Chivkeeb 31
31
Yakhauj Khiav Tawm Ntawm Lanpas
1Yakhauj hnov Lanpas cov tub sibtham hais tias, “Yakhauj tau muab txhua yam uas yog peb txiv li coj mus tag huv tibsi lawm. Nws muajtxiag npluanuj twb yog los ntawm tej uas yog peb txiv li nkaus xwb.” 2Thiab nws pom tias Lanpas tsis tshua ua zoo rau nws npaum li yav tas los lawm. 3Ces tus TSWV thiaj hais rau Yakhauj tias, “Koj ciali rovqab mus rau tim koj txiv thiab koj cov kwvtij lub tebchaws. Kuv yuav nrog koj mus.”
4Yogli ntawd, Yakhauj thiaj tso neeg mus hais rau Laxees thiab Le-as kom nkawd tuaj ntsib nws rau tom teb uas yog qhov chaw cov tsiaj nyob. 5Nws hais rau nkawd tias, “Kuv pom tias neb txiv tsis tshua ua zoo rau kuv li yav tas los lawm, tiamsis kuv txiv tus Vajtswv yeej tseem nrognraim kuv. 6Neb yeej paub zoo lawm hais tias kuv rausiab ntso ua haujlwm rau neb txiv kawg kuv tus dag tus zog. 7Txawm li ntawd los nws tseem nyiag thiab hloov kuv tej nqizog kaum zaus lawm. Tiamsis Vajtswv tsis pub nws ua phem rau kuv. 8Thaum twg uas Lanpas hais tias, ‘Muab cov tshis uas txaij tej tee ua nqizog rau koj,’ ces cov tsiaj txawm yug tau menyuam txaij tej tee tagnrho. Thaum twg uas nws hais tias, ‘Muab cov tshis uas txaij tej kab ua nqizog rau koj,’ ces cov tsiaj txawm yug tau menyuam txaij ua tej kab tagnrho. 9Vimli no ntag lau, Vajtswv thiaj muab cov tsiaj ntawd tshem tawm ntawm neb txiv thiab coj los rau kuv.
10“Thaum txog caij uas cov tsiaj sibtshov kuv txawm ua ib zaj npausuav; kuv pom cov laug tshis uas tabtom tshov maum ntawd yog cov txaij ua tej tee thiab txaij ua tej kab. 11Vajtswv tus timtswv tau los hais rau kuv hauv zaj npausuav ntawd tias, ‘Yakhauj!’ Kuv teb tias, ‘Kuv nyob ntawm no.’ 12Nws hais ntxiv tias, ‘Koj saib maj, cov laug tshis uas tabtom tshov maum ntawd puavleej yog cov txaij ua tej tee thiab txaij ua tej kab xwb. Kuv ua kom muaj tej no tshwmsim los, rauqhov Kuv twb pom txhua yam uas Lanpas ua rau koj lawm. 13Kuv yog tus Vajtswv uas los tshwm rau koj pom nram Npethees, ntawm thaj chaw uas koj muab lub pobzeb los teeb ua puavpheej nco txog, uas koj muab roj txivntoo hliv rau saum, thiab yog thaj chaw uas koj coglus rau Kuv ntag. Zaumno koj ciali npaj kom txhij thiab rovqab mus rau lub tebchaws uas koj yug.’ ” #Chiv 28:18-22
14Laxees thiab Le-as teb Yakhauj hais tias, “Wb los yeej tsis tshuav ib yam qubtxeeg qubteg uas wb txiv tseg rau wb nyob hauv nws lub tsev li thiab. 15Nws saib wb ib yam li yog neeg txawv tebchaws xwb. Nws muab wb muag, thiab nimno nws muab tej nyiaj uas yog wb tej nqi ntawd siv tag huv tibsi lawm. 16Txhua yam qubtxeeg qubteg uas Vajtswv rho tawm ntawm wb txiv los, puavleej yog peb tug thiab yog peb tej menyuam tug lawm. Seb Vajtswv tau hais licas rau koj lawm ces ua li ntawd xwb.”
17-18Yogli ntawd, Yakhauj thiaj tunra txhij thiab rovqab mus cuag nws txiv rau hauv lub tebchaws Kana-as. Nws muab nws cov menyuam thiab nws ob tug pojniam caij saum cov ntxhuav nrobqaum, thiab lawv tagnrho nws cov tsiaj mus ua nws ntej, thiab coj txhua yam uas nws khwv tau hauv tebchaws Padas Alas#31:17-18 Padas Alas; lossis Mexuputamias. los. 19Lanpas tabtom mus txiav plaub yaj lawm, ces thaum uas nws tsis nyob hauv tsev lawm, Laxees txawm mus nyiag tau nws txiv cov mlom zov tsev coj mus lawm. 20Yakhauj nyiagkev khiav ntsiagto tsis qhia rau Lanpas paub tias nws khiav mus lawm. 21Nws coj txhua yam uas yog nws tug thiab maj ceevnrooj mus hla tus Dej Yufatis thiab taug kev mus rau tim lub laj roob Nkile-as.
