KEKULI 16
16
Timothi na Paul nu Sila Manyi gweghe Kewa
1Paul na Derbe nu Lustra wi wala ciwi Khristanyi kesü ma nyan Timothi muya. Ma jja na Judah nyi Khristanyi kesü, nu ma ba na Grik nyi. 2Lustra nu Ikonium wi kahang kenondithu na Timothi cüki khi pi mehaiden. 3Paul na Timothi ssi wa mvu ntsa kesalina ma Timothi hyuhan, kepaghenanye apen ciwi keben Judah nyithu tsüdila Timothi ba na Grik nyi le kesa chüben. 4Mathu na anyunuti kejon wi wala kenondithu ghena Jerusalem wi apostelthu nu keshenpfüthu na cenkeya jüh tsü pi mathu kiza nu tsü nie tenlo kiza. 5Tsalina kemehuthu na kenondi wi zü kayi nu atsathangla anyi la ji kayi sa.
Troa wi Paul na Kemanthi kemu
6Kemetha Ghamu na mathu yala Asia yyi wi ketsijüh nkhi thsü mvula kesalina mathu na Frugia nu Galatia pvüdhi wa. 7Mathu na wa Musia ggü cu keya wi mathu na Bithunia yyi wi wale kiden, isala Jisu Ghamu na mathu ya tsüti nsa thsü mvu. 8Tsalina mathu na Musia yyi pvüdhi sen nu Troa wi wa. 9Tsü ghaja Paul na kemanthi kesü mu, ciwi Macedonia nyi kesü na gho ma tuwi ngan nu ma wi khie, “Macedonia wi ghala ikhang kiqa cülo!” 10Paul na kemanthi tsü chüya meyi ikhang na Macedonia wi wale kidenya, kepaghenanye Anyiza na Jühtheü Kemehaiwa pi ciwi anyithu kizalo kesa ghena ikhang ci benle kesa südheya.
Filippi wi Lydia na Kahang kemilikeya
11Tsalina ikhang na Troa teshi nu ahunjjen wina wa Samothra cuya, nu dhitsüwa wi Neapoli wi wa. 12Nu ciwi na wa Rom nyi na Macedonia yyi wi anyunuti sa keben Filippi wi tsü waya, isanu ikhang na ghanan keu ciwi ben. 13Sabbath tsathang wi ikhang na anyunuti na ameiwa aghaku ghüsa wi Judah nyithu na kekhie kesa pen benle meshen nu wa, ciwi nzathu na saghu keben wi ikhang na wa mathu ssinu keccünengli. 14Ciwi nza kesü Thiatira wina kegho athsümeni menkedhu pi jeü keten ma nyan Lydia na ben. Ma Anyiza kinyi nu hang keten nyi kesü, Apvüwa na ma leben sha chicü nu ma Paul jüh kekhi tsü zaya. 15Lydia nu ma theghithu na baptaiz sakeya seng wi ma ghola ikhang ci, “Nthu na hi pi Apvüwa kenondi tsentsa nyi kesü sa lethu, ghola ijjen wi benlo.” Isanu ma ikhang ci khvu sa.
Filippi wi Atssüzüjjen wi keben
16Ghanan kesü ikhang na kekhie kesa pen wi wa keten maghale kesü na atsaghang ssinu dema keten metuya. Ma kedema ghena ma pvüwa na sashü na kekiyi muyaden. 17Nza tsüwa na Paul nu ikhang niela jisha, “Anyi hathu hana Kemisintsa Anyiza maghathu le! Mathu na nthu khati nu hangsha yaben khe tsü khi pi nthu kizaben!” 18Ma ghanan kejonla hati sa wa kesalina Paul na ma lebentsu nu ma ghang nu aghamuwa wi khi, “Hi Jisu Khrista nyan wina no ma gwo wina shhugholo kizaben.” Tsümeyi kivvü keten ghamu tsüna ma gwo wina shhughoa.
19Nzawa pvüwa na ma kekiyi nmila kesa chüya meyi Paul nu Sila manyi ghan sen nu anyitenti pen wi kekhang kesenthu tuwi wa. 20Mathu na manyi ssinu Rom kedithu tuwi wa nu khi, “Anyi ha keni na Judah nyi, nu manyi na ikhang nyunutiwa wi ha kekivvü pfüsi chiben. 21Manyi na ithu yenwa nkenye pi nyu sansiden, hi Rom nyithu na tsü nie nu saya nben.” 22Nu anyitenti la mathu gweghe nu Paul nu Sila manyi shun.
Tsaseng wi kedithu na Paul nu Sila manyi thsümeni mezüqhe nu manyi kiccülo kesa ahza khuchia. 23Mathu na manyi kiccü ntsa sa nu pi atssüzüjjen wi khala chia, nu manyi pi khentenlo kesa atssüzüjjen wi kediwa kiza. 24Atssüzüjjen wi kediwa na tsü zaya meyi manyi ssi wa ajjen non ntsawa wi manyi ccü pi achan wi bhenki pi theng.
25Ghaja non wi Paul nu Sila manyi na kekhie sa nu akhwisa pi Anyiza seng ben, nu atssüzüthu na manyi hhai tsü kina ben. 26Zuli ciwi ameghükuju ntsa sa, nu atssüzüjjen zankeju ntsa sa. Tsümeyi ajenkathu tsüdila sha, nu atssüzüthu tsüdi ccükwen kebhen kenengca shan. 27Isanan atssüzüjjen wi kediwa na shagha, ma ajenkathu na sha ketheng mu keya wi atssüzüthu tsüdila bvüdhale meshen; tsalina ma ketanla ma njünnu hanshi pi ma süthiale kiden. 28Isala Paul na misikhhali magha nu khi, “No ketanla no npathi lalo, ikhang tsüdila he wi ben le!”
29Atssüzüjjen wi kediwa na anni kecanki khieya nu bvü dugho, nu kedheggü nu Paul nu Sila manyi ccü wi nkhwendu. 30Tsaseng wi ma manyi ssi shhula manyi wi keü, “Kediwa keni, hi hangshaya le kesa ghena mangwa nsathu yishü nu?”
31Manyi na ma wi khi, “No Apvüwa Jisu nondiya, isa lethu no nu ntheghithu la hangsha yaben” 32Tsaseng wi manyi na Apvüwa jüh khi pi ma nu ajjen wi kebenthu tsüdi kiza. 33Tsü ghaja na atssüzüjjen wi kediwa na manyi ssi wa kekihhe yisü tsü bhu cüa, ma nu ma theghithu tsüdila baptaiz saya. 34Tsaseng wi ma manyi ssi wa ma jjen wi kedsakejjü pi cü. Ma nu ma theghithu na anonghe ntsa sa, kepaghenanye mathu na khilitsü Anyiza nondiyadha.
35Ghanenwa wi atsathangya meyi Rom kedithu na kedithu wi “Anyi tsü keni ya bvü thsülo” khi.
36Tsalina atssüzüjjen wi kediwa na wala Paul kiza, “Kedithu na no nu Sila nshinyi teshichilo kesa ahza kesun chidha, tsalina nshinyi shhu nu lebencca whalo.”
37Isala Paul na kediwa wi khi, “Ishinyi na Rom nyi, mathu na ishinyi kesami mangla mu meya lela nyu jawi na ishinyi kihhe nu pi atssüzüjjen wi chi theng nu khili nyu kuthila ishinyi teshi chiale ben kwe? Tsüti sa keya nmi, Rom kedithu ketanla ghola ishinyi khushi thsülo.”
38Kedithu na ajüh hapi Rom kedithu wi kiza chia; nu mathu na Paul nu Sila manyi na Rom nyi le kesa zakeya wi mathu messi ntsa sa. 39Tsalina mathu ghola manyi wi kesami keteshi khie nu atssüzüjjen wina manyi ssi shhula anyunuti tsüwa wina bvülo khie. 40Paul nu Sila manyi na atssüzüjjen wina shhu nu Lydia jjen wi wa. Ciwi manyi na kenondithu metuya, nu mathu saketezü jüh khitheng nu bvüa.
လက္ရွိေရြးခ်ယ္ထားမွု
KEKULI 16: RENGNBSI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.