ܡܙܡܘܪ̈ܐ 145 (ܩܡܗ)

145 (ܩܡܗ)

ܫܵܒܲܚܬܵܐ ܕܕܵܘܝܼܕ.

1ܒܸܬ ܡܲܪܡܸܢܘܼܟ݂، ܝܵܐ ܐܲܠܵܗܝܼ ܡܲܠܟܵܐ،

ܘܒܸܬ ܒܲܪܟܸܢ ܫܸܡܘܼܟ݂ ܠܥܵܠܲܡ ܥܵܠܡܝܼܢ.

2ܒܟܠ ܝܘܿܡ ܒܸܬ ܒܲܪܟܸܢܘܼܟ݂،

ܘܒܸܬ ܫܲܒܚܸܢ ܠܫܸܡܘܼܟ݂ ܠܥܵܠܲܡ ܥܵܠܡܝܼܢ.

3ܓܘܼܪܵܐ ܝܠܹܗ ܡܵܪܝܵܐ ܘܫܘܼܒܚܵܐ ܪܵܒܵܐ،

ܘܠܓܘܼܪܘܼܬܹܗ ܠܲܝܬ ܨܲܚܨܵܝܬܵܐ.

4ܕܵܘܪܵܐ ܒܸܬ ܫܲܒܸܚ ܦܘܼܠܚܵܢܘܼ̈ܟ݂ ܠܕܵܘܪܵܐ،

ܘܓܲܢ݇ܒܵܪ̈ܘܼܝܵܬܘܼܟ݂ ܒܸܬ ܡܲܕܥܝܼ.

5ܠܣܸܩܠܵܐ ܕܚܸܩܪܵܐ ܕܫܘܼܒ݂ܚܘܼܟ݂،

ܘܥܒ݂ܵܕܘܼ̈ܟ݂ ܡܲܥܓ̰ܸܒܵܢܹ̈ܐ ܒܸܬ ܗܲܓܹܝܢ.

6ܘܒܘܼܬ ܚܲܝܠܵܐ ܕܥܒ݂ܵܕܘܼ̈ܟ݂ ܣܲܗܡܵܢܹ̈ܐ ܒܸܬ ܐܵܡܪܝܼ،

ܘܓܘܼܪܘܼܬܘܼܟ݂ ܒܸܬ ܗܲܩܹܝܢ.

7ܕܟ݂ܵܪܵܐ ܕܦܸܪܝܘܼܬܵܐ ܕܛܵܒ݂ܘܼܬܘܼܟ݂ ܒܸܬ ܬܲܢܝܼ،

ܘܙܲܕܝܼܩܘܼܬܘܼܟ݂ ܒܸܬ ܡܲܩܘܸܚܝܼ.

8ܚܲܢܵܢܵܐ ܝܠܹܗ ܘܡܪܲܚܡܵܢܵܐ ܡܵܪܝܵܐ،

ܝܲܪܝܼܟ݂ܬܵܐ ܒܹܐܢܹܗ ܘܓܘܼܪܬܵܐ ܫܵܦܵܩܲܬܹܗ.

9ܛܵܒ݂ܵܐ ܝܠܹܗ ܡܵܪܝܵܐ ܠܟܠܲܝܗܝ،

ܘܪ̈ܲܚܡܘܼܗܝ ܥܲܠ ܟܠܲܝܗܝ ܦܘܼܠܚܵܢܘܼ̈ܗܝ.

10ܒܸܬ ܫܲܟܪܝܼ ܠܘܼܟ݂، ܝܵܐ ܡܵܪܝܵܐ، ܟܠܲܝܗܝ ܦܘܼܠܚܵܢܘܼ̈ܟ݂،

ܘܡܗܘܼܡܢܘܼ̈ܟ݂ ܒܸܬ ܒܲܪܟ݂ܝܼ ܠܘܼܟ݂.

11ܒܘܼܬ ܚܸܩܪܵܐ ܕܡܲܠܟܘܼܬܘܼܟ݂ ܒܸܬ ܐܵܡܪܝܼ،

ܘܓܲܢ݇ܒܵܪܘܼܬܘܼܟ݂ ܒܸܬ ܗܲܡܙܸܡܝܼ،

12ܠܡܲܕܘܼܥܹܐ ܠܒܢܲܝ̈ܢܵܫܵܐ ܓܲܢ݇ܒܵܪ̈ܘܼܝܵܬܘܼܟ݂،

ܘܚܸܩܪܵܐ ܕܣܸܩܠܵܐ ܕܡܲܠܟܘܼܬܘܼܟ݂.

13ܡܲܠܟܘܼܬܘܼܟ݂ ܡܲܠܟܘܼܬܵܐ ܥܵܠܡܝܼܢܵܝܬܵܐ ܝܠܵܗ̇،

ܘܫܘܼܠܛܵܢܘܼܟ݂ ܒܟܠ ܕܵܘܪܵܐ ܘܕܵܘܪܵܐ.

14ܟܹܐ ܣܵܢܹܕ ܡܵܪܝܵܐ ܠܟܠܲܝܗܝ ܢܵܦܠܵܢܹ̈ܐ،

ܘܟܹܐ ܡܲܩܸܡ ܠܟܠܲܝܗܝ ܛܥܝܼ̈ܦܹܐ.

15ܥܲܝܢܹ̈ܐ ܕܟܠܲܝܗܝ ܐܸܠܘܼܟ݂ ܟܹܐ ܣܵܦܪܝܼ،

ܘܐܲܢ݇ܬ ܟܹܐ ܝܵܗ݇ܒܹܬ ܠܗܘܿܢ ܡܹܐܟ݂ܘܼܠܬܲܝܗܝ ܒܥܕܵܢܘܼܗ̇.

16ܟܹܐ ܦܵܬܚܹܬ ܐܝܼܕܘܼܟ݂،

ܘܟܹܐ ܡܲܣܒܸܥܸܬ ܠܨܸܒ݂ܝܵܢܵܐ ܕܟܠ ܚܵܝܵܐ.

17ܙܲܕܝܼܩܵܐ ܝܠܹܗ ܡܵܪܝܵܐ ܒܟܠܲܝܗܝ ܐܘܼܪ̈ܚܵܬܹܗ،

ܘܡܗܘܼܡܢܵܐ ܒܟܠܲܝܗܝ ܦܘܼܠܚܵܢܘܼ̈ܗܝ.

18ܩܘܼܪܒܵܐ ܝܠܹܗ ܡܵܪܝܵܐ ܠܟܠܲܝܗܝ ܩܵܪ̈ܝܵܢܘܼܗܝ،

ܠܟܠ ܡ̇ܢ ܕܩܵܪܹܐ ܠܹܗ ܒܫܲܪܝܼܪܘܼܬܵܐ.

19ܨܸܒ݂ܝܵܢܵܐ ܕܙܕܝܼܥܘܼ̈ܗܝ ܟܹܐ ܥܵܒܹܕ،

ܘܡܲܩܘܲܚܬܲܝܗܝ ܟܹܐ ܫܵܡܹܥ، ܘܟܹܐ ܦܲܪܸܩ ܠܗܘܿܢ.

20ܟܹܐ ܢܵܛܹܪ ܡܵܪܝܵܐ ܠܟܠܲܝܗܝ ܡܲܚܸܒܵܢܘܼ̈ܗܝ،

ܐܝܼܢܵܐ ܠܟܠܲܝܗܝ ܪ̈ܲܫܝܼܥܹܐ ܒܸܬ ܛܲܠܸܩ.

21ܬܸܫܒܘܿܚܬܵܐ ܕܡܵܪܝܵܐ ܒܸܬ ܗܲܡܙܸܡ ܦܘܼܡܝܼ،

ܘܒܸܬ ܒܲܪܟ݂ܵܐ ܟܠ ܓܵܢܵܐ ܫܸܡܵܐ ܕܩܘܼܕܫܹܗ ܠܥܵܠܲܡ ܥܵܠܡܝܼܢ.

လက္ရွိေရြးခ်ယ္ထားမွု

ܡܙܡܘܪ̈ܐ 145 (ܩܡܗ): ABTAB

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ အေၾကာင္းကို ပို၍ သင္ယူပါ။