ܡܬܠ̈ܐ 13

ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ

1ܒܪܘܿܢܵܐ ܚܲܟܝܼܡܵܐ ܟܹܐ ܩܲܒܸܠ ܡܲܪܕܘܼܬܵܐ ܕܒܵܒܵܐ،

ܐܝܼܢܵܐ ܡܲܣܚܸܪܵܢܵܐ ܠܹܐ ܫܵܡܹܥ ܢܓ̰ܵܘܬܵܐ.

2ܡ̣ܢ ܛܥܘܼܢܬܵܐ ܕܦܘܼܡܵܐ ܐ݇ܢܵܫܵܐ ܟܹܐ ܐܵܟܹܠ ܛܵܒ݂ܬܵܐ،

ܐܝܼܢܵܐ ܚܵܝܝܼܢܹ̈ܐ ܟܹܐ ܫܲܗܘܸܬܝܼ ܠܛܠܘܼܡܝܵܐ.

3ܢܵܛܪܵܢܵܐ ܕܦܘܼܡܹܗ ܟܹܐ ܢܵܛܹܪ ܓܵܢܹܗ،

ܐܝܼܢܵܐ ܠܦܵܬܚܵܢܵܐ ܕܣܸܦܘܵܬܹ̈ܗ ܟܹܐ ܐܵܬܹܐ ܚܪܵܒ݂ܵܐ.

4ܓܵܢܵܐ ܕܡܲܟܣܸܠܵܢܵܐ ܟܹܐ ܫܲܗܘܸܬܵܐ، ܘܠܹܐ ܩܵܢܝܵܐ ܡܸܢܕܝܼ،

ܐܝܼܢܵܐ ܓܵܢܵܐ ܚܲܦܛܵܢܬܵܐ ܟܹܐ ܗܵܘܝܵܐ ܥܲܬܝܼܪܬܵܐ.

5ܙܲܕܝܼܩܵܐ ܟܹܐ ܣܵܢܹܐ ܚܲܒܪܵܐ ܕܕܘܼܓܠܵܐ،

ܐܝܼܢܵܐ ܪܲܫܝܼܥܵܐ ܟܹܐ ܥܵܒܹܕ ܣܸܪܝܘܼܬܵܐ ܘܡܲܝܬܹܐ ܢܟ݂ܝܼܦܬܵܐ.

6ܙܲܕܝܼܩܘܼܬܵܐ ܟܹܐ ܢܵܛܪܵܐ ܠܬܲܡܝܼܡܵܐ ܕܐܘܼܪܚܵܐ،

ܐܝܼܢܵܐ ܪܲܫܝܼܥܘܼܬܵܐ ܟܹܐ ܡܲܢܦܸܠܵܐ ܠܚܲܛܵܝܵܐ.

7ܐܝܼܬ ܐ݇ܢܵܫܵܐ ܕܟܹܐ ܡܲܚܫܸܒ݂ ܥܲܬܝܼܪܵܐ ܝܠܹܗ، ܐܝܼܢܵܐ ܠܲܝܬ ܠܹܗ ܡܸܢܕܝܼ،

ܘܐܝܼܬ ܕܟܹܐ ܡܲܚܫܸܒ݂ ܡܸܣܟܹܢܵܐ ܝܠܹܗ، ܐܝܼܢܵܐ ܐܝܼܬ ܠܹܗ ܥܘܼܬܪܵܐ ܪܵܒܵܐ.

8ܥܘܼܬܪܵܐ ܕܐ݇ܢܵܫܵܐ ܟܹܐ ܦܲܪܸܩ ܠܵܗ̇ ܓܵܢܹܗ،

ܐܝܼܢܵܐ ܡܸܣܟܹܢܵܐ ܠܹܐ ܐܵܬܹܐ ܥܲܠܘܼܗܝ ܓܸܙܡܵܐ.

9ܒܲܗܪܵܐ ܕܙܲܕܝܼܩܹ̈ܐ ܟܹܐ ܨܵܡܹܚ،

ܐܝܼܢܵܐ ܫܪܵܓ݂݇ܝܵܐ ܕܪ̈ܲܫܝܼܥܹܐ ܒܸܬ ܟ̰ܵܡܥܵܐ.

10ܚܬܵܪܬܵܐ ܐܲܚܟ̰ܝܼ ܟܹܐ ܡܲܝܬܝܵܐ ܡܲܩܲܪܵܨܘܼܬܵܐ،

ܐܝܼܢܵܐ ܠܐܵܢܝܼ ܕܩܲܒܠܝܼ ܡܸܠܟܵܐ ܐܝܼܬ ܚܸܟ݂ܡܬܵܐ.

11ܥܘܼܬܪܵܐ ܩܸܢܝܵܐ ܒܡܲܠܝܲܙܬܵܐ ܒܸܬ ܒܵܨܹܪ،

ܐܝܼܢܵܐ ܗ̇ܘ ܕܓ̰ܲܡܸܥ ܢܝܼܚܵܐ ܒܢܝܼܚܵܐ ܒܸܬ ܡܲܙܝܸܕ.

12ܣܲܒ݂ܪܵܐ ܡܘܼܡܗܸܪܵܐ ܟܹܐ ܡܲܡܪܸܥ ܠܸܒܵܐ،

ܐܝܼܢܵܐ ܒܵܥܘܼܬܵܐ ܬܘܼܡܸܡܬܵܐ ܐܝܼܠܵܢܵܐ ܕܚܲܝܹ̈ܐ ܝܠܵܗ̇.

13ܗ̇ܘ ܕܡܲܣܠܹܐ ܠܡܲܠܦܵܢܘܼܬܵܐ ܟܹܐ ܡܲܝܬܹܐ ܚܪܵܒ݂ܵܐ ܠܓܵܢܹܗ،

ܐܝܼܢܵܐ ܗ̇ܘ ܕܙܵܕܹܥ ܡ̣ܢ ܦܘܼܩܕܵܢܵܐ ܒܸܬ ܦܵܐܹܫ ܦܪܝܼܥܵܐ.

14ܢܵܡܘܿܣܵܐ ܕܚܲܟܝܼܡܵܐ ܡܲܒܘܼܥܵܐ ܕܚܲܝܹ̈ܐ ܝܠܹܗ

ܠܸܩܠܵܒܵܐ ܡ̣ܢ ܦܲܚܹ̈ܐ ܕܡܵܘܬܵܐ.

15ܣܘܼܟܵܠܵܐ ܛܵܒ݂ܵܐ ܟܹܐ ܝܲܗ݇ܒܸܠ ܫܵܦܵܩܲܬ،

ܐܝܼܢܵܐ ܐܘܼܪܚܵܐ ܕܚܵܝܝܼܢܹ̈ܐ ܥܲܣܩܵܐ ܝܠܵܗ̇.

16ܟܠ ܝܵܕܘܿܥܵܐ ܟܹܐ ܦܵܠܹܚ ܒܝ݇ܕܲܥܬܵܐ،

ܐܝܼܢܵܐ ܣܲܟ݂ܠܵܐ ܟܹܐ ܦܵܪܹܣ ܣܲܟ݂ܠܘܼܬܵܐ.

17ܐܝܼܙܓܲܕܵܐ ܪܲܫܝܼܥܵܐ ܟܹܐ ܢܵܦܹܠ ܒܒܝܼܫܬܵܐ،

ܐܝܼܢܵܐ ܡܫܲܕܪܵܐ ܡܗܘܼܡܢܵܐ ܟܹܐ ܡܲܝܬܹܐ ܒܣܵܡܬܵܐ.

18ܡܸܣܟܹܢܘܼܬܵܐ ܘܒܘܼܨܵܪܵܐ ܠܡ̇ܢ ܕܫܵܒܹܩ ܡܲܪܕܘܼܬܵܐ،

ܐܝܼܢܵܐ ܢܵܛܪܵܢܵܐ ܕܡܲܢܟܲܣܬܵܐ ܒܸܬ ܦܵܐܹܫ ܡܝܘܼܩܪܵܐ.

19ܒܵܥܘܼܬܵܐ ܝܘܼܗ݇ܒܸܠܬܵܐ ܚܠܝܼܬܵܐ ܝܠܵܗ̇ ܠܓܵܢܵܐ،

ܐܝܼܢܵܐ ܩܠܵܒܬܵܐ ܡ̣ܢ ܒܝܼܫܬܵܐ ܛܲܡܐܘܼܬܵܐ ܝܠܵܗ̇ ܠܣܲܟ݂ܠܹ̈ܐ.

20ܚܵܕܪܵܢܵܐ ܥܲܡ ܚܲܟܝܼܡܹ̈ܐ ܟܹܐ ܗܵܘܹܐ ܚܲܟܝܼܡܵܐ،

ܐܝܼܢܵܐ ܚܲܒ݂ܪܵܐ ܕܣܲܟ݂ܠܹ̈ܐ ܒܸܬ ܩܲܒܸܠ ܒܝܼܫܬܵܐ.

21ܒܵܬ݇ܪ ܚܲܛܵܝܹ̈ܐ ܟܹܐ ܢܵܦܠܵܐ ܒܝܼܫܬܵܐ،

ܐܝܼܢܵܐ ܦܘܼܪܥܵܢܵܐ ܕܙܲܕܝܼܩܹ̈ܐ ܛܵܒ݂ܬܵܐ ܝܠܹܗ.

22ܛܵܒ݂ܵܐ ܟܹܐ ܫܵܒܹܩ ܝܘܼܪܬܵܢܵܐ ܠܒܢܘܿܢܹ̈ܐ ܕܒܢܘܿܢܘܼ̈ܗܝ،

ܐܝܼܢܵܐ ܥܘܼܬܪܵܐ ܕܚܲܛܵܝܵܐ ܦܝܼܫܵܐ ܝܠܹܗ ܚܘܼܡܝܵܐ ܩܵܐ ܙܲܕܝܼܩܵܐ.

23ܐܝܼܬ ܡܹܐܟ݂ܘܼܠܬܵܐ ܪܵܒܵܐ ܒܟܪܹܒ݂ܵܐ ܕܡܸܣܟܹܢܹ̈ܐ،

ܐܝܼܢܵܐ ܟܹܐ ܦܵܝܫܵܐ ܟܘܼܪܦܸܫܬܵܐ ܒܠܵܐ ܗܵܩܘܼܬܵܐ.

24ܗ̇ܘ ܕܚܵܣܹܟ݂ ܩܲܛܝܼܥܹܗ ܣܵܢܝܵܢܵܐ ܕܒܪܘܿܢܹܗ ܝܠܹܗ،

ܐܝܼܢܵܐ ܡܲܚܸܒܵܢܹܗ ܟܹܐ ܬܲܥܠܸܡ ܠܹܗ ܚܦܝܼܛܵܐܝܼܬ.

25ܙܲܕܝܼܩܵܐ ܟܹܐ ܐܵܟܹܠ ܗܲܠ ܣܒ݂ܵܥܬܹܗ،

ܐܝܼܢܵܐ ܟܹܪ݇ܣܵܐ ܕܪ̈ܲܫܝܼܥܹܐ ܟܹܐ ܦܵܝܫܵܐ ܣܢܝܼܩܬܵܐ.

လက္ရွိေရြးခ်ယ္ထားမွု

ܡܬܠ̈ܐ 13: ABTAB

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ အေၾကာင္းကို ပို၍ သင္ယူပါ။