ܡܬܠ̈ܐ 19
19
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ
1ܒܘܼܫ ܨܦܵܝܝܼ ܝܠܹܗ ܡܸܣܟܹܢܵܐ ܕܚܵܕܹܪ ܒܬܲܡܝܼܡܘܼܬܹܗ
ܡ̣ܢ ܣܲܟ݂ܠܵܐ ܒܣܸܦܘܵܬܹ̈ܐ ܦܠܝܼܡܹ̈ܐ.
2ܐܘܼܦ ܫܲܗܘܲܬܬܵܐ ܒܠܵܐ ܝ݇ܕܲܥܬܵܐ ܠܹܐ ܝܠܵܗ̇ ܨܦܵܝܝܼ،
ܘܟܹܐ ܚܵܛܹܐ ܗ̇ܘ ܕܡܲܠܝܸܙ ܒܐܲܩܠܵܬܹ̈ܗ.
3ܣܲܟ݂ܠܘܼܬܵܐ ܕܐ݇ܢܵܫܵܐ ܟܹܐ ܡܲܦܟ̰ܸܠܵܐ ܐܘܼܪܚܹܗ،
ܘܥܲܠ ܡܵܪܝܵܐ ܟܹܐ ܟܵܪܹܒ ܠܸܒܹܗ.
4ܥܘܼܬܪܵܐ ܟܹܐ ܡܲܙܝܸܕ ܚܲܒ݂ܪ̈ܵܘܵܬܹܐ ܪܵܒܵܐ،
ܐܝܼܢܵܐ ܡܸܣܟܹܢܵܐ ܡ̣ܢ ܚܲܒ݂ܪܹܗ ܟܹܐ ܦܵܐܹܫ ܦܪܝܼܫܵܐ.
5ܣܵܗܕܵܐ ܕܫܘܼܩܪܵܐ ܠܹܐ ܗܵܘܹܐ ܙܲܟܵܝܵܐ،
ܘܗ̇ܘ ܕܗܲܡܙܸܡ ܕܘܼܓܠܹ̈ܐ ܠܹܐ ܦܵܨܹܐ.
6ܪܵܒܵܐ ܝܢܵܐ ܕܟܹܐ ܡܵܚܝܼ ܫܸܛܪܹ̈ܐ ܠܢܲܨܝܼܚܵܐ،
ܘܟܠ ܚܲܕ ܚܲܒ݂ܪܵܐ ܝܠܹܗ ܠܝܵܗ݇ܒ݂ܵܢܵܐ ܕܡܵܘܗܲܒ݂ܬܵܐ.
7ܟܠܲܝܗܝ ܐܲܚܘܿܢܘܵܬܹ̈ܐ ܕܡܸܣܟܹܢܵܐ ܟܹܐ ܣܵܢܝܼ ܠܹܗ،
ܟܡܵܐ ܒܘܼܫ ܙܵܘܕܵܐ ܚܲܒ݂ܪ̈ܵܘܵܬܹܗ ܟܹܐ ܪܵܚܩܝܼ ܡܸܢܹܗ،
ܟܹܐ ܢܵܦܹܠ ܒܵܬ݇ܪܲܝܗܝ ܒܗܹܡܸܙܡܵܢܹ̈ܐ،
ܐܝܼܢܵܐ ܠܲܝܬ ܐܵܢܝܼ.
8ܗ̇ܘ ܕܩܵܢܹܐ ܗܵܘܢܵܐ ܟܹܐ ܡܲܚܸܒ ܓܵܢܹܗ،
ܘܗ̇ܘ ܕܢܵܛܹܪ ܦܲܪܡܵܝܬܵܐ ܟܹܐ ܡܲܫ݇ܟ̰ܸܚ ܛܵܒ݂ܬܵܐ.
9ܣܵܗܕܵܐ ܕܫܘܼܩܪܵܐ ܠܹܐ ܗܵܘܹܐ ܙܲܟܵܝܵܐ،
ܘܗ̇ܘ ܕܗܲܡܙܸܡ ܕܘܼܓܠܹ̈ܐ ܒܸܬ ܛܵܠܹܩ.
10ܠܹܐ ܚܵܫܹܚ ܠܣܲܟ݂ܠܵܐ ܚܲܝܘܼܬܵܐ ܕܒܘܼܣܵܡܵܐ،
ܟܡܵܐ ܒܘܼܫ ܙܵܘܕܵܐ ܠܪܹܓܵܐ ܕܗܲܟܸܡ ܥܲܠ ܓܘܼܪ̈ܵܢܹܐ.
11ܦܲܪܡܵܝܬܵܐ ܕܐ݇ܢܵܫܵܐ ܟܹܐ ܡܲܪܝܸܟ݂ܵܐ ܒܹܐܢܹܗ،
ܘܚܸܩܪܹܗ ܝܼܠܹܗ ܠܸܥܒ݂ܵܪܵܐ ܡܥܲܠ ܓܢܵܗܵܐ.
12ܓܲܪܓܲܡܬܵܐ ܐܲܝܟ݂ ܐܲܪܝܵܐ ܝܠܵܗ̇ ܟܲܪܒܵܐ ܕܡܲܠܟܵܐ،
ܐܝܼܢܵܐ ܐܲܝܟ݂ ܛܠܘܼܠܵܐ ܥܲܠ ܓܸܠܵܐ ܨܸܒ݂ܝܵܢܹܗ.
13ܚܪܵܒ݂ܵܐ ܝܠܹܗ ܠܒܵܒܘܼܗܝ ܒܪܘܿܢܵܐ ܣܲܟ݂ܠܵܐ،
ܘܕܵܠܘܿܦܵܐ ܕܠܵܐ ܫܠܵܝܵܐ ܝܢܵܐ ܕܘܼܪ̈ܵܫܹܐ ܕܒܲܟ݂ܬܵܐ.
14ܒܲܝܬܵܐ ܘܥܘܼܬܪܵܐ ܝܵܪܬܘܼܬܵܐ ܝܢܵܐ ܡ̣ܢ ܐܲܒ݂ܵܗܹ̈ܐ،
ܐܝܼܢܵܐ ܡ̣ܢ ܡܵܪܝܵܐ ܝܠܵܗ̇ ܒܲܟ݂ܬܵܐ ܦܲܪܡܝܼܵܢܬܵܐ.
15ܡܲܟܣܸܠܵܢܘܼܬܵܐ ܟܹܐ ܡܲܢܦܸܠܵܐ ܒܢܵܘܡܵܐ،
ܘܓܵܢܵܐ ܪܦܝܼܬܵܐ ܒܸܬ ܟܵܦܢܵܐ.
16ܢܵܛܪܵܢܵܐ ܕܦܘܼܩܕܵܢܵܐ ܟܹܐ ܢܵܛܹܪ ܓܵܢܹܗ،
ܡܲܣܠܝܼܵܢܵܐ ܕܐܘܼܪ̈ܚܵܬܹܗ ܒܸܬ ܡܵܐܹܬ.
17ܟܹܐ ܡܲܕܝܸܢ ܠܡܵܪܝܵܐ ܗ̇ܘ ܕܚܲܢܵܢܵܐ ܝܠܹܗ ܠܡܸܣܟܹܢܵܐ،
ܘܒܘܼܬ ܥܒ݂ܵܕܹܗ ܒܸܬ ܦܵܪܹܥ ܐܸܠܹܗ.
18ܬܲܥܠܸܡ ܠܒܪܘܿܢܘܼܟ݂ ܟܲܕ ܐܝܼܬ ܗܹܒ݂ܝܼ،
ܘܡܵܘܬܹܗ ܠܵܐ ܛܵܥܢܹܬ ܠܹܗ ܠܓܵܢܘܼܟ݂.
19ܗ̇ܘ ܕܪܵܒܵܐ ܚܸܡܬܵܢܵܐ ܝܠܹܗ ܒܸܬ ܛܵܥܹܢ ܓ̰ܵܪܝܼܡܵܐ،
ܣܵܒܵܒ ܐܸܢ ܦܲܨܹܝܬ ܠܹܗ، ܒܸܬ ܡܲܙܝܸܕܸܬ ܠܸܥܒ݂ܵܕܵܐ ܗܲܕܟ݂ܵܐ.
20ܫܡܸܥ ܡܸܠܟܵܐ ܘܩܲܒܸܠ ܡܲܪܕܘܼܬܵܐ،
ܩܵܐ ܕܗܵܘܹܝܬ ܚܲܟܝܼܡܵܐ ܒܕܲܥܬܝܼܕܘܼܟ݂.
21ܪܵܒܵܐ ܝܢܵܐ ܚܘܼܫܵܒܹ̈ܐ ܒܠܸܒܵܐ ܕܐ݇ܢܵܫܵܐ،
ܐܝܼܢܵܐ ܡܸܠܟܵܐ ܕܡܵܪܝܵܐ ܒܸܬ ܡܩܵܘܹܐ.
22ܡܸܢܕܝܼ ܫܘܼܗܘܸܬܵܐ ܓܵܘ ܐ݇ܢܵܫܵܐ ܫܵܦܵܩܲܬܹܗ ܝܠܵܗ̇،
ܘܒܘܼܫ ܨܦܵܝܝܼ ܝܠܹܗ ܡܸܣܟܹܢܵܐ ܡ̣ܢ ܐ݇ܢܵܫܵܐ ܕܲܓܵܠܵܐ.
23ܙܕܘܼܥܬܵܐ ܕܡܵܪܝܵܐ ܟܹܐ ܡܗܲܕܝܵܐ ܠܚܲܝܹ̈ܐ،
ܘܡ̇ܢ ܕܐܝܼܬ ܠܹܗ ܒܸܬ ܚܲܝܹ̈ܐ ܣܒ݂ܝܼܥܵܐ،
ܘܠܹܐ ܦܵܐܹܫ ܣܘܼܚܒܸܪܵܐ ܒܒܝܼܫܬܵܐ.
24ܡܲܟܣܸܠܵܢܵܐ ܟܹܐ ܛܵܡܹܫ ܠܵܗ̇ ܐܝܼܕܹܗ ܓܵܘ ܛܵܣܵܐ،
ܐܘܼܦ ܠܦܘܼܡܹܗ ܠܹܐ ܡܲܕܸܪܵܗ̇.
25ܠܡܲܣܚܸܪܵܢܵܐ ܡܵܚܹܝܬ، ܦܫܝܼܛܵܐ ܒܸܬ ܩܲܒܸܠ ܬܘܼܠܡܵܕܵܐ،
ܘܡܲܢܟܸܣܸܬ ܠܦܲܪܡܝܼܵܢܵܐ، ܒܸܬ ܩܵܢܹܐ ܝ݇ܕܲܥܬܵܐ.
26ܗ̇ܘ ܕܡܲܝܬܹܐ ܚܪܵܒ݂ܵܐ ܠܒܵܒܵܐ ܘܡܲܥܪܸܩ ܠܝܸܡܵܐ،
ܒܪܘܿܢܵܐ ܡܲܢܟܸܦܵܢܵܐ ܝܠܹܗ ܘܡܲܝܬܝܵܢܵܐ ܕܠܵܘܡܵܐ.
27ܐܸܢ ܫܵܠܹܝܬ، ܒܪܘܿܢܝܼ، ܡ̣ܢ ܠܸܫܡܵܥܵܐ ܡܲܪܕܘܼܬܵܐ،
ܒܸܬ ܪܵܚܩܹܬ ܡ̣ܢ ܗܹܡܸܙܡܵܢܹ̈ܐ ܕܝ݇ܕܲܥܬܵܐ.
28ܣܵܗܕܵܐ ܣܪܝܼܩܵܐ ܟܹܐ ܡܲܣܚܸܪ ܒܗܵܩܘܼܬܵܐ،
ܘܒܲܣܝܼܡܵܐ ܝܠܹܗ ܥܵܘܠܵܐ ܠܦܘܼܡܵܐ ܕܪ̈ܲܫܝܼܥܹܐ.
29ܕܝܼܘܵܢܹ̈ܐ ܗܘܼܕܪܹܐ ܝܢܵܐ ܩܵܐ ܡܲܣܚܸܪ̈ܵܢܹܐ،
ܘܡܲܚܘܵܬܹ̈ܐ ܩܵܐ ܚܲܨܵܐ ܕܣܲܟ݂ܠܹ̈ܐ.
လက္ရွိေရြးခ်ယ္ထားမွု
ܡܬܠ̈ܐ 19: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation