Chivkeeb 34
34
Dinas Raug Yuam
1Muaj ib nub Yakhauj hab Le-as obtug tug ntxhais Dinas txawm tawm moog saib cov ntxhais hluas kws yog tuabneeg Kana-aas. 2Hamaus kws yog tuabneeg Hivis, nwg yog tug thawj kws saib cheebtsaam ntawd; thaus nwg tug tub Sekhees pum Dinas, Sekhees txawm tuaj nteg Dinas moog hab muab Dinas yuam. 3Tabsis vim nwg pum tas Dinas kws yog Yakhauj tug ntxhais ntawd zoonkauj heev, nwg cale nyam Dinas hab cale haslug qaabzib heev rua Dinas. 4Sekhees txhaj has rua nwg txiv has tas, “Txiv, kuv xaav kuas koj moog yuav tug ntxhais ntawd lug ua kuv tug quaspuj.”
5Yakhauj paub tas nwg tug ntxhais raug kev poob ntsejmuag, tabsis vim nwg cov tub moog yug nwg cov tsaj rua nraag teb lawm, nwg txhaj tsi has ib yaam dlaabtsi txug thaus nwg cov tub lug tsev txhij. 6Hamaus kws yog Sekhees txiv txhaj tuaj nrug Yakhauj thaam, 7tawmthawj thaus Yakhauj cov tub rov nraag teb lug txug tsev. Thaus puab nov txug zaaj nuav, puab mobsab hab chim heev ruaqhov Sekhees tau ua ib qhov kws rhuav ntsej rhuav muag heev, ua saib tsi taug cov tuabneeg Yixalayees kws yog nwg muab Yakhauj tug ntxhais yuam le ntawd.
8Hamaus has rua Yakhauj has tas, “Kuv tug tub Sekhees nyam koj tug ntxhais heev le lawm, yogle ntawd, thov muab koj tug ntxhais rua nwg yuav ua quaspuj. 9Thov peb lug sis coglug has tas yuav muaj kev txis tshoob txis kug nruabnraab ntawm mej tsaav tuabneeg hab peb tsaav tuabneeg. 10Mej nrug peb nyob huv peb lub tebchaws nuav los yeej tau. Mej yuav nyob thaaj chaw twg los nyob ntawm mej nyam, qheb kev lug rua mej ua laag ua luam, hab mej xaav yuav vaaj yuav tsev lug ua mej ndlagtug los yeej tau.”
11Tes Sekhees has rua Dinas txiv hab nwg cov nug has tas, “Thov mej ua zoo rua kuv, kuv yuav muab txhua yaam kws mej xaav tau rua mej. 12Thov qha seb yaam khoomplig twg kws mej xaav tau, hab has tug nqe tshoob kuas sab npaum le mej xaav sau; mej xaav kuas them npaum caag los kuv yuav them npaum ntawd rua mej, tsuav yog mej kaam muab nwg rua kuv yuav ua quaspuj xwb.”
13Vim qhov kws Sekhees tau ua rua puab tug muam Dinas raug kev poob ntsejmuag, Yakhauj cov tub txhaj teb dlaag ntsuav rua Sekhees hab nwg txiv Hamaus. 14Puab has rua Sekhees has tas, “Peb tsi pumzoo ca peb tug muam moog yuav ib tug txivneej kws tsi tau ua kevcai txav tawv; yog ua le ntawd mas rhuav peb ntsejmuag heev. 15Tsuas muaj tuabqho kws peb txhaj yuav kaam xwb: mej txhua tug txivneej yuavtsum tau ua kevcai txav tawv ib yaam le peb ua huv tuabsi, 16mas peb tsaav tuabneeg hab mej tsaav tuabneeg txhaj yuav paub ua tshoob ua kug. Peb txhaj yuav nrug mej nyob tau uake hab txhaj yuav nrug mej ua tau ib tsaav tuabneeg. 17Tabsis yog mej tsi leeg ua lawvle peb has hab ua kevcai txav, tes peb yuav tuaj coj peb tug muam hab tsiv tawm huv tebchaws nuav moog.”
18Hamaus hab nwg tug tub Sekhees pumzoo yuav lawvle puab has ntawd, 19tes tug tub hluas txawm maajnroog ua lawvle puab tau has ntawd, ruaqhov nwg nyam Yakhauj tug ntxhais heev. Sekhees yog tug kws tseemceeb tshaajplawg nyob rua huv nwg tsev tuabneeg.
20Hamaus hab nwg tug tub Sekhees txhaj moog rua tim qhov chaw saablaaj kws nyob rua tim roojloog hab has rua cov pejxeem huv lub moos has tas: 21“Cov tuabneeg nuav yog tuabneeg zoo, ca puab nrug peb nyob huv lub tebchaws nuav hab ca puab moog-moog lug-lug ywjsab. Lub tebchaws los kuj dlaav txaus rua puab nyob hab. Ca peb tej tub moog yuav puab tej ntxhais hab puab tej tub tuaj yuav peb tej ntxhais. 22Puab yeej zoosab nrug peb nyob hab nrug peb koom ua ib tsaav tuabneeg, tabsis muaj ib txujcai kws peb yuavtsum tau ua, qhov ntawd yog peb txhua tug txivneej yuavtsum tau ua kevcai txav tawv le puab. 23Taagnrho puab tej tsajtxhu hab tej khoom yuav yog peb le huv tuabsi hab, puas yog maj? Yogle ntawd, ca peb ua le puab has hab ca puab nrug peb nyob.” 24Taagnrho cov pejxeem suavdlawg puavleej pumzoo yuav hab ua lawvle Hamaus hab Sekhees obtug has ntawd, tes txhua tug txivneej txhaj ua kevcai txav tawv taagnrho.
25Peb nub tomqaab kws cov txivneej ua kevcai txav tawv ntawd taag, tej nqaj tseem mob-mob, Yakhauj ob tug tub kws yog Xime-oos hab Levis, kws yog Dinas ob tug nug, txawm nqaa obtug ob raab ntaaj nyagkev tuabywv moog rua huv nroog, hab muab cov txivneej huv tua tuag taag, 26nrug rua Hamaus hab nwg tug tub Sekhees huv tuabsi. Tes obtug txawm coj Dinas tawm huv Sekhees tsev lug lawm. 27Tomqaab kws Xime-oos hab Levis obtug muab cov tuabneeg ntawd tua tuag taag lawm, Yakhauj cov tub kws u tseem moog fuab lub moos ua pauj qhov kws puab tug muam tau poob ntsejmuag ntawd. 28Puab caab taagnrho tej tsajtxhu, nyuj, neegluav hab muab txhua yaam khoom kws nyob huv nroog hab huv tej teb nqaa huv tuabsi moog lawm. 29Puab nqaa txhua yaam kws muajnqes, nteg taagnrho tej quaspuj hab mivnyuas, hab nqaa txhua yaam kws nyob huv tej vaajtse moog huv tuabsi.
30Yakhauj has rua Xime-oos hab Levis has tas, “Meb ua rua kuv ntsib teebmeem lawm; taamsim nuav cov tuabneeg Kana-aas hab cov tuabneeg Pelixes, hab txhua tug kws nyob huv lub tebchaws nuav ntxub kuv heev. Kuv tsi muaj tuabneeg coob; yog puab taagnrho sissau tuaj tawmtsaam hab tua kuv, tes peb tsev tuabneeg kawg raug kev puamtsuaj xwb.”
31Tabsis obtug teb ua npautawg vog has tas, “Es yuav ca Sekhees coj wb tug muam moog dleev zoole ib tug namndlav nua lov?”
လက္ရွိေရြးခ်ယ္ထားမွု
Chivkeeb 34: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.