Lanpas Caum Yakhauj
22Tau peb hnub tomqab muaj neeg mus qhia rau Lanpas paub tias Yakhauj twb khiav lawm. 23Nws thiaj txhij nws cov neeg nrog nws mus caum Yakhauj qab tau xya hnub, lawv thiaj caum cuag Yakhauj rau ntawm lub laj roob Nkile-as. 24Hmo ntawd Vajtswv los hais rau Lanpas hauv nruab npausuav hais tias, “Koj ceevfaj tsis txhob mus hais dabtsi rau Yakhauj hlo li, txawm yuav hais zoo thiab hais phem los xij.” 25Yakhauj thiaj tsa tsevntaub so rau saum laj roob, Lanpas thiab nws cov neeg kuj tsa tsevntaub so rau saum lub laj roob Nkile-as ntawd thiab.
26Lanpas hais rau Yakhauj tias, “Koj ua dabtsi li ko? Koj dag kuv thiab coj kuv ob tug ntxhais khiav cuag li khiav rog? 27Vim licas koj thiaj nyiagkev khiav ntsiagto es tsis qhia rau kuv paub? Yog koj qhia kuv paub, kuv yuav xa koj sawvkev los ntawm kev zoosiab nrog tej suab hunkauj lomzem uas ntaus tej nruas npuaj thiab nkauj nogncas. 28Koj txawm tsis pub kuv nwj kuv cov xeebntxwv thiab kuv ob tug ntxhais ua kev sibncaim li. Qhov koj ua tag los ntawd yog ib yam uas ruam kawg nkaus! 29Kuv muaj cuabkav ua rau koj raug kev puastsuaj tau, tiamsis naghmo koj txiv tus Vajtswv los txwv tsis pub kuv ua licas rau koj hlo li. 30Kuv paub tias qhov uas koj khiav ntawd yog vim koj maj rovqab mus tsev heev, tiamsis vim licas koj ho nyiag kuv cov mlom los lawm thiab?”
31Yakhauj teb tias, “Rauqhov kuv ntshai nyobtsam koj coj koj ob tug ntxhais khiav tawm ntawm kuv mus. 32Tiamsis yog koj nrhiav tau peb cov ntawm no leejtwg tau coj koj cov mlom los lawm, ciali muab tus ntawd tua kom tuag. Peb cov neeg puavleej nyob ntawm no nrog ua timkhawv, tshawb txhua yam uas nyob ntawm no seb puas muaj tej yam uas yog koj tug; yog muaj, koj ciali nqa huv tibsi mus.” Yakhauj tsis paub tias Laxees yog tus nyiag Lanpas cov mlom ntawd los lawm.
33Lanpas xub mus tshawb hauv Yakhauj lub tsevntaub, ces nws mam mus tshawb hauv Le-as lub tsevntaub, thiab hauv ob tug ntxhais qhev ob lub tsevntaub, tiamsis nws nrhiav tsis tau nws cov mlom li. Ces nws mus tshawb hauv Laxees lub tsevntaub. 34Laxees tau muab cov mlom zov tsev ntawd qhwv ntsaws rau hauv lub eeb uas txawb saum tus ntxhuav thiab nws zaum rau saud. Lanpas mus tshawb thoobplaws huv lub tsevntaub, tiamsis nws nrhiav tsis pom cov mlom ntawd li. 35Laxees hais rau nws txiv tias, “Txiv, thov koj tsis txhob chim rau kuv, qhov uas kuv tsis muaj peevxwm los sawv ntawm koj xubntiag, twb yog kuv tseem tabtom coj khaubncaws.” Lanpas nrhiav kawg, tiamsis tsis pom nws cov mlom zov tsev ntawd li.
36Yakhauj chim heev tswj tsis tau nws lub siab li lawm. Nws thiaj nug npautaws vog hais tias, “Kuv tau ua txhaum koj dabtsi? Kuv tau ua txhaum txojcai twg es thiaj ua rau koj muaj cai tuaj caum kuv? 37Zaumno koj tub tshawb tag kuv tej khoom huv tibsi lawm, koj puas pom muaj ib yam khoom twg uas yog koj li? Ciali muab rho tawm los tso tabmeeg rau koj cov neeg thiab kuv cov neeg, thiab cia lawv txiavtxim rau wb seb leejtwg yog tus uas ua yog.
