KEKULI 11
11
Pitor na Jerusalem Kemehu wi tsü Cüki Kekhi
1Judea wi apostelthu nu kenondithu tsüdila Judah nyi nkenyethu la Anyiza jüh yayadha le kesa zaya. 2Pitor na Jerusalem wi kewa wi Judah nyi nkenyethu na ahyuhanlo khi ketenthu na ma ssinu kicennali. 3Mathu kekhi na, “No ahyu nkahan Judah nyi nkenyethu jjen wi kijünyi wa nu mathu gweghe la dsajjü le khiben man!” 4Tsalina khati sa khe Pitor na aghatsan na mehaitsü maben khi pi mathu kiza:
5“Hi Joppa nyunutiwa wi kekhie sa keben wi kemanthi kesü mu. Hi tang wi na palakhang ti kesa keti kesü accügwen mejü keben pi ayyi wi dugho thsü, nu tsüna gho ikete wi ben wa. 6Hi wala tsü tetsaki nu ma non wi ghangchi nan asahangthu nu aghangsathu, ayyi wi ghapvü ketenthu, nu awathu tsüdi keben muya. 7Tsaseng wi ahhai kesü hati hi kiza, ‘Pitor, shagha hathu ha pathi nu dsalo!’ 8Isala hi khi, ‘Nmale, Apvüwa! Hi atsse kenenkagha nu nkemetha tsü pi ipang wi npi chi.’ 9Tsaseng wi tang wi na ahhai tsüna hi luneng, ‘Katsüha lela Anyiza na satemetha kesa tsü nmetha le nmeshen lalo.’ 10Hana kecheng tughu hati sa, nu asakhen wi tsüna tang wi zanki nengya. 11Tsü tsüwi Kaesarea wina kesun kechi meshu kecheng na gho hi keben jjen tsü cuya. 12Aghamu na hi mathu gweghe wa nkesütu lalo hi kiza. Joppa wi kenondithu ma tugho ha la hi gweghe Kaesarea wi wa, nu ikhang tsüdila Kornelia jjen wi wa. 13Ciwi ma tangnyilo kesü na gho ma jjen wi ngan nu hati ma kizale kesa khi pi ikhang wi kiza: ‘Anyi pahan kesun pi Joppa wi meshu kesü ma nyan Simon Pitor kesa tsü ci wa thsülo. 14Ma ajühkhi pi no nu ntheghithu kizathu, ciwi nthu na hangsha yaben.’ 15Isanu hi ajühkhi keshagha wi Kemetha Ghamu na kheni ithu miwi kegho ti mathu miwi la gho le. 16#Kek 1.5 Tsaseng wi hi Apvüwa na hati khi ketheng tsü meshenya: ‘Johan na atssü pi nyu baptaiz sa, isala Kemetha Ghamu pi nthu baptaiz sa cüben.’ 17Hawa ha Anyiza na ithu Apvüwa Jisu Khrista nondi keya wi Kemetha Ghamu pi ithu kecü ti pi Judah nyi nkenyethu la cüdha kesa muti yadha; hi thowa le nu Anyiza khenle saya mehai nu!”
18Mathu na ha zakeya seng wi kicennali nsala nu Anyiza seng nu khi, “Anyiza na Judah nyi nkenyethu la leben khapeghe nu hangya thsüle kesalina matsü kemehai pi cüdha.”
Antiok wi Kemehu
19 #
Kek 8.1-4
Kemeten-kemesha wi Stefan kepathi tsü ghena kenondithu pahan na bvü zighe sen wa Fonisia, Cipra, nu Antiok kecu wi ketsijüh pi Judah nyithu ketan kiza. 20Isala kenondithu pahan na Cipra nu Ciren wina gho Antiok wi wa ketsijüh pi Judah nyi nkenyethu kiza nu Apvüwa Jisu cüki Jühtheü Kemehaiwa la pi mathu sansi. 21Apvüwa kekhang na mathu ssiden, nu anyi kejonla nondiya nu Apvüwa wi kheneng gho.
22Mathu cüki na wala Jerusalem wi kemehu cua, tsalina mathu na Barnaba kesun pi Antiok wi chi. 23Ma wa cukeya wi Anyiza na khatila sawegü pi anyithu cü khe muya, ma anonghe ntsa sa nu mathu leben tsüdi pi Apvüwa wi bentenlo kesa mathu kechü-kenong chicü. 24Barnaba na anyi kemehai kesü, Kemetha Ghamu nu kenondi pi ma pong pvüden, nu anyi kejon ssinu Apvüwa wi ghoya. 25Tsaseng wi Barnaba na Tarsa wi Saul bha wa. 26Ma wa Saul metuya nu ma ssi sen Antiok wi gho. Amapi kesü chuli manyi gweghe kemehu nyithu metu nu anyi kejonla sansi. Hana Antiok wi sansikeyathu pi atuwa sa Khristanyi le ciya. 27Tsü tsüwi Jerusalem wi atusenjüh-kechüthu pahan na Antiok wi wa. 28#Kek 21.10 Mathu jawi meshu kesü ma nyan Agaba kesa na shagha Aghamu kekhang wina azeng nkemehai na ayyi maben wi gho tenle khi. (Hana Klaudia na kadimi sa keben tsü wi gho.) 29Sansikeyathu na mathu meshu kesüsü saya kemehai chu kekiqa kesun pi Judea wi mathu pvüshang kenondithu cü tenle kesa südheya. 30Mathu na hati sa nu apisa kesun pi Barnaba nu Saul manyi wina kemehu keshenpfüthu cü.
လက္ရွိေရြးခ်ယ္ထားမွု
KEKULI 11: RENGNBSI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.