Chivkeeb 39
39
Yauxej Hab Pautifas Tug Quaspuj
1Cov tuabneeg Yisamayees coj Yauxej moog rua tebchaws Iziv, hab puab muab nwg muag rua Pautifas kws yog Falaus#39:1: Falaus: tsi yog ib lub npe tuabneeg tabsis yog ib lub meejmom kws txhais has tas “vaajntxwv.” tug thawj tubrog saib cov tubrog faajxwm kws zuv Falaus lub loog. 2Tug TSWV nrugnraim Yauxej ua rua Yauxej tegnum tawgpaaj txitxiv heev. Yauxej nyob huv nwg tug tswv kws yog tuabneeg Iziv lub tsev. #Tegnum 7:9 3Pautifas pum tas tug TSWV nrugnraim Yauxej hab ua rua txhua tegnum kws Yauxej ua puavleej tav moog rua qhov zoo. 4Pautifas txaussab heev rua Yauxej nwg txhaj tsaa Yauxej ua nwg tug tubkhai ntawm nwg xubndlag, hab tso plhuav nwg lub vaajtse hab cuabtaam rua Yauxej ua tug saib.
5Txij thaus ntawd lug, vim Yauxej nrug nwg nyob, tug TSWV txhaj foom koobmoov rua tug tuabneeg Iziv ntawd tsev tuabneeg hab txhua yaam kws nwg muaj nyob huv nwg lub vaaj lub tsev hab huv nwg tej teb. 6Pautifas muab txhua yaam kws nwg muaj cob rua Yauxej saib hab nwg tsosab plhuav tsi txhawj txug ib yaam dlaabtsi le, tsuas yog tshwj tej zaub-mov kws nwg noj nkaus xwb.
Yauxej yog ib tug hluas kws zoo cev hab zoonraug heev, 7tes tau tsi ntev Pautifas tug quaspuj txawm nyam Yauxej hab taij Yauxej has tas, “Koj cale lug nrug kuv pw!” 8Yauxej tsi kaam moog hab nwg has rua Pautifas tug quaspuj has tas, “Koj saib maj, vim muaj kuv nyob rua ntawm nuav, kuv tug tswv txhaj tsi muaj kev nyuajsab hab txhawj txug ib yaam dlaabtsi nyob rua huv nwg lub tsev hlo le. Nwg muab txhua yaam kws nwg muaj tso plhuav rua kuv ua tug saib. 9Huv lub tsev nuav kuv muaj meejmom ib yaam le nwg. Nwg yeej tsi txwv kuv ib yaam dlaabtsi le, tsuas tshwj koj kws yog nwg tug quaspuj xwb. Kuv yuav ua lecaag ua tej kev phem kev qas luj le nuav hab ua txhum rua Vaajtswv?” 10Txawm yog nwg yuav najnub taij kuas Yauxej moog nrug nwg pw los Yauxej yeej tsi kaam moog le.
11Tabsis muaj ib nub Yauxej moog rua huv tsev kws yog moog ua nwg tegnum, nub ntawd tej tubkhai tsi muaj ib tug nyob huv tsev le lawm. 12Pautifas tug quaspuj txawm lug ntsab nkaus Yauxej lub tsho ntev hab has tas, “Koj cale lug nrug kuv pw!” Tabsis Yauxej hle hlo nwg lub tsho ntev rua ntawm Pautifas tug quaspuj txhais teg, tes nwg txawm dlha tsiv tawm rua nrauzoov lawm.
13Thaus Pautifas tug quaspuj pum tas Yauxej hle Yauxej lub tsho ntev rua nwg hab dlha tsiv tawm rua nrauzoov lawm, 14nwg txawm qw rua cov tubkhai kws zuv nwg lub tsev lug hab has tas, “Mej saib seb! Tug tuabneeg Henplais kws kuv tug quasyawg coj lug rua huv tsev nuav, nwg ua saib tsi taug peb kag le! Nwg cale lug huv kuv txaaj hab yuav muab kuv mos, tabsis kuv qw tawg ntho. 15Thaus nwg nov kuv qw tes nwg cale dlha tsiv rua nrauzoov hab tseg nwg lub tsho ntev rua ntawm kuv ib saab.”
16Pautifas tug quaspuj khaws Yauxej lub tsho ntev ntawd ca moog txug thaus Yauxej tug tswv rov lug txug tsev. 17Tes nwg txawm pav zaaj nuav rua nwg tug quasyawg noog has tas: “Tug tubqhe Henplais kws koj coj lug nrug wb nyob, nwg lug huv kuv txaaj hab ua saib tsi taug kuv! 18Tabsis thaus kuv qw tawg ntho, tes nwg txawm dlha tsiv rua nrauzoov hab tseg nwg lub tsho rua ntawm kuv ib saab.”
19Thaus Yauxej tug tswv nov tej lug kws nwg tug quaspuj pav ntawd, nwg chim kawg nkaus le. 20Nwg txhaj kuas tuabneeg muab Yauxej nteg hab coj moog kaw rua huv qhov chaw kws kaw vaajntxwv cov tuabneeg raug txim; tes Yauxej txhaj moog nyob rua ntawd lawm.
21Tabsis tug TSWV yeej nrugnraim Yauxej hab foom koobmoov rua Yauxej, Nwg tau ua rua tug kws saib lub tsev lojcuj ntawd txaussab heev rua Yauxej. 22Tug kws saib lub tsev lojcuj ntawd tau tsaa Yauxej ua tug tswj taagnrho cov tuabneeg raug txim hab ua tug saib txhua yaam kws nyob huv lub tsev lojcuj. 23Tug kws saib lub tsev lojcuj yeej tsosab plhuav, tsi taag yuav taug qaab saib tej num kws nwg tso rua Yauxej ua le, ruaqhov tug TSWV nrugnraim Yauxej hab txhua yaam kws nwg ua puavleej tav moog rua qhov zoo huv tuabsi.
လက္ရွိေရြးခ်ယ္ထားမွု
Chivkeeb 39: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.