ܡܬܠ̈ܐ 14
14
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ
1ܒܲܟ݂ܬܵܐ ܚܲܟܝܼܡܬܵܐ ܟܹܐ ܒܵܢܝܵܐ ܒܲܝܬܘܼܗ̇،
ܐܝܼܢܵܐ ܒܲܟ݂ܬܵܐ ܣܲܟ݂ܠܹܐ ܒܐܝܼܕܵܬܘܼ̈ܗ̇ ܟܹܐ ܬܵܠܚܵܐ ܠܹܗ.
2ܡ̇ܢ ܕܚܵܕܹܪ ܒܬܪܘܼܨܘܼܬܹܗ ܟܹܐ ܙܵܕܹܥ ܡ̣ܢ ܡܵܪܝܵܐ،
ܐܝܼܢܵܐ ܦܟ̰ܝܼܠܵܐ ܒܐܘܼܪ̈ܚܵܬܹܗ ܟܹܐ ܡܲܣܠܹܐ ܐܸܠܹܗ.
3ܒܦܘܼܡܵܐ ܕܣܲܟ݂ܠܵܐ ܐܝܼܬ ܩܲܛܝܼܥܵܐ ܩܵܐ ܫܘܼܒ݂ܗܵܪܹܗ،
ܐܝܼܢܵܐ ܣܸܦܘܵܬܹ̈ܐ ܕܚܲܟܝܼܡܹ̈ܐ ܟܹܐ ܢܵܛܪܝܼ ܐܸܠܲܝܗܝ.
4ܐܲܝܟܵܐ ܕܠܲܝܬ ܩܸܢܝܵܢܹ̈ܐ ܐܘܼܪܹܐ ܕܟ݂ܝܼܬܵܐ ܝܠܵܗ̇،
ܐܝܼܢܵܐ ܕܲܚܠܵܐ ܦܪܝܼܬܵܐ ܟܹܐ ܐܵܬܝܵܐ ܒܚܲܝܠܵܐ ܕܬܵܘܪܵܐ.
5ܣܵܗܕܵܐ ܡܗܘܼܡܢܵܐ ܠܹܐ ܕܲܓܸܠ،
ܐܝܼܢܵܐ ܗܲܡܙܸܡܵܢܵܐ ܕܕܘܼܓܠܹ̈ܐ ܣܵܗܕܵܐ ܕܫܘܼܩܪܵܐ ܝܠܹܗ.
6ܡܲܣܚܸܪܵܢܵܐ ܟܹܐ ܛܵܥܹܐ ܠܚܸܟ݂ܡܬܵܐ ܘܠܹܐ ܡܲܫ݇ܟ̰ܸܚ ܠܵܗ̇،
ܐܝܼܢܵܐ ܝ݇ܕܲܥܬܵܐ ܠܦܲܪܡܝܼܵܢܵܐ ܩܲܠܘܼܠܬܵܐ ܝܠܵܗ̇.
7ܙܹܠ݇ ܡܩܵܕ݇ܡ ܦܵܬܵܐ ܕܐ݇ܢܵܫܵܐ ܣܲܟ݂ܠܵܐ،
ܣܵܒܵܒ ܠܹܐ ܩܲܒܠܸܬ ܡ̣ܢ ܣܸܦܘܵܬܹ̈ܗ ܝ݇ܕܲܥܬܵܐ.
8ܚܸܟ݂ܡܬܵܐ ܕܝܵܕܥܵܢܵܐ ܦܲܪܡܵܝܬܵܐ ܕܐܘܼܪܚܹܗ ܝܠܵܗ̇،
ܐܝܼܢܵܐ ܐܲܗܡܲܩܘܼܬܵܐ ܕܣܲܟ݂ܠܹ̈ܐ ܦܸܠܡܲܝܗܝ ܝܠܵܗ̇.
9ܣܲܟ݂ܠܹ̈ܐ ܟܹܐ ܡܲܣܚܸܪܝܼ ܒܓܢܵܗܵܐ،
ܐܝܼܢܵܐ ܒܹܝܠ ܬܪ̈ܘܼܨܹܐ ܐܝܼܬ ܨܸܒ݂ܝܵܢܵܐ.
10ܐܲܚܟ̰ܝܼ ܠܸܒܵܐ ܟܹܐ ܝܵܕܹܥ ܡܲܪܝܼܪܘܼܬܵܐ ܕܓܵܢܹܗ،
ܘܒܚܲܕܘܼܬܹܗ ܐܘܼܦ ܚܲܕ ܠܹܐ ܡܵܨܹܐ ܫܲܪܸܟ.
11ܒܲܝܬܵܐ ܕܪ̈ܲܫܝܼܥܹܐ ܒܸܬ ܚܵܪܹܒ݂،
ܐܝܼܢܵܐ ܡܲܫܟܢܵܐ ܕܬܪ̈ܘܼܨܹܐ ܒܸܬ ܡܲܢܬܹܐ.
12ܐܝܼܬ ܐܘܼܪܚܵܐ ܕܟܹܐ ܡܲܒܝܸܢܵܐ ܬܪܘܼܨܬܵܐ ܩܵܕ݇ܡ ܐ݇ܢܵܫܵܐ،
ܐܝܼܢܵܐ ܚܲܪܬܘܼܗ̇ ܡܵܘܬܵܐ ܝܠܵܗ̇.
13ܐܘܼܦ ܓܵܘ ܓܸܚܟܵܐ ܟܹܐ ܡܵܨܹܐ ܗܵܘܹܐ ܕܲܪܕ ܕܠܸܒܵܐ،
ܘܚܲܪܬܵܐ ܕܚܲܕܘܼܬܵܐ ܟܹܐ ܡܵܨܝܵܐ ܗܵܘܝܵܐ ܚܲܫܵܐ.
14ܡ̣ܢ ܐܘܼܪ̈ܚܵܬܹܗ ܦܟ̰ܝܼܠܹ̈ܐ ܒܸܬ ܣܵܒܹܥ ܩܵܠܒܵܢܵܐ ܕܠܸܒܵܐ،
ܐܝܼܢܵܐ ܐ݇ܢܵܫܵܐ ܛܵܒ݂ܵܐ ܡ̣ܢ ܐܘܼܪ̈ܚܵܬܹܗ ܬܪ̈ܘܼܨܹܐ.
15ܦܫܝܼܛܵܐ ܟܹܐ ܗܲܡܸܢ ܠܟܠ ܚܲܒܪܵܐ،
ܐܝܼܢܵܐ ܝܵܕܘܿܥܵܐ ܟܹܐ ܬܲܚܡܸܢ ܠܦܵܣܘܿܥܬܹܗ.
16ܚܲܟܝܼܡܵܐ ܟܹܐ ܙܵܕܹܥ ܘܩܵܠܹܒ ܡ̣ܢ ܒܝܼܫܬܵܐ،
ܐܝܼܢܵܐ ܣܲܟ݂ܠܵܐ ܟܹܐ ܫܲܒ݂ܗܸܪ ܒܬܘܼܟ݂ܠܵܢܵܐ.
17ܐ݇ܢܵܫܵܐ ܒܹܐܢܹܗ ܟܪܝܼܬܵܐ ܟܹܐ ܥܵܒܹܕ ܣܲܟ݂ܠܘܼܬܵܐ،
ܘܥܵܒ݂ܕܵܢܵܐ ܕܦܸܠܡܹ̈ܐ ܟܹܐ ܦܵܐܹܫ ܣܸܢܝܵܐ.
18ܦܫܝܼ̈ܛܹܐ ܟܹܐ ܝܵܪܬܝܼ ܣܲܟ݂ܠܘܼܬܵܐ،
ܐܝܼܢܵܐ ܝܵܕܘܿܥܹ̈ܐ ܟܹܐ ܦܵܝܫܝܼ ܒܘܼܢܦܸܪܹܐ ܒܝ݇ܕܲܥܬܵܐ.
19ܒܸܬ ܟܵܝܦܝܼ ܒܝܼܫܹ̈ܐ ܩܵܕ݇ܡ ܛܵܒܹ̈ܐ،
ܘܪ̈ܲܫܝܼܥܹܐ ܩܵܕ݇ܡ ܕܲܪ̈ܘܵܙܹܐ ܕܙܲܕܝܼܩܵܐ.
20ܐܘܼܦ ܒܚܲܒ݂ܪܹܗ ܟܹܐ ܦܵܐܹܫ ܣܸܢܝܵܐ ܡܸܣܟܹܢܵܐ،
ܐܝܼܢܵܐ ܡܲܚܸܒܵܢܹ̈ܐ ܕܥܲܬܝܼܪܵܐ ܪܵܒܵܐ ܝܢܵܐ.
21ܡܲܣܠܝܼܵܢܵܐ ܕܚܲܒ݂ܪܹܗ ܟܹܐ ܚܵܛܹܐ،
ܐܝܼܢܵܐ ܛܘܼܒ݂ܵܐ ܠܗ̇ܘ ܕܪܲܚܸܡ ܥܲܠ ܡܸܣܟܹܢܹ̈ܐ.
22ܗܵܐ، ܠܹܐ ܚܵܠܛܝܼ ܚܵܪ̈ܛܵܢܹܐ ܕܒܝܼܫܬܵܐ؟
ܐܝܼܢܵܐ ܫܵܦܵܩܲܬ ܘܫܪܵܪܵܐ ܥܲܡ ܚܵܪ̈ܛܵܢܹܐ ܕܛܵܒ݂ܬܵܐ ܝܢܵܐ.
23ܒܟܠ ܥܲܡܠܵܐ ܟܹܐ ܗܵܘܹܐ ܝܘܼܬܪܵܢܵܐ،
ܐܝܼܢܵܐ ܒܗܲܡܙܲܡܬܵܐ ܐܲܚܟ̰ܝܼ ܚܘܼܣܪܵܢܵܐ.
24ܟܠܝܼܠܵܐ ܕܚܲܟܝܼܡܹ̈ܐ ܥܘܼܬܪܲܝܗܝ ܝܠܹܗ،
ܐܝܼܢܵܐ ܒܸܢܦܵܪ ܕܣܲܟ݂ܠܹ̈ܐ ܐܲܗܡܲܩܘܼܬܵܐ.
25ܟܹܐ ܦܲܨܹܐ ܓܵܢܵܬܹ̈ܐ ܣܵܗܕܵܐ ܫܲܪܝܼܪܵܐ،
ܐܝܼܢܵܐ ܟܹܐ ܗܲܡܙܸܡ ܕܘܼܓܠܹ̈ܐ ܦܠܝܼܡܵܐ.
26ܒܙܕܘܼܥܬܵܐ ܕܡܵܪܝܵܐ ܐܝܼܬ ܣܲܒ݂ܪܵܐ ܥܲܫܝܼܢܵܐ،
ܘܠܒܢܘܿܢܘܼ̈ܗܝ ܟܹܐ ܗܵܘܹܐ ܣܸܬܵܪܵܐ.
27ܙܕܘܼܥܬܵܐ ܕܡܵܪܝܵܐ ܡܲܒܘܼܥܵܐ ܕܚܲܝܹ̈ܐ ܝܠܵܗ̇
ܠܸܩܠܵܒܵܐ ܡ̣ܢ ܦܲܚܹ̈ܐ ܕܡܵܘܬܵܐ.
28ܦܸܪܝܘܼܬܵܐ ܕܥܲܡܵܐ ܣܸܩܠܵܐ ܕܡܲܠܟܵܐ ܝܠܵܗ̇،
ܐܝܼܢܵܐ ܒܵܨܘܿܪܘܼܬܵܐ ܕܛܵܝܸܦܵܐ ܫܡܵܛܬܵܐ ܕܫܲܠܝܼܛܵܐ.
29ܒܹܐܢܹܗ ܝܲܪܝܼܟ݂ܬܵܐ ܪܵܒܵܐ ܝܠܵܗ̇ ܦܲܪܡܵܝܬܹܗ،
ܐܝܼܢܵܐ ܒܹܐܢܹܗ ܟܪܝܼܬܵܐ ܟܹܐ ܡܲܚܙܹܐ ܣܲܟ݂ܠܘܼܬܵܐ.
30ܚܲܝܹ̈ܐ ܕܓܘܼܫܡܵܐ ܝܠܵܗ̇ ܫܸܠܝܘܼܬܵܐ ܕܠܸܒܵܐ،
ܐܝܼܢܵܐ ܒܲܚܸܠܵܢܘܼܬܵܐ ܣܦܝܼܣܘܼܬܵܐ ܕܓܲܪ̈ܡܹܐ.
31ܛܵܠܡܵܢܵܐ ܠܡܸܣܟܹܢܵܐ ܟܹܐ ܡܲܝܬܹܐ ܠܵܘܡܵܐ ܠܒܵܪܝܵܢܹܗ،
ܐܝܼܢܵܐ ܡܝܲܩܪܵܢܵܐ ܕܡܵܪܝܵܐ ܟܹܐ ܪܲܚܸܡ ܥܲܠ ܣܢܝܼܩܵܐ.
32ܒܒܝܼܫܬܹܗ ܟܹܐ ܦܵܐܹܫ ܚܘܼܪܙܸܦܵܐ ܪܲܫܝܼܥܵܐ،
ܐܝܼܢܵܐ ܐܝܼܬ ܠܹܗ ܣܲܒ݂ܪܵܐ ܒܥܕܵܢܵܐ ܕܡܵܘܬܹܗ ܙܲܕܝܼܩܵܐ.
33ܒܠܸܒܵܐ ܕܦܲܪܡܝܼܵܢܵܐ ܟܹܐ ܫܵܪܝܵܐ ܚܸܟ݂ܡܬܵܐ،
ܘܒܓܵܘܵܐ ܕܣܲܟ݂ܠܹ̈ܐ ܟܹܐ ܦܵܝܫܵܐ ܝ݇ܕܝܼܥܬܵܐ.
34ܙܲܕܝܼܩܘܼܬܵܐ ܟܹܐ ܡܲܪܡܵܐ ܠܐܘܼܡܬܵܐ،
ܐܝܼܢܵܐ ܚܛܝܼܬܵܐ ܠܵܘܡܵܐ ܝܠܵܗ̇ ܠܡܸܠܲܬܹ̈ܐ.
35ܡܲܠܟܵܐ ܟܹܐ ܪܵܕܹܐ ܠܪܹܓܵܐ ܦܲܪܡܝܼܵܢܵܐ،
ܐܝܼܢܵܐ ܟܹܐ ܟܵܪܹܒ ܒܗ̇ܘ ܕܝܼܠܹܗ ܡܲܢܟܸܦܵܢܵܐ.
လက္ရွိေရြးခ်ယ္ထားမွု
ܡܬܠ̈ܐ 14: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation