Exodus 8
8
Naaġaayiich
1Tavraasii Ataniq uqallaktuq Moses-mun, “Ullaglugu Pharaoh uqallautisaqtuġuŋ Ataniq uqallagniḷugu, ‘Aullaqtitkich iñugiratka, nanġautiqaġumaut uvamnun. 2Pisuŋitkuvich, tatavsaġniaġivsi matulugu nunaksi naaġaayinik. 3Nile siḷivitpaiḷḷuni naaġaayinik iniksraiġutilutik siḷivinniaġmigaich igluqpaktin, inauratin, siñigviktin, igluŋich atanauraqpich, igluŋiññullu iñukpich, iggavivsiññun, punniliuġvivsiñullu. 4Naaġaayiich minŋiġniaqtut iliŋnun, iñugiraġnun, iluqaiññullu atanauraġnun.’”
5Atanġum uqallautigaa Moses, “Uqallauttuuŋ Aaron ayauppiaŋa isaatqulugu qulaatigun kuugich, kuugauraliat, imaġaurallu, aasii naaġaayiich qaipkaġniaġitka matulġataġlugu nunaŋa Egypt.” 6Tavraasii Aaron-gum isaaqsimaniġaa ayauppiani qulaatigun imapayaat, aasii naaġaayiich qaiñiqsut matulġataqługu nuna. 7Aglaan aŋatkuŋich Pharaoh-m aŋatkuaqłutiŋ, qaipkaŋammigaich naaġaayiich nunamun.
8Pharaoh-m ququaŋagaik Moses-lu Aaron-lu aasii uqallakłuni, “Aŋaiyyusitchik Ataniġmun piiqulugich makkua naaġaayiich, aasii aullaqtinniaġitka iñutin, aitchuiyumaut ikipkaiḷutik Ataniġmun.”
9Moses-gum kiugaa, “Aŋaiyyutiyumiñaġikpiñ qanutun. Piviksramik nalunaiqsisiññaġutin qakugu aŋaiyyutitquguvich, atanauratillu, iñugiratillu. Tavra naaġaayiich iluqaġmiŋ piiġñiaqtut, kisiŋŋuġlugich Nile-miittuat.”
10Pharaoh-m kiugaa, “Aŋaiyyutisaġiŋma uvlaaku.”
Moses uqallaktuq, “Tainna piñiaqtuŋa apiqsrisiktun, aasii iḷitchuġiñiaqtutin allamik god-aisilaaŋanik Ataniqtun, God-iptitun ittuamik. 11Naaġaayiich uniññiaġaasi, iliŋniñ, atanauraġniñ, iñugniḷḷu, piiġḷutiŋ iluqapayauraġmiŋ kisiŋŋuġlugich Nile-miittuat.” 12Tavraasii Moses-guvlu Aaron-guvlu uniññiġaak Pharaoh, aasii Moses aŋaiyyuvluni Ataniġmun piiquvlugich naaġaayiich qaipkaŋaraŋich umialigmun. 13Ataniq savaŋaruq Moses apiqsriaŋatun, aasii naaġaayiich igluniittuat, siḷalliġmiittuat, suli nunamiittuallu tuquŋarut. 14Egypt-miut qaliġiiksinŋagaich tuquŋarat naaġaayiich qutchiksivḷugich, nuna tipaaqsiḷġataqługu. 15Pharaoh-m tautukkamigich naaġaayiich tuqutilaaŋiññik, uqayunaitqigatalgitchuq, uqallausiatun Atanġum, Pharaoh-m naalaġnisuŋitkaik Moses-lu Aaron-lu.
Milugiatchiat
16Atanġum uqallautigaa Moses, “Uqallauttuuŋ Aaron anautqulugu nuna ayauppiaŋanik, aasii nunapayauraŋani Egypt avyuq milugiatchiaġuġniaqtuq.” 17Tavraasii Aaron-gum anauŋagaa nuna ayauppiamiñik, aasii iluqani avyuq Egypt-mi milugiatchiaġuŋaruq, matuvlugich iñuiḷḷu niġrutillu. 18Pharaoh-m aŋatkuŋich niptaqtitchiñiatakkaluaġmiut milugiatchianik, niptaŋiḷḷaktut. 19#Lk 11.20.Pharaoh-m aŋatkuŋisa uqallautigaat umialik, “God-im taamna savaaŋa suaŋŋanmigun!” Aglaan Pharaoh uqayunaitchuq-suli, Atanġum uqallausiatun, Pharaoh naalaġnisuŋitchuq Moses-miglu Aaron-miglu.
Nuviuvaich
20Atanġum uqallautigaa Moses, “Uvlaatchaurami uvlaaku kasuġiaġumagiñ Pharaoh kuugmun ivvaġiaqpan, aasii uqallautilugu Ataniq uqallagniḷugu inna, ‘Aullaqtitkich iñutka, nanġautiqaġumaut uvamnun. 21Kilikkikpiñ tainna pisuŋitkuvich, tatavsaġniaġikpiñ nuviuvagnik aullaqtitchiḷuŋa iliŋnun, atanauraġnun, iñugiraġnullu. Igluŋich Egypt-miut immiġñiaqtut nuviuvagnik, aasii suli nuna matuniaġaat. 22Aglaan aksianiaŋitkiga nunaŋa Goshen, iñugiraġma iñuuniaġviat, nuviuvaitchumauq taamani. Tainna savagniaqtuŋa, iḷisimayumautin uvaŋa, Atanġuruaŋa, savaktilaamnik mattumani nunami. 23Nalunaiġñiaġiga aŋalatchiñiġa allagiiksilaaŋa iñugiramnun iñugiraġnullu. Taamna aliuġnaqtuaq uvlaaku nalautinniaqtuq.’” 24Ataniq aullaqtitchiŋaniqsuq iñugiapiaġataqtuanik nuviuvagnik Pharaoh-m igluqpaŋanun igluŋiññullu atanauraŋisa. Iluqani Egypt nunaŋa maqunŋagaat nuviuvaich.
25Tavraasii Pharaoh-m ququaqtitkaik Moses-lu Aaron-lu aasii uqallakłuni, “Ki, aitchuiyyaġitchi ikipkaiḷusi God-ivsiññun maani nunami.”
26Moses-gum kiugaa, “Taamna iłuaġiniaŋitkaat, qanuq uvva Egypt-miut isummaaġniaŋitkivut ikipkaigupta niġrutinik aitchuutigilugich Ataniġmun, God-iptinnun. Isummaaŋitkuptigich, Egypt-miut tuqunniaġaatigut miḷḷuuġluta uyaġagnik. 27Iglauruksraurugut piŋasuni uvluni nunagluktuamun aitchuiyyaġluta ikipkaiḷuta Ataniġmun, God-iptinnun, piraksriutaa uvaptinnun nalaullugu.”
28Pharaoh uqallaktuq, “Aullaqtinniaġivsi aitchuisaqtuġumausi ikipkaiḷusi Ataniġmun, God-ivsiññun, nunagluktuami, uŋasiksuamuŋitkuvsi. Aŋaiyyutisaġivsiñŋa.”
29Moses kiuruq, “Aullaanigluqqaaqtuŋa, aŋaiyyuniaqtuŋa Ataniġmun uvlaaku nuviuvaich aullaqulugich iliŋniñ, atanauraġniñ, iñugiraġniḷḷu. Aglaan pisaasuġmiatqigñasigut aullaqsaiḷiḷugiḷḷu iñuich aitchuiyyaqsaiḷiḷugich ikipkaiḷutik Ataniġmun.”
30Moses-gum unitkaa Pharaoh aasii aŋaiyyuvluni Ataniġmun, 31aasii Ataniq savaŋaruq Moses-gum apiqsriaŋanik. Nuviuvaich piiŋarut Pharaoh-miñ, atanauraŋiññiñ, iñuŋiññiḷḷu; atausiuramik-unnii nuviuvaqaŋaitchuq. 32Aglaan taavsrumani unnii Pharaoh uqayunaiġatalgitchuq, tainnasuliasi aullaqtinŋiḷgitkaich iñuich.
လက္ရွိေရြးခ်ယ္ထားမွု
Exodus 8: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)