ܡܬܠ̈ܐ 12

ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ

1ܗ̇ܘ ܕܡܲܚܸܒ ܡܲܪܕܘܼܬܵܐ، ܡܲܚܸܒܵܢܵܐ ܕܝ݇ܕܲܥܬܵܐ ܝܠܹܗ،

ܐܝܼܢܵܐ ܣܵܢܝܵܢܵܐ ܕܡܲܢܟܲܣܬܵܐ ܐܲܗܡܲܩ ܝܼܠܹܗ.

2ܐ݇ܢܵܫܵܐ ܛܵܒ݂ܵܐ ܟܹܐ ܩܲܒܸܠ ܫܵܦܵܩܲܬ ܡ̣ܢ ܡܵܪܝܵܐ،

ܐܝܼܢܵܐ ܐ݇ܢܵܫܵܐ ܕܦܸܠܡܹ̈ܐ ܒܸܬ ܦܵܐܹܫ ܥܒ݂ܝܼܕܵܐ ܚܲܝܵܒ݂ܵܐ.

3ܠܹܐ ܡܩܵܘܹܐ ܒܲܪܢܵܫܵܐ ܒܝܲܕ ܪܲܫܝܼܥܘܼܬܵܐ،

ܐܝܼܢܵܐ ܥܸܩܪܵܐ ܕܙܲܕܝܼܩܵܐ ܠܹܐ ܫܵܥܹܫ.

4ܒܲܟ݂ܬܵܐ ܟܫܝܼܛܬܵܐ ܟܠܝܼܠܵܐ ܕܓܲܒ݂ܪܘܼܗ̇ ܝܠܵܗ̇،

ܐܝܼܢܵܐ ܒܲܟ݂ܬܵܐ ܡܲܢܟܸܦܵܢܬܵܐ ܐܲܝܟ݂ ܣܦܝܼܣܘܼܬܵܐ ܒܓܲܪ̈ܡܘܼܗܝ.

5ܚܘܼܫܵܒܹ̈ܐ ܕܙܲܕܝܼܩܹ̈ܐ ܗܲܩ ܝܼܢܵܐ،

ܐܝܼܢܵܐ ܡܸܠܟܹ̈ܐ ܕܪ̈ܲܫܝܼܥܹܐ ܦܸܠܡܵܐ ܝܢܵܐ.

6ܗܹܡܸܙܡܵܢܹ̈ܐ ܕܪ̈ܲܫܝܼܥܹܐ ܒܟܡܹܐܢܵܐ ܝܢܵܐ ܠܬܲܦܲܟ݂ܬܵܐ ܕܕܸܡܵܐ،

ܐܝܼܢܵܐ ܦܘܼܡܵܐ ܕܬܪ̈ܘܼܨܹܐ ܠܦܲܨܵܝܬܵܐ ܝܠܹܗ.

7ܟܹܐ ܦܵܝܫܝܼ ܡܘܼܢܦܸܠܹܐ ܪ̈ܲܫܝܼܥܹܐ، ܘܟܹܐ ܛܵܠܩܝܼ،

ܐܝܼܢܵܐ ܒܲܝܬܵܐ ܕܙܲܕܝܼܩܹ̈ܐ ܟܹܐ ܟܵܠܹܐ.

8ܠܩܲܕܪܵܐ ܕܦܲܪܡܵܝܬܹܗ ܒܸܬ ܦܵܐܹܫ ܚܩܝܼܪܵܐ ܐ݇ܢܵܫܵܐ،

ܐܝܼܢܵܐ ܦܟ̰ܝܼܠܵܐ ܕܠܸܒܵܐ ܒܸܬ ܗܵܘܹܐ ܠܡܲܣܠܵܝܬܵܐ.

9ܒܘܼܫ ܨܦܵܝܝܼ ܝܠܹܗ ܐ݇ܢܵܫܵܐ ܥܝܵܕܵܝܵܐ ܕܐܝܼܬ ܠܹܗ ܪܹܓܵܐ،

ܡ̣ܢ ܗ̇ܘ ܕܚܵܫܹܒ݂ ܒܘܼܬ ܓܵܢܹܗ ܐܝܼܢܵܐ ܠܲܝܬ ܠܹܗ ܠܲܚܡܵܐ.