38“Kuv nrog koj nyob tau neesnkaum xyoo, koj tej yaj tej tshis huamvam tsis tuncua, thiab kuv yeej tsis tau tua koj tej yaj ib tug noj li. 39Thaum ib tug yaj twg raug tsiaj qus tom lawm, kuv yeej ibtxwm muab kuv li ib tug los them rau koj. Kuv tsis tau coj los qhia rau koj hais tias tsis yog tim kuv. Koj tseem yuam kom kuv them tej tsiaj uas tubsab nyiag nruabhnub thiab hmontuj lawm huv tibsi rau koj. 40Ntau zaus kuv tiv tshav nruabhnub thiab tiv no hmontuj, kuv yeej pw tsis tsaugzog hlo li. 41Yeej zooli no los tau neesnkaum xyoo uas kuv nrog koj nyob. Kuv ua haujlwm kaum-plaub xyoo los pauv koj ob tug ntxhais, thiab rau xyoo los tu koj cov tsiaj. Npaum li ntawd los koj tseem muab kuv tej nqizog hloov txog kaum zaug. 42Yog kuv txiv tus Vajtswv, Anplahas thiab Ixaj tus Vajtswv, tsis nrog kuv nyob, ntshe koj twb muab kuv xa rovqab tes dawb tes npliag lawm. Tiamsis Vajtswv pom kuv tej kev nyuajsiab thiab tej haujlwm uas kuv tau ua tag los lawm, vimli ntawd, naghmo Nws thiaj los txiavtxim rau koj!”
Yakhauj Thiab Lanpas Sibhais Haum
43Lanpas teb Yakhauj hais tias, “Ob tug ntxhais no yog kuv ob tug ntxhais, nkawd cov menyuam los yeej yog kuv cov menyuam, thiab tej tsiaj no los puavleej yog kuv li. Txhua yam uas koj qhovmuag pom no puavleej yog kuv tug. Tiamsis hnubno kuv tav tsis tau kuv ob tug ntxhais thiab nkawd cov menyuam kev lawm, 44yogli ntawd, kuv thiaj npajsiab uas yuav nrog koj sibhais kom haum. Cia wb muab ib co pobzeb los teeb ua ib qho kev nco txog wb cov lus cogtseg no.”
45Yogli ntawd, Yakhauj thiaj khaws tau ib lub pobzeb los teeb cia ua puavpheej nco txog. 46Nws txawm hais kom nws cov neeg mus khaws ib co pobzeb los teeb ua ib pawg cia. Ces lawv txawm noj ib pluag mov uake nyob ntawm pawg pobzeb ntawd ib sab. 47Lanpas thiaj tis npe rau pawg pobzeb ntawd hu ua Yenkas Xahaduthas,#31:47: Yenkas Xahaduthas: Lub npe no lus Alamej txhais hais tias “ib pawg pobzeb uas ua lub cim rau wb nco cia.” tiamsis Yakhauj tis npe rau pawg pobzeb ntawd hu ua Nkale-es.#31:47: Nkale-es: Lub npe no lus Henplais txhais hais tias “ib pawg pobzeb uas ua lub cim rau wb nco cia.” 48Lanpas hais rau Yakhauj tias, “Pawg pobzeb no yuav ua lub cim rau wb nco cia.” Vimli ntawd thaj chaw ntawd thiaj muab hu ua Nkale-es.
49Lanpas hais ntxiv tias, “Thov kom tus TSWV tsomkwm wb thaum wb sibncaim ib leeg mus nyob rau ib qho lawm.” Yogli ntawd, thiaj muab thaj chaw ntawd tis npe hu ua Mixepas.#31:49: Mixepas: Lub npe no hais muaj ntsis thooj li lolus Henplais uas hais tias “qhov chaw uas ntsiantsoov.” 50Lanpas tseem hais ntxiv tias, “Yog koj ua phem rau kuv ob tug ntxhais lossis yog koj mus yuav niamyau, txawm yog kuv tsis paub txog tej uas koj ua ntawd los xij, kom koj ncontsoov tias Vajtswv yeej ntsiantsoov wb. 51Ntawm no yog cov pobzeb uas kuv sau los teeb nruabnrab ntawm koj thiab kuv, thiab ntawm no yog tus ncej zeb uas ua lub cim tseg cia. 52Pawg pobzeb thiab tus ncej zeb no, yog ua lub cim uas ncontsoov cia. Kuv yuav tsis hla pawg pobzeb no tuaj tua koj, thiab koj yuav tsis hla pawg pobzeb no lossis tus nce zeb uas yog lub cim nco txog no tuaj tua kuv. 53Cia Anplahas tus Vajtswv thiab Nahaus#31:53: Anplahas … Nahaus: Anplahas yog Yakhauj yawg thiab Nahaus yog Lanpas yawg. tus Vajtswv ua tus txiavtxim rau wb.” Ces Yakhauj thiaj tuav Vajtswv tus uas nws txiv Ixaj pehawm lub npe coglus tseg hais tias nws yuav ua rawsli ntawd.
54Yakhauj thiaj muab ib tug tsiaj los tua fij rau saum lub roob ntawd, thiab caw tagnrho nws cov neeg los noj. Tomqab uas lawv noj mov tag lawm, lawv thiaj rov pw ib hmos saum lub roob ntawd ntxiv. 55Hnub tomqab thaum sawvntxov Lanpas thiaj mus nwj nws cov xeebntxwv thiab nws ob tug ntxhais thiab foom koobhmoov rau lawv tag, ces nws txawm ncaim lawv rovqab mus tsev lawm.
လက္ရွိေရြးခ်ယ္ထားမွု
Chivkeeb 31: MWW2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.