ܡܙܡܘܪ̈ܐ 119 (ܩܝܛ)
119 (ܩܝܛ)
ܐ
1ܛܘܼܒ݂ܵܐ ܠܬܲܡܝܼܡܹ̈ܐ ܒܐܘܼܪܚܲܝܗܝ،
ܕܟܹܐ ܚܵܕܪܝܼ ܒܢܵܡܘܿܣܵܐ ܕܡܵܪܝܵܐ.
2ܛܘܼܒ݂ܵܐ ܠܢܵܛܪ̈ܵܢܹܐ ܕܣܵܗܕܘܵܬܹ̈ܗ،
ܕܒܟܠܹܗ ܠܸܒܵܐ ܟܹܐ ܛܵܥܝܼ ܐܸܠܹܗ.
3ܐܘܼܦ ܠܹܐ ܦܵܠܚܝܼ ܥܵܘܠܵܐ،
ܒܐܘܼܪ̈ܚܵܬܹܗ ܟܹܐ ܚܵܕܪܝܼ.
4ܐܲܢ݇ܬ ܦܘܼܩܸܕ ܠܘܼܟ݂ ܦܘܼܩܵܕܘܼ̈ܟ݂،
ܕܦܵܝܫܝܼ ܢܛܝܼܪܹܐ ܚܦܝܼܛܵܐܝܼܬ.
5ܛܘܼܒ݂ܵܐ ܕܗܵܘܝܼ ܡܩܵܘܝܵܢܹ̈ܐ ܐܘܼܪ̈ܚܵܬܝܼ،
ܠܸܢܛܵܪܵܐ ܩܵܢܘܿܢܘܼ̈ܟ݂.
6ܗ̇ܝܓܵܗ ܠܹܐ ܢܵܟ݂ܦܹܢ،
ܟܲܕ ܚܵܝܪܹܢ ܠܟܠܲܝܗܝ ܦܘܼܩܕܵܢܘܼ̈ܟ݂.
7ܒܸܬ ܫܲܟܪܸܢܘܼܟ݂ ܒܬܪܘܼܨܘܼܬܵܐ ܕܠܸܒܵܐ،
ܟܲܕ ܝܵܠܦܹܢ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
8ܩܵܢܘܿܢܘܼ̈ܟ݂ ܒܸܬ ܢܵܛܪܹܢ،
ܫܒ݂ܵܩܵܐ ܠܵܐ ܫܵܒ݂ܩܹܬ ܠܝܼ.
ܒ
9ܒܡܘܿܕܝܼ ܕܲܟܹܐ ܠܵܗ̇ ܥܠܲܝܡܵܐ ܐܘܼܪܚܹܗ؟
ܒܢܛܵܪܬܘܼܗ̇ ܐܲܝܟ݂ ܚܲܒܪܘܼܟ݂.
10ܒܟܠܹܗ ܠܸܒܝܼ ܛܥܹܐ ܠܝܼ ܐܸܠܘܼܟ݂،
ܠܵܐ ܫܵܒ݂ܩܹܬ ܚܵܠܛܹܢ ܡ̣ܢ ܦܘܼܩܕܵܢܘܼ̈ܟ݂.
11ܓܵܘ ܠܸܒܝܼ ܛܘܼܫܝܵܐ ܠܝܼ ܗܹܡܸܙܡܵܢܘܼܟ݂،
ܩܵܐ ܕܠܵܐ ܚܵܛܹܝܢ ܥܲܠܘܼܟ݂.
12ܒܪܝܼܟ݂ܵܐ ܝܘܸܬ، ܝܵܐ ܡܵܪܝܵܐ،
ܡܲܠܸܦ ܠܝܼ ܩܵܢܘܿܢܘܼ̈ܟ݂.
13ܒܣܸܦܘܵܬܝܼ̈ ܗܘܼܩܹܐ ܠܝܼ
ܟܠܲܝܗܝ ܕܝܼܘܵܢܹ̈ܐ ܕܦܘܼܡܘܼܟ݂.
14ܒܐܘܼܪܚܵܐ ܕܣܵܗܕܘܵܬܘܼ̈ܟ݂ ܦܨܝܼܚ ܠܝܼ،
ܗܲܪ ܐܲܝܟ݂ ܕܒܟܠܹܗ ܥܘܼܬܪܵܐ.
15ܠܦܘܼܩܵܕܘܼ̈ܟ݂ ܒܸܬ ܗܲܓܹܝܢ،
ܘܠܐܘܼܪ̈ܚܵܬܘܼܟ݂ ܒܸܬ ܚܵܝܪܹܢ.
16ܒܩܵܢܘܿܢܘܼ̈ܟ݂ ܒܸܬ ܡܲܒܣܸܡܸܢܵܗ̇ ܓܵܢܝܼ،
ܠܹܐ ܢܵܫܹܝܢ ܠܚܲܒܪܘܼܟ݂.
ܓ
17ܥܒ݂ܘܿܕ ܛܵܒ݂ܬܵܐ ܠܪܹܓܘܼܟ݂ ܕܚܵܝܹܝܢ،
ܘܢܵܛܪܹܢܗܘܿܢ ܗܹܡܸܙܡܵܢܘܼ̈ܟ݂.
18ܓܲܠܝܼ ܠܗܘܿܢ ܥܲܝܢܝܼ̈ ܕܚܵܙܹܝܢ
ܕܘܼܡܵܪܹ̈ܐ ܡ̣ܢ ܢܵܡܘܿܣܘܼܟ݂.
19ܡܵܫܵܚܲܛ ܝܼܘܸܢ ܐܵܢܵܐ ܒܐܲܪܥܵܐ،
ܠܵܐ ܛܲܫܹܝܬ ܡܸܢܝܼ ܦܘܼܩܕܵܢܘܼ̈ܟ݂.
20ܓܪܝܼܣܬܵܐ ܝܠܵܗ̇ ܓܵܢܝܼ ܒܪܲܚܪܲܚܬܵܐ
ܠܕܝܼܘܵܢܘܼ̈ܟ݂ ܒܟܠ ܙܲܒ݂ܢܵܐ.
21ܢܓ̰ܝܼܘ ܠܘܼܟ݂ ܒܚܵܬܪ̈ܵܢܹܐ، ܒܠܝܼܛܹ̈ܐ،
ܐܲܝܢܝܼ ܕܚܵܠܛܝܼ ܡ̣ܢ ܦܘܼܩܕܵܢܘܼ̈ܟ݂.
22ܡܲܥܒܸܪ ܡܥܲܠܝܼ ܠܵܘܡܵܐ ܘܡܲܣܠܵܝܬܵܐ،
ܣܵܒܵܒ ܢܛܝܼܪܵܐ ܝܘܸܢ ܠܣܵܗܕܘܵܬܘܼ̈ܟ݂.
23ܐܘܼܦ ܝ݇ܬܝܼܒ݂ ܠܗܘܿܢ ܓܘܼܪ̈ܵܢܹܐ ܘܗܘܼܡܙܸܡ ܠܗܘܿܢ ܕܲܠܩܘܼܒ݂ܠܝܼ،
ܐܝܼܢܵܐ ܪܹܓܘܼܟ݂ ܗܘܼܓܹܐ ܠܹܗ ܩܵܢܘܿܢܘܼ̈ܟ݂.
24ܐܘܼܦ ܣܵܗܕܘܵܬܘܼ̈ܟ݂ ܒܲܣܝܼܡܘܼܬܝܼ ܝܢܵܐ،
ܡܵܠܘܿܟܹ̈ܐ ܝܢܵܐ ܐܸܠܝܼ.
