Mathais 23
23
Yexus Ceebtoom Txug Cov Xwbfwb Kws Qha Kevcai Hab Cov Falixais
(Malakaus 12:38-39; Lukas 11:43, 46; 20:45-46)
1Thaus ntawd Yexus has rua cov tuabneeg coob-coob hab Nwg cov thwjtim has tas, 2“Cov xwbfwb kws qha Kevcai hab cov Falixais yog cov kws muaj cai txhais Mauxes txuj Kevcai. 3Yogle ntawd, mej yuavtsum noog puab lug hab ua txhua yaam lawvle tej kws puab qha. Tabsis tsi xob ua lawvle puab ua, ruaqhov puab tsi ua lawvle puab qha. 4Puab muab tej nraa nyaav lug nog rua sau suavdlawg tej xubpwg, tabsis puab tub tsi kaam cev ib tug nyuas ntivteg moog paab thab tej nraa ntawd le.
5“Puab ua yaam twg puab xaav ua kuas suavdlawg pum puab xwb. Puab xaws tej lub naab luj-luj ntim Vaajtswv Txujlug hab muab paav rua ntawm puab hauvplaj hab ntawm puab tej ncejnpaab; hab xaws tej ntxhoo ntev-ntev rua ntawm puab tej qaab tw tsho!#23:5: ntxhoo ntev-ntev rua ntawm puab tej qaab tw tsho: Naav tej tsho le nuav yog ua lub cim qha has tas nwg muab sab npuab Vaajtswv npaum lecaag (saib Teev 15:37-41). #Math 6:1; 2Kev 6:8; Teev 15:38 6Thaus muaj rooj noj rooj haus, puab nyam moog nyob ntawm tej chaw saamxeeb xwb; hab thaus puab moog rua huv tej tsev saablaaj, puab nyam moog nyob tej rooj kws tseemceeb xwb. 7Puab nyam kuas suavdlawg hawm puab tom tej kab hab hu puab has tas, ‘Xwbfwb.’
8“Tabsis mej tsi xob ca leejtwg hu mej has tas ‘Xwbfwb,’ ruaqhov mej suavdlawg puavleej sistxig sisluag hab mej tsuas muaj tuabtug Xwbfwb xwb. 9Hab mej tsi xob hu cov tuabneeg kws nyob huv nplajteb nuav ib tug twg has tas, ‘Txiv,’ ruaqhov mej tsuas muaj tuableeg Txiv kws nyob sau ntuj ceebtsheej xwb. 10Hab tsi xob ca leejtwg hu mej has tas, ‘Tug Tswv,’ ruaqhov mej tsuas muaj tuabtug Tswv kws yog tug Mexiyas xwb. 11Tug kws tseemceeb tshaajplawg nyob rua huv mej, tug ntawd yog mej tug tubkhai. #Math 20:26-27; Malak 9:35; 10:43-44; Lukas 22:26 12Tug kws tsaa nwg lub fwjchim, yuav raug muab txu kuas qeg, hab tug kws txu nwg lub fwjchim, yuav raug muab tsaa kuas sab. #Lukas 14:11; 18:14
Yexus Rautxim Rua Cov Tuabneeg Ntsejmuag Ncaaj Sabnkhaus
(Malakaus 12:40; Lukas 11:39-42, 44, 52; 20:47)
13“Cov xwbfwb kws qha Kevcai hab cov Falixais kws ntsejmuag ncaaj sabnkhaus, mej yuav raug kev puamtsuaj lau! Mej kaw Vaajtswv lub Ntuj Ceebtsheej le qhovrooj tsi pub leejtwg moog, txawm yog mej kag los mej tub tsi moog rua huv, hab mej tseem txwv cov kws xaav moog kuas moog tsi tau rua huv hab. 14#23:14: Tej phoo ntawv qub kws xuas teg sau ntxiv nqai 14 nuav ntxiv rua: Cov xwbfwb kws qha Kevcai hab cov Falixais kws ntsejmuag ncaaj sabnkhaus, mej yuav raug kev puamtsuaj lau! Mej saib tsi taug cov pujntsuag hab txhaav puab tej vaajtse lug ua mej tug, hab uatxuj thov Vaajtswv ntev-ntev kuas suavdlawg qhuas mej! Vimle ntawd mej yuav raug txim nyaav tshaajplawg! (saib Malak 12:40).
15“Cov xwbfwb kws qha Kevcai hab cov Falixais kws ntsejmuag ncaaj sabnkhaus, mej yuav raug kev puamtsuaj lau! Mej moog nruabnqhuab nruabdleg thoob tebchaws, moog coj kuas tau ib tug lug coj mej txuj kevcai; tabsis thaus mej nrhav tau lug lawm, mej ua rua nwg hajyam ntxim poob rua huv ntujtawg tshaaj mej ob npaug!
16“Cov tuabneeg dligmuag kws coj kev, mej yuav raug kev puamtsuaj lau! Mej qha has tas, ‘Yog leejtwg tuav txug lub Tuamtsev coglug, txawm nwg tsi ua lawvle nwg tej lug cogtseg ntawd los tau; tabsis yog nwg tuav txug tej nyaj kub kws nyob huv lub Tuamtsev coglug, nwg yuavtsum tau ua lawvle nwg coglug tseg lawm.’ 17Cov tuabneeg dligmuag kws ruag! Yaam twg tseemceeb dlua, tej kub lossis lub Tuamtsev kws ua rua tej kub ntawd muajnqes? 18Hab mej tseem qha has tas, ‘Yog leejtwg tuav txug tej thaaj fij khoom coglug, txawm nwg tsi ua lawvle nwg tej lug cogtseg ntawd los tau. Tabsis yog nwg tuav txug tej khoom fij kws nyob sau lub thaaj coglug, nwg yuavtsum tau ua lawvle nwg coglug tseg lawm.’ 19Uacaag mej yuav dligmuag ualuaj! Yaam twg tseemceeb dlua? Tej khoom fij kws nyob sau lub thaaj, lossis lub thaaj kws ua rua tej khoom ntawd muajnqes? 20Yogle ntawd, thaus leejtwg tuav txug lub thaaj coglug, yog nwg tuav txug lub thaaj hab cov khoom fij kws nyob sau lub thaaj huv tuabsi; 21hab thaus leejtwg tuav txug lub Tuamtsev coglug, tes kuj yog nwg tuav txug lub Tuamtsev hab tug Vaajtswv kws nyob huv lub Tuamtsev ntawd huv tuabsi; 22hab thaus leejtwg tuav txug lub ntuj coglug, tes yog nwg tuav txug Vaajtswv lub zwmtxwv hab tug kws nyob sau lub zwmtxwv ntawd huv tuabsi. #Yaxaya 66:1; Math 5:34
23“Cov xwbfwb kws qha Kevcai hab cov Falixais kws ntsejmuag ncaaj sabnkhaus, mej yuav raug kev puamtsuaj lau! Mej muab ib feem kaum ntawm mej tej txumlom, xwsle pumhum, zaubtxhwb hab xyaabtxob rua Vaajtswv, tabsis mej tsi ua lawvle tej lug tseemceeb kws txuj Kevcai qha, xwsle kev coj ncaaj, kev taabncuab, hab kev ncaajnceeg. Tej nuav yog tej kws tsimnyog mej yuavtsum tau ua, tabsis ho tsi xob muab lwm nqai tsotseg hab. #Levi 27:30 24Cov tuabneeg dligmuag kws coj kev! Mej lim tug yoov miv-miv tawm huv cov dlej kws mej yuav haus, tabsis mej ho nqog tej tug ntxhuav!
25“Cov xwbfwb kws qha Kevcai hab cov Falixais kws ntsejmuag ncaaj sabnkhaus, mej yuav raug kev puamtsuaj lau! Mej ntxuav mej lub khob hab lub phaaj saabnrau xwb, tabsis saabhuv mas mej puvnkaus tej kev uanruj uatsiv hab sabhlub. 26Cov Falixais kws dligmuag! Yog mej xub ntxuav saabhuv tej khob hab tej phaaj uantej lawm, tes saabnrau yeej yuav huv hab!
27“Cov xwbfwb kws qha Kevcai hab cov Falixais kws ntsejmuag ncaaj sabnkhaus, mej yuav raug kev puamtsuaj lau! Mej zoo ib yaam le tej ntxaa kws muab moovsib pleev rua saabnrau dlawbpaug ua rua zoonkauj heev, tabsis saabhuv mas puvnkaus pobtxhaa tuabneeg tuag hab txhua yaam kws lwj ntsuav xwb. #Tegnum 23:3 28Ib yaam nkaus le ntawd, saabnrau mas suavdlawg xaav tas mej yog tuabneeg zoo, tabsis saabhuv mas mej puvnkaus txuj kev ua tuabneeg ntsejmuag ncaaj sabnkhaus hab kev txhum.
Yexus Qha Txug Tej Kws Puab Yuav Raug Txim
(Lukas 11:47-51)
29“Cov xwbfwb kws qha Kevcai hab cov Falixais kws ntsejmuag ncaaj sabnkhaus, mej yuav raug kev puamtsuaj lau! Mej txhim cov xwbfwb cev Vaajtswv lug tej ntxaa kuas zoonkauj, hab ua tej pemthuam zoo-zoo rua cov tuabneeg ncaajnceeg thaus u. 30Hab mej has tas, ‘Yog peb nyob tam kws peb cov yawmkoob nyob, mas peb yuav tsi koomteg nrug puab tua cov xwbfwb cev Vaajtswv lug.’ 31Mej has le ntawd, yog mej leeg has tas mej yog cov kws tua cov xwbfwb cev Vaajtswv lug ntawd le caajceg ntaag! 32Yijmeem ua tej kws mej cov yawmkoob tau chiv ua lawm kuas tav!
33“Cov nam naab hab cov nam noob naab sabphem! Mej xaav tas mej yuav tsi raug txavtxim hab yuav tsi poob moog rua huv ntujtawg nua lov? #Math 3:7; 12:34; Lukas 3:7 34Vimle nuav Kuv qha tseeb rua mej has tas, Kuv yuav khaiv cov xwbfwb cev Vaajtswv lug, hab cov tuabneeg txawjntse, hab ib cov xwbfwb tuaj qha mej; mej yuav muab puab qeeleej tua, muab qeeleej ntsa rua sau ntoo khaublig, muab qeeleej nplawm huv tej tsev saablaaj hab ntab puab tsiv ib lub nroog moog rua ib lub nroog. 35Vimle ntawd, txhua tug tuabneeg kws ncaajnceeg cov ntshaav yuav poob lug raug mej, suav txij thaus Anpees tug kws ncaajnceeg cov ntshaav lug txug rua thaus Npelekhiyas tug tub Xekhaliyas cov ntshaav kws mej muab tua ntawm nruabnraab lub Tuamtsev hab lub thaaj. #Chiv 4:8; 2Xwm 24:20-21 36Kuv qha tseeb rua mej has tas, txhua tug kws tau tua tuabneeg nuav lub txim yuav poob lug raug rua cov tuabneeg tam nuav!”
Yexus Txuj Kev Hlub Rua Cov Tuabneeg Huv Yeluxalees
(Lukas 13:34-35)
37“Yeluxalees, Yeluxalees! Koj muab cov xwbfwb cev Vaajtswv lug tua hab muab pobzeb ntaus cov tubkhai kws Vaajtswv khaiv lug qha koj! Muaj ntau zag Kuv tub yuav muab koj cov mivnyuas lug puag ib yaam le tug pujqab cuab nwg cov mivnyuas lug puag rua huvqaab nwg ob phob tis, tabsis koj ho tsi kaam Kuv ua le ntawd! 38Saib maj, koj lub Tuamtsev yuav raug muab tsotseg hab nyob nqhaa lug ca. #Yelemi 22:5 39Kuv qha rua koj has tas, koj yuav tsi pum Kuv ntxiv moog txug nub kws koj has tas, ‘Thov Vaajtswv foom koobmoov rua tug kws lug huv Vaajtswv lub npe lug.’ ” #Nnkauj 118:26
လက္ရွိေရြးခ်ယ္ထားမွု
Mathais 23: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.