Mathais 21
21
Yexus Moog Huv Yeluxalees Yaam Muajyeej
(Malakaus 11:1-11; Lukas 19:28-40; Yauhaas 12:12-19)
1Thaus Yexus hab Nwg cov thwjtim moog yuav txug lub nroog Yeluxalees, puab moog txug lub zog Npefakhes kws nyob ntawm lub Roob Txiv Ntoo-Roj. Yexus txawm khaiv ob tug thwjtim uantej moog 2hab qha obtug has tas, “Meb moog rua huv lub zog kws nyob tom meb hauvntej. Thaus meb moog txug huv lawm, meb yuav pum ob namtub neegluav khi rua ntawd. Meb muab dlaws hab caab lug rua Kuv. 3Yog muaj leejtwg has dlaabtsi rua meb, tes meb teb tas, ‘Tug Tswv#21:3: Tug Tswv; lossis ob tug neegluav ntawd tug tswv. xaav siv’; tes nwg yuav ca meb caab ob namtub neegluav lug taamsim ntawd.”
4Muaj le nuav kuas tav lawvle tug xwbfwb cev Vaajtswv lug tau has tseg lawm has tas,
5“Cale qha rua cov tuabneeg kws nyob huv lub nroog Xi-oos has tas,
Saib maj, mej tug vaajntxwv taabtom lug cuag mej!
Nwg txu fwjchim hab caij ib tug neegluav,
kws yog ib tug mivnyuas neegluav lug.” #Xekhali 9:9
6Ob tug thwjtim txawm moog hab ua lawvle Yexus tau qha rua obtug. 7Obtug txhaj caab tau ob namtub neegluav lug, obtug hle obtug ob lub tsho ntev lug pua tug mivnyuas neegluav nrauqaum rua Yexus caij. 8Cov tuabneeg coob-coob kws nrug Yexus moog ntawd muaj ibtxha hle puab tej tsho lug pua huv txujkev, hab ibtxha txav nplooj ntoos lug pua huv txujkev. 9Cov tuabneeg coob-coob kws moog ua Yexus ntej hab cov kws lawv Yexus qaab qw nrov-nrov has tas, “Hauxanas rua Daviv tug Tub! Thov Vaajtswv foom koobmoov rua tug kws lug huv Vaajtswv lub npe lug! Cale qhuas Vaajtswv!” #Nnkauj 118:25-26
10Thaus Yexus moog txug huv lub nroog Yeluxalees lawm, cov tuabneeg kws nyob huv lub nroog ntawd raag zumzawg hab sisnug has tas, “Tug nuav yog leejtwg?”
11Cov tuabneeg coob-coob ntawd teb tas, “Tug nuav yog Yexus, tug xwbfwb cev Vaajtswv lug kws tuaj peg lub nroog Naxalev huv xeev Kalilais tuaj.”
Yexus Moog Rua Ntawm Lub Tuamtsev
(Malakaus 11:15-19; Lukas 19:45-48; Yauhaas 2:13-22)
12Yexus moog rua huv lub Tuamtsev hab ntab cov tuabneeg kws tuaj yuav khoom hab muag khoom kuas cale tawm moog. Nwg muab cov tuabneeg pauv nyaj tej rooj hab cov tuabneeg muag nquab tej rooj nyob ntxeev huv tuabsi. 13Nwg has rua puab tas, “Vaajtswv tej Lug sau ca has tas, ‘Kuv lub Tuamtsev yog lub tsev thov Vaajtswv.’ Tabsis mej muab ua qhov chaw rua tubsaab nkaum!” #Yaxaya 56:7; Yelemi 7:11
14Muaj tuabneeg dligmuag hab cegtawv tuaj cuag Yexus huv lub Tuamtsev, mas Yexus khu puab txhua tug zoo huv tuabsi. 15Cov thawj povthawj hlub hab cov xwbfwb kws qha Kevcai chim heev thaus puab pum tej txujci tseemceeb kws Yexus ua ntawd, hab nov cov mivnyuas yau kws nyob huv lub Tuamtsev qw has tas, “Hauxanas rua Daviv tug Tub!” 16Puab nug Yexus has tas, “Koj puas nov tej lug kws cov mivnyuas ntawd has?”
Yexus teb tas, “Kuv nov. Mej tsi tau nyeem dlua Vaajtswv Txujlug kws has tas, ‘Vaajtswv tub cobqha cov mivnyuas yau hab cov mivnyuas mog kuas paub qhuas Vaajtswv rua qhov kws tsimnyog kawg nkaus’ lov?” #Nnkauj 8:2 (LXX)
17Tes Yexus txawm ncaim puab hab tawm huv lub nroog moog pw tom lub zog Npethanis lawm.
Yexus Foom Tsob Txiv Ncuavpas
(Malakaus 11:12-14, 20-24)
18Nub tomqaab thaus sawvntxuv, Yexus taug kev rov moog rua tom lub nroog, Nwg tshaib plaab. 19Nwg pum ib tsob txiv ncuavpas nyob ntawm ntug kev tes Nwg txawm moog saib, tabsis tsi pum muaj txiv le, tsuas muaj nplooj xwb. Yexus txawm has rua tsob ntoo tas, “Txij nuav moog koj yuav tsi txitxiv ib zag le lawm!” Taamsim ntawd tsob txiv ncuavpas txawm cale qhuav kag lawm.
20Thaus cov thwjtim pum le ntawd puab xaav tsi thoob le, puab has tas, “Uacaag tsob txiv ncuavpas nuav yuav qhuav sai ualuaj le?”
21Yexus teb tas, “Kuv qha tseeb rua mej has tas, yog mej ntseeg tag-tag hab tsi ua xyemxyaav, mej yeej muaj peevxwm ua tau ib yaam le Kuv ua rua tsob txiv ncuavpas nuav. Tsi taag le ntawd xwb, mej tseem yuav muaj peevxwm has rua lub roob nuav has tas, ‘Cale txaav moog rua huv dlej havtxwv,’ los lub roob yeej yuav ua lawvle mej has. #Math 17:20; 1Klt 13:2 22Yog mej ntseeg tag, mej thov yaam twg, mej yuav tau yaam ntawd.”
Leejtwg Tsocai Rua Yexus
(Malakaus 11:27-33; Lukas 20:1-8)
23Yexus rov moog rua huv lub Tuamtsev; thaus Nwg taabtom qha, cov thawj povthawj hlub hab cov txwjlaug txawm tuaj cuag Nwg hab nug Nwg has tas, “Koj tau cai qhovtwg lug ua tej nuav? Leejtwg tsocai rua koj?”
24Yexus teb puab has tas, “Kuv yuav nug mej ib lus, yog mej teb tau, Kuv maamle qha rua mej has tas leejtwg tsocai rua Kuv ua tej nuav. 25Leejtwg tsocai rua Yauhaas muab tuabneeg ua kevcai rausdlej, Vaajtswv lossis tuabneeg?”
Puab txawm sisthaam has tas, “Peb yuav teb lecaag? Yog peb teb tas, ‘Vaajtswv tsocai rua Yauhaas ua,’ Nwg yuav has rua peb tas, ‘Ua lecaag mej ho tsi ntseeg Yauhaas?’ 26Tabsis yog peb ho teb tas, ‘Tuabneeg tsocai rua Yauhaas ua,’ peb ntshai tsaam cov pejxeem ho ua phem rua peb, ruaqhov suavdlawg yeej paub tas Yauhaas yog ib tug xwbfwb cev Vaajtswv lug.” 27Yogle ntawd, puab txhaj teb Yexus has tas, “Peb tsi paub.”
Yexus txhaj has rua puab tas, “Yogle ntawd, Kuv los yuav tsi qha rua mej has tas yog leejtwg tsocai rua Kuv ua tej nuav hab.”
Zaaj Lug Pevtxwv Has Txug Ob Tug Tub
28“Mej xaav lecaag? Muaj ib tug yawm muaj ob tug tub. Nwg moog has rua tug tub hlub tas, ‘Tub, nubnua koj moog tu lub vaaj txivmaab.’ 29Tug tub hlub teb tas, ‘Kuv tsi moog,’ tabsis tomqaab ntawd nwg txawm hloov sab hab moog lawm. 30Leejtxiv kuj moog has rua tug tub yau ib yaam le ntawd hab. Tug tub yau teb tas, ‘Txiv, kuv maamle moog,’ tabsis nwg ho tsi moog. 31Ob tug tub nuav, tug twg yog tug kws ua lawvle leejtxiv lub sab nyam?”
Puab teb tas, “Yog tug tub hlub.”