ܕ
25ܬܒܝܼܥ ܠܵܗ̇ ܠܥܲܦܪܵܐ ܓܵܢܝܼ،
ܡܲܚܝܼ ܠܝܼ ܐܲܝܟ݂ ܚܲܒܪܘܼܟ݂.
26ܗܘܼܩܹܐ ܠܝܼ ܐܸܠܘܼܟ݂ ܐܘܼܪ̈ܚܵܬܝܼ ܘܩܲܡ ܓ̰ܲܘܸܒܸܬ ܠܝܼ،
ܡܲܠܸܦ ܠܝܼ ܩܵܢܘܿܢܘܼ̈ܟ݂.
27ܐܘܼܪܚܵܐ ܕܦܘܼܩܵܕܘܼ̈ܟ݂ ܡܲܦܪܸܡ ܠܝܼ،
ܘܒܸܬ ܗܲܓܹܝܢ ܠܕܘܼܡܵܪ̈ܘܼܟ݂.
28ܡܘܼܥܝܸܩܬܵܐ ܝܠܵܗ̇ ܓܵܢܝܼ ܡ̣ܢ ܚܲܫܵܐ،
ܣܢܘܿܕ ܠܝܼ ܐܲܝܟ݂ ܚܲܒܪܘܼܟ݂.
29ܐܘܼܪܚܵܐ ܕܕܘܼܓܠܵܐ ܡܲܥܒܸܪ ܡܸܢܝܼ،
ܘܒܚܢܵܢܵܐ ܡܲܠܸܦ ܠܝܼ ܢܵܡܘܿܣܘܼܟ݂.
30ܐܘܼܪܚܵܐ ܕܫܪܵܪܵܐ ܓܘܼܒܹܐ ܠܝܼ،
ܕܝܼܘܵܢܘܼ̈ܟ݂ ܡܘܼܬܸܒ݂ ܠܝܼ ܒܲܠܩܘܼܒ݂ܠܝܼ.
31ܬܒܝܼܥ ܠܝܼ ܠܣܵܗܕܘܵܬܘܼ̈ܟ݂،
ܝܵܐ ܡܵܪܝܵܐ، ܠܵܐ ܡܲܢܟܸܦܸܬ ܠܝܼ.
32ܒܐܘܼܪܚܵܐ ܕܦܘܼܩܕܵܢܘܼ̈ܟ݂ ܒܸܬ ܪܵܚܛܹܢ،
ܒܗ̇ܝ ܕܒܸܬ ܡܲܪܘܸܚܸܬ ܠܸܒܝܼ.
ܗ
33ܡܲܠܸܦ ܠܝܼ، ܝܵܐ ܡܵܪܝܵܐ، ܐܘܼܪܚܵܐ ܕܩܵܢܘܿܢܘܼ̈ܟ݂،
ܘܒܸܬ ܢܵܛܪܹܢܵܗ̇ ܗܲܠ ܚܲܪܬܵܐ.
34ܡܲܦܪܸܡ ܠܝܼ ܕܢܵܛܪܹܢ ܢܵܡܘܿܣܘܼܟ݂،
ܘܒܸܬ ܢܵܛܪܹܢܹܗ ܒܟܠܹܗ ܠܸܒܝܼ.
35ܡܲܚܕܸܪܝܼ ܒܫܒ݂ܝܼܠܵܐ ܕܦܘܼܩܕܵܢܘܼ̈ܟ݂،
ܣܵܒܵܒ ܒܝܼܹܗ ܒܣܝܼܡ ܠܵܗ̇ ܓܵܢܝܼ.
36ܡܲܦܬܸܠ ܠܸܒܝܼ ܠܣܵܗܕܘܵܬܘܼ̈ܟ݂،
ܘܠܵܐ ܠܩܢܵܝܬܵܐ ܛܲܢܦܬܵܐ.
37ܡܲܥܒܸܪ ܥܲܝܢܝܼ̈ ܡ̣ܢ ܠܸܚܙܵܝܵܐ ܣܪܝܼܩܘܼܬܵܐ،
ܒܐܘܼܪܚܘܼܟ݂ ܡܲܚܝܼ ܠܝܼ.
38ܡܲܩܘܝܼ ܗܹܡܸܙܡܵܢܘܼܟ݂ ܠܪܹܓܘܼܟ݂،
ܗ̇ܝ ܕܝܼܠܵܗ̇ ܕܙܵܕܹܥ ܡܸܢܘܼܟ݂.
39ܡܲܥܒܸܪ ܡܸܢܝܼ ܠܵܘܡܝܼ ܕܟܹܐ ܙܵܕܥܹܢ ܡܸܢܹܗ،
ܣܵܒܵܒ ܕܝܼܘܵܢܘܼ̈ܟ݂ ܛܵܒܹ̈ܐ ܝܢܵܐ.
40ܗܵܐ، ܪܘܼܚܪܸܚ ܠܝܼ ܠܦܘܼܩܵܕܘܼ̈ܟ݂،
ܒܙܲܕܝܼܩܘܼܬܘܼܟ݂ ܡܲܚܝܼ ܠܝܼ.
ܘ
41ܘܐܵܬܝܵܐ ܥܲܠܝܼ ܫܵܦܵܩܲܬܘܼܟ݂، ܝܵܐ ܡܵܪܝܵܐ،
ܘܦܘܼܪܩܵܢܘܼܟ݂، ܐܲܝܟ݂ ܩܵܘܠܘܼܟ݂،
42ܗܲܕܟ݂ܵܐ ܕܝܵܗ݇ܒܹܢ ܓ̰ܘܼܘܵܒ ܠܠܵܝܡܵܢܝܼ،
ܣܵܒܵܒ ܣܒܝܼܪܝܼ ܒܚܲܒܪܘܼܟ݂.
43ܘܠܵܐ ܫܵܩܠܹܬ ܡ̣ܢ ܦܘܼܡܝܼ ܗܹܡܸܙܡܵܢ ܕܫܪܵܪܵܐ،
ܣܵܒܵܒ ܠܕܝܼܘܵܢܘܼ̈ܟ݂ ܣܦܝܼܪܝܼ،
44ܘܒܸܬ ܢܵܛܪܹܢ ܢܵܡܘܿܣܘܼܟ݂ ܐܲܡܝܼܢܵܐܝܼܬ،
ܠܥܵܠܲܡ ܥܵܠܡܝܼܢ،
45ܘܒܸܬ ܚܵܕܪܹܢ ܒܪܘܵܚܵܢܝܼ،
ܣܵܒܵܒ ܠܦܘܼܩܵܕܘܼ̈ܟ݂ ܛܥܹܐ ܠܝܼ،
46ܘܒܸܬ ܗܲܡܙܸܡܸܢ ܒܘܼܬ ܣܵܗܕܘܵܬܘܼ̈ܟ݂ ܩܵܕ݇ܡ ܡܲܠܟܹ̈ܐ،
ܘܠܹܐ ܢܵܟ݂ܦܹܢ.
47ܘܒܸܬ ܩܲܒܠܸܢ ܒܘܼܣܵܡܵܐ ܒܦܘܼܩܕܵܢܘܼ̈ܟ݂
ܕܡܘܼܚܸܒܲܝ ܠܝܼ،
48ܘܒܸܬ ܡܲܪܡܸܢ ܐܝܼܕܵܬܝܼ̈ ܠܦܘܼܩܕܵܢܘܼ̈ܟ݂ ܕܡܘܼܚܸܒܲܝ ܠܝܼ،
ܘܒܸܬ ܗܲܓܹܝܢ ܩܵܢܘܿܢܘܼ̈ܟ݂.
ܙ
49ܕܟ݂ܘܿܪܹܗ ܚܲܒܪܘܼܟ݂ ܠܪܹܓܘܼܟ݂،
ܗ̇ܘ ܕܒܝܼܹܗ ܩܲܡ ܥܵܒ݂ܕܹܬ ܕܣܵܒܪܹܢ.
50ܐܵܗܵܐ ܝܠܵܗ̇ ܝܲܗ݇ܒܲܠܬܵܐ ܕܠܸܒܵܐ ܐܸܠܝܼ ܓܵܘ ܐܘܼܠܨܵܢܝܼ،
ܣܵܒܵܒ ܗܹܡܸܙܡܵܢܘܼܟ݂ ܩܲܡ ܡܲܚܝܼܵܐ ܠܝܼ.
51ܚܵܬܪ̈ܵܢܹܐ ܡܘܼܣܚܸܪܗܘܿܢ ܟ̰ܸܡ ܪܵܒܵܐ ܒܝܼܝܼ،
ܘܡ̣ܢ ܢܵܡܘܿܣܘܼܟ݂ ܠܵܐ ܩܠܝܼܒ ܠܝܼ.
52ܕܟ݂ܝܼܪܝܼ ܕܝܼܘܵܢܘܼ̈ܟ݂ ܡ̣ܢ ܥܵܠܲܡ، ܝܵܐ ܡܵܪܝܵܐ،
ܘܦܝܼܫ ܠܝܼ ܝܘܼܗ݇ܒ݂ܵܐ ܠܸܒܵܐ.
53ܚܸܡܬܵܐ ܩܲܡ ܕܵܒ݂ܩܵܐ ܠܝܼ
ܡ̣ܢ ܥܸܠܬܵܐ ܕܪ̈ܲܫܝܼܥܹܐ ܫܵܒ݂ܩܵܢܹ̈ܐ ܕܢܵܡܘܿܣܘܼܟ݂.
54ܩܵܢܘܿܢܘܼ̈ܟ݂ ܗܘܹܐ ܠܗܘܿܢ ܙܡܝܼܪ̈ܵܬܹܐ ܐܸܠܝܼ،
ܓܵܘ ܒܲܝܬܵܐ ܕܬܵܘܬܵܒ݂ܘܼܬܝܼ.
55ܕܟ݂ܝܼܪܝܼ ܒܠܲܝܠܹܐ ܫܸܡܘܼܟ݂، ܝܵܐ ܡܵܪܝܵܐ،
ܘܢܛܝܼܪܝܼ ܢܵܡܘܿܣܘܼܟ݂.
56ܐܵܗܵܐ ܗܘܹܐ ܠܵܗ̇ ܥܝܵܕܵܐ ܐܸܠܝܼ،
ܣܵܒܵܒ ܢܛܝܼܪܝܼ ܦܘܼܩܵܕܘܼ̈ܟ݂.
ܚ
57ܡܵܪܝܵܐ ܝܼܠܹܗ ܣܵܗܡܵܐ ܐܸܠܝܼ،
ܐ݇ܡܝܼܪܝܼ ܕܒܸܬ ܢܵܛܪܹܢ ܗܹܡܸܙܡܵܢܘܼ̈ܟ݂.
58ܦܘܼܪܦܸܠ ܠܝܼ ܒܝܼܘܼܟ݂ ܒܟܠܹܗ ܠܸܒܝܼ،
ܗܘܝܼ ܚܲܢܵܢܵܐ ܐܸܠܝܼ ܐܲܝܟ݂ ܩܵܘܠܘܼܟ݂.
59ܬܘܼܚܡܸܢܝܼ ܒܘܼܬ ܐܘܼܪ̈ܚܵܬܝܼ،
ܘܡܘܼܕܸܪܲܝ ܠܝܼ ܐܲܩܠܝܼ̈ ܠܣܵܗܕܘܵܬܘܼ̈ܟ݂.
60ܡܘܼܠܝܸܙ ܠܝܼ ܘܠܵܐ ܥܘܼܪܩܸܠ ܠܝܼ،
ܠܸܢܛܵܪܵܐ ܦܘܼܩܕܵܢܘܼ̈ܟ݂.
61ܚܲܒ݂ܠܹ̈ܐ ܕܪ̈ܲܫܝܼܥܹܐ ܩܲܡ ܚܲܪܕܝܼ ܠܝܼ،
ܐܝܼܢܵܐ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.
62ܒܦܲܠܓܵܐ ܕܠܲܝܠܹܐ ܒܸܬ ܩܵܝܡܹܢ ܠܫܲܟܘܼܪܘܼܟ݂
ܒܘܼܬ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
63ܚܲܒ݂ܪܵܐ ܝܘܸܢ ܐܵܢܵܐ ܠܟܠܲܝܗܝ ܙܕܝܼܥܘܼ̈ܟ݂،
ܘܠܢܵܛܪ̈ܵܢܹܐ ܕܦܘܼܩܵܕܘܼ̈ܟ݂.
64ܫܵܦܵܩܲܬܘܼܟ݂، ܝܵܐ ܡܵܪܝܵܐ، ܡܠܹܐ ܠܵܗ̇ ܠܐܲܪܥܵܐ،
ܡܲܠܸܦ ܠܝܼ ܩܵܢܘܿܢܘܼ̈ܟ݂.
ܛ
65ܛܵܒ݂ܬܵܐ ܥܒ݂ܝܼܕܵܐ ܝܘܸܬ ܥܲܡ ܪܹܓܘܼܟ݂،
ܝܵܐ ܡܵܪܝܵܐ، ܐܲܝܟ݂ ܚܲܒܪܘܼܟ݂.
66ܦܲܪܡܵܝܬܵܐ ܨܦܵܝܝܼ ܘܝ݇ܕܲܥܬܵܐ ܡܲܠܸܦ ܠܝܼ،
ܣܵܒܵܒ ܒܦܘܼܩܕܵܢܘܼ̈ܟ݂ ܗܘܼܡܸܢܝܼ.
67ܡ̣ܢ ܩܵܕ݇ܡ ܕܦܵܝܫܹܢ ܗ݇ܘܵܐ ܡܘܼܠܝܸܨܵܐ ܒܸܚܠܵܛܵܐ ܝܘܸܢ ܗ݇ܘܵܐ،
ܐܝܼܢܵܐ ܐܵܕܝܼܵܐ ܗܹܡܸܙܡܵܢܘܼ̈ܟ݂ ܒܸܢܛܵܪܲܝ ܝܘܸܢ.
68ܛܵܒ݂ܵܐ ܝܘܸܬ ܐܲܢ݇ܬ ܘܥܵܒ݂ܕܵܢܵܐ ܕܛܵܒ݂ܬܵܐ،
ܡܲܠܸܦ ܠܝܼ ܩܵܢܘܿܢܘܼ̈ܟ݂.
69ܗܘܼܡܙܸܡ ܠܗܘܿܢ ܒܘܼܚܬܵܢ ܥܲܠܝܼ ܚܵܬܪ̈ܵܢܹܐ،
ܐܝܼܢܵܐ ܐܵܢܵܐ ܒܟܠܹܗ ܠܸܒܝܼ ܒܸܬ ܢܵܛܪܹܢ ܦܘܼܩܵܕܘܼ̈ܟ݂.
70ܛܪܝܼܨ ܠܹܗ ܐܲܝܟ݂ ܬܲܪܒܵܐ ܠܸܒܲܝܗܝ،
ܐܝܼܢܵܐ ܐܵܢܵܐ ܒܢܵܡܘܿܣܘܼܟ݂ ܒܣܝܼܡ ܠܵܗ̇ ܠܝܼ.
71ܨܦܵܝܝܼ ܝܠܵܗ̇ ܩܵܬܝܼ ܕܦܝܼܫ ܠܝܼ ܡܘܼܠܝܸܨܵܐ،
ܩܵܐ ܕܝܵܠܦܹܢ ܩܵܢܘܿܢܘܼ̈ܟ݂.
72ܒܘܼܫ ܨܦܵܝܝܼ ܝܠܹܗ ܩܵܬܝܼ ܢܵܡܘܿܣܵܐ ܕܦܘܼܡܘܼܟ݂،
ܡ̣ܢ ܐܲܠܦܹ̈ܐ ܕܕܲܗܒ݂ܵܐ ܘܕܣܹܐܡܵܐ.
ܝ
73ܐܝܼܕܵܬܘܼ̈ܟ݂ ܥܒ݂ܝܼܕ ܠܗܘܿܢ ܘܬܘܼܪܸܨ ܠܗܘܿܢ ܐܸܠܝܼ،
ܡܲܦܪܸܡ ܠܝܼ ܘܒܸܬ ܝܵܠܦܹܢ ܦܘܼܩܕܵܢܘܼ̈ܟ݂.
74ܙܕܝܼܥܘܼ̈ܟ݂ ܒܸܬ ܚܵܙܝܼ ܠܝܼ ܘܒܸܬ ܚܵܕܝܼ،
ܣܵܒܵܒ ܒܚܲܒܪܘܼܟ݂ ܣܒܝܼܪܝܼ.
75ܟܹܐ ܝܵܕܥܹܢ، ܝܵܐ ܡܵܪܝܵܐ، ܕܙܲܕܝܼܩܘܼܬܵܐ ܝܢܵܐ ܕܝܼܘܵܢܘܼ̈ܟ݂،
ܘܒܡܗܘܼܡܢܘܼܬܘܼܟ݂ ܩܲܡ ܡܲܡܟܸܟܸܬ ܠܝܼ.
76ܦܲܪܦܘܼܠܹܐ ܝܘܸܢ، ܗܵܘܝܵܐ ܫܵܦܵܩܲܬܘܼܟ݂ ܠܝܼܵܗ݇ܒ݂ܝܼ ܠܸܒܵܐ،
ܐܲܝܟ݂ ܗܹܡܸܙܡܵܢܘܼܟ݂ ܠܪܹܓܘܼܟ݂.
77ܐܵܬܝܼ ܥܲܠܝܼ ܪ̈ܲܚܡܘܼܟ݂ ܕܚܵܝܹܝܢ،
ܣܵܒܵܒ ܢܵܡܘܿܣܘܼܟ݂ ܒܲܣܝܼܡܘܼܬܵܐ ܝܠܹܗ ܐܸܠܝܼ.
78ܢܵܟ݂ܦܝܼ ܚܵܬܪ̈ܵܢܹܐ ܣܵܒܵܒ ܒܒܘܼܚܬܵܢ ܩܲܡ ܛܵܠܡܝܼ ܐܸܠܝܼ،
ܐܵܢܵܐ ܒܸܬ ܗܲܓܹܝܢ ܦܘܼܩܵܕܘܼ̈ܟ݂.
79ܦܵܬܠܝܼ ܠܟܸܣ ܠܝܼ ܙܕܝܼܥܘܼ̈ܟ݂،
ܘܝܵܕܥܵܢܹ̈ܐ ܕܣܵܗܕܘܵܬܘܼ̈ܟ݂.
80ܗܵܘܹܐ ܠܸܒܝܼ ܬܲܡܝܼܡܵܐ ܒܩܵܢܘܿܢܘܼ̈ܟ݂،
ܩܵܐ ܕܠܵܐ ܢܵܟ݂ܦܹܢ.
ܟ
81ܢܘܝܼܠ ܠܵܗ̇ ܓܵܢܝܼ ܩܵܐ ܦܘܼܪܩܵܢܘܼܟ݂،
ܠܚܲܒܪܘܼܟ݂ ܣܦܝܼܪܝܼ.
82ܚܒܹܐ ܠܗܘܿܢ ܥܲܝܢܝܼ̈ ܒܸܣܦܵܪܵܐ ܠܗܹܡܸܙܡܵܢܘܼܟ݂،
ܟܲܕ ܒܹܐܡܵܪܵܐ ܝܘܸܢ، ”ܐܝܼܡܲܢ ܒܸܬ ܝܵܗ݇ܒܹܬ ܠܝܼ ܠܸܒܵܐ؟“
83ܣܵܒܵܒ ܗܘܹܐ ܠܝܼ ܐܲܝܟ݂ ܡܙܝܼܕܵܐ ܓܵܘ ܬܸܢܵܐ،
ܐܝܼܢܵܐ ܩܵܢܘܿܢܘܼ̈ܟ݂ ܠܵܐ ܡܘܼܢܫܹܐ ܠܝܼ.
84ܟܡܵܐ ܝܼܢܵܐ ܝܵܘܡܵܢܹ̈ܐ ܕܪܹܓܘܼܟ݂؟
ܐܝܼܡܲܢ ܒܸܬ ܥܵܒ݂ܕܹܬ ܕܝܼܘܵܢ ܥܲܠ ܢܵܦܠܵܢܹ̈ܐ ܒܵܬ݇ܪܝܼ؟
85ܚܦܝܼܪܗܘܿܢ ܚܵܬܪ̈ܵܢܹܐ ܓܘܼܒܹ̈ܐ ܩܵܬܝܼ،
ܕܠܹܐ ܝܠܵܗ̇ ܡ̣ܢ ܢܵܡܘܿܣܘܼܟ݂.
86ܟܠܲܝܗܝ ܦܘܼܩܕܵܢܘܼ̈ܟ݂ ܡܗܘܼܡܢܹ̈ܐ ܝܢܵܐ،
ܒܠܵܐ ܥܸܠܬܵܐ ܢܦܝܼܠ ܠܗܘܿܢ ܒܵܬ݇ܪܝܼ؛ ܗܲܝܸܪܝܼ!
87ܚܲܕ݇ܟ̰ܵܐ ܦܝܼܫ ܠܵܗ̇ ܕܬܵܝܡܝܼ ܗ݇ܘܵܘ ܠܝܼ ܒܐܲܪܥܵܐ،
ܐܝܼܢܵܐ ܐܵܢܵܐ ܠܵܐ ܫܒ݂ܝܼܩ ܠܝܼ ܦܘܼܩܵܕܘܼ̈ܟ݂.
88ܐܲܝܟ݂ ܫܵܦܵܩܲܬܘܼܟ݂ ܡܲܚܝܼ ܠܝܼ،
ܕܢܵܛܪܹܢ ܣܵܗܕܘܵܬܹ̈ܐ ܕܦܘܼܡܘܼܟ݂.
ܠ
89ܠܥܵܠܲܡ، ܝܵܐ ܡܵܪܝܵܐ،
ܚܲܒܪܘܼܟ݂ ܡܩܵܘܝܵܢܵܐ ܝܠܹܗ ܒܫܡܲܝܵܐ.
90ܠܕܵܘܪܵܐ ܘܕܵܘܪܵܐ ܡܗܘܼܡܢܘܼܬܘܼܟ݂،
ܫܘܼܬܐܸܣܵܐ ܠܘܼܟ݂ ܐܲܪܥܵܐ ܘܒܸܟܠܵܝܵܐ ܝܠܵܗ̇.
