ܡܙܡܘܪ̈ܐ 139 (ܩܠܛ)
139 (ܩܠܛ)
ܠܪܹܫ ܓܘܼܕܵܐ ܕܙܲܡܵܪܹ̈ܐ. ܡܲܙܡܘܿܪܵܐ ܕܕܵܘܝܼܕ.
1ܝܵܐ ܡܵܪܝܵܐ، ܨܘܼܚܨܝܼܵܐ ܝܘܸܬ ܐܸܠܝܼ ܘܟܹܐ ܝܵܕܥܹܬ ܠܝܼ.
2ܐܲܢ݇ܬ ܟܹܐ ܝܵܕܥܹܬ ܝ݇ܬܵܒ݂ܬܝܼ ܘܩܝܵܡܬܝܼ،
ܦܘܼܪܡܹܐ ܠܘܼܟ݂ ܚܘܼܫܵܒ݂ܝܼ ܡ̣ܢ ܪܸܚܩܵܐ.
3ܐܘܼܪܚܝܼ ܘܕܡܵܟ݂ܬܝܼ ܬܘܼܦ̮ܬܸܫ ܠܘܼܟ݂،
ܘܟܠܲܝܗܝ ܐܘܼܪ̈ܚܵܬܝܼ ܟܹܐ ܝܵܕܥܹܬ.
4ܟܲܕ ܗܹܫ ܠܲܝܬ ܚܲܒܪܵܐ ܒܠܸܫܵܢܝܼ،
ܗܵܐ ܐܲܢ݇ܬ، ܝܵܐ ܡܵܪܝܵܐ، ܟܹܐ ܝܵܕܥܹܬ ܠܹܗ ܟܠܹܗ.
5ܡ̣ܢ ܒܵܬ݇ܪܵܐ ܘܩܵܕ݇ܡܵܐ ܩܲܡ ܚܲܪܕܸܬ ܠܝܼ،
ܘܩܲܡ ܡܲܬܒܸܬ ܐܝܼܕܘܼܟ݂ ܥܲܠܝܼ.
6ܥܓ̰ܝܼܒܬܵܐ ܝܠܵܗ̇ ܐܵܗܵܐ ܝ݇ܕܲܥܬܵܐ ܩܵܬܝܼ،
ܥܸܠܸܠ ܝܼܠܵܗ̇ ܡ̣ܢ ܨܲܠܡܲܢܬܝܼ.
7ܠܐܲܝܟܵܐ ܐܵܙܹܠ݇ܢ ܡ̣ܢ ܪܘܼܚܘܼܟ݂،
ܘܠܐܲܝܟܵܐ ܥܵܪܩܹܢ ܡ̣ܢ ܦܵܬܘܼܟ݂؟
8ܐܸܢ ܐܵܣܩܹܢ ܠܫܡܲܝܵܐ، ܬܵܡܵܐ ܝܘܸܬ ܐܲܢ݇ܬ،
ܘܐܸܢ ܫܲܘܹܝܢ ܫܘܝܼܬܝܼ ܓܵܘ ܫܝܘܿܠ، ܗܵܐ، ܬܵܡܵܐ ܝܘܸܬ.
9ܐܸܢ ܫܵܩܠܹܢ ܓܘܼܠܦܵܢܹ̈ܐ ܕܨܸܡܚܵܐ،
ܘܫܵܪܹܝܢ ܒܚܲܪܬܵܐ ܕܝܵܡܵܐ،
10ܐܘܼܦ ܬܵܡܵܐ ܐܝܼܕܘܼܟ݂ ܒܸܬ ܡܗܲܕܝܵܐ ܠܝܼ،
ܘܝܲܡܝܼܢܘܼܟ݂ ܒܸܬ ܕܵܒ݂ܩܵܐ ܠܝܼ.
11ܘܐܸܢ ܐܵܡܪܹܢ، ”ܒܫܪܵܪܵܐ، ܚܸܫܟܵܐ ܒܸܬ ܟܲܣܹܐ ܠܝܼ،
ܘܒܲܗܪܵܐ ܕܥܲܠܝܼ ܒܸܬ ܗܵܘܹܐ ܠܲܝܠܹܐ،“
12ܐܘܼܦ ܚܸܫܟܵܐ ܠܹܐ ܝܠܹܗ ܚܸܫܟܵܢܵܐ ܐܸܠܘܼܟ݂،
ܘܠܲܝܠܹܐ ܐܲܝܟ݂ ܐܝܼܡܵܡܵܐ ܟܹܐ ܒܲܗܪܸܢ،
ܐܲܝܟ݂ ܚܸܫܟܵܐ، ܗܲܕܟ݂ܵܐ ܒܲܗܪܵܐ.
13ܣܵܒܵܒ ܐܲܢ݇ܬ ܒܪܹܐ ܠܘܼܟ݂ ܠܪܸܥܝܵܢܝܼ،
ܩܲܡ ܙܵܩܪܹܬ ܠܝܼ ܒܒܲܛܢܵܐ ܕܝܸܡܝܼ.
14ܒܸܬ ܫܲܟܪܸܢܘܼܟ݂ ܣܵܒܵܒ ܣܲܗܡܵܢܵܐ ܘܥܓ̰ܝܼܒܵܐ ܦܝܼܫ ܠܝܼ ܥܒ݂ܝܼܕܵܐ،
ܥܓ̰ܝܼܒܹ̈ܐ ܝܢܵܐ ܦܘܼܠܚܵܢܘܼ̈ܟ݂،
ܘܓܵܢܝܼ ܨܦܵܝܝܼ ܟܹܐ ܝܵܕܥܵܐ.
15ܠܵܐ ܦܝܼܫ ܠܗܘܿܢ ܛܸܫܝܹܐ ܓܲܪ̈ܡܝܼ ܡܸܢܘܼܟ݂،
ܟܲܕ ܦܝܼܫ ܠܝܼ ܥܒ݂ܝܼܕܵܐ ܒܣܸܬܵܪܵܐ،
ܦܝܼܫ ܠܝܼ ܙܩܝܼܪܵܐ ܓܵܘ ܬܲܚܬܵܝܵܬܹ̈ܐ ܕܐܲܪܥܵܐ.
16ܚܙܹܐ ܠܗܘܿܢ ܥܲܝܢܘܼ̈ܟ݂ ܓܒ݂ܝܼܠܬܝܼ،
ܘܓܵܘ ܟܬܵܒ݂ܘܼܟ݂ ܟܠܲܝܗܝ ܝܵܘܡܵܢܝܼ̈ ܦܝܼܫ ܠܗܘܿܢ ܟܬܝܼܒܹܐ،
ܦܝܼܫ ܠܗܘܿܢ ܪܫܝܼܡܹܐ، ܟܲܕ ܠܲܝܬ ܗ݇ܘܵܐ ܐܘܼܦ ܚܲܕ ܡܸܢܲܝܗܝ.
17ܘܐܸܠܝܼ ܟܡܵܐ ܡܝܘܼܩܪܹ̈ܐ ܝܢܵܐ ܚܘܼܫܵܒ݂ܘܼ̈ܟ݂، ܝܵܐ ܐܲܠܵܗܵܐ،
ܟܡܵܐ ܪܵܒܵܐ ܝܢܵܐ ܡܸܢܝܵܢܲܝ̈ܗܝ.
18ܐܸܢ ܡܵܢܹܝܢܗܘܿܢ ܒܘܼܫ ܒܸܬ ܙܵܝܕܝܼ ܡ̣ܢ ܣܹܠܵܐ،
ܟܹܐ ܪܵܥܫܹܢ ܘܗܹܫ ܐܵܢܵܐ ܥܲܡܘܼܟ݂ ܝܼܘܸܢ.
19ܛܘܼܒ݂ܵܐ ܕܩܵܛܠܹܬ ܠܪ̈ܲܫܝܼܥܹܐ، ܝܵܐ ܐܲܠܵܗܵܐ،
ܪܚܘܿܩܘܼܢ ܡܸܢܝܼ، ܝܵܐ ܫܲܦܟ݂ܵܢܹ̈ܐ ܕܕܸܡܹ̈ܐ.
20ܟܹܐ ܗܲܡܙܸܡܝܼ ܒܘܼܬ ܕܝܼܘܼܟ݂ ܒܥܵܘܠܵܐ،
ܕܸܫܡܸܢܘܼ̈ܟ݂ ܟܹܐ ܫܵܩܠܝܼ ܫܸܡܘܼܟ݂ ܒܣܪܝܼܩܘܼܬܵܐ.
21ܗܵܐ، ܠܹܐ ܣܵܢܹܝܢ ܠܣܵܢܝܵܢܘܼ̈ܟ݂، ܝܵܐ ܡܵܪܝܵܐ،
ܘܠܹܐ ܓܲܢܓܸܙܸܢ ܡ̣ܢ ܩܵܝܡܵܢܹ̈ܐ ܕܕܲܠܩܘܼܒ݂ܠܘܼܟ݂؟
22ܣܢܵܝܬܵܐ ܓܡܝܼܪܬܵܐ ܟܹܐ ܣܵܢܹܝܢܗܘܿܢ،
ܗܘܹܐ ܠܗܘܿܢ ܐܸܠܝܼ ܕܸܫܡܸܢܹ̈ܐ.
23ܨܲܚܨܝܼ ܠܝܼ، ܝܵܐ ܐܲܠܵܗܵܐ، ܘܝ݇ܕܸܥ ܠܸܒܝܼ،
ܬܲܦ̮ܬܸܫ ܠܝܼ ܘܝ݇ܕܸܥ ܚܲܡܝܼ̈.
24ܘܚܙܝܼ ܐܸܢ ܐܝܼܬ ܒܝܼܝܼ ܡܸܢܕܝܼ ܥܲܓ̰ܸܙܵܢܵܐ ܩܵܬܘܼܟ݂،
ܘܡܗܲܕܝܼ ܠܝܼ ܒܐܘܼܪܚܵܐ ܕܠܥܵܠܲܡ.
လက္ရွိေရြးခ်ယ္ထားမွု
ܡܙܡܘܪ̈ܐ 139 (ܩܠܛ): ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation