Mathais 27
27
Coj Yexus Moog Cuag Philaj
(Malakaus 15:1; Lukas 23:1-2; Yauhaas 18:28-32)
1Thaus kaajntug txoog, taagnrho cov thawj povthawj hlub hab cov txwjlaug txawm saablaaj pumzoo kuas muab Yexus coj moog tua. 2Puab muab Nwg khi hab coj moog cob rua Philaj kws yog cov tuabneeg Loos tug tswvxeev.
Yudas Dlai Tuag
(Tegnum 1:18-19)
3Thaus Yudas tug kws ntxeevsab paub tas Yexus raug luas txavtxim rua lawm, nwg tusab heev rua yaam kws nwg tau ua lug, tes nwg txawm nqaa 30 npib nyaj rovqaab moog rua cov thawj povthawj hlub hab cov txwjlaug. #Tegnum 1:18-19
4Nwg has tas, “Kuv tau ua txhum lawm vim kuv muab ib tug tuabneeg kws tsi muaj txim rua luas coj moog tua!”
Puab teb tas, “Tej ko muaj qaabhau dlaabtsi rua peb? Ntawd yog koj le dlejnum!”
5Yudas txawm muab cov nyaj ntawd povtseg rua huv lub Tuamtsev hab tawm moog; tes nwg txawm moog dlai cejdlaab tuag lawm.
6Cov thawj povthawj hlub txhaj khaws cov nyaj ntawd hab has tas, “Yog yuav muab cov nyaj nuav tso rua huv lub txhaab nyaj huv lub Tuamtsev, mas nwg txhum kevcai, vim cov nyaj nuav yog nyaj ntshaav.” 7Thaus puab saablaaj pumzoo lawm, puab txhaj muab cov nyaj ntawd moog yuav ib tug kws puab laujkaub aav thaaj teb, ca ua tojntxaas log cov kws yog Lwmtsaav Tuabneeg. 8Vimle ntawd thaaj teb ntawd txhaj raug hu ua, “Thaaj Teb Ntshaav” lug txug najnub nua.
9Tej nuav muaj tav lawvle Yelemis, kws yog tug xwbfwb cev Vaajtswv lug tau qha tseg lawm has tas: “Puab txais 30 lub npib nyaj, kws yog tug nqe cov tuabneeg Yixalayees pumzoo them nwg, #Xekhali 11:12-13 10hab puab muab cov nyaj ntawd moog yuav ib tug kws puab laujkaub aav thaaj teb, lawvle tug Tswv tau xaaj tseg rua kuv lawm.”
Philaj Taug Yexus Zaaj
(Malakaus 15:2-5; Lukas 23:3-5; Yauhaas 18:33-38)
11Thaus Yexus sawv ntawm cov tuabneeg Loos tug tswvxeev xubndlag, nwg nug Yexus has tas, “Koj puas yog cov Yudais tug vaajntxwv?”
Yexus teb tas, “Yog le koj has.” 12Tabsis thaus cov thawj povthawj hlub hab cov txwjlaug kom Yexus, Nwg yeej tsi teb ib lus le.
13Philaj txhaj has rua Yexus tas, “Koj tsi nov txug tej lug kws puab komtxim rua Koj nuav lov?”
14Tabsis Yexus yeej tsi teb ib lus le; qhov ntawd ua rua tug tswvxeev xaav tsi thoob le.
Txavtxim Muab Yexus Tua
(Malakaus 15:6-15; Lukas 23:13-25; Yauhaas 18:39—19:16)
15Txhua zag kws ua kevcai Hlaa Dlhau, cov tuabneeg Loos tug tswvxeev yeej tso ib tug tuabneeg raug txim lawvle cov pejxeem thov. 16Thaus ntawd muaj ib tug txivneej raug txim hu ua Yexus Npalanpas kws suavdlawg yeej paub nwg zoo. 17Thaus cov tuabneeg coob-coob tuaj uake, Philaj nug puab has tas, “Mej xaav kuas kuv tso tug twg rua mej? Tso Yexus Npalanpas lossis tso Yexus tug kws hu ua Mexiyas?” 18Philaj yeej paub tseeb has tas qhov kws puab nteg Yexus tuaj rua nwg ntawd tub yog vim puab khib xwb.
19Thaus Philaj tseem nyob ntawm lub rooj has plaub, nwg tug quaspuj khaiv tuabneeg tuaj has rua nwg tas: “Koj tsi xob ua ib yaam dlaabtsi rua tug txivneej kws tsi muaj txim nuav, ruaqhov naagmo kuv ua npausuav txug tug txivneej nuav mas ua rua kuv nyuajsab kawg le.”
20Cov thawj povthawj hlub hab cov txwjlaug ntxag kuas cov pejxeem thov Philaj tso Npalanpas hab muab Yexus coj moog tua. 21Tabsis Philaj rov nug puab has tas, “Ob tug nuav, mej xaav kuas kuv tso tug twg rua mej?”
Puab teb tas, “Npalanpas!”
22Philaj nug puab has tas, “Yogle ntawd, mej yuav kuas kuv ua lecaag rua tug Yexus kws hu ua Mexiyas?”
Puab teb tas, “Muab Nwg ntsa rua sau ntoo khaublig!”
23Tabsis Philaj nug has tas, “Vim lecaag? Nwg tau ua txhum dlaabtsi?”
Puab suavdlawg hajyam qw nrov-nrov has tas, “Muab Nwg ntsa rua sau ntoo khaublig!”
24Thaus Philaj pum tas ua tsi tau dlaabtsi ntxiv lawm, tabsis cov pejxeem tsuas muaj yuav ua kuas muaj kev kubntxhuv xwb, nwg txawm muab dlej lug ntxuav teg taabmeeg suavdlawg hab has tas, “Kuv tsi ris tug txivneej nuav txuj kev tuag! Qhov ntawd mej ris mej xwb!” #2Kev 21:6-9
25Tes cov pejxeem suavdlawg teb tas, “Ca Nwg lub txim tuag lug raug rua peb hab peb cov mivnyuas!”
26Thaus ntawd, Philaj txhaj tso Npalanpas rua puab; tomqaab kws nwg muab Yexus rua cov tubrog nplawm taag lawm, nwg txhaj muab Yexus cob rua puab coj moog ntsa rua sau ntoo khaublig.
Cov Tubrog Ua Saib Tsi Taug Yexus
(Malakaus 15:16-20; Yauhaas 19:2-3)
27Thaus ntawd, Philaj cov tubrog txawm coj Yexus moog rua huv tug tswvxeev lub vaajloog, hab taagnrho cov tubrog txawm lug sawv vij Yexus. 28Puab muab Yexus lub tsho hle hab muab ib lub tsho ntev tsaamxem rua Yexus naav. 29Puab muab xuavpaug ntsaaj qhab ua ib lub kausmom looj Nwg taubhau, hab muab ib tug cwjnreg rua Nwg saab teg xis tuav; tes puab txawm txhuscaug ntawm Nwg xubndlag luag hab haslug saib tsi taug Nwg, puab has tas, “Thov kuas cov Yudais tug vaajntxwv muaj sa nyob ntev!” 30Puab ntu quavncaug rua Yexus, hab muab tug lojkov lug ntaus Yexus taubhau. 31Thaus puab ua saib tsi taug Yexus taag lawm, puab muab lub tsho ntev ntawd hle hab rov muab Nwg cev khaubdluag khu rua Nwg naav. Tes puab txawm coj Nwg tawm moog hab muab Nwg ntsa rua sau ntoo khaublig.
