ܡܙܡܘܪ̈ܐ 135 (ܩܠܗ)
135 (ܩܠܗ)
ܗܲܠܸܠܘܼܝܵܐ.
1ܫܲܒܚܘܼܢ ܠܫܸܡܵܐ ܕܡܵܪܝܵܐ،
ܫܲܒܚܘܼܢ، ܝܵܐ ܪܹ̈ܓܵܘܵܬܹܐ ܕܡܵܪܝܵܐ،
2ܐܵܢܝܼ ܕܟܹܐ ܟܵܠܝܼ ܒܒܲܝܬܵܐ ܕܡܵܪܝܵܐ،
ܒܕܵܪ̈ܵܬܹܐ ܕܒܲܝܬܵܐ ܕܐܲܠܵܗܵܐ.
3ܫܲܒܚܘܼܢ ܠܡܵܪܝܵܐ ܣܵܒܵܒ ܛܵܒ݂ܵܐ ܝܠܹܗ ܡܵܪܝܵܐ،
ܙܡܘܿܪܘܼܢ ܠܫܸܡܹܗ ܣܵܒܵܒ ܒܲܣܝܼܡܵܐ ܝܠܹܗ.
4ܣܵܒܵܒ ܓܘܼܒܹܐ ܠܹܗ ܡܵܪܝܵܐ ܠܝܲܥܩܘܿܒ݂ ܩܵܐ ܓܵܢܹܗ،
ܠܝܼܣܪܵܝܹܠ ܓܲܙܵܐ ܕܓܵܢܹܗ.
5ܣܵܒܵܒ ܐܵܢܵܐ ܟܹܐ ܝܵܕܥܹܢ ܕܓܘܼܪܵܐ ܝܠܹܗ ܡܵܪܝܵܐ،
ܘܥܸܠܵܝܵܐ ܝܠܹܗ ܡܵܪܲܢ ܡ̣ܢ ܟܠܲܝܗܝ ܐܲܠܵܗܹ̈ܐ.
6ܟܹܐ ܥܵܒܹܕ ܡܵܪܝܵܐ ܟܠ ܕܒܵܣܡܵܐ ܠܹܗ،
ܒܫܡܲܝܵܐ ܘܒܐܲܪܥܵܐ، ܒܝܵܡܵܬܹ̈ܐ ܘܒܟܠܲܝܗܝ ܬܗܘܿܡܹ̈ܐ.
7ܡܲܐܣܩܵܢܵܐ ܕܗܵܘܓܹ̈ܐ ܡ̣ܢ ܡܲܪܙܵܐ ܕܐܲܪܥܵܐ،
ܥܵܒ݂ܕܵܢܵܐ ܕܒܸܪ̈ܩܹܐ ܩܵܐ ܡܸܛܪܵܐ،
ܦܲܠܛܵܢܵܐ ܕܦܵܘܚܵܐ ܡ̣ܢ ܐܲܢܒܵܪ̈ܘܼܗܝ.
8ܗ̇ܘ ܝܼܗ݇ܘܵܐ ܕܡܚܹܐ ܠܹܗ ܒܘܼܟ݂ܪܹ̈ܐ ܕܡܸܨܪܹܝܢ،
ܡ̣ܢ ܒܲܪܢܵܫܵܐ ܗܲܠ ܒܥܝܼܪܵܐ.
9ܩܲܡ ܫܲܕܸܪ ܢܝܼܫܲܢܩܹ̈ܐ ܘܕܘܼܡܵܪܹ̈ܐ ܓܵܘܵܟ݂ܝ، ܝܵܐ ܡܸܨܪܹܝܢ،
ܥܲܠ ܦܸܪܥܘܿܢ ܘܥܲܠ ܟܠܲܝܗܝ ܪܹ̈ܓܵܘܵܬܹܗ.
