Xekhaliyas 9
9
Txiavtxim Rau Yixalayees Cov Yeebncuab
1Ntawm no yog tus TSWV cov lus:
Nws tau txiavtxim rau lub tebchaws Hadakes thiab lub nroog Damaxakas. Tsis yog txiavtxim rau txhua xeem Yixalayees xwb, tiamsis txiavtxim rau cov Xilias lub tuamceeb nroog uas yog tus TSWV tug. #Yaxaya 17:1-3; Yelemi 49:23-27; Amaus 1:3-5 2Lub nroog Hamaj, uas nyob rau ntawm tebchaws Hadakes tus ciam, thiab tej nroog uas nyob pem Thailes thiab Xidoos, nrog rau lawv tej txujtes zoo huv tibsi. 3Lub nroog Thailes tau ua tej chaw fajxwm uas khov heev thaiv nws thiab tau muab nyiaj muab kub los teeb ua tej pawg cia, zoo yam tej khoom liamsim xwb! 4Tiamsis tus TSWV yuav muab txhua yam uas nws muaj tshem mus thiab yuav muab nws tej kev npluanuj cuam rau hauv hiavtxwv, thiab lub nroog yuav raug hlawv kom kubhnyiab du lug mus. #Yaxaya 23:1-18; Exek 26:1—28:26; Yau 3:4-8; Amaus 1:9-10; Math 11:21-22; Lukas 10:13-14
5Lub nroog Asekeloos yuav pom tej xwm no thiab yuav ntshai heev. Lub nroog Nkaxas yuav pom tej xwm no thiab yuav mobsiab kawg nkaus. Lub nroog Ekiloos los ib yam nkaus, nws txoj kev ciasiab yuav puasntsoog mus. Lub nroog Nkaxas tus vajntxwv yuav raug tua tuag, thiab lub nroog Asekeloos yuav tsis muaj neeg nyob lawm. #Yaxaya 14:29-31; Yelemi 47:1-7; Exek 25:15-17; Yau 3:4-8; Amaus 1:6-8 6Ntau haivneeg yuav tuaj nyob sibxyaws ntxaws hauv lub nroog Asedaus. Tus TSWV hais tias, “Kuv yuav muab cov neeg Filixatees txoj kev khavtheeb txo mus. 7Lawv yuav tsis noj nqaij xyaw ntshav, lossis tej khoom noj uas raug txwv tsis pub noj lawm. Tagnrho cov neeg uas seem tuag yuav tau los ua Kuv haivneeg thiab yuav zoo li ib xeem hauv xeem Yudas. Ekiloos yuav tau los ua ib feem ntawm Kuv haivneeg, ib yam li cov Yenpus#9:7: Yenpus: Yog cov neeg uas ibtxwm nyob hauv lub nroog Yeluxalees, uas lawv tau ua Daviv qhev, thaum uas Daviv tuaj txeeb tau lub nroog ntawd. twb tau los lawm. 8Kuv yuav tsomkwm Kuv lub Tuamtsev thiab tsis pub kom muaj tubrog tuaj tau rau hauv. Kuv yuav tsis pub leejtwg caijtsuj Kuv haivneeg ntxiv lawm. Kuv yeej pom tias Kuv haivneeg raug kev txomnyem npaum licas.”
Tus Vajntxwv Uas Yuav Los Yav Tomntej
9Cov neeg Xi-oos, nej ciali zoosiab!
Cov neeg Yeluxalees, nej ciali qw zoosiab!
Saib maj, nej tus vajntxwv tabtom los cuag nej!
Nws yog tus ncajncees thiab muajyeej,
tiamsis Nws txo hwjchim thiab caij ib tug neesluav
uas yog ib tug menyuam neesluav los. #Math 21:5; Yauh 12:15
10Tus TSWV hais tias,
“Kuv yuav muab tej tsheb nees uarog tshem tawm ntawm cov Yixalayees;
thiab coj tej nees tawm hauv Yeluxalees mus;
tej hneevnti uas tau siv tua rog yuav raug rhuav kom puastsuaj tag.
Nej tus vajntxwv yuav coj kev thajyeeb los rau txhua haivneeg;
Nws yuav kav ib lub hiavtxwv rau ib lub hiavtxwv,
txij ntua ntawm tus Dej Yufatis mus txog qabntuj kawg.” #Nnkauj 72:8
Rov Txhimkho Vajtswv Haivneeg
11Tus TSWV hais tias,
“Vim Kuv tau nrog nej coglus
uas yog muab ntshav ua khoom fij ua lub cim nias rau,
Kuv yuav tso nej haivneeg uas raug ntes kom dim
hauv lub qhovtshij uas tsis muaj dej lawm rov los. #Khiav 24:8
12Nej cov uas tau raug ntes mus, nimno nej muaj kev ciasiab lawm, nej ciali rov los;
rov los nyob hauv nej lub tebchaws tsosiab lug.
Nimno Kuv qhia rau nej tias Kuv yuav ntxiv ob npaug rov rau nej,
thiab foom koobhmoov rau tej uas nej raug kev txomnyem los lawm.
13Kuv yuav siv Yudas ib yam li tus tubrog rab hneevnti,
thiab siv cov Yixalayees ib yam li cov xubvos.
Kuv yuav siv cov neeg hauv Xi-oos ib yam li rab ntaj
mus tua cov neeg Kilis.”
14Tus TSWV yuav tshwm los rau saum Nws haivneeg;
Nws yuav tua Nws tej xubvos zoo yam nplaimxob laim.
Tus TSWV uas kav ibpuas tsavyam yuav tshuab raj tshuab xyu;
Nws yuav nrog nagxob nagcua tuaj nram sab qabteb tuaj.
15Tus TSWV uas muaj Hwjchim Loj Kawg Nkaus yuav tivthaiv Nws haivneeg,
mas lawv yuav rhuav kom lawv cov yeebncuab puastsuaj tag.
Lawv yuav qw ntshoonrooj hauv tshavrog yam nkaus li tej neeg qaugcawv,
thiab lawv yuav ua rau lawv cov yeebncuab ntshav nrog;
tej ntshav ntawd yuav ntws ib yam li tej ntshav ua khoom fij
uas hliv hauv tais rau saum lub thaj.#9:15: Nqe 15 no paub tsis meej tias lolus Henplais yog txhais licas tiag.
16Thaum hnub ntawd los txog, tus TSWV yuav cawm Nws haivneeg,
li tus tswv yug yaj cawm nws pab yaj dim ntawm txoj kev piamsij.
Lawv yuav ci ntsa-iab rau hauv lub tebchaws
yam li tej hlaws uas lo ntawm lub kausmom kub.
17Lawv yuav zoonkauj zoonraug thiab ntxim nyiam heev!
Tej tub ntxhais hluas yuav hlob mosnyoos thiab muajzog los ntawm tej nplej thiab cawv.
လက္ရွိေရြးခ်ယ္ထားမွု
Xekhaliyas 9: MWW2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.