Psalms 147

147

Nanġaqługu God Sapiġñaqtuaq

1Nanġaqtauli Ataniq!

Nakuuruq atuqtuni nanġautinik God-iptinnun;

qaamanaqtuġlu nalaunŋaruaguruġlu nanġaqtuni ilaa.

2Atanġum nappaġaa Jerusalem;

katitkaich aullaqtitauŋaruat Israel-miñ.

3Mamititchuugaich anniqsauŋaruat uummatiŋich

suli nimmaaqługich kiḷḷiŋich.

4Quliallagaich qanutun iñugiaktilaaŋat uvluġiat

suli taiguqługich atilaaŋisigun.

5Qanutun kamanaqtigiruq Ataniqput;

kaŋiqsisaa ilaan killiksraitchuq.

6Ilaan qutchiksiḷiġuugaich qiñuitchuat,

aglaan anmuksruġuugaich pigiiḷḷiqirauruat.

7Atuġitchi Ataniġmun quyyatiqaġlusi;

atuqtuurautilugu nuqaqtilignik God-ikput.

8Qiḷak matusuugaa nuvuyanik;

sialuktiłługulu nunamun

suli naupkaqługich ivigaat qimiqqani.

9Niġrutit niqiksritchuugaich

suli niġipkaqługich tulugaiyaat qalġuuġmata.

10Quviasuutigilaitkaa tuttuqpaum suaŋŋataa,

naakkaunnii quviagilugu iqsiiññiŋat aŋuyaktit;

11aglaan Atanġum quviagigaich qiksiksrautiqaqtuat ilaanun,

iliŋich niġiukkutiqaqtuat ilaan nakuaqqutaanun.

12Nanġaġuŋ Ataniq, Jerusalem-guruatiin!

Nanġaġuŋ God-igiran Zion-guruatiin!

13Ilaata upkuaqpaich payaŋaisitchuugaich;

suli quviasaaqługich iñugirani.

14Aŋuyautairrun ititchuugaa nunavsi killiŋiñi

suli niġisuiqsuaqtiłłusi palauvaksraġiksuanik.

15Aŋalatchiruq nunamik,

suli qilamik uqallautaa pirausuuruq.

16Isivitchugaa apun uliktun

siamiłługulu kaniq aġratun.

17Natatquġnat kataktitchuugaich maġġaqtun;

kia unnii manimmiḷguitkaa qiiyanaqsipkaġmauŋ!

18Tavraasii piraksriimman, siku auguugaa;

anuqłiġuqtitchuugaa aasii imaq supivluni.

19Uqaluni iḷisimapkaġuugaa Jacob-mun,#147.19 Jacob-lu Israel-lu atiruk.

iḷisaurrutiniḷu pitquraniḷu Israel-mun.

20Tainnasimik aŋalatchiŋaitchuq allanun nunaqpauruanun;

nalurut ilaata pitquraŋiññik.

Nanġaqtauli Ataniq!

လက္ရွိေရြးခ်ယ္ထားမွု

Psalms 147: INUPIAQ

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Iñupiatun Mumiksat Uqalugiksuat အေၾကာင္းကို ပို၍ သင္ယူပါ။