91ܒܕܝܼܘܵܢܘܼ̈ܟ݂ ܒܸܟܠܵܝܵܐ ܝܢܵܐ ܐܸܕܝܘܿܡ،
ܣܵܒܵܒ ܟܠܲܝܗܝ ܪܹ̈ܓܵܘܵܬܘܼܟ݂ ܝܼܢܵܐ.
92ܐܸܢ ܠܵܐ ܗܵܘܹܐ ܗ݇ܘܵܐ ܢܵܡܘܿܣܘܼܟ݂ ܒܲܣܝܼܡܘܼܬܝܼ،
ܒܸܬ ܛܵܠܩܹܢ ܗ݇ܘܵܐ ܒܥܵܘܩܵܢܝܼ.
93ܠܥܵܠܲܡ ܠܹܐ ܡܲܢܫܹܝܢ ܦܘܼܩܵܕܘܼ̈ܟ݂،
ܣܵܒܵܒ ܒܝܼܲܝܗܝ ܩܲܡ ܡܲܚܹܝܬ ܠܝܼ.
94ܕܝܼܘܼܟ݂ ܝܼܘܸܢ ܐܵܢܵܐ، ܦܲܪܸܩ ܠܝܼ،
ܣܵܒܵܒ ܠܦܘܼܩܵܕܘܼ̈ܟ݂ ܛܥܹܐ ܠܝܼ.
95ܣܦܝܼܪܗܘܿܢ ܐܸܠܝܼ ܪ̈ܲܫܝܼܥܹܐ ܠܛܲܠܘܼܩܝܼ،
ܐܝܼܢܵܐ ܣܵܗܕܘܵܬܘܼ̈ܟ݂ ܒܸܬ ܦܲܪܡܹܝܢ.
96ܠܟܠ ܟܡܝܼܠܘܼܬܵܐ ܚܙܹܐ ܠܝܼ ܚܘܼܬܵܡܵܐ،
ܦܘܼܩܕܵܢܘܼܟ݂ ܪܘܝܼܚܵܐ ܝܠܹܗ ܪܵܒܵܐ.
ܡ
97ܟܡܵܐ ܟܹܐ ܡܲܚܸܒܸܢ ܠܢܵܡܘܿܣܘܼܟ݂،
ܟܠܹܗ ܝܵܘܡܵܐ ܗ̇ܘ ܝܼܠܹܗ ܗܲܓܵܝܬܝܼ.
98ܦܘܼܩܕܵܢܘܼ̈ܟ݂ ܩܲܡ ܥܵܒ݂ܕܝܼ ܠܝܼ ܒܘܼܫ ܚܲܟܝܼܡܵܐ ܡ̣ܢ ܕܸܫܡܸܢܝܼ̈،
ܣܵܒܵܒ ܠܟܸܣ ܠܝܼ ܝܢܵܐ ܗܲܠ ܥܵܠܲܡ.
99ܗܘܹܐ ܠܝܼ ܒܘܼܫ ܚܲܟܝܼܡܵܐ ܡ̣ܢ ܟܠܲܝܗܝ ܡܲܠܦܵܢܝܼ̈،
ܣܵܒܵܒ ܣܵܗܕܘܵܬܘܼ̈ܟ݂ ܗܲܓܵܝܬܵܐ ܝܢܵܐ ܐܸܠܝܼ.
100ܒܘܼܫ ܙܵܘܕܵܐ ܡ̣ܢ ܚܘܵܪ̈ܕܸܩܢܹܐ ܟܹܐ ܦܲܪܡܹܝܢ،
ܣܵܒܵܒ ܦܘܼܩܵܕܘܼ̈ܟ݂ ܢܛܝܼܪܲܝ ܠܝܼ.
101ܡ̣ܢ ܟܠ ܐܘܼܪܚܵܐ ܒܝܼܫܬܵܐ ܡܘܼܟܠܹܐ ܠܝܼ ܐܲܩܠܝܼ̈،
ܩܵܐ ܕܢܵܛܪܹܢ ܚܲܒܪܘܼܟ݂.
102ܡ̣ܢ ܕܝܼܘܵܢܘܼܟ݂ ܠܵܐ ܩܠܝܼܒ ܠܝܼ،
ܣܵܒܵܒ ܐܲܢ݇ܬ ܩܲܡ ܡܲܠܦܸܬ ܠܝܼ.
103ܟܡܵܐ ܚܸܠܝܹ̈ܐ ܝܢܵܐ ܠܫܵܡܵܟܝܼ ܗܹܡܸܙܡܵܢܘܼ̈ܟ݂،
ܒܘܼܫ ܚܸܠܝܹ̈ܐ ܡ̣ܢ ܕܸܒ݂ܫܵܐ ܠܦܘܼܡܝܼ.
104ܡ̣ܢ ܦܘܼܩܵܕܘܼ̈ܟ݂ ܟܹܐ ܫܵܩܠܹܢ ܦܲܪܡܵܝܬܵܐ،
ܒܘܼܬ ܐܵܗܵܐ، ܣܢܹܐ ܠܝܼ ܟܠ ܐܘܼܪܚܵܐ ܕܕܘܼܓܠܵܐ.
ܢ
105ܫܪܵܓ݂݇ܝܵܐ ܝܠܹܗ ܠܐܲܩܠܝܼ ܚܲܒܪܘܼܟ݂،
ܘܒܲܗܪܵܐ ܠܫܒ݂ܝܼܠܝܼ.
106ܝ݇ܡܹܐ ܠܝܼ ܘܒܸܬ ܡܲܩܘܹܝܢ ܡܵܘܡܝܼܬܝܼ،
ܠܸܢܛܵܪܵܐ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
107ܦܝܼܫ ܠܝܼ ܡܘܼܠܝܸܨܵܐ ܟ̰ܸܡ ܪܵܒܵܐ،
ܝܵܐ ܡܵܪܝܵܐ، ܡܲܚܝܼ ܠܝܼ ܐܲܝܟ݂ ܚܲܒܪܘܼܟ݂.
108ܩܲܒܸܠ ܠܗܘܿܢ ܩܘܼܪ̈ܒܵܢܹܐ ܕܨܸܒ݂ܝܵܢܵܐ ܡ̣ܢ ܦܘܼܡܝܼ، ܝܵܐ ܡܵܪܝܵܐ،
ܘܕܝܼܘܵܢܘܼ̈ܟ݂ ܡܲܠܸܦ ܠܝܼ.
109ܓܵܢܝܼ ܒܩܹܘܲܢܕܹܢܘܿܣ ܝܼܠܵܗ̇ ܐܲܡܝܼܢܵܐܝܼܬ،
ܐܝܼܢܵܐ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.
110ܡܘܼܬܸܒ݂ ܠܗܘܿܢ ܪ̈ܲܫܝܼܥܹܐ ܦܲܚܵܐ ܐܸܠܝܼ،
ܐܝܼܢܵܐ ܡ̣ܢ ܦܘܼܩܵܕܘܼ̈ܟ݂ ܠܵܐ ܚܠܝܼܛ ܠܝܼ.
111ܗܘܹܐ ܠܗܘܿܢ ܝܵܪܬܘܼܬܵܐ ܐܸܠܝܼ ܣܵܗܕܘܵܬܘܼ̈ܟ݂ ܠܥܵܠܲܡ،
ܣܵܒܵܒ ܦܨܝܼܚܘܼܬܵܐ ܕܠܸܒܝܼ ܝܢܵܐ.
112ܡܘܼܬܸܒ݂ ܠܝܼ ܠܸܒܝܼ ܠܸܥܒ݂ܵܕܵܐ ܩܵܢܘܿܢܘܼ̈ܟ݂،
ܠܥܵܠܲܡ، ܗܲܠ ܚܲܪܬܵܐ.
ܣ
113ܠܦܠܝܼܥܵܐ ܒܪܸܥܝܵܢܵܐ ܟܹܐ ܣܵܢܹܝܢ،
ܐܝܼܢܵܐ ܠܢܵܡܘܿܣܘܼܟ݂ ܟܹܐ ܡܲܚܸܒܸܢ.
114ܣܸܬܵܪܝܼ ܘܡܵܛܵܠܝܼ ܐܲܢ݇ܬ ܝܼܘܸܬ،
ܠܚܲܒܪܘܼܟ݂ ܟܹܐ ܣܵܦܪܹܢ.
115ܪܚܘܿܩܘܼܢ ܡܸܢܝܼ، ܝܵܐ ܒܝܼܫܹ̈ܐ،
ܕܢܵܛܪܹܢ ܦܘܼܩܕܵܢܹ̈ܐ ܕܐܲܠܵܗܝܼ.
116ܣܢܘܿܕ ܠܝܼ ܐܲܝܟ݂ ܗܹܡܸܙܡܵܢܘܼܟ݂ ܩܵܐ ܕܚܵܝܹܝܢ،
ܘܠܵܐ ܫܵܒ݂ܩܹܬ ܢܵܟ݂ܦܹܢ ܡ̣ܢ ܣܲܒ݂ܪܵܐ ܕܐܝܼܬ ܠܝܼ.
117ܣܢܘܿܕ ܠܝܼ ܩܵܐ ܕܦܵܝܫܹܢ ܦܘܼܪܩܵܐ،
ܘܒܸܬ ܚܵܝܪܹܢ ܒܩܵܢܘܿܢܘܼ̈ܟ݂ ܐܲܡܝܼܢܵܐܝܼܬ.
118ܡܘܼܣܠܹܐ ܠܘܼܟ݂ ܠܟܠܲܝܗܝ ܚܵܠܛܵܢܹ̈ܐ ܡ̣ܢ ܩܵܢܘܿܢܘܼ̈ܟ݂،
ܣܵܒܵܒ ܣܪܝܼܩܵܐ ܝܠܹܗ ܦܸܠܡܲܝܗܝ.
119ܐܲܝܟ݂ ܚܸܠܬ ܕܣܹܐܡܵܐ ܪܘܼܦܝܲܝ ܠܘܼܟ݂ ܟܠܲܝܗܝ ܪ̈ܲܫܝܼܥܹܐ ܕܐܲܪܥܵܐ،
ܒܘܼܬ ܐܵܗܵܐ، ܟܹܐ ܡܲܚܸܒܸܢ ܣܵܗܕܘܵܬܘܼ̈ܟ݂.
120ܪܘܼܬܪܸܬ ܠܹܗ ܒܸܣܪܝܼ ܒܥܸܠܬܵܐ ܕܣܘܼܪܵܕܘܼܟ݂،
ܘܡ̣ܢ ܕܝܼܘܵܢܘܼ̈ܟ݂ ܟܹܐ ܙܵܕܥܹܢ.
ܥ
121ܥܒ݂ܝܼܕ ܠܝܼ ܕܝܼܘܵܢ ܘܙܲܕܝܼܩܘܼܬܵܐ،
ܠܵܐ ܫܵܒ݂ܩܹܬ ܠܝܼ ܒܐܝܼܕܵܐ ܕܛܵܠܡܵܢܝܼ̈.
122ܗܘܝܼ ܥܲܪܵܒ݂ܵܐ ܕܪܹܓܘܼܟ݂ ܠܛܵܒ݂ܬܵܐ،
ܠܵܐ ܫܵܒ݂ܩܹܬ ܛܵܠܡܝܼ ܐܸܠܝܼ ܚܵܬܪ̈ܵܢܹܐ.
123ܥܲܝܢܝܼ̈ ܚܒܹܐ ܠܗܘܿܢ ܒܸܣܦܵܪܵܐ ܠܦܘܼܪܩܵܢܘܼܟ݂،
ܘܠܗܹܡܸܙܡܵܢ ܕܙܲܕܝܼܩܘܼܬܘܼܟ݂.
124ܥܒ݂ܘܿܕ ܥܲܡ ܪܹܓܘܼܟ݂ ܐܲܝܟ݂ ܫܵܦܵܩܲܬܘܼܟ݂،
ܘܩܵܢܘܿܢܘܼ̈ܟ݂ ܡܲܠܸܦ ܐܸܠܝܼ.
125ܥܲܒ݂ܕܘܼܟ݂ ܝܼܘܸܢ ܐܵܢܵܐ، ܡܲܦܪܸܡ ܠܝܼ
ܕܝܵܕܥܹܢ ܣܵܗܕܘܵܬܘܼ̈ܟ݂.
126ܥܕܵܢܵܐ ܝܠܵܗ̇ ܕܥܵܒܹܕ ܚܲܕ ܡܸܢܕܝܼ ܡܵܪܝܵܐ،
ܣܵܒܵܒ ܒܘܼܛܸܠ ܠܗܘܿܢ ܢܵܡܘܿܣܘܼܟ݂.
127ܒܘܼܬ ܐܵܗܵܐ، ܟܹܐ ܡܲܚܸܒܸܢ ܦܘܼܩܕܵܢܘܼ̈ܟ݂،
ܒܘܼܫ ܡ̣ܢ ܕܲܗܒ݂ܵܐ، ܘܡ̣ܢ ܕܲܗܒ݂ܵܐ ܨܸܦܝܵܐ.
128ܒܘܼܬ ܐܵܗܵܐ، ܟܠܲܝܗܝ ܦܘܼܩܵܕܹ̈ܐ ܟܹܐ ܢܵܛܪܹܢ ܬܪܘܼܨܵܐܝܼܬ،
ܟܠܵܗ̇ ܐܘܼܪܚܵܐ ܕܕܘܼܓܠܵܐ ܣܢܹܐ ܠܝܼ.
ܦ
129ܥܓ̰ܝܼܒܹ̈ܐ ܝܢܵܐ ܣܵܗܕܘܵܬܘܼ̈ܟ݂،
ܒܘܼܬ ܐܵܗܵܐ ܢܛܝܼܪܲܝ ܠܵܗ̇ ܓܵܢܝܼ.
130ܦܬܵܚܬܵܐ ܕܚܲܒܪ̈ܘܼܟ݂ ܟܹܐ ܒܲܗܪܸܢܵܐ،
ܟܹܐ ܡܲܦܪܸܡܵܐ ܠܗܘܿܢ ܦܫܝܼ̈ܛܹܐ.
131ܦܘܼܡܝܼ ܦܬܝܼܚ ܠܝܼ ܘܡܘܼܠܗܸܕ ܠܝܼ،
ܣܵܒܵܒ ܠܦܘܼܩܕܵܢܘܼ̈ܟ݂ ܪܘܼܚܪܸܚ ܠܝܼ.
132ܕܘܼܪ ܠܟܸܣ ܠܝܼ ܘܪܲܚܸܡ ܥܲܠܝܼ،
ܐܲܝܟ݂ ܕܝܼܘܵܢܘܼܟ݂ ܠܡܲܚܸܒܵܢܹ̈ܐ ܕܫܸܡܘܼܟ݂.
133ܡܲܩܘܝܼ ܦܵܣܘܿܥܝܵܬܝܼ̈ ܒܗܹܡܸܙܡܵܢܘܼܟ݂،
ܘܠܵܐ ܫܵܒ݂ܩܹܬ ܗܲܟܸܡ ܥܲܠܝܼ ܟܠ ܥܵܘܠܵܐ.
134ܦܲܪܸܩ ܠܝܼ ܡ̣ܢ ܛܠܘܼܡܝܵܐ ܕܒܲܪܢܵܫܵܐ،
ܩܵܐ ܕܢܵܛܪܹܢ ܦܘܼܩܵܕܘܼ̈ܟ݂.
135ܒܲܗܪܸܢ ܦܵܬܘܼܟ݂ ܥܲܠ ܪܹܓܘܼܟ݂،
ܘܡܲܠܸܦ ܠܝܼ ܩܵܢܘܿܢܘܼ̈ܟ݂.
136ܫܵܩܝܼܵܬܹ̈ܐ ܕܡ̈ܝܼܵܐ ܓ̰ܪܹܐ ܠܗܘܿܢ ܡ̣ܢ ܥܲܝܢܝܼ̈،
ܣܵܒܵܒ ܠܵܐ ܢܛܝܼܪܗܘܿܢ ܢܵܡܘܿܣܘܼܟ݂.
ܨ
137ܙܲܕܝܼܩܵܐ ܝܘܸܬ ܐܲܢ݇ܬ، ܝܵܐ ܡܵܪܝܵܐ،
ܘܬܪ̈ܘܼܨܹܐ ܝܢܵܐ ܕܝܼܘܵܢܘܼ̈ܟ݂.
138ܦܩܝܼܕܲܝ ܠܘܼܟ݂ ܣܵܗܕܘܵܬܘܼ̈ܟ݂ ܒܙܲܕܝܼܩܘܼܬܵܐ،
ܘܒܟܠ ܡܗܘܼܡܢܘܼܬܵܐ.
139ܩܲܡ ܐܵܟܹܠ ܠܝܼ ܛܢܵܢܝܼ،
ܣܵܒܵܒ ܡܘܼܢܫܹܐ ܠܗܘܿܢ ܚܲܒܪ̈ܵܢܘܼܟ݂ ܕܸܫܡܸܢܝܼ̈.
140ܨܘܼܪܸܦܬܵܐ ܝܠܵܗ̇ ܗܹܡܸܙܡܵܢܘܼܟ݂ ܪܵܒܵܐ،
ܘܪܹܓܘܼܟ݂ ܟܹܐ ܡܲܚܸܒ ܠܵܗ̇.
141ܙܥܘܿܪܵܐ ܝܘܸܢ ܐܵܢܵܐ ܘܡܘܼܣܠܝܼܵܐ،
ܐܝܼܢܵܐ ܦܘܼܩܵܕܘܼ̈ܟ݂ ܠܵܐ ܢܸܫܝܲܝ ܠܝܼ.
142ܙܲܕܝܼܩܘܼܬܘܼܟ݂ ܙܲܕܝܼܩܘܼܬܵܐ ܝܠܵܗ̇ ܠܥܵܠܲܡ،
ܘܢܵܡܘܿܣܘܼܟ݂ ܫܪܵܪܵܐ ܝܠܹܗ.
143ܥܵܘܩܵܢܵܐ ܘܐܘܼܠܨܵܢܵܐ ܩܲܡ ܡܲܫ݇ܟ̰ܚܝܼ ܠܝܼ،
ܐܝܼܢܵܐ ܒܲܣܝܼܡܘܼܬܝܼ ܝܢܵܐ ܦܘܼܩܕܵܢܘܼ̈ܟ݂.
144ܙܲܕܝܼܩܘܼܬܵܐ ܝܢܵܐ ܣܵܗܕܘܵܬܘܼ̈ܟ݂ ܠܥܵܠܲܡ،
ܗܲܒ݂݇ܠ ܠܝܼ ܦܲܪܡܵܝܬܵܐ ܕܚܵܝܹܝܢ.
ܩ
145ܩܪܹܐ ܠܝܼ ܒܟܠܹܗ ܠܸܒܵܐ؛ ܓ̰ܲܘܸܒ ܠܝܼ، ܝܵܐ ܡܵܪܝܵܐ،
ܘܩܵܢܘܿܢܘܼ̈ܟ݂ ܒܸܬ ܢܵܛܪܹܢ.
146ܩܪܹܐ ܠܝܼ ܐܸܠܘܼܟ݂، ܦܲܪܸܩ ܠܝܼ،
ܘܒܸܬ ܢܵܛܪܹܢ ܣܵܗܕܘܵܬܘܼ̈ܟ݂.
147ܩܕܝܼܡ ܠܝܼ ܓ̰ܲܠܕܹܐ ܒܨܲܦܪܵܐ ܘܓܥܹܐ ܠܝܼ،
ܠܚܲܒܪܘܼܟ݂ ܣܦܝܼܪܝܼ.
148ܦܬܝܼܚܹܐ ܝܢܵܐ ܥܲܝܢܝܼ̈ ܒܒܲܕܠܹ̈ܐ ܕܠܲܝܠܹܐ،
ܠܗܲܓܘܼܝܹܐ ܗܹܡܸܙܡܵܢܘܼܟ݂.
149ܫܡܸܥ ܩܵܠܝܼ ܐܲܝܟ݂ ܫܵܦܵܩܲܬܘܼܟ݂،
ܝܵܐ ܡܵܪܝܵܐ، ܐܲܝܟ݂ ܕܝܼܘܵܢܘܼܟ݂ ܡܲܚܝܼ ܠܝܼ.
150ܩܘܼܪܒܸܢܗܘܿܢ ܐܸܠܝܼ ܢܵܦܠܵܢܹ̈ܐ ܕܒܵܬ݇ܪ ܒܝܼܫܬܵܐ،
ܪܚܝܼܩ ܠܗܘܿܢ ܡ̣ܢ ܢܵܡܘܿܣܘܼܟ݂.
151ܩܘܼܪܒܵܐ ܝܘܸܬ ܐܲܢ݇ܬ، ܝܵܐ ܡܵܪܝܵܐ،
ܘܫܪܵܪܵܐ ܝܢܵܐ ܟܠܲܝܗܝ ܦܘܼܩܕܵܢܘܼ̈ܟ݂.
152ܡ̣ܢ ܓ̰ܲܠܕܹܐ ܝ݇ܕܝܼܥ ܠܝܼ ܡ̣ܢ ܣܵܗܕܘܵܬܘܼ̈ܟ݂،
ܕܠܥܵܠܲܡ ܫܘܼܬܐܸܣܲܝ ܝܘܸܬ.
ܪ
153ܚܙܝܼ ܐܘܼܠܨܵܢܝܼ ܘܦܲܨܝܼ ܠܝܼ،
ܣܵܒܵܒ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.
154ܥܒ݂ܘܿܕ ܕܝܼܘܵܢܝܼ ܘܦܲܪܸܩ ܠܝܼ،
ܐܲܝܟ݂ ܗܹܡܸܙܡܵܢܘܼܟ݂ ܡܲܚܝܼ ܠܝܼ.
155ܪܸܚܩܵܐ ܝܠܹܗ ܦܘܼܪܩܵܢܵܐ ܡ̣ܢ ܪ̈ܲܫܝܼܥܹܐ،
ܣܵܒܵܒ ܠܩܵܢܘܿܢܘܼ̈ܟ݂ ܠܵܐ ܛܥܹܐ ܠܗܘܿܢ.
