ܡܬܠ̈ܐ 6
6
ܙܘܼܗܵܪܵܐ ܒܘܼܬ ܥܲܪܵܒ݂ܘܼܬܵܐ
1ܒܪܘܿܢܝܼ، ܐܸܢ ܗܘܹܐ ܠܘܼܟ݂ ܥܲܪܵܒ݂ܵܐ ܠܫܒ݂ܵܒ݂ܘܼܟ݂،
ܫܥܝܼܫ ܠܘܼܟ݂ ܐܝܼܕܵܐ ܥܲܡ ܢܘܼܟ݂ܪܵܝܵܐ،
2ܦܝܼܫ ܠܘܼܟ݂ ܨܝܼܕܵܐ ܒܗܹܡܸܙܡܵܢܹ̈ܐ ܕܦܘܼܡܘܼܟ݂،
ܦܝܼܫ ܠܘܼܟ݂ ܕܒ݂ܝܼܩܵܐ ܒܚܲܒܪܹ̈ܐ ܕܣܸܦܘܵܬܘܼ̈ܟ݂.
3ܗ̇ܝܓܵܗ ܥܒ݂ܘܿܕ ܐܵܗܵܐ، ܒܪܘܿܢܝܼ، ܘܦܲܨܝܼ ܓܵܢܘܼܟ݂،
ܣܵܒܵܒ ܥܒ݂ܝܼܪܘܼܟ݂ ܬܚܘܿܬ ܐܝܼܕܵܐ ܕܫܒ݂ܵܒ݂ܘܼܟ݂:
ܙܹܠ݇ ܡܲܟܸܦ ܓܵܢܘܼܟ݂، ܘܡܲܠܝܸܨ ܫܒ݂ܵܒ݂ܘܼܟ݂.
4ܠܵܐ ܝܵܗ݇ܒܹܬ ܫܸܢܬܵܐ ܠܥܲܝܢܘܼ̈ܟ݂،
ܝܲܢ ܢܝܵܡܬܵܐ ܠܛܸܠܦܵܦܘܼ̈ܟ݂.
5ܦܲܨܝܼ ܓܵܢܘܼܟ݂ ܐܲܝܟ݂ ܛܲܒ݂ܝܵܐ ܡ̣ܢ ܢܸܫܒ݂ܵܐ،
ܘܐܲܝܟ݂ ܛܲܝܪܵܐ ܡ̣ܢ ܐܝܼܕܵܐ ܕܨܲܝܵܕܵܐ.
ܙܘܼܗܵܪܵܐ ܒܘܼܬ ܡܲܟܣܸܠܵܢܘܼܬܵܐ
6ܙܹܠ݇ ܠܟܸܣ ܫܸܟܒ݂ܵܢܵܐ، ܝܵܐ ܡܲܟܣܸܠܵܢܵܐ،
ܚܙܝܼ ܐܘܼܪ̈ܚܵܬܹܗ ܘܗܘܝܼ ܚܲܟܝܼܡܵܐ،
7ܕܠܲܝܬ ܠܹܗ ܓܘܼܪܵܐ،
ܠܵܐ ܡܕܲܒܪܵܢܵܐ ܝܲܢ ܫܲܠܝܼܛܵܐ،
8ܟܹܐ ܗܲܕܸܪ ܒܩܲܝܛܵܐ ܠܲܚܡܹܗ،
ܟܹܐ ܟܲܦܸܫ ܒܚܸܨܕܵܐ ܡܹܐܟ݂ܘܼܠܬܹܗ.
9ܗܲܠ ܐܝܼܡܲܢ، ܝܵܐ ܡܲܟܣܸܠܵܢܵܐ، ܒܸܬ ܕܵܡܟܹܬ؟
ܐܝܼܡܲܢ ܒܸܬ ܩܵܝܡܹܬ ܡ̣ܢ ܫܸܢܬܘܼܟ݂؟
10ܚܲܕ݇ܟ̰ܵܐ ܫܸܢܬܵܐ، ܚܲܕ݇ܟ̰ܵܐ ܢܝܵܡܬܵܐ،
ܚܲܕ݇ܟ̰ܵܐ ܟܬܵܪܬܵܐ ܕܐܝܼܕܵܬܹ̈ܐ ܠܸܕܡܵܟ݂ܵܐ،
11ܘܐ݇ܬܹܐ ܠܵܗ̇ ܥܲܠܘܼܟ݂ ܡܸܣܟܹܢܘܼܬܵܐ ܐܲܝܟ݂ ܓܲܝܵܣܵܐ،
ܘܚܘܼܣܪܵܢܵܐ ܐܲܝܟ݂ ܐ݇ܢܵܫܵܐ ܟ̰ܘܼܟܒܸܢܵܐ.
ܥܒ݂ܵܕܹ̈ܐ ܕܥܵܘܵܠܹ̈ܐ
12ܐ݇ܢܵܫܵܐ ܣܪܝܼܩܵܐ، ܐ݇ܢܵܫܵܐ ܕܥܵܘܠܵܐ،
ܟܹܐ ܚܵܕܹܪ ܒܦܟ̰ܝܼܠܘܼܬܵܐ ܕܦܘܼܡܵܐ،
13ܟܹܐ ܠܵܟܹܙ ܒܥܲܝܢܘܼ̈ܗܝ،
ܟܹܐ ܗܲܡܙܸܡ ܒܐܲܩܠܵܬܹ̈ܗ،
ܟܹܐ ܪܵܡܹܙ ܒܨܸܒܥܵܬܹ̈ܗ،
14ܦܠܝܼܡܘܼܬܵܐ ܓܵܘ ܠܸܒܹܗ ܝܠܵܗ̇،
ܟܹܐ ܚܵܪܹܛ ܒܝܼܫܬܵܐ ܒܟܠ ܥܕܵܢܵܐ،
ܡܲܩܲܪ̈ܵܨܘܼܝܵܬܹܐ ܟܹܐ ܕܵܪܹܐ.
15ܒܘܼܬ ܐܵܗܵܐ، ܡܸܢܫܸܠܬܵܢܹܐ ܒܸܬ ܐܵܬܹܐ ܓܘܼܢܚܵܐ ܥܲܠܘܼܗܝ،
ܒܛܲܪܦܲܛܬܵܐ ܕܥܲܝܢܵܐ ܒܸܬ ܦܵܐܹܫ ܬܒ݂ܝܼܪܵܐ، ܘܠܹܐ ܗܵܘܝܵܐ ܠܹܗ ܒܵܣܲܡܬܵܐ.
ܫܲܒ݂ܥܵܐ ܛܲܡܐܘܵܬܹ̈ܐ ܣܸܢܝܹ̈ܐ
16ܐܸܫܬܵܐ ܝܢܵܐ ܕܟܹܐ ܣܵܢܹܐ ܡܵܪܝܵܐ،
ܗܹܐ، ܫܲܒ݂ܥܵܐ ܛܲܡܐܘܼܬܵܐ ܝܢܵܐ ܠܓܵܢܹܗ:
17ܥܲܝܢܹ̈ܐ ܪ̈ܵܡܵܢܹܐ، ܠܸܫܵܢܵܐ ܕܲܓܵܠܵܐ،
ܘܐܝܼܕܵܬܹ̈ܐ ܫܲܦܟ݂ܵܢܹ̈ܐ ܕܕܸܡܵܐ ܙܲܟܵܝܵܐ،
18ܠܸܒܵܐ ܚܵܪܛܵܢܵܐ ܕܬܲܚܡܲܢܝܵܬܹ̈ܐ ܕܥܵܘܠܵܐ،
ܐܲܩܠܵܬܹ̈ܐ ܕܟܹܐ ܡܲܠܝܸܙܝܼ ܠܸܪܚܵܛܵܐ ܠܒܝܼܫܬܵܐ،
19ܣܵܗܕܵܐ ܕܫܘܼܩܪܵܐ ܕܟܹܐ ܗܲܡܙܸܡ ܕܘܼܓܠܹ̈ܐ،
ܘܕܵܪܝܵܢܵܐ ܕܡܲܩܲܪ̈ܵܨܘܼܝܵܬܹܐ ܒܹܝܠ ܐܲܚܘܿܢܘܵܬܹ̈ܐ.
ܙܘܼܗܵܪܵܐ ܒܘܼܬ ܓܲܝܵܪܘܼܬܵܐ
20ܢܛܘܿܪ، ܝܵܐ ܒܪܘܿܢܝܼ، ܦܘܼܩܕܵܢܵܐ ܕܒܵܒܘܼܟ݂،
ܘܠܵܐ ܫܵܒ݂ܩܹܬ ܢܵܡܘܿܣܵܐ ܕܝܸܡܘܼܟ݂.
21ܟܬܘܿܪܗܘܿܢ ܥܲܠ ܠܸܒܘܼܟ݂ ܐܲܡܝܼܢܵܐܝܼܬ،
ܐ݇ܣܘܿܪܗܘܿܢ ܥܲܠ ܩܕܵܠܘܼܟ݂.
22ܟܲܕ ܚܵܕܪܹܬ، ܒܸܬ ܡܗܲܕܝܼ ܠܘܼܟ݂،
ܟܲܕ ܕܵܡܟܹܬ، ܒܸܬ ܢܵܛܪܝܼ ܠܘܼܟ݂،
ܟܲܕ ܪܵܥܫܹܬ، ܐܵܢܝܼ ܒܸܬ ܗܲܡܙܸܡܝܼ ܥܲܡܘܼܟ݂.
23ܣܵܒܵܒ ܫܪܵܓ݂݇ܝܵܐ ܝܠܹܗ ܦܘܼܩܕܵܢܵܐ، ܘܢܵܡܘܿܣܵܐ ܒܲܗܪܵܐ،
ܘܐܘܼܪܚܵܐ ܕܚܲܝܹ̈ܐ ܝܢܵܐ ܡܲܢܟܲܣܝܵܬܹ̈ܐ ܕܬܲܥܠܲܡܬܵܐ،
24ܠܸܢܛܵܪܘܼܟ݂ ܡ̣ܢ ܒܲܟ݂ܬܵܐ ܒܝܼܫܬܵܐ،
ܡ̣ܢ ܟ̰ܘܼܥܝܘܼܬܵܐ ܕܠܸܫܵܢܵܐ ܕܢܘܼܟ݂ܪܵܝܬܵܐ.
25ܠܵܐ ܫܲܗܘܸܬܸܬ ܠܫܘܼܦܪܘܼܗ̇ ܒܠܸܒܘܼܟ݂،
ܘܠܵܐ ܕܵܒ݂ܩܵܐ ܠܘܼܟ݂ ܒܛܸܠܦܵܦܘܼ̈ܗ̇،
26ܣܵܒܵܒ ܒܘܼܬ ܒܲܟ݂ܬܵܐ ܙܵܢܝܼܬܵܐ ܚܲܕ ܟܹܐ ܡܵܛܹܐ ܗܲܠ ܚܘܼܣܪܵܢܵܐ،
ܐܝܼܢܵܐ ܒܲܟ݂ܬܵܐ ܓܒ݂ܝܼܪܬܵܐ ܟܹܐ ܨܵܝܕܵܐ ܓܵܢܵܐ ܛܝܼܡܵܢܬܵܐ ܕܐ݇ܢܵܫܵܐ.
27ܩܵܡܘܿ ܟܹܐ ܡܵܨܹܐ ܕܵܒܹܩ ܐ݇ܢܵܫܵܐ ܢܘܼܪܵܐ ܒܥܘܼܒܹܗ،
ܘܠܒ݂ܘܼܫܘܼ̈ܗܝ ܠܵܐ ܝܵܩܕܝܼ؟
28ܝܲܢ ܡܵܨܹܐ ܚܵܕܹܪ ܐ݇ܢܵܫܵܐ ܥܲܠ ܓܘܼܡܪܹ̈ܐ،
ܘܐܲܩܠܵܬܹ̈ܗ ܠܵܐ ܟܵܘܝܼ؟
29ܗܲܕܟ݂ܵܐ ܗ̇ܘ ܕܥܵܒܹܪ ܠܟܸܣ ܒܲܟ݂ܬܵܐ ܕܚܲܒ݂ܪܹܗ،
ܠܹܐ ܗܵܘܹܐ ܙܲܟܵܝܵܐ ܟܠ ܕܕܵܩܹܪ ܒܝܼܘܼܗ̇.
30ܠܹܐ ܡܲܣܠܝܼ ܠܓܹܢܵܒ݂ܵܐ ܐܝܼܡܲܢ ܕܓܵܢܹܒ݂
ܩܵܐ ܡܲܣܒܲܥܬܵܐ ܕܓܵܢܹܗ ܐܝܼܡܲܢ ܕܟܵܦܹܢ.
31ܐܝܼܢܵܐ ܐܸܢ ܦܵܐܹܫ ܕܒ݂ܝܼܩܵܐ ܒܸܬ ܦܵܪܹܥ ܚܲܕ ܒܫܲܒ݂ܥܵܐ،
ܟܠܲܝܗܝ ܡܸܢܕܝܼܵܢܹ̈ܐ ܕܒܲܝܬܹܗ ܒܸܬ ܝܲܗ݇ܒܸܠ.
32ܗ̇ܘ ܕܥܵܒܹܕ ܓܲܝܵܪܘܼܬܵܐ ܥܲܡ ܒܲܟ݂ܬܵܐ، ܩܲܠܝܼܠ ܗܵܘܢܵܐ ܝܠܹܗ،
ܟܹܐ ܡܲܚܪܸܒ݂ ܓܵܢܹܗ ܗ̇ܘ ܕܥܵܒܹܕ ܗܲܕܟ݂ܵܐ.
33ܡܚܘܿܬܵܐ ܘܒܘܼܨܵܪܵܐ ܒܸܬ ܡܲܫ݇ܟ̰ܸܚ،
ܘܠܵܘܡܹܗ ܠܹܐ ܦܵܐܹܫ ܓܪܝܼܕܵܐ.
34ܣܵܒܵܒ ܛܢܵܢܵܐ ܟܹܐ ܡܲܒܪܹܐ ܚܸܡܬܵܐ ܕܓܲܒ݂ܪܵܐ،
ܘܠܹܐ ܥܵܒܹܕ ܪ̈ܲܚܡܹܐ ܒܝܵܘܡܵܐ ܕܬܘܼܥܠܵܐ.
35ܠܹܐ ܩܲܒܸܠ ܦܵܬܵܐ ܒܟܠ ܚܕܵܐ ܦܵܪܲܥܬܵܐ،
ܘܠܹܐ ܗܵܘܹܐ ܪܵܙܝܼ ܟܲܕ ܡܲܙܝܸܕܸܬ ܪܸܫܘܲܬ.
လက္ရွိေရြးခ်ယ္ထားမွု
ܡܬܠ̈ܐ 6: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation