Exodus 6
6
1Tavraasii Atanġum uqallautigaa Moses, “Tavra qiñiġniaġiñ savaaġiniaqtaġa Pharaoh-mun. Nunuriñiaġiga ilaa aullaqtitqulugich iñutka. Aninniaġaich unnii maaŋŋa nunamiñiñ.”
God-im Ququaġaa Moses
2 #
Gn 17.1; 28.3; 35.11; Ex 3.13-15. God-im uqallautigaa Moses, “Uvaŋa Atanġuruŋa. 3Niptaŋaruŋa Abraham-mun, Isaac-mun, Jacob-mullu, Suaŋŋatiqpaqaqłuŋa God-auvluŋa, aglaan iḷitchuġipkaŋaitchuŋa iliŋiññun atiqaqtilaamnik Ataniġmik. 4Aasii suli inillaiŋaruŋa sivunniuġunmik iliŋiññun, unniqsuqłiivḷugich aitchuġniaġnivḷugich nunaŋanik Canaan, nunamik iñuuvigiŋaraŋannik allaniñ nunaniŋŋaqtauvlutiŋ. 5Uvva tusaaŋagiga nagliksaaqłutiŋ iiqtuaġutaat Israel-gum kiŋuvaaŋich, Egypt-miut tigutaaqtaliutiraŋich kivgauvlugich, suli itqaumagiga inillaŋaraġa sivunniuġun. 6Tavraasii uqallautikkich Israel-gum kiŋuvaaŋich innaġniḷuŋa, ‘Uvaŋa Atanġuruŋa; Annautiniaġivsi suli kivgaunivsiññiñ atanġiqsillusi Egypt-miuniñ. Suaŋŋatiga atuġlugu tatavsaġniaġitka, annautilusiḷu. 7Iñugiliutiniaġivsi uvaŋa nanmiñiq, suli ilivsiññun God-auniaqtuŋa. Iḷisimaniaqtusi uvaŋa Ataniq, ilivsi God-igiraqsi, atanġiqsitkivsi kivgaunivsiññiñ Egypt-mi. 8Nunamuutiniaġivsi unniqsuqłiisigiŋaramnun Abraham-mun, Isaac-mun, Jacob-mullu; qaiññiaġiga ilivsiññun pigiliutipkaġlugu. Uvaŋa Atanġuruŋa.’” 9Moses-gum taavsrumiŋa uqautigaich Israel-gum kiŋuvaaŋich, aglaan naalaġnisuŋaitkaat, qanukkii irrusiŋat qapiŋatchapiaġataŋaruq aŋalamaqłuksiqpaił̣ł̣utiŋ kivgauniġmigni.
10Tavraasii Ataniq uqallaktuq Moses-mun, 11“Uqallautisaqtuqsiuŋ Pharaoh aullaqtittuksraġigaigguuq Israel-gum kiŋuvaaŋich nunamiñiñ.”
12Moses-gum aglaan kiugaa, “Israel-gum kiŋuvaaŋisa unnii naalaġnisuŋaitkaanŋa, aasiuvva summan Pharaoh-m naalaġniñiaqpaŋa? Uvaŋa uqaġnialguipiaġataqtuŋa.”
13Aglaan Atanġum piraksriġaik Moses-lu Aaron-lu. “Innaqsigik Israel-guruallu Pharaoh-lu piraksriŋatilaavsigñik uvamnun aullaqtitquvlugich Israel-gum kiŋuvaaŋich Egypt-miñ.”
Sivulliuŋisa Agliusimaniŋat Moses-guvlu Aaron-guvlu
14Reuben, Jacob-gum aŋayukłiŋa, sisamanik iġñiqaqtuaq: Hanoch, Pallu, Hezron, Carmi-ḷu; taapkua maŋŋuurut kiŋuvaamignun. 15Simeon iġñiqaŋaruq itchaksranik: Jemuel, Jamin, Ohad, Jachin, Zohar, Shaul-lu, taamna iġñiŋa Canaan-mium aġnam; taapkua maŋŋuurut kiŋuvaamignun. 16#Nu 3.17-20; 26.57, 58; 1 Ch 6.16-19.Levi piŋasunik iġñiqaŋaruq: Gershon, Kohath, Merari-ḷu: taapkua maŋŋuurut kiŋuvaamignun. Levi iñuuŋaruq 137-ni ukiuni. 17Gershon malġugnik iġñiqaŋaruq: Libni-ḷu Shimei-ḷu, aasii iñugiaktuanik kiŋuvaaqaŋaruk. 18Kohath sisamanik iġñiqaŋaruq: Amram, Izhar, Hebron, Uzziel-lu. Kohath iñuuŋaruq 133-ñi ukiuni. 19Merari iġñiqaŋaruq malġugnik: Mahli-ḷu Mushi-ḷu. Tavra taapkua qitunġaŋich Levi-m kiŋuvaaġiraŋich.
20Amram-gum tuvaaqasiutiŋagaa aapami aniqataa Jochebed, iġñiqaqłuni aasii Aaron-miglu Moses-miglu. Amram iñuuŋaruq 137-ni ukiuni. 21Izhar iġñiqaŋaruq piŋasunik: Korah, Nepheg, Zichri-ḷu. 22Uzziel iġñiqaŋammiuq piŋasunik. Mishael, Elzaphan, Sithri-lu.
23Aaron tuvaaqasiŋaruq Elisheba-mik, panianik Amminadab, aniqataanik Nahshon; iġñiŋaruq Nadab-mik, Abihu-mik, Eleazar-mik, Ithamar-miglu. 24Korah iġñiqaŋaruq piŋasunik: Assir, Elkanah, Abiasaph-lu; maŋŋuuŋarut Korah-tkuayaanun. 25Eleazar, Aaron-gum iġñiŋa, tuvaaqatchiŋaruq iḷaŋannik Putiel-gum paniŋisa, taamna iġñiŋaruq Phinehas-mik. Isagutisaŋagaat taapkua maŋŋuuruat kiŋuvaaŋiññun Levi-m.
26Taapkuak tavra Aaron-lu Moses-lu Atanġum uqallautiraŋik, “Aullatisigik Israel-gum kiŋuvaaŋich Egypt-miñ.” 27Taapkuak tavra uqallautiŋagaak Pharaoh aullaqtitquvlugich Israel-gum kiŋuvaaŋich.
Atanġum Piraksriutaa Moses-mullu Aaron-mullu
28Atanġum uqallautimmauŋ Moses Egypt-mi, 29inna uqallaŋaruq, “Uvaŋa Atanġuruŋa. Uqallautisaġiksik Pharaoh uqalupayaamnik ilivsiŋñun.”
30Aglaan Moses-gum kiugaa, “Iḷisimarutin qanutun uqaġnialguisilaaġa; aasiuvva summan naalaġniñiaqpaŋa Pharaoh-m?”
လက္ရွိေရြးခ်ယ္ထားမွု
Exodus 6: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)