mthakemi akukau akithe lakhino Ijip lo akukau shi ipeghive. 9Pano pawu timiqo vilo pi, “Israilmi hipaqoye phikhamla kepushi akumto shiuvae eno ningu ghenguno akumsapu shiauvae. 10Aghushi ighiaye panonguno nighumi gholo supuzu nisasu aghu shino aghakhu lono poveluvike. Ninguye panonguno kihikha mla kepushi akeu alau shipemonike alaghi hami phu masae.” 11Ikehu aghichhe kumla pesu Israilmi ghuthi kuxu puhave tsunike ghenguno Ijipmino aqemi kumla jukutsu heqhikemiqo pesu panoqo shou qhike. Israilmino Pithom ngo Ramese phughiqo shiqhike, tiye akukau kuakini pekukutsua shicheke. 12Ikemu Ijipmi no khijehi Israilmi qodaqhi keno tijehi Israilmiye alaushi timi kutomo shiuve eno panonguno aghakhuqha lo alaushi ikowove. Ijipmiye panoqo msaukhave. 13Ikehu panonguno Israilmiqo pelo aghime kusashi panoqo qepeke, 14eno panoqo kuxu kijiksa shipeke. Panonguno akikishilo ngo alu kumlalo eno akumla jeli kumtsulo Israilimi pelo mlapeke eno panoqo shou amlo kimiyekeu kuhake.
15Tipathiu Ijip lo akukauno Shipra ngo Puwa pama putsa, hipamaye Ibrimi totimino pununikelo tuchohiju cheke. 16Akukauno pi, “Kughou nonguno Ibrimi totimi sasu kupunu nikeno anga kiptimi shiaghi aye heqhivelo ikemu anga totimi shiaghi aye puxuve tsulo.” 17Ikemu totimi hipamaye Alhou sumsakemi kehu akukau gholu moveke; pano pikeu shinike zuqhulo anga kiptimi pelo xuluvepeke. 18Ikehu akukauno totimiqo kusaghipeno panoqo vilo iniju, “Nonguye kushiye hikithipu shicheni kya? Kushiye anga kiptimi pelo xuluve anipe kya?”
19Panonguno ishi khochile, “Ibrimi totimiye Ijipmi totimi toimoe; panonguye mulalei punuve cheni eno nino wo tomphi lono anga punuve aghi chenike.” 20-21Totimi hipamano Alhou sumsakeu ghenguno Alhou no pama lau amlokiqi ae eno pama pelo pututa kibo shilupe, timiqo ghi alau ikowolupe. 22Ashekhashi akukauno pawu timiqo kumtsu lau ahza hipau tsuke: “Ibrimi anga kiptimi anileshi punukeu kumtsu ikhipesu Nayil ghokilo vesuvelo, ikemu anga totimiqo pelo xulupelo.”
လက္ရွိေရြးခ်ယ္ထားမွု
IPEKULU 1: SUMIBSI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.