10ܗ̇ܘ ܝܼܗ݇ܘܵܐ ܕܡܚܹܐ ܠܹܗ ܐܸܡܘܵܬܹ̈ܐ ܪܵܒܵܐ،
ܘܩܛܝܼܠ ܠܹܗ ܡܲܠܟܹ̈ܐ ܥܲܫܝܼܢܹ̈ܐ؛
11ܠܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ،
ܘܠܥܘܿܓ݂ ܡܲܠܟܵܐ ܕܒܲܝܫܵܢ،
ܘܠܟܠܲܝܗܝ ܡܲܠܟܘܵܬܹ̈ܐ ܕܟܢܲܥܢ.
12ܘܝܘܼܗ݇ܒܸܠ ܠܹܗ ܐܲܪܥܲܝܗܝ ܠܝܵܪܬܘܼܬܵܐ،
ܝܵܪܬܘܼܬܵܐ ܠܝܼܣܪܵܝܹܠ ܥܲܡܹܗ.
13ܝܵܐ ܡܵܪܝܵܐ، ܫܸܡܘܼܟ݂ ܠܥܵܠܲܡ ܝܼܠܹܗ،
ܝܵܐ ܡܵܪܝܵܐ، ܕܟ݂ܵܪܘܼܟ݂ ܠܕܵܘܪܵܐ ܘܕܵܘܪܵܐ.
14ܣܵܒܵܒ ܒܸܬ ܥܵܒܹܕ ܡܵܪܝܵܐ ܕܝܼܘܵܢ ܕܥܲܡܹܗ،
ܘܥܲܠ ܪܹ̈ܓܵܘܵܬܹܗ ܒܸܬ ܪܲܚܸܡ.
15ܨܵܢܲܡܹ̈ܐ ܕܐܸܡܘܵܬܹ̈ܐ ܣܹܐܡܵܐ ܘܕܲܗܒ݂ܵܐ ܝܢܵܐ،
ܦܘܼܠܚܵܢܵܐ ܕܐܝܼܕܵܬܹ̈ܐ ܕܒܲܪܢܵܫܵܐ.
16ܦܘܼܡܵܐ ܐܝܼܬ ܠܗܘܿܢ ܐܝܼܢܵܐ ܠܹܐ ܗܲܡܙܸܡܝܼ،
ܥܲܝܢܵܬܹ̈ܐ ܐܝܼܬ ܠܗܘܿܢ ܐܝܼܢܵܐ ܠܹܐ ܚܵܙܝܼ،
17ܢܵܬܝܵܬܹ̈ܐ ܐܝܼܬ ܠܗܘܿܢ ܐܝܼܢܵܐ ܠܹܐ ܫܵܡܥܝܼ،
ܐܘܼܦ ܠܲܝܬ ܢܫܲܡܬܵܐ ܒܦܘܼܡܲܝܗܝ.
18ܐܲܝܟ݂ ܕܝܼܲܝܗܝ ܗܵܘܝܼ ܥܵܒ݂ܕܵܢܲܝ̈ܗܝ،
ܘܟܠ ܕܣܵܒܹܪ ܒܝܼܲܝܗܝ.
19ܝܵܐ ܒܹܝܬ ܝܼܣܪܵܝܹܠ، ܒܲܪܟ݂ܘܼܢ ܠܡܵܪܝܵܐ،
ܝܵܐ ܒܹܝܬ ܐܲܗܪܘܿܢ، ܒܲܪܟ݂ܘܼܢ ܠܡܵܪܝܵܐ،
20ܝܵܐ ܒܹܝܬ ܠܹܘܝܼ، ܒܲܪܟ݂ܘܼܢ ܠܡܵܪܝܵܐ،
ܝܵܐ ܙܕܝܼܥܹ̈ܐ ܕܡܵܪܝܵܐ، ܒܲܪܟ݂ܘܼܢ ܠܡܵܪܝܵܐ.
21ܒܘܼܪܟ݂ܵܐ ܝܠܹܗ ܡܵܪܝܵܐ ܡ̣ܢ ܨܸܗܝܘܿܢ،
ܥܵܡܪܵܢܵܐ ܕܐܘܿܪܸܫܠܸܡ. ܗܲܠܸܠܘܼܝܵܐ.
လက္ရွိေရြးခ်ယ္ထားမွု
ܡܙܡܘܪ̈ܐ 135 (ܩܠܗ): ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation