ܡܬܠ̈ܐ 24
24
1ܠܵܐ ܒܲܚܸܠܸܬ ܒܐ݇ܢܵܫܹ̈ܐ ܒܝܼܫܹ̈ܐ،
ܘܠܵܐ ܫܲܗܘܸܬܸܬ ܠܸܗܘܵܝܵܐ ܥܲܡܲܝܗܝ.
2ܣܵܒܵܒ ܚܪܵܒ݂ܵܐ ܟܹܐ ܗܲܓܹܐ ܠܸܒܲܝܗܝ،
ܘܣܸܦܘܵܬܲܝ̈ܗܝ ܟܹܐ ܗܲܡܙܸܡܝܼ ܐܘܼܠܨܵܢܵܐ.
3ܒܚܸܟ݂ܡܬܵܐ ܟܹܐ ܦܵܐܹܫ ܒܸܢܝܵܐ ܒܲܝܬܵܐ،
ܘܒܦܲܪܡܵܝܬܵܐ ܟܹܐ ܦܵܐܹܫ ܡܘܼܩܘܝܼܵܐ،
4ܘܒܝ݇ܕܲܥܬܵܐ ܬܵܘܵܢܹ̈ܐ ܟܹܐ ܦܵܝܫܝܼ ܡܸܠܝܹܐ
ܡ̣ܢ ܟܠ ܥܘܼܬܪܵܐ ܛܝܼܡܵܢܵܐ ܘܒܲܣܝܼܡܵܐ.
5ܓܲܒ݂ܪܵܐ ܚܲܟܝܼܡܵܐ ܥܲܫܝܼܢܵܐ ܝܠܹܗ،
ܘܐ݇ܢܵܫܵܐ ܕܝ݇ܕܲܥܬܵܐ ܗܲܪ ܟܹܐ ܡܲܙܝܸܕ ܚܲܝܠܹܗ.
6ܣܵܒܵܒ ܒܡܕܲܒܪܵܢܘܼܬܵܐ ܟܹܐ ܡܵܨܹܝܬ ܥܵܒ݂ܕܹܬ ܦܠܵܫܘܼܟ݂،
ܘܙܵܟ݂ܘܼܬܵܐ ܒܦܸܪܝܘܼܬܵܐ ܕܡܵܠܘܿܟܹ̈ܐ ܝܠܵܗ̇.
7ܪܵܡܬܵܐ ܝܠܵܗ̇ ܠܣܲܟ݂ܠܵܐ ܚܸܟ݂ܡܬܵܐ،
ܒܕܲܪܘܵܙܵܐ ܠܹܐ ܦܵܬܹܚ ܦܘܼܡܹܗ.
8ܗ̇ܘ ܕܟܹܐ ܬܲܚܡܸܢ ܠܸܥܒ݂ܵܕܵܐ ܒܝܼܫܬܵܐ،
ܡܵܪܹܐ ܦܸܠܡܹ̈ܐ ܒܸܬ ܩܵܪܝܼ ܠܹܗ.
9ܡܲܪܝܲܙܬܵܐ ܠܸܥܒ݂ܵܕܵܐ ܣܲܟ݂ܠܘܼܬܵܐ ܚܛܝܼܬܵܐ ܝܠܵܗ̇،
ܘܡܲܣܚܸܪܵܢܵܐ ܛܲܡܐܘܼܬܵܐ ܝܠܹܗ ܠܒܲܪܢܵܫܵܐ.
10ܐܸܢ ܐܝܼܕܘܼ̈ܟ݂ ܪܵܦܝܼ ܒܝܵܘܡܵܐ ܕܥܵܘܩܵܢܵܐ،
ܥܝܼܩܵܐ ܝܠܹܗ ܚܲܝܠܘܼܟ݂.
11ܦܲܨܝܼ ܠܗܘܿܢ ܐܵܢܝܼ ܕܦܝܼܫܹܐ ܝܢܵܐ ܠܘܼܒܠܹܐ ܠܡܵܘܬܵܐ،
ܘܠܵܐ ܚܵܣܟܹܬ ܦܘܼܪܩܵܢܵܐ ܡ̣ܢ ܐܵܢܝܼ ܕܦܝܵܫܵܐ ܝܢܵܐ ܟܘܼܢܟܸܫܹܐ ܠܩܸܛܠܵܐ.
12ܐܸܢ ܐܵܡܪܹܬ، ”ܠܵܐ ܝ݇ܕܝܼܥ ܠܲܢ ܐܵܗܵܐ،“
ܗܵܐ، ܠܹܐ ܦܲܪܡܹܐ ܗ̇ܘ ܕܟܹܐ ܬܵܩܹܠ ܠܸܒܵܘܵܬܹ̈ܐ؟
ܘܠܹܐ ܝܵܕܹܥ ܗ̇ܘ ܕܟܹܐ ܢܵܛܹܪ ܓܵܢܘܼܟ݂؟
ܘܠܹܐ ܦܵܪܹܥ ܠܒܲܪܢܵܫܵܐ ܐܲܝܟ݂ ܦܘܼܠܚܵܢܹܗ؟
13ܐ݇ܟ݂ܘܿܠ، ܒܪܘܿܢܝܼ ܕܸܒ݂ܫܵܐ، ܣܵܒܵܒ ܨܦܵܝܝܼ ܝܠܹܗ،
ܘܕܵܘܒܵܐ ܚܸܠܝܵܐ ܝܠܹܗ ܥܲܠ ܫܵܡܵܟܘܼܟ݂.
14ܝ݇ܕܸܥ ܗܲܕܟ݂ܵܐ ܝܠܵܗ̇ ܚܸܟ݂ܡܬܵܐ ܠܓܵܢܘܼܟ݂،
ܐܸܢ ܡܘܼܫ݇ܟ̰ܚܵܐ ܠܘܼܟ݂، ܐܝܼܬ ܕܲܥܬܝܼܕ ܩܵܬܘܼܟ݂،
ܘܣܲܒ݂ܪܘܼܟ݂ ܠܹܐ ܦܵܐܹܫ ܩܛܝܼܥܵܐ.
15ܠܵܐ ܝܵܬܒܹܬ ܒܟܡܹܐܢܵܐ ܐܲܝܟ݂ ܪܲܫܝܼܥܵܐ ܒܕܘܼܝܵܪܵܐ ܕܙܲܕܝܼܩܵܐ،
ܠܵܐ ܡܲܚܪܸܒܸܬ ܒܹܝܬ ܡܲܫܪܝܹܗ.
16ܣܵܒܵܒ ܫܒܲܥ ܓܵܗܹ̈ܐ ܟܹܐ ܢܵܦܹܠ ܙܲܕܝܼܩܵܐ ܘܟܹܐ ܩܵܐܹܡ،
ܐܝܼܢܵܐ ܪ̈ܲܫܝܼܥܹܐ ܗܲܪ ܟܹܐ ܬܲܪܩܸܠܝܼ ܒܒܝܼܫܬܵܐ.
17ܒܢܦܵܠܬܵܐ ܕܕܸܫܡܸܢܘܼܟ݂ ܠܵܐ ܚܵܕܹܝܬ،
ܘܒܬܲܪܩܲܠܬܹܗ ܠܵܐ ܦܵܨܹܚ ܠܸܒܘܼܟ݂،
18ܕܠܵܐ ܚܵܙܹܐ ܡܵܪܝܵܐ، ܘܗܵܘܝܵܐ ܣܪܝܼܬܵܐ ܒܥܲܝܢܘܼ̈ܗܝ،
ܘܡܲܕܸܪ ܡܸܢܹܗ ܟܲܪܒܹܗ.
19ܠܵܐ ܥܵܒ݂ܕܹܬ ܚܣܵܡܵܐ ܠܒܝܼܫܹ̈ܐ،
ܠܵܐ ܒܲܚܸܠܸܬ ܒܪ̈ܲܫܝܼܥܹܐ.
20ܣܵܒܵܒ ܠܹܐ ܗܵܘܹܐ ܕܲܥܬܝܼܕ ܠܒܝܼܫܵܐ،
ܫܪܵܓ݂݇ܝܵܐ ܕܪ̈ܲܫܝܼܥܹܐ ܒܸܬ ܟ̰ܵܡܥܵܐ.
21ܙܕܸܥ ܡ̣ܢ ܡܵܪܝܵܐ، ܒܪܘܿܢܝܼ، ܘܡ̣ܢ ܡܲܠܟܵܐ،
ܥܲܡ ܡܵܪ̈ܘܿܕܹܐ ܠܵܐ ܚܵܒ݂ܛܹܬ.
22ܣܵܒܵܒ ܡܸܢܫܸܠܬܵܢܹܐ ܒܸܬ ܩܵܐܹܡ ܓܘܼܢܚܲܝܗܝ،
ܘܡܵܢܝܼ ܟܹܐ ܝܵܕܹܥ ܛܠܵܩܵܐ ܕܡܲܝܬܝܼ ܬܸܪܘܲܝܗܝ؟
ܒܘܼܫ ܙܵܘܕܵܐ ܡܲܬܠܹ̈ܐ ܕܚܸܟ݂ܡܬܵܐ
23ܐܘܼܦ ܐܲܢܹܐ ܗܹܡܸܙܡܵܢܹ̈ܐ ܕܚܲܟܝܼܡܹ̈ܐ ܝܢܵܐ:
ܚܙܵܝܬܵܐ ܕܦܵܬܵܐ ܒܕܝܼܘܵܢ ܠܹܐ ܝܠܵܗ̇ ܨܦܵܝܝܼ.
24ܗ̇ܘ ܕܐܵܡܹܪ ܠܪܲܫܝܼܥܵܐ، ”ܙܲܕܝܼܩܵܐ ܝܘܸܬ ܐܲܢ݇ܬ،“
ܒܸܬ ܠܵܝܛܝܼ ܠܹܗ ܥܲܡܡܹ̈ܐ، ܒܸܬ ܡܲܚܪܸܡܝܼ ܠܹܗ ܐܸܡܘܵܬܹ̈ܐ.
25ܐܝܼܢܵܐ ܠܐܵܢܝܼ ܕܡܲܢܟܸܣܝܼ ܠܹܗ ܪܲܫܝܼܥܵܐ ܒܸܬ ܗܵܘܝܵܐ ܒܲܣܝܼܡܘܼܬܵܐ،
ܘܥܲܠܲܝܗܝ ܒܸܬ ܐܵܬܝܵܐ ܒܘܼܪܟܬܵܐ ܨܦܵܝܝܼ.
26ܐܲܝܟ݂ ܢܫܵܩܬܵܐ ܥܲܠ ܣܸܦܘܵܬܹ̈ܐ ܝܠܵܗ̇
ܡܲܕܲܪܬܵܐ ܕܓ̰ܘܼܘܵܒܹ̈ܐ ܬܪ̈ܘܼܨܹܐ.
27ܡܲܩܘܝܼ ܠܒܲܕܲܪ ܦܘܼܠܚܵܢܘܼܟ݂،
ܘܗܲܕܸܪܹܗ ܒܚܲܩܠܘܼܟ݂ ܐܸܠܘܼܟ݂،
ܘܒܵܬ݇ܪ ܗܵܕܵܐ ܒܵܢܹܝܬ ܒܲܝܬܘܼܟ݂.
28ܠܵܐ ܗܵܘܹܝܬ ܣܵܗܕܵܐ ܒܠܵܐ ܥܸܠܬܵܐ ܕܲܠܩܘܼܒ݂ܠ ܕܫܒ݂ܵܒ݂ܘܼܟ݂،
ܘܠܵܐ ܡܲܚܠܸܛܸܬ ܒܣܸܦܘܵܬܘܼ̈ܟ݂.
29ܠܵܐ ܐܵܡܪܹܬ، ”ܕܵܐܟ݂ܝܼ ܕܥܒ݂ܝܼܕ ܠܹܗ ܐܸܠܝܼ، ܗܲܕܟ݂ܵܐ ܒܸܬ ܥܵܒ݂ܕܹܢ ܐܸܠܹܗ،
ܒܸܬ ܦܵܪܥܹܢܹܗ ܐܲܝܟ݂ ܦܘܼܠܚܵܢܹܗ.“
30ܥܒ݂ܝܼܪܝܼ ܒܚܲܩܠܵܐ ܕܐ݇ܢܵܫܵܐ ܡܲܟܣܸܠܵܢܵܐ،
ܒܟܲܪܡܵܐ ܕܐ݇ܢܵܫܵܐ ܚܣܝܼܪ ܗܵܘܢܵܐ.
31ܘܗܵܐ، ܐ݇ܣܝܼܩܹܐ ܝܗ݇ܘܵܘ ܩܝܼܘܵܪܹ̈ܐ ܒܟܠܵܗ̇ ܐܲܪܥܹܗ،
ܡܘܼܟܸܣܬܵܐ ܝܗ݇ܘܵܐ ܦܵܬܘܼܗ̇ ܙܝܼܘܵܢܹ̈ܐ،
ܘܣܝܵܓܹܗ ܕܟܹܐܦܹ̈ܐ ܦܝܼܫܵܐ ܝܗ݇ܘܵܐ ܬܠܝܼܚܵܐ.
32ܘܚܙܝܼ ܠܝܼ ܐܵܢܵܐ، ܘܡܘܼܣܸܡ ܠܝܼ ܒܵܠܵܐ،
ܚܝܼܪܝܼ ܘܩܘܼܒܸܠ ܠܝܼ ܠܐܵܗܵܐ ܡܲܪܕܘܼܬܵܐ:
33ܚܲܕ݇ܟ̰ܵܐ ܫܸܢܬܵܐ، ܚܲܕ݇ܟ̰ܵܐ ܢܝܵܡܬܵܐ،
ܚܲܕ݇ܟ̰ܵܐ ܟܬܵܪܬܵܐ ܕܐܝܼܕܵܬܹ̈ܐ ܠܸܕܡܵܟ݂ܵܐ،
34ܘܐ݇ܬܹܐ ܠܵܗ̇ ܡܸܣܟܹܢܘܼܬܘܼܟ݂ ܐܲܝܟ݂ ܓܲܝܵܣܵܐ،
ܘܚܘܼܣܪܵܢܘܼܟ݂ ܐܲܝܟ݂ ܐ݇ܢܵܫܵܐ ܟ̰ܘܼܟܒܸܢܵܐ.
လက္ရွိေရြးခ်ယ္ထားမွု
ܡܬܠ̈ܐ 24: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation