Mathais 25
25
Zaaj Lug Pevtxwv Has Txug Kaum Tug Hluasnkauj
1“Lub sijhawm ntawd Vaajtswv lub Ntuj Ceebtsheej yuav pev ib yaam le kaum tug hluasnkauj kws taws teeb moog tog tug nraugvauv. #Lukas 12:35 2Tsib tug ruag hab tsib tug ntse. 3Cov kws ruag, puab nqaa teeb tabsis tsi nqaa roj txhaab nrug puab moog. 4Cov kws ntse, puab nqaa teeb hab ib leeg nqaa ib fwj roj txhaab nrug puab moog. 5Tub lig-lig lawm tug nraugvauv pheej tsi txawj tuaj, tes puab txawm tsaugzug ncaws nrujnris.
6“Thaus txug ib taagmo txawm muaj ib lub suab hu nrov-nrov has tas, ‘Tug nraugvauv tuaj lawm lau! Cale tawm tuaj tog Nwg!’ 7Kaum tug hluasnkauj txawm sawv hab nyag khu nyag lub teeb kuas cig. 8Tes tsib tug ruag has rua tsib tug ntse tas, ‘Thov muab mej cov roj faib mivntsiv rua peb hab, ruaqhov peb cov teeb tub yuav tuag.’ 9Tsib tug kws ntse teb tas, ‘Tsi tau, cov roj tsi txaus rua peb hab mej. Mej cale moog tom kab hab yuav ntxiv rua mej.’ 10Tabsis thaus tsib tug ruag taabtom moog yuav roj lawm; tug nraugvauv txawm tuaj txug. Tsib tug kws yeej npaaj txhij lawm, txhaj nrug tug nraugvauv moog noj tshoob huv tsev hab lub qhovrooj kuj kaw nkaus rua lawm.
11“Tomqaab ntawd tsib tug hluasnkauj kws ruag rov lug txug. Puab txawm hu has tas, ‘Tug tswv! Tug tswv! Thov qheb qhovrooj rua peb!’ #Lukas 13:25 12Tug nraugvauv teb tas, ‘Kuv qha tseeb rua mej has tas, Kuv tsi paub mej!’ ”
13Yexus xaus lug has tas, “Mej yuavtsum ceevfaaj, ruaqhov mej tsi paub nub twg hab lub sijhawm twg yuav muaj le ntawd.
Zaaj Lug Pevtxwv Has Txug Peb Tug Tubkhai
(Lukas 19:11-27)
14“Lub sijhawm ntawd Vaajtswv lub Ntuj Ceebtsheej yuav pev ib yaam le ib tug txivneej kws yuav moog rua txawv tebchaws; nwg hu nwg cov tubkhai lug hab kuas puab saib nwg tej vaajtse hab tej qhov txhua chaw. 15Nwg muab 5 taslaas#25:15: 1 taslaas yog raug nqe le ntawm 6,000 denalis. 1 denalis yog raug nqe le ib tug tuabneeg moog khwv ib nub. nyaj rua ib tug, muab 2 taslaas rua ib tug, hab muab 1 taslaas rua ib tug; puab nyag tau txais lawvle nyag lub peevxwm. Tes nwg txawm moog lawm. 16Tug tubkhai kws tau 5 taslaas txawm coj moog ua luam taamsim, hab nwg tsaam 5 taslaas ntxiv. 17Tug tubkhai kws tau 2 taslaas kuj coj moog ua luam tsaam 2 taslaas ntxiv. 18Tabsis tug tubkhai kws tau 1 taslaas txawm muab nwg tug tswv cov nyaj coj moog khawb qhov hab faus aav ca.
19“Tomqaab ntawd ntev loo, tug tswv rovqaab lug nrug puab txheeb tej ntaub ntawv saib seb puab muab cov nyaj ntawd moog ua lecaag lawm. 20Tug tubkhai kws tau 5 taslaas txawm nqaa 5 taslaas kws nwg tsaam lug hab has tas, ‘Tug Tswv, koj muab 5 taslaas rua kuv, koj saib seb, kuv tsaam 5 taslaas hab.’
21“Tug tswv has tas, ‘Zoo heev, koj yog tug tubkhai kws zoo hab ncaajnceeg! Koj ncaajnceeg rua tej yaam kws miv-miv, yogle ntawd, kuv yuav tsaa koj ua tug saib yaam kws luj. Koj cale lug hab koom nrug kuv txuj kev zoosab!’
22“Tug tubkhai kws tau 2 taslaas txawm lug has tas, ‘Tug tswv, koj muab 2 taslaas rua kuv, koj saib seb, kuv tsaam 2 taslaas hab.’ 23Tug tswv has tas, ‘Zoo heev, koj yog tug tubkhai kws zoo hab ncaajnceeg! Koj ncaajnceeg rua tej yaam kws miv-miv, yogle ntawd, kuv yuav tsaa koj ua tug saib yaam kws luj. Koj cale lug hab koom nrug kuv txuj kev zoosab!’
24“Tug tubkhai kws tau 1 taslaas txawm lug has rua tug tswv has tas, ‘Tug Tswv, kuv paub tas koj yog ib tug tuabneeg nruj heev; koj hlais tej qoobloo kws tub tsi yog koj cog, hab sau tej qoobloo kws tub tsi yog koj tseb. 25Kuv ntshai, kuv txhaj coj koj taslaas nyaj moog faus aav tseg. Koj saib seb, koj cov nyaj nyob ntawm nuav.’
26“Tug tswv has tas, ‘Tug nam tubkhai kws phem hab tubnkeeg! Koj tub paub lawm puas yog, has tas kuv hlais tej qoobloo kws tsi yog kuv cog, hab sau tej qoobloo kws tsi yog kuv tseb? 27Yogle ntawd, tub tsimnyog koj muab kuv cov nyaj coj moog tso rua huv txhaab nyaj, sub thaus kuv rov lug, kuv txhaj tau taagnrho kuv cov nyaj rovqaab lug hab tau paaj ntxiv. 28Mej cale muab cov nyaj ntawm nwg coj moog ntxiv rua tug kws muaj 10 taslaas. 29Ruaqhov txhua tug kws muaj lawm, tseem yuav muab tsaav ntxiv rua nwg, kuas nwg muaj nplua-mag; tabsis tug kws tsi muaj dlaabtsi le, txawm yog yaam nyuas miv-miv kws nwg muaj xwb los tseem yuav muab rhu tawm ntawm nwg moog. #Math 13:12; Malak 4:25; Lukas 8:18 30Cale muab tug tubkhai kws tsi muajnqes nuav pov rua saabnrau kws tsausntuj nti, nwg yuav quaj qw qes nav qawv qhov ntawd.’ #Math 8:12; 22:13; Lukas 13:28 #Lukas 19:11-27
Kev Txavtxim Thaus Kawg
31“Thaus Tuabneeg Leejtub lug le tug Vaajntxwv, hab taagnrho cov timtswv ceebtsheej nrug Nwg lug, Nwg yuav lug nyob sau Nwg lub zwmtxwv kws ci ntsaa-ab. #Math 16:27; Math 19:28 32Txhua tsaav tuabneeg huv qaabntuj yuav lug sau zog uake rua ntawm Nwg xubndlag. Thaus ntawd Nwg yuav muab suavdlawg cais ua ob paab, ib yaam le tug tswv yug yaaj muab paab yaaj cais tawm ntawm paab tshis. 33Nwg yuav kuas cov tuabneeg ncaajnceeg lug nyob ntawm Nwg saab xis, hab kuas cov tuabneeg kws tsi ncaajnceeg lug nyob ntawm Nwg saab txhumphem.
34“Thaus ntawd Vaajntxwv yuav has rua cov kws nyob ntawm Nwg saab xis has tas, ‘Mej cov kws Kuv Txiv tau foom koobmoov rua lawm, mej cale lug ntawm nuav! Cale lug txais lub tebchaws kws tub yeej npaaj rua mej txij thaus tsim nplajteb lug lawm. 35Ruaqhov thaus Kuv tshaib plaab, mej pub rua Kuv noj; thaus Kuv nqhes dlej, mej pub rua Kuv haus; thaus Kuv tuaj ua qhua, mej txais Kuv lug huv mej tsev; 36thaus Kuv tsi muaj rigtsho naav, mej muab rua Kuv naav; thaus Kuv muaj mob, mej paab tu Kuv; thaus Kuv raug kaw huv tsev lojcuj, mej tuaj saib Kuv!’
37“Thaus ntawd cov tuabneeg ncaajnceeg yuav teb tas, ‘Tug Tswv, thaus twg peb pum Koj tshaib plaab es peb muab mov rua Koj noj lossis pum Koj nqhes dlej es peb muab dlej rua koj haus? 38Thaus twg Koj tuaj ua qhua es peb txais Koj lug huv peb tsev lossis pum Koj tsi muaj rigtsho naav es peb muab rua Koj naav? 39Thaus twg peb pum Koj muaj mob lossis raug kaw huv tsev lojcuj es peb tuaj saib Koj?’ 40Vaajntxwv yuav teb tas, ‘Kuv qha tseeb rua mej has tas, thaus mej tau ua ib yaam dlaabtsi rua Kuv ib tug kwvtij kws tsi tseemceeb tshaajplawg nuav, tes yog mej paab Kuv lawm ntaag!’
41“Hab Nwg has rua cov kws nyob ntawm Nwg saab txhumphem has tas, ‘Mej cov kws raug Vaajtswv foom phem, mej cale tsiv ntawm Kuv moog! Cale moog rua huv lub cubtawg kws cig moog ibtxhis kws npaaj tseg ca rua dlaab ntxwgnyoog hab nwg cov tubqhe lawm! 42Thaus Kuv tshaib plaab, mej tsi pub mov rua Kuv noj; thaus Kuv nqhes dlej, mej tsi pub dlej rua Kuv haus; 43thaus Kuv tuaj ua qhua, mej tsi txais Kuv lug huv mej tsev; thaus Kuv tsi muaj rigtsho naav, mej tsi muab rua Kuv naav; thaus Kuv muaj mob hab raug kaw rua huv tsev lojcuj, mej tsi tuaj tu hab saib Kuv.’
44“Puab yuav teb nwg has tas, ‘Tug Tswv, thaus twg peb pum Koj tshaib plaab lossis nqhes dlej lossis tuaj ua qhua lossis tsi muaj rigtsho naav lossis muaj mob lossis raug kaw rua huv tsev lojcuj, es peb tsi paab Koj?’ 45Tug Vaajntxwv yuav teb puab has tas, ‘Kuv qha tseeb rua mej has tas, thaus kws mej tsi kaam paab ib tug kws tsi tseemceeb tshaajplawg nuav, tes yog mej tsi paab Kuv ntaag.’ 46Thaus ntawd, cov tuabneeg ntawd yuav raug txim moog ibtxhis le, tabsis cov tuabneeg ncaajnceeg yuav tau txujsa ntev dlhawv moog ibtxhis.” #Dani 12:2
လက္ရွိေရြးခ်ယ္ထားမွု
Mathais 25: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.