Yexus has rua puab tas, “Kuv qha tseeb rua mej has tas, cov tuabneeg sau se hab cov namndlav yuav xub ua mej ntej moog rua huv Vaajtswv lub Tebchaws. 32Ruaqhov Yauhaas tug kws muab tuabneeg ua kevcai rausdlej tub lug qha txuj kev ncaajnceeg rua mej, tabsis mej tsi kaam ntseeg nwg, tsuas yog cov tuabneeg sau se hab cov namndlav txhaj ntseeg xwb. Txawm yog mej tub pum le ntawd los mej yeej tsi kaam tso mej tej kev txhum tseg hab lug ntseeg nwg tej lug.” #Lukas 3:12; 7:29-30
Zaaj Lug Pevtxwv Has Txug Cov Tuabneeg Kws Tu Lub Vaaj Txivmaab
(Malakaus 12:1-12; Lukas 20:9-19)
33Yexus has tas, “Mej rov noog dlua ib zaaj lug pevtxwv. Muaj ib tug tswv vaaj, nwg cog ib cov txivmaab hab xov vaaj puagncig rua, nwg khawb ib lub qhov tsuam txivmaab hab ua ib lub chaw tsomfaaj zuv. Nwg muab cov txivmaab ntawd xauj rua ib cov tuabneeg tu, tes nwg txawm moog rua lwm tebchaws lawm. #Yaxaya 5:1-2 34Thaus txug lub caij dle txivmaab, nwg txawm khaiv nwg cov tubqhe moog sau tej txivmaab kws yog nwg feem lug rua nwg.
35“Cov tuabneeg kws tu lub vaaj txawm muab tug tswv cov tubqhe ntawd nteg, muab ib tug ntaus, muab ib tug tua, hab muab pobzeb ntaus ib tug. 36Tug tswv rov khaiv dlua ib cov tubqhe kws coob dlua thawjzag moog, tabsis cov tuabneeg kws tu lub vaaj kuj ua phem rua puab ib yaam nkaus le ntawd hab. 37Thaus kawg tug tswv vaaj txhaj khaiv kag nwg tug tub moog cuag puab. Nwg xaav tas, ‘Uacaag los puab yeej yuav fwm kuv tug tub xwb.’
38“Tabsis thaus cov tuabneeg kws tu lub vaaj pum tug tub ntawd, puab txawm sisthaam has tas, ‘Tug nuav ntaag lau, yog tug tswv vaaj tug tub. Peb cale muab nwg tua povtseg, peb txhajle tau nwg tej teejtug!’ 39Puab txawm nteg kag nwg, muab nwg thawb rua saab ntug vaaj nrau hab muab nwg tua lawm.”
40Yexus nug has tas, “Thaus tug tswv vaaj rovqaab lug, nwg yuav ua lecaag rua cov tuabneeg kws tu lub vaaj ntawd?”
41Puab teb tas, “Nwg yuav muab cov tuabneeg sabphem ntawd tua kuas tuag, hab muab lub vaaj txivmaab ntawd xauj rua lwm cov tu. Thaus txug lub caij faib txivmaab, puab yuav faib cov kws yog nwg feem rua nwg.”
42Yexus has rua puab tas, “Mej tsi tau nyeem Vaajtswv tej Lug seb has lecaag lov?
“ ‘Lub pobzeb kws cov tuabneeg ua tsev muab povtseg lawm,
lub ntawd tub dlhau lug ua lub kws tseemceeb dlua ndlais lawm.
Qhov nuav yog tug Tswv ua;
yog yaam zoo kawg nkaus rua peb pum!’ ” #Nnkauj 118:22-23
43Yexus has ntxiv tas, “Kuv qha rua mej has tas Vaajtswv yuav muab Nwg lub Tebchaws tshem tawm ntawm mej moog rua ib tsaav tuabneeg kws yuav txitxiv zoo.” 44#21:44: Tej phoo ntawv qub kws xuas teg sau ntxiv nqai 44 nuav ntxiv rua: Yog leejtwg qaug tsoo lub pobzeb ntawd, tug ntawd yuav tawg taag, hab yog lub pobzeb ntawd poob lug raug leejtwg, tug ntawd yuav ntsoog taag huv tuabsi (saib Lukas 20:18).
45Thaus cov thawj povthawj hlub hab cov Falixais nov tej lug pevtxwv kws Yexus qha ntawd, puab paub tas yog Yexus has txug puab, 46yogle ntawd, puab txhaj npaajsab yuav nteg Yexus, tabsis puab kuj ntshai cov tuabneeg coob-coob ntawd, ruaqhov suavdlawg yeej paub tas Yexus yog ib tug xwbfwb cev Vaajtswv lug.
လက္ရွိေရြးခ်ယ္ထားမွု
Mathais 21: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.