Yexus Raug Ntsa Rua Sau Ntoo Khaublig
(Malakaus 15:21-32; Lukas 23:26-43; Yauhaas 19:17-27)
32Thaus puab taabtom tawm moog, puab ntsib ib tug txivneej hu ua Ximoos, kws tuaj huv lub nroog Kulenes tuaj; puab txawm cale yuam kuas nwg kwv Yexus tug ntoo khaublig. 33Puab txhaj moog txug ib qhov chaw kws hu ua Khaulakhauthas, kws txhais has tas, “Pobtxhaa Taubhau.” 34Thaus ntawd puab txawm muab cawv txivmaab tov xyaw kua ab rua Yexus haus; tabsis thaus Nwg saaj mivntsiv, Nwg txawm tsi kaam haus lawm. #Nnkauj 69:21
35Thaus puab muab Yexus ntsa rua sau ntoo khaublig lawm, puab txawm muab Nwg cev rigtsho lug twv seb leejtwg yuav tau yaam twg. #Nnkauj 22:18 36Puab ua le ntawd taag, tes puab txawm nyob quastsawg zuv Nwg. 37Puab sau cov lug kws teemtxim rua Nwg has tas, “Tug nuav yog Yexus, kws yog cov Yudais tug Vaajntxwv,” hab muab ntsa ncaaj ntawm Nwg taubhau rua sau. 38Puab kuj muab ob tug tubsaab ntsa nrug Yexus hab; ib tug nyob ntawm Nwg saab xis hab ib tug nyob ntawm Nwg saab txhumphem.
39Cov tuabneeg kws dlua kev ntawd cu taubhau quas nyo hab txobthuam Yexus has tas, #Nnkauj 22:7; 109:25 40“Koj tub yuav rhuav lub Tuamtsev hab peb nub Koj yuav rov ua dlua tshab nua neb! Yog Koj yog Vaajtswv tug Tub tag, cale cawm Koj kuas dlim los mas! Cale nqeg sau ntoo khaublig ko lug!” #Math 26:61; Yauh 2:19
41Cov thawj povthawj hlub hab cov xwbfwb qha Kevcai hab cov txwjlaug los kuj thuam Yexus ib yaam nkaus hab. Puab has tas, 42“Nwg cawm tau lwmtug, tabsis Nwg ho cawm tsi tau Nwg tugkheej! Nwg tub yog cov Yixalayees tug vaajntxwv ne! Nwg kuj nqeg kag sau tug ntoo khaublig lug taamsim nuav kuas peb txhaj ntseeg tau Nwg! 43Nwg tub tsosab rua Vaajtswv hab Nwg tub has tas Nwg yog Vaajtswv tug Tub nua neb! Yogle ntawd, yog Vaajtswv xaav cawm Nwg, kuj ca Vaajtswv cawm Nwg taamsim nuav!” #Nnkauj 22:8
44Ob tug tubsaab kws raug ntsa rua sau ntoo khaublig nrug Yexus los kuj txobthuam Yexus tuabyaam hab.
Yexus Txuj Kev Tuag
(Malakaus 15:33-41; Lukas 23:44-49; Yauhaas 19:28-30)
45Thaus taavsu, thoobplawg lub tebchaws txawm cale tsausntuj nti tau peb txoogteev. 46Kwvlaam le thaus peb teev nubqaij ntawd, Yexus txawm hu nrov-nrov has tas, “Elis, Elis, lemas xanpathanis?” kws txhais has tas, “Kuv tug Vaajtswv, Kuv tug Vaajtswv, vim lecaag Koj txhaj muab Kuv tsotseg lawm?” #Nnkauj 22:1
47Ibtxha tuabneeg kws sawv ntawd nov Yexus has le ntawd, puab has tas, “Nwg taabtom hu Eliyas!” 48Cov tuabneeg ntawd muaj ib tug txawm dlha moog muab ib lub taub ntxuav yag raus cawv txivmaab qaub, muab chob rua ib tug paas hab cev moog rua Yexus haus. #Nnkauj 69:21
49Tabsis muaj ib cov has tas, “Tog rawm, ca peb tog seb puas pum Eliyas lug cawm kuas Nwg dlim!”
50Yexus rov hu dlua ib zag nrov-nrov, tes Nwg txawm tusav nrho lawm.