156ܪܵܒܵܐ ܝܢܵܐ ܪ̈ܲܚܡܘܼܟ݂، ܝܵܐ ܡܵܪܝܵܐ،
ܐܲܝܟ݂ ܕܝܼܘܵܢܘܼ̈ܟ݂ ܡܲܚܝܼ ܠܝܼ.
157ܪܵܒܵܐ ܝܢܵܐ ܪ̈ܵܕܘܿܦܝܼ ܘܕܸܫܡܸܢܝܼ̈،
ܐܝܼܢܵܐ ܡ̣ܢ ܣܵܗܕܘܵܬܘܼ̈ܟ݂ ܠܵܐ ܩܠܝܼܒ ܠܝܼ.
158ܚܙܹܐ ܠܝܼ ܚܵܝܝܼܢܹ̈ܐ ܘܓܘܼܢܓܸܙ ܠܝܼ،
ܣܵܒܵܒ ܗܹܡܸܙܡܵܢܘܼܟ݂ ܠܵܐ ܢܛܝܼܪܗܘܿܢ.
159ܚܙܝܼ ܕܵܐܟ݂ܝܼ ܦܘܼܩܵܕܘܼ̈ܟ݂ ܟܹܐ ܡܲܚܸܒܸܢ،
ܝܵܐ ܡܵܪܝܵܐ، ܐܲܝܟ݂ ܫܵܦܵܩܲܬܘܼܟ݂ ܡܲܚܝܼ ܠܝܼ.
160ܐܝܼܬܘܼܬܵܐ ܕܚܲܒܪܘܼܟ݂ ܫܲܪܝܼܪܘܼܬܵܐ ܝܠܵܗ̇،
ܘܠܥܵܠܲܡ ܝܼܢܵܐ ܟܠܲܝܗܝ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
ܫ
161ܓܘܼܪ̈ܵܢܹܐ ܢܦܝܼܠ ܠܗܘܿܢ ܒܵܬ݇ܪܝܼ ܒܠܵܐ ܥܸܠܬܵܐ،
ܐܝܼܢܵܐ ܡ̣ܢ ܚܲܒܪ̈ܘܼܟ݂ ܟܹܐ ܙܵܕܹܥ ܠܸܒܝܼ.
162ܒܸܦܨܵܚܵܐ ܝܘܸܢ ܐܵܢܵܐ ܥܲܠ ܗܹܡܸܙܡܵܢܘܼܟ݂،
ܐܲܝܟ݂ ܗ̇ܘ ܕܡܲܫ݇ܟ̰ܸܚ ܣܠܵܒܬܵܐ ܪܵܒܵܐ.
163ܟܹܐ ܣܵܢܹܝܢ ܠܕܘܼܓܠܵܐ ܘܟܹܐ ܓܲܢܓܸܙܸܢ ܡܸܢܹܗ،
ܐܝܼܢܵܐ ܢܵܡܘܿܣܘܼܟ݂ ܟܹܐ ܡܲܚܸܒܸܢ.
164ܫܒܲܥ ܓܵܗܹ̈ܐ ܒܝܵܘܡܵܐ ܟܹܐ ܫܲܒܚܸܢܘܼܟ݂،
ܒܘܼܬ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.
165ܫܠܵܡܵܐ ܪܵܒܵܐ ܐܝܼܬ ܠܡܲܚܸܒܵܢܹ̈ܐ ܕܢܵܡܘܿܣܘܼܟ݂،
ܘܠܲܝܬ ܐܸܠܲܝܗܝ ܬܘܼܪܩܵܠܵܐ.
166ܣܒܝܼܪܝܼ ܒܦܘܼܪܩܵܢܘܼܟ݂، ܝܵܐ ܡܵܪܝܵܐ،
ܘܦܘܼܩܕܵܢܘܼ̈ܟ݂ ܥܒ݂ܝܼܕ ܠܝܼ.
167ܢܛܝܼܪܵܗ̇ ܓܵܢܝܼ ܣܵܗܕܘܵܬܘܼ̈ܟ݂،
ܘܟܹܐ ܡܲܚܸܒܸܢܗܘܿܢ ܪܵܒܵܐ.
168ܢܛܝܼܪܝܼ ܦܘܼܩܵܕܘܼ̈ܟ݂ ܘܣܵܗܕܘܵܬܘܼ̈ܟ݂،
ܣܵܒܵܒ ܟܠܲܝܗܝ ܐܘܼܪ̈ܚܵܬܝܼ ܩܵܕ݇ܡ ܥܲܝܢܘܼ̈ܟ݂ ܝܼܢܵܐ.
ܬ
169ܩܲܪܒܸܢܵܐ ܡܲܩܘܲܚܬܝܼ ܠܟܸܣ ܠܘܼܟ݂، ܝܵܐ ܡܵܪܝܵܐ،
ܐܲܝܟ݂ ܚܲܒܪܘܼܟ݂ ܡܲܦܪܸܡ ܠܝܼ.
170ܥܵܒ݂ܪܵܐ ܩܵܕ݇ܡܘܼܟ݂ ܦܲܪܦܲܠܬܝܼ،
ܐܲܝܟ݂ ܗܹܡܸܙܡܵܢܘܼܟ݂ ܦܲܨܝܼ ܠܝܼ.
171ܡܲܢܒܸܥܝܼ ܣܸܦܘܵܬܝܼ̈ ܬܸܫܒܘܿܚܬܵܐ،
ܣܵܒܵܒ ܟܹܐ ܡܲܠܦܸܬ ܠܝܼ ܩܵܢܘܿܢܘܼ̈ܟ݂.
172ܙܵܡܹܪ ܠܸܫܵܢܝܼ ܗܹܡܸܙܡܵܢܘܼܟ݂،
ܣܵܒܵܒ ܟܠܲܝܗܝ ܦܘܼܩܕܵܢܘܼ̈ܟ݂ ܙܲܕܝܼܩܘܼܬܵܐ ܝܢܵܐ.
173ܗܵܘܝܵܐ ܐܝܼܕܘܼܟ݂ ܠܗܲܝܘܼܪܝܼ،
ܣܵܒܵܒ ܦܘܼܩܵܕܘܼ̈ܟ݂ ܓܘܼܒܹܐ ܠܝܼ.
174ܪܘܼܚܪܸܚ ܠܝܼ ܠܦܘܼܪܩܵܢܘܼܟ݂، ܝܵܐ ܡܵܪܝܵܐ،
ܘܢܵܡܘܿܣܘܼܟ݂ ܒܘܼܣܵܡܝܼ ܝܠܹܗ.
175ܚܵܝܵܐ ܓܵܢܝܼ ܘܫܲܒܚܵܐ ܐܸܠܘܼܟ݂،
ܘܕܝܼܘܵܢܘܼ̈ܟ݂ ܗܲܝܸܪܝܼ ܠܝܼ.
176ܚܠܝܼܛ ܠܝܼ ܐܲܝܟ݂ ܥܸܪܒܵܐ ܛܠܝܼܩܵܐ؛ ܛܥܝܼ ܒܵܬ݇ܪ ܪܹܓܘܼܟ݂،
ܣܵܒܵܒ ܦܘܼܩܕܵܢܘܼ̈ܟ݂ ܠܵܐ ܡܘܼܢܫܹܐ ܠܝܼ.
လက္ရွိေရြးခ်ယ္ထားမွု
ܡܙܡܘܪ̈ܐ 119 (ܩܝܛ): ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation