Malakaus 11
11
Yexus Moog Huv Yeluxalees Yaam Muajyeej
(Mathais 21:1-11; Lukas 19:28-40; Yauhaas 12:12-19)
1Thaus Yexus puab moog yuav txug lub nroog Yeluxalees, puab moog txug ntawm lub zog Npefakhes hab lub zog Npethanis, ntawm lub Roob Txiv Ntoo-Roj. Yexus txawm khaiv Nwg ob tug thwjtim ua Nwg ntej moog, 2Nwg qha obtug has tas, “Meb moog rua huv lub zog kws nyob tom meb hauvntej. Thaus meb moog txug huv lawm, meb yuav pum ib tug mivnyuas neegluav khi ca rua ntawd kws yeej tsi tau muaj leejtwg caij dlua le, meb muab dlaws hab caab lug rua ntawm nuav. 3Yog muaj leejtwg nug meb has tas, ‘Meb ua dlaabtsi le ntawd?’ Meb teb tas, ‘Tug Tswv#11:3: Tug Tswv; lossis nwg tug tswv. xaav siv, ib ntsiv Nwg maamle xaa rovqaab lug.’ ”
4Obtug txhaj moog hab pum ib tug mivnyuas neegluav nyob tom kev, khi rua ntawm lub qhovrooj tsev. Thaus obtug tseem taabtom dlaws hlua, 5ibtxha tuabneeg kws sawv ntawd nug has tas, “Meb muab tug mivnyuas neegluav nuav dlaws hlua ua dlaabtsi?”
6Obtug teb lawvle Yexus tau qha rua obtug lawm, tes puab txawm tso obtug moog. 7Obtug caab tug mivnyuas neegluav moog rua Yexus, obtug hle obtug ob lub tsho ntev lug pua tug mivnyuas neegluav nrauqaum rua Yexus caij. 8Muaj ntau leej hle puab tej tsho lug pua huv txuj kev, lwmtug ho moog txav tej nplooj ntoos tom ntug zog nqaa lug pua kev hab. 9Cov tuabneeg kws uantej hab cov kws uaqaab suavdlawg qw nrov-nrov has tas, “Hauxanas!#11:9: Hauxanas yog lulug Henplais kws txhais tau has tas “thov paab cawm lau!” Thov Vaajtswv foom koobmoov rua tug kws lug huv Vaajtswv lub npe lug! #Nnkauj 118:25-26 10Thov Vaajtswv foom koobmoov rua peb yawmkoob Vaajntxwv Daviv lub tebchaws kws taabtom lug yuav txug nuav! Cale qhuas Vaajtswv!”
11Thaus Yexus moog txug huv lub nroog Yeluxalees lawm, Nwg moog rua huv lub Tuamtsev, hab Nwg tsaa muag saib txhua yaam thoobplawg. Tabsis vim tub tsausntuj lawm, Nwg txhaj nrug Nwg kaum-ob tug thwjtim moog rua tom lub zog Npethanis.
Yexus Foom Tsob Ntoo Txiv Ncuavpas
(Mathais 21:18-19)
12Nub tomqaab ntawd thaus Yexus hab Nwg cov thwjtim rovqaab tom lub zog Npethanis lug, Yexus txawm muaj ntsiv tshaib plaab. 13Nwg pum ib tsob txiv ncuavpas muaj nplooj tsaus nti nyob dleb tsawv, tes Nwg txawm moog saib seb puas txitxiv. Tabsis thaus Nwg moog txug, Nwg tsuas pum muaj nplooj xwb, ruaqhov tseem tsi tau txug lub caij txi. 14Yexus txawm has rua tsob txiv ncuavpas ntawd tas, “Txij nuav moog yuav tsi muaj leejtwg tau noj koj cov txiv ib zag le lawm!”
Cov thwjtim kuj nov tej lug kws Yexus has ntawd.
Yexus Moog Rua Ntawm Lub Tuamtsev
(Mathais 21:12-17; Lukas 19:45-48; Yauhaas 2:13-22)
15Thaus puab moog txug lub nroog Yeluxalees lawm, Yexus moog rua huv lub Tuamtsev hab pib ntab cov tuabneeg kws tuaj yuav khoom hab muag khoom kuas cale tawm moog. Nwg muab cov tuabneeg kws pauv nyaj hab cov tuabneeg kws muag nquab tej rooj nyob ntxeev huv tuabsi. 16Hab Nwg txwv tsi pub leejtwg coj ib yaam dlaabtsi hlaa huv lub tshaavloog ntawm Tuamtsev moog. 17Yexus qha rua puab tas, “Vaajtswv tej Lug tau sau ca has tas, ‘Kuv lub Tuamtsev yog lub tsev thov Vaajtswv.’ Tabsis mej muab hloov lug ua qhov chaw rua tubsaab nkaum!” #Yaxaya 56:7; Yelemi 7:11
18Cov thawj povthawj hlub hab cov xwbfwb kws qha Kevcai nov tej nuav, puab txhaj pib nrhav kev muab Yexus tua. Puab ntshai Yexus, ruaqhov Yexus tej lug qha ua rua suavdlawg xaav tsi thoob.
19Thaus yuav tsausntuj, Yexus hab Nwg cov thwjtim txawm tawm huv lub nroog moog lawm.
Tsob Ntoo Txiv Ncuavpas Qhuav
(Mathais 21:20-22)
20Nub tomqaab sawvntxuv, thaus Yexus hab Nwg cov thwjtim puab taabtom taug kev moog, puab pum tsob txiv ncuavpas tub tuag tshaav, qhuav ti nkaus caag lawm. 21Petus ncu tau has tas yog lecaag tes nwg txawm has rua Yexus tas, “Xwbfwb, Koj saib seb, tsob txiv ncuavpas kws naagmo Koj foom tub qhuav taag lawm!”
22Yexus teb tas, “Yog mej ntseeg Vaajtswv, 23Kuv qha tseeb rua mej has tas, yog mej leejtwg has rua lub roob nuav kuas txaav moog rua huv havtxwv, kws yeej tsi ua xyemxyaav huv mej lub sab, tabsis ntseeg tas yeej yuav muaj lawvle qhov kws mej has ntawd, tes yeej yuav muaj le ntawd xwb. #Math 17:20; 1Klt 13:2 24Tub yog vimle nuav, Kuv txhaj has rua mej tas, thaus mej thov Vaajtswv pub ib yaam dlaabtsi rua mej, mej yuavtsum ntseeg tas mej tub tau txais lawm, mej txhaj yuav tau yaam kws mej thov ntawd. 25Thaus mej sawvntsug thov Vaajtswv, mej yuavtsum zaamtxim rua txhua tug kws mej tsi txaussab rua, sub mej Leejtxiv tug kws nyob sau ntuj ceebtsheej txhaj yuav zaam mej lub txim.” 26#11:26: Tej phoo ntawv qub kws xuas teg sau ntxiv nqai 26 nuav rua: Yog mej tsi zaamtxim rua lwmtug, mej Leejtxiv tug kws nyob sau ntuj ceebtsheej yuav tsi zaamtxim rua mej hab. #Math 6:14-15
Leejtwg Tsocai Rua Yexus
(Mathais 21:23-27; Lukas 20:1-8)
27Yexus hab Nwg cov thwjtim rov moog rua huv lub nroog Yeluxalees ib zag ntxiv. Thaus Yexus moog rua huv lub Tuamtsev, cov thawj povthawj hlub, cov xwbfwb kws qha Kevcai, hab cov txwjlaug tuaj cuag Nwg, 28hab nug Nwg has tas, “Koj tau cai qhovtwg lug ua tej nuav? Leejtwg tsocai rua Koj?”
29Yexus teb puab has tas, “Kuv yuav nug mej ib lus, yog mej teb tau, Kuv maamle qha rua mej has tas leejtwg tsocai rua Kuv ua tej nuav. 30Mej sim qha rua Kuv seb, leejtwg tsocai rua Yauhaas muab tuabneeg ua kevcai rausdlej, Vaajtswv lossis tuabneeg?”
31Puab txawm sisthaam has tas, “Peb yuav teb lecaag? Yog peb teb tas, ‘Vaajtswv tsocai rua Yauhaas ua,’ Nwg yuav has tas, ‘Ua lecaag mej ho tsi ntseeg Yauhaas?’ 32Tabsis yog peb ho teb tas, ‘Tuabneeg tsocai rua Yauhaas ua …’ ” (Puab ntshai cov pejxeem, ruaqhov suavdlawg yeej paub tas Yauhaas yog ib tug xwbfwb cev Vaajtswv lug.) 33Puab txhaj teb Yexus has tas, “Peb tsi paub.”
Yexus txhaj has rua puab tas, “Kuv los yuav tsi qha rua mej has tas leejtwg tsocai rua Kuv ua tej nuav hab.”
လက္ရွိေရြးခ်ယ္ထားမွု
Malakaus 11: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.