51Taamsim ntawd dlaim ntaub kws thaiv huv lub Tuamtsev txawm ndluag rhe sau hauv ti nkaus rua huv taw ua ob dlaig. Lub nplajteb uazug koog, tej pobzeb pobtsuas tawg zumzawg, #Tsiv 26:31-33 52tej qhovntxaa txawm qheb hab ntau tug ntseeg Vaajtswv kws tuag lawm txawm cajsa rov lug, 53hab tawm huv puab tej qhovntxaa lug. Tomqaab kws Yexus sawv huv qhovtuag rovqaab lug lawm, puab cov kws cajsa sawv rov lug ntawd kuj moog rua huv lub Nroog Dlawbhuv hab muaj tuabneeg ntau leej pum puab.
54Thaus tug thawj tubrog hab cov tubrog kws zuv Yexus pum lub nplajteb uazug koog hab pum txhua yaam kws muaj tshwm lug ntawd, puab ntshai kawg le, puab sisthaam has tas, “Tseeb tag lau, tug nuav yeej yog Vaajtswv tug Tub!”
55Muaj ntau tug quaspuj tuaj sawv dleb-dleb saib. Puab yog cov kws nrug Yexus tuaj peg Kalilais tuaj hab yeej ibtxwm paab Nwg. #Lukas 8:2-3 56Ibtxha ntawm cov quaspuj ntawd yog Malis Madalas, Malis kws yog Yakaunpaus hab Yauxej nam, hab muaj ib tug yog Xenpedais tug quaspuj.
Log Yexus
(Malakaus 15:42-47; Lukas 23:50-56; Yauhaas 19:38-42)
57Thaus yuav tsausntuj, muaj ib tug txivneej npluanuj, hu ua Yauxej kws nyob huv lub nroog Alimathias txawm tuaj txug. Nwg kuj yog Yexus ib tug thwjtim hab. 58Nwg moog cuag Philaj hab thov kuas muab Yexus lub cev rua nwg. Tes Philaj txhaj tsocai kuas puab muab Yexus lub cev rua Yauxej. 59Yogle ntawd, Yauxej txhaj txu Yexus lub cev lug, muab ib chaws ntaub maag tshab lug qhwv lub cev, 60hab muab tso rua huv nwg lub qhovntxaa tshab kws nwg nyavnyuas txaug tau rua huv ib phaab pobzeb. Nwg dlov ib dlaim laagzeb luj lug npug lub rooj ntxaas ca, tes nwg txawm moog tsev lawm. 61Malis Madalas hab muaj dlua ib tug Malis, obtug kuj nyob quastsawg saab tid saibntsoov lub rooj ntxaas hab.
Cov Faajxwm Kws Nyob Tom Lub Qhovntxaa
62Nub tomqaab kws yog nub Xanpataus, cov thawj povthawj hlub hab cov Falixais txawm moog cuag Philaj 63hab has tas, “Tug Tswv, peb ncu tau has tas thaus tug tuabneeg dlaag ntawd tseem muaj sa nyob mas Nwg tau has tas, ‘Tomqaab peb nub Kuv yuav sawv rovqaab lug.’ #Math 16:21; 17:23; 20:19; Malak 8:31; 9:31; 10:33-34; Lukas 9:22; 18:31-33 64Yogle ntawd, thov koj tso tuabneeg moog ua tuabzoo zuv lub qhovntxaa kuas puv peb nub. Yog tsi ua le ntawd, Nwg cov thwjtim yuav moog nyag Nwg lub cev hab moog qha rua suavdlawg has tas Nwg tub sawv huv qhovtuag rovqaab lug lawm. Tej kws puab dlaag zag nuav tseem yuav hajyam luj dlua thawjzag hab.”
65Philaj txawm has rua puab tas, “Mej cale coj ib paab tubrog moog zuv lub qhovntxaa kuas zoo npaum le mej muaj peevxwm zuv tau.”
66Puab txawm moog ua kuas lub qhovntxaa ntawd khov heev lug ntawm qhov kws nas kag homthawj rua dlaim laagzeb hab tso tubrog zuv zoo heev.
လက္ရွိေရြးခ်ယ္ထားမွု
Mathais 27: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.