Acts 20
20
Macedonia-mun Greece-mullu
1Tuavaalaŋaiġmata, Paul katitquŋagai ukpiqtuat aasii qapiŋaisaaqqaaqługich, qimaŋagai Macedonia-muksaqłuni. 2Iglauganikami tamatkunuuna nunaaqqisigun, qapiŋaisaaqługich ukpiqtuat, tikiñŋaruq Greece-mun. 3Tavraniinŋaruq tatqiñi piŋasuni, aasii iḷitchuġikami Jew-guruat sivunniuġniġmata inmigun piyumigivluni, itqanaiyaŋaruq aullaġukłuni Syria-mun. Tavra sivunniŋaruq utiqsaġukłuni Macedonia-kun. 4Sopater iġñiŋa Pyrrhus Berea-mium aullaqasiŋagaa, aasiiḷi Thessalonica-ġmiuniñ Aristarchus-guvlu Secundus-lu Gaius-lu Derbe-mium, Timothy-vlu Tychicus-lu Trophimus-lu nunaaqqiŋiñiñ Asia-m tuvaaqasiŋagaat. 5Taapkua iñuich ayuŋarut sivuptiŋni, aasii utaqqivḷuta Troas-mi. 6Uvagulli tiŋinnaaŋarugut Philippi-miñ Niqinaqianiŋmata Puvlaksiŋaitchuamik Punniġmik, aasii tallimat uvlut pianiŋmata kasuŋagivut Troas-mi. Tavrani tallimat malġuŋni uvliŋarugut.
Paul Ullaguiqsaaġai Ukpiqtuat Troas-mi
7Tavra Savaitchuani katinŋarugut atautchimun nullautchiġviḷiqiniaqłuta. Paul uqautiŋagai iñuich unnuaq qitiqqaġataqtillugu aullaġniaqłuni uvlaakukpan. 8Qulliich iñugiaŋarut qiḷaguami kasimavivsiŋñi. 9Aasii nukatpiaq atiqaqtuaq Eutychus aquppiŋaruq igalaurami. Paul uqaŋaiḷḷaiqsillugu Eutychus uiñġaliqsaiññaŋaruq, kiisaimmaa siquvuq, aasii katakłuni piŋayuaŋniñ qiḷaguak nunamun. Tigummarruŋ tuquŋaniqsuq. 10Tavra Paul atqaŋaruq aasii pułłuni qulaŋiqł̣ugu, iqinnamiuŋ uqallaŋaruq Uŋiariñasi. Iñuuruq suli. 11Tavra Paul mayuanikami, niġianikamirruŋ nullautchiġvik, uqautivsaaŋagai uvluġataqtillugu, aasii aullaqłuni. 12Aasii iñuich aggisiŋagaat nutaġaaluk iñuuvlugu, suli quviasaaqtauqpaŋarut.
Troas-miñ Miletus-muktugut
13Aasii ayuvluta umiaqpaŋmun tiŋilġaqsiqsaŋarugut Assos-mun, sivuniqaqłuta ikisukługu Paul tavrani. Tainna sivunniuŋamman ilaa nunakuaġumavluni. 14Tavra kasuġmatigut Assos-mi, ikuŋagikput umiaqpaŋmun aasii Mitylene-mukłuta. 15Tavraŋŋa tiŋinnaaŋarugut uvlaakumman akiŋiqł̣ugu Chios. Aasii uvlutqiŋman tikił̣ł̣uta Samos-mun, aasii uvlaakutqiŋman tikił̣ł̣uta Miletus-mun. 16Tavra Paul sivunniŋaruq qaaŋiqsaaġukługu Ephesus, iñaviqqutchiġuŋił̣ł̣uni nunaaqqiŋisiguaġumi Asia-m. Ilaa tikiññasuaġuŋaruq Jerusalem-mun piñaġumiñaqpan Pentecost-liqikpata itchukłuni.
Paul Uqautisuiqsaaġai Umialiŋnauruat Ephesus-mi
17Paul aullaqtitchiŋaruq uqaluŋmik Miletus-miinŋaġmi Ephesus-mun apiġivlugich umialiŋnaŋich aŋaiyyuliqiruat paaquvluni. 18Aasii tikiñmanni uqallautiŋagai, Iḷisimarusi qanuq iñuuŋatilaamnik akunnavsiññi sivulliġmiñqaŋa uvlumiñ tikiññama nunaaqqiŋiñun Asia-m. 19Savautiŋagiga Ataniq kamasaaŋaiqł̣uŋa qulviuqłuŋalu siġḷiġniuġutit pisigivlugich tikitqataqtuat uvamnun sivunniuġutiŋich piyumigivluŋa Jew-guruat. 20Iḷisimarusi aŋŋikkutiŋaitkivsi supayaamik ikayuutauyumiñaqtuamik ilivsiññun alġaqsruikama iḷisautivlusiḷu kasimakavsi, igluvsiññiḷu. 21Jew-guruallu Jew-guŋitchuallu ativlugich kiliktuŋagitka isumalitqiquvlugich piḷuunmiŋniñ God-mun, suli ukpiquvlugich Ataniptiŋnun Jesus-mun. 22Aasii paŋmapak Ilitqusiġiksuam piyummiqł̣uŋa aullaaqsiruŋa Jerusalem-mun, nalugaluaŋŋaan suna piruksraq uvamnun taamani. 23Aglaan iḷisimatualuktuŋa Ilitqusiġiksuam iḷitchuġipkaŋagaaŋa iniqpapayaani tigutaaqtauniaġnivḷuŋa nagliksaaqtitauniaġnivḷuŋalu. 24#2 Ti 4.7.Aasii tamatkua sivuuġagiŋitkitka. Sugiŋitkigalu tuqutkaluaqpanŋa. Naatchisuktuŋa tiliraunimnik alġaqsruiñimniglu Atanġum Jesus piraksriŋammaŋa quliaqtuaġutitquvlugich iñuich tusaayugaaġiksuanik, God-mun annautiyumiñaġnivḷugich nagliktuutiqpaŋmigun.
25Aasii kukiḷuŋaruŋa akunnavsiññi alġaqsruutigivlugu God-im atanniqsimmataa iñuŋnun. Paŋmapak uvva iḷisimaruŋa iluqasi taututqigñiaŋitkivsiŋa. 26Tavraasii uqallautipiaġivsi uvlupak patchisauyumiñaiññiḷuŋa nalliqsi annaurrauyumiñaiññiqpan. 27Qanuq aŋŋikkutiŋaitkivsi sumik uqautigiraksramnik iluqaanik God-im iḷisimatqukkaŋanik ilivsiññun. 28Qaunagisitchi ilivsiññun iluqaisalu ukpiqtuat, Ilitqusiġiksuam qaunagitquŋakkaŋi ilivsiññun. Qaunagisigik aŋaiyyuliqiruat God-mun, ilaan pigiliutiŋakkaŋi tuqqutaagun ilaan iġñiġmi. 29Iḷisimaruŋa aullaanikkuma, iḷisaurriruat iḷumun inŋitchuanik iqsiñaqtuatun amaqqutun akunnaaġutiniaqtut ilivsiññun, aasii ukpiġutaiqsinniaġniaġaich ukpiqtuat. 30Suli ilivsi nanmiñiq akunnavsiññiñ satqummiġñiaqtut iñuich uqaurriruat saglunik ukpiqtuaguruanun maliksuktitchiñiaqłutiŋ inmiŋnun. 31Taamna pisigilugu nipuŋaitchitchi, itqaumalusi ukiuni piŋasuni nutqaŋaitchuŋa unnuakkaluami naagga uvlumi kiliktuqługu iñupayaaq tamatkunuuna qulviuġaluaŋŋaġma.
32Aasii paŋmapak aŋaiyyutigivsi God-mun qaunagitquvlusi, suli aŋaiyyutivlusi nagliktuutikun uqaluŋiñun suaŋasiḷaaquvlugu ukpiġutiksi iḷaŋiutiyumiñaqsiḷusi quviasaaġusianik ilaan aitchuutigisuukkaŋiñik ilaaguaqtamiñun. 33Kaviuġiŋaitkiga kialiqaa mania qatiqtuaq naagga kaviqsuaq, naagga annuġaaŋi. 34Ilivsi iḷisimarusi ukuniŋa argamnik savautiqaġuuruŋa piqallasivḷuta iḷatkalu pigiraksraġikkaptiŋnik. 35Tamatkunani iluqaiññi iḷisautiŋagivsi tainna iñuk savagluni ikayuiruksrautilaaŋanik piḷguitchuanik, itqaumalugich uqaluŋi Atanġum Jesus uqallaŋamman, Quvianałhaaqtuq aitchuiruni aitchuusiaqaġniġmiñ.
36Tavra Paul tamatkuniŋa uqaanikami, sitquqatigiŋagai iluqaisa umialiŋnat, aasii aŋaiyyuvlutiŋ. 37Tavra iluqaġmiŋ qiaqpaŋarut, suli iqimmaaqługu Paul kunikł̣ugulu kutpaiŋagaat, 38isumaaġutigiłhaaqługich uqaluich uqallausiġiŋakkaŋi taututqigñiaŋiññivḷuni. Tavra umiaqpaŋmuqatigiŋagaat.
လက္ရွိေရြးခ်ယ္ထားမွု
Acts 20: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)