Proverbs 20
20
1Taaŋŋaqpaiñiġum nipatusipkaġniaġaatillu isumalluaġiiqsinniaġaatillu.
Isumalluaġiiññiġuruq taaŋŋaqpaiññiq.
2Iqsigiuŋ qinnaŋaruaq umialik iqsigiruatun ugialaruatun lion-tun;
qinnairuni ilaa iñugutaiġsuatun ittuq.
3Isumalluaġiitchuam isagutillagaa qanaaġun;
pilluatałhaaġnaqtuq iḷḷatiŋitchuni.
4Nautchialiqiri iqiasukhuni itqanaiŋitpauŋ nautchiivigrani tikitpan,
naurrianik kivluiviksraqaġniaŋitchuq.
5Iñuum isumaŋich ittut immatun itiruamiittuatun,
aglaan iñuum kaŋiqsiummatilluataqaqtuam anillagaich.
6Iñupayaat uqaġuurut iḷumutuuqtuagunivḷutik ukpiġnaġnivḷutiglu,
aglaan ivaġnaqtut!
7Miqłiqtut quviasuusiaqaġuurut aapaqaqtuat ukpiġnaqtuamik suli iluaqtuakuaqtuamik.
8Umialik naipiqtutqiksuq
aasii iḷisimaruq tautukkami piḷuktuamik.
9Iñuk uqallakkumiñaqpa sumik isumaaluutaiññiḷuni,
piḷuutaiññiḷuniḷu?
10Atanġum uumigigaich iñuich pitqiksiġaqhutik
uqumaisilaaqsiruallu aktilaaġsiruallu.
11Miqłiqtut unnii qiñiqtitchuurut qanuġitilaamignik surġausimiktigun;
iḷisimaniaqtutin pitqiksiġautaisilaaŋiññik naagga iñugiksilaaŋiññik.
12Atanġum iriksriñŋagaatigut qiñiutiksraptignik
suli siuttagnik tusaagutiksraptignik.
13Siñiktuaġuvich, suiḷḷiuġniaqtutin.
Aptaugaġuvich niqiksraukkaġniaqtutin.
14Tausiġñiaqti uqaviḷuguuruq akiŋa akisuvaiññivḷugu,
aglaan kamanniraanagutisuuruq akiiñaaġnivḷugu.
15Iḷisimaguvich sumik uqausiqaqtilaaġnik,
piqaqtutin akisułhaaqtuamik kaviqsuamin maniġmiḷḷu akisuruaniḷḷu uyaġagniñ.
16Kiñaliqaa isumalluaġiisilaamisun uniqsuqłiiruaq naluraġmi iñuum akiiḷaŋa akiḷiġñiaġnivḷugu
ilaan suġauttani akiḷiutigiyumaaqtuksraġigai.
17Sunik piksraŋaguvich pitqiksiġautikun nakuaġiniaġaluaġitin tivraġiksigiruatun niqitun,
aglaan taikani iḷiñiaqtuq uqummiaqaqtuatun maġġaġmik.
18Siḷġiqsuusiaqalluataġuvich piḷḷuataġniaqtutin;
aŋuyaktuanun tikisaaġnak sivunniuganiŋaiḷḷutin.
19Uqautigliqsuaq nalunaqtuakun iriqtaqaġuminaitchuq.
Nayuutinak iñugnun uqqaqturuanun.
20Uqamaqłuutigupkik aŋayuqaakiñ,
iñuggutin isuqaġniaqtuq naniġuatun qamiruatun taaġmi.
21Tigusiññaamik umiallakkuvich,
iliŋnun ikayuutauniaŋitchuq.
22Iliktuġruiññaq akisaġniaġnagu iluaŋitchuaq.
Ukpiġiuŋ Ataniq ilaan iluaqsruġniaġaa.
23Atanġum uumigigaich iñuich pisaasuġmiaġaqtuat suli uqumaisilaaŋisigun.
24Atanġum sivunniutigianiŋagaa igliġniksraqput;
qanuġuniasii kaŋiqsiñiaqpauŋ iñuusiġmi igliġniŋa?
25Isumalaaġutigimmaġiksaaġuŋ unniqsuqłiiŋaiñŋaqpich aitchuutiksraġnik God-mun.
Nunuuraliqpiaqtutin aquvatigun.
26Isumaturuaq umialik iḷitchuġiniaqtuq kiña iluatun piŋisilaaŋanik
aasii tatavsaġlugu nagliksrautaiḷakun.
27Atanġum aitchuŋagaatigut isumalaallasivḷutalu iluaqtuamik naagga iluaŋitchuamik;
uvaptigniñ iriġuminaitchugut.
28Umialik umialgullaruq aullarriñiqtutilaamisun
iluaqtuakuaġumi, nalaunŋaruakuaġumi, suli aŋalatchiḷḷuataġumi.
29Iluaġigivut suaŋaniŋat nutaqqat
suli qutchigivlugu qirġiqaġniŋat utuqqanaat.
30Iḷaanni anniġñaqtuaq apqusaaqtuksraġigikput allaŋŋuġniaġupta pilġusiptigun.
လက္ရွိေရြးခ်ယ္ထားမွု
Proverbs 20: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)