KEKULI 14
14
Ikonium wi Keben
1Ikonium wi la tsü makesü sa. Paul nu Barnaba manyi Judah nyi Sinagog wi du ajüh khi ntsa nu Judah nyi nu Judah nyi nkenyethu la kejonla kenondi nyi saya. 2Isala Judah nyi nkenondithu na Judah nyi nkenyethu leben sameshü pi kenondithu nanmeghü thsüa. 3Apostel keni na ciwi matsü kesie-u ben nu manyi kempvüza sala Apvüwa jüh khi. Manyi na Apvüwa nanketizen cüki kekhi tsüna atsentsa le kesa ma amankesa nu azensuthu kuliya kemehai kekhang pi manyi cü nu kuli thsü. 4Anyunuti tsüwa wi anyithu gishü pi keni sa; pahan na Judah nyithu wiwa, nu pahan na apostelthu wiwa sa.
5Isanu Judah nyithu nu Judah nyi nkenyethu saghuya nu mathu ccülikesathu ssighola apostel keni meten-mesha nu alon pi manyi kecenthiale keben chüya. 6Apostel keni na tsü cüki za keya wi manyi bvü sen nu Lukaonia yyi wi anyunutithu Lustra nu Derbe, nu ayyi tsü kevü wi wa. 7Manyi na ciwi Jühtheü Kemehaiwa pi nyu sansi.
Lustra nu Derbe wi Keben
8Ciwi Lustra wi meshu kesü ma kepvügha wina accü nkemehai nu ma khiela alen npi tsenya kesa na ben. 9Ma ciwi donki nu Paul jüh kina. Paul na ma nondiben nu ma sa pi mehai yaben kesa muya, tsalina ma anyi tsü ghang, 10nu ahhai misikhhali khi, “Shagha nu mehaitsü ngan yalo!” Tsümeyi ma ngan shagha alentsenya. 11Anyitenti na Paul kekuli tsü muya meyi mathu Lukaonia jüh wina, “Acenpvü na anyithu ceng sen nu ithu jawi ghodha le!” isa khi. 12Mathu na Barnaba nyan pi Zea, nu Paul nyan pi Herma ci, kepaghenanye ma ajüh kekhi khang. 13Anyuti tsüna ameiwa Zea kekinyijjen na ben, ciwi keqhaikediwa na amesü süpon nu athighithu sen nu ajenka wi gho, kepaghenanye ma nu anyitenti na apostelthu kinyi mvu sa.
14Isala Paul nu Barnaba manyi mathu tsüti sale keben tsü zaya meyi manyi thsümeni zanqhe nu anyitenti jawi bvüdu nu jisha, 15#Bvü 20.11; Zak 146.6 “Ae, anyithu, nthu mangkesa na hati saben nu? Ishinyi la nthu ti anyi le! Ishinyi na nthu yala ma men nkemi hathu wina khapeghe sen nu Anyiza atssan, ayyi, atssükedone, nu ciwi kebenthu tsüdi sakechiwa wi tsü ghoya thsüle kesalina Jühtheü Kemehaiwa khi pi nthu wi thangchile ghoben. 16Ma hatu wi anyi tsüdila ya mathu kenen wi hang thsü. 17Isala ma keshüthangla ma hang benle kesa chüya thsüle kesalina pala kemehai kuliden: ma tang wi na atsangho pi nthu cü nu matsü wina pala bi bünya thsüden; ma kedsakejjü khuchi nu anonkeghe pi nthu leben pong cüden.” 18Apostelthu na ajüh tsüthu pi anyitenti na manyi nkinyi thsüle kesa khen dhu ntsa nu khenya.
19Judah nyi pahan na Pisidia yyi Antiok nu Ikonium wina gho; mathu na anyitenti zan pi mathu wiwa saya, nu alon pi Paul kecen nu ma shüdhale sala zan sen wa anyuti khesha wi khala. 20Isala kenondithu ma vüsen keben wi shagha anyutiwa wi du neng. Ma dhitsüwa wi Barnaba ssinu Derbe wi wa.
Siriya Yyi Antiok wi Kegho neng
21Paul nu Barnaba manyi na Jühtheü Kemehaiwa pi Derbe wi nyu sansi nu anyi kejonla sansikeyathu saya. Tsaseng wi manyi ciwi na Lustra, Ikonium, nu Pisidia yyi Antiok wi wha neng. 22Manyi ciwi wa kenondithu na kenondi tsentsa wi benya thsüle kesalina mathu satezü nu kechü-kenong nu khi, “Ithu na Anyiza Kadiyyi wi dule kesalina agükeccü kejon saben.” 23Manyi na kemehu tsüdi wi accülikesathu kessi pi cü, manyi zi nu kekhie sa nu mathu pi mathu na nondi ketenwa Apvüwa kwen wi chia.
24Manyi Pisidia yyi tsüdi wi kewa cen seng wi Pamfilia wi gho. 25Manyi Perga wi ketsijüh pi nyu sansi nu tsaseng wi Attalia wi wa, 26nu ciwi atssü wina Antiok wi gho neng, apen ciwi na manyi Anyiza nanketizen sen nu kekuli salo kesunshi kechi tsü manyi na khili sacendha.
27Manyi na Antiok wi ghoya meyi kemehu nyithu cighu chi nu Anyiza na manyi ssinu kekuli sa keyathu nu Judah nyi nkenyethu ya nondiya thsüle kesa ghena alen shachi kecü cüki tsüdi khi pi mathu kiza. 28Isanu manyi ciwi kenondithu ssinu matsü kesiela ben.
လက္ရွိေရြးခ်ယ္ထားမွု
KEKULI 14: RENGNBSI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.