Tegnum 23
23
1Paulus tsaa qhovmuag saib cov thawjcoj huv Koomhum qebsab hab has tas, “Cov kwvtij, kuv lub sab yeej paub meej-meej tas kuv ua kuv lub neej zoo lecaag taabmeeg Vaajtswv lug txug najnub nua.” 2Tug Tuam Povthawj Hlub Ananias txawm has rua cov tuabneeg kws sawv ze ntawm Paulus kuas ntaus Paulus qhovncauj. 3Paulus has rua Ananias has tas, “Vaajtswv yeej yuav ntaus koj lau, tug nam tuabneeg kws uatxuj muab moovsib lug pleev rua phaabntsaa kuas dlawb! Koj tuaj nyob ntawm ko txavtxim rua kuv lawvle txuj Kevcai, tabsis qhov kws koj kuas puab ntaus kuv ntawd, koj tub ua txhum txuj Kevcai lawm los sav!” #Math 23:27-28
4Cov tuabneeg kws sawv ze Paulus has rua Paulus has tas, “Koj tseem yuav txobthuam Vaajtswv tug Tuam Povthawj Hlub hab lov?”
5Paulus teb puab has tas, “Cov kwvtij, kuv tsi paub tas nwg yog tug Tuam Povthawj Hlub, ruaqhov Vaajtswv Txujlug sau tseg has tas, ‘Mej tsi xob haslug phem rua tug kws saib mej.’ ” #Tsiv 22:28
6Thaus Paulus pum tas, cov tuabneeg kws tuaj saablaaj ntawd muaj ibtxha yog cov Xadukais hab ibtxha yog cov Falixais, tes Paulus txawm has nrov-nrov rua cov thawjcoj huv Koomhum qebsab tas, “Cov kwvtij, kuv yog ib tug Falixais, yog cov Falixais ib tug tub. Qhov kws kuv raug mej coj tuaj txavtxim ntawm nuav tub yog vim kuv casab has tas cov tuabneeg kws tuag lawm yuav sawv rov lug muaj txujsa!” #Tegnum 26:4; Filipi 3:5
7Thaus Paulus has le ntawd taag, cov Falixais hab cov Xadukais txawm pib siscaav, tes puab cale faib ua ob paab. ( 8Rua qhov cov Xadukais has tas yeej tsi muaj kev sawv huv qhovtuag rovqaab lug, tsi muaj timtswv ceebtsheej hab tsi muaj ntsujplig; tabsis cov Falixais ntseeg tas peb yaam ntawd yeej muaj huv tuabsi.) #Math 22:23; Malak 12:18; Lukas 20:27 9Suavdlawg yimfuab siscaav nrov dlua qub ntxiv, tes cov xwbfwb kws qha Kevcai kws yog cov Falixais paab, muaj qeeleej txawm sawvtseeg hab tawmtsaam nyaav heev has tas, “Peb tsi pum tug txivneej nuav ua ib qhov txhum le! Tejzag yeej yog ib tug ntsujplig lossis ib tug timtswv ceebtsheej lug has rua nwg tag!”
10Suavdlawg siscaav muajceem heev, ua rua tug thawj tubrog pawg txheeb ntshai nyobtsaam puab muab Paulus chua ndluag ua ob-peb ceg, nwg txhaj kuas nwg cov tubrog nqeg moog hab coj Paulus tawm huv cov tuabneeg ntawd moog rua huv lub yeej.
11Mo ntawd tug Tswv lug sawv ntawm Paulus ib saab hab has tas, “Koj tsi xob ntshai! Koj tau ua timkhawv txug Kuv nyob huv lub nroog Yeluxalees nuav lecaag, koj yuavtsum ua ib yaam le ntawd rua tim lub nroog Loos hab.”
Cov Yudais Tuavhuv Yuav Tua Paulus
12Thaus kaajntug ib cov Yudais txawm tuaj saablaaj tuavhuv uake. Puab coglug has tas puab yuav tsi noj tsi haus ib yaam dlaabtsi moog txug thaus puab tua tau Paulus tsaiv. 13Cov kws tuaj tuavhuv uake ntawd muaj plaubcaug tawm leej. 14Tes puab txawm moog cuag cov thawj povthawj hlub hab cov txwjlaug, puab has tas, “Peb tau coglug khovkho lawm has tas peb yuav tsi noj tsi haus ib yaam dlaabtsi moog txug thaus peb tua tau Paulus tsaiv. 15Yogle ntawd, mej hab cov thawjcoj huv Koomhum qebsab cale khaiv tuabneeg moog has rua cov tuabneeg Loos tug thawj tubrog pawg txheeb kuas coj Paulus tuaj cuag mej. Mej uatxuj ua le mej xaav taug Paulus zaaj kuas meej dlua qub ntxiv. Tabsis peb yuav npaaj kuas txhij muab nwg tua povtseg uantej nwg tuaj txug ntawm nuav.”
16Tabsis Paulus tug muam tug tub txawm nov txug puab txuj kev tuavhuv nuav, yogle ntawd nwg txhaj moog rua huv lub yeej hab qha rua Paulus paub. 17Paulus txawm hu ib tug thawj tubrog pawg pua lug cuag nwg hab has tas, “Thov koj coj tug tub hluas nuav moog cuag tug thawj tubrog pawg txheeb, nwg muaj lug yuav has rua tug thawj tubrog ntawd noog.” 18Tug thawj tubrog pawg pua txawm coj tug tub hluas ntawd moog cuag tug thawj tubrog pawg txheeb hab has tas, “Tug Paulus kws raug txim ntawd tau hu kuv hab thov kuas kuv coj tug tub hluas nuav tuaj cuag koj, ruaqhov nwg muaj lug yuav has rua koj noog.”
19Tug thawj tubrog pawg txheeb tuav tug tub hluas ntawd teg coj moog rua ibcaag hab nug has tas, “Koj muaj lug dlaabtsi yuav has rua kuv?”
20Nwg teb tas, “Ibtxha Yudais tub saablaaj hum lawm has tas, pigkig puab yuav tuaj thov koj coj Paulus moog cuag cov thawjcoj huv Koomhum qebsab, puab yuav uatxuj has tas cov thawjcoj huv Koomhum qebsab xaav taug Paulus zaaj kuas meej dlua qub ntxiv. 21Tabsis koj tsi xob noog puab has, ruaqhov muaj plaubcaug tawm leej tub moog nkaum hab tog kev yuav tua Paulus lawm. Puab tau coglug tseg lawm has tas puab yuav tsi noj tsi haus ib yaam dlaabtsi moog txug thaus puab tua tau Paulus tsaiv. Puab tub npaaj txhij lawm, puab tsuas yog tog seb koj yuav has lecaag xwb.”
22Tug thawj tubrog pawg txheeb txawm has tas, “Koj tsi xob qha rua leejtwg paub tas koj tub tuaj qha tej nuav rua kuv lawm.” Tes nwg txawm tso tug hluas ntawd moog lawm.
Xaa Paulus Moog Cuag Tug Tswvxeev Felis
23Tug thawj tubrog pawg txheeb hu nwg ob tug thawj tubrog pawg pua lug cuag nwg hab has tas, “Meb cale moog txhij 200 leej tubrog, txhij cov tubrog caij neeg 70 leej, hab cov tubrog nkaug muv 200 leej, thaus cuaj teev tsausntuj, mej cale sawvkev moog rua peg lub nroog Xixaleyas. 24Mej npaaj tug puav neeg rua Paulus caij hab ua tuabzoo xaa nwg moog kuas txug tug tswvxeev Felis.”
25Tes tug thawj tubrog pawg txheeb tau sau ib tsaab ntawv has le nuav:
26“Hawm txug tug Tswvxeev Felis, kuv yog Khlaudius Lixias. 27Cov Yudais tau nteg tug txivneej nuav hab yuav muab nwg tua povtseg. Kuv nov tas nwg yog pejxeem Loos, kuv txhaj coj kuv cov tubrog moog cawm nwg. 28Kuv xaav paub seb tej kws puab kom nwg ntawd yog dlaabtsi, kuv txhaj coj nwg moog cuag cov thawjcoj huv Koomhum qebsab. 29Kuv pum tas nwg yeej tsi tau ua ib yaam dlaabtsi kws yuav tsimnyog raug tuag lossis raug kaw rua huv tsev lojcuj; tej kws puab kom nwg ntawd yog has txug puab txuj kevcai xwb. 30Thaus kuv nov tas muaj cov tuavhuv yuav muab nwg tua povtseg, kuv txhaj xaa kag nwg tuaj cuag koj. Kuv tau has rua cov tuabneeg kws kom nwg has tas kuas puab coj puab tej lug tsi txaussab ntawd tuaj has timntsej timmuag ntawm koj.”
31Cov tubrog ntawd tau ua lawvle tug thawj tubrog pawg txheeb has. Mo ntawd puab coj Paulus moog txug ncua peg lub nroog Aatipatis. 32Nub tomqaab cov tubrog kws moog kutaw, puab txawm rovqaab moog rua nraag puab lub yeej lawm, tsuas tseg cov tubrog kws caij neeg nrug Paulus moog ntxiv lawm xwb. 33Thaus puab moog txug huv lub nroog Xixaleyas lawm, puab txhaj xaa tsaab ntawv hab muab Paulus moog cob rua tug Tswvxeev. 34Thaus tug Tswvxeev nyeem tsaab ntawv ntawd taag, nwg txhaj nug Paulus seb Paulus tuaj lub tebchaws twg tuaj. Thaus tug Tswvxeev paub tas Paulus tuaj peg tebchaws Kilikias tuaj, 35nwg txhaj has tas, “Tog cov tuabneeg kws kom koj tuaj txug tsaiv, kuv maamle noog koj has.” Tes nwg has kuas cov tubrog zuv Paulus zoo-zoo nyob rua huv vaajntxwv Helauj lub loog.
လက္ရွိေရြးခ်ယ္ထားမွု
Tegnum 23: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.