10ܟܹܐ ܐܵܟܹܠ ܙܲܕܝܼܩܵܐ ܐܘܼܦ ܚܲܡ ܕܗܲܝܘܵܢܘܼ̈ܗܝ،

ܐܝܼܢܵܐ ܐܘܼܦ ܪ̈ܲܚܡܹܐ ܕܪ̈ܲܫܝܼܥܹܐ ܛܠܘܼܡܝܵܐ ܝܢܵܐ.

11ܗ̇ܘ ܕܒܲܓ̰ܸܪ ܐܲܪܥܹܗ ܒܸܬ ܣܵܒܹܥ ܒܠܲܚܡܵܐ،

ܐܝܼܢܵܐ ܗ̇ܘ ܕܢܵܦܹܠ ܒܵܬ݇ܪ ܣܪܝܼܩܘܼܬܵܐ ܚܣܝܼܪ ܗܵܘܢܵܐ ܝܠܹܗ.

12ܟܹܐ ܫܲܗܘܸܬ ܪܲܫܝܼܥܵܐ ܠܨܲܝܕܵܐ ܕܒܝܼܫܹ̈ܐ،

ܐܝܼܢܵܐ ܥܸܩܪܵܐ ܕܙܲܕܝܼܩܹ̈ܐ ܟܹܐ ܝܲܗ݇ܒܸܠ ܛܥܘܼܢܬܵܐ.

13ܒܝܼܫܵܐ ܟܹܐ ܢܵܦܹܠ ܓܵܘ ܢܸܫܒ݂ܵܐ ܒܓܢܵܗܵܐ ܕܣܸܦܘܵܬܹ̈ܗ،

ܐܝܼܢܵܐ ܙܲܕܝܼܩܵܐ ܟܹܐ ܦܵܠܹܛ ܡ̣ܢ ܐܘܼܠܨܵܢܵܐ.

14ܡ̣ܢ ܛܥܘܼܢܬܵܐ ܕܦܘܼܡܹܗ ܐ݇ܢܵܫܵܐ ܒܸܬ ܣܵܒܹܥ ܒܛܵܒ݂ܬܵܐ،

ܘܦܘܼܠܚܵܢܵܐ ܕܐܝܼܕܵܬܹ̈ܐ ܕܒܲܪܢܵܫܵܐ ܒܸܬ ܦܵܪܹܥ ܐܸܠܹܗ.

15ܐܘܼܪܚܵܐ ܕܣܲܟ݂ܠܵܐ ܬܪܘܼܨܬܵܐ ܝܠܵܗ̇ ܒܥܲܝܢܹ̈ܐ ܕܓܵܢܹܗ،

ܐܝܼܢܵܐ ܚܲܟܝܼܡܵܐ ܝܠܹܗ ܫܵܡܥܵܢܵܐ ܕܡܸܠܟܵܐ.

16ܣܲܟ݂ܠܵܐ ܒܪܦܵܦܵܐ ܟܹܐ ܦܵܝܫܵܐ ܝ݇ܕܝܼܥܬܵܐ ܟܲܪܒܹܗ،

ܐܝܼܢܵܐ ܝܵܕܘܿܥܵܐ ܟܹܐ ܟܲܣܹܐ ܡܲܣܠܵܝܬܵܐ.

17ܗܲܡܙܸܡܵܢܵܐ ܕܫܪܵܪܵܐ ܟܹܐ ܡܲܕܸܥ ܗܵܩܘܼܬܵܐ،

ܐܝܼܢܵܐ ܣܵܗܕܵܐ ܕܕܘܼܓܠܹ̈ܐ ܦܸܠܡܵܐ.

18ܐܝܼܬ ܕܟܹܐ ܗܲܡܙܸܡ ܒܠܵܐ ܬܲܚܡܲܢܬܵܐ ܐܲܝܟ݂ ܟ̰ܪ̈ܵܙܝܵܬܹܐ ܕܣܲܝܦܵܐ،

ܐܝܼܢܵܐ ܠܸܫܵܢܵܐ ܕܚܲܟܝܼܡܹ̈ܐ ܩܵܐ ܒܵܣܲܡܬܵܐ ܝܠܹܗ.

19ܦܘܼܡܵܐ ܕܫܪܵܪܵܐ ܡܩܵܘܝܵܢܵܐ ܝܠܹܗ ܠܥܵܠܲܡ،

ܐܝܼܢܵܐ ܠܸܫܵܢܵܐ ܕܕܘܼܓܠܵܐ ܗܲܠ ܛܲܪܦܲܛܬܵܐ ܕܥܲܝܢܵܐ ܝܠܹܗ.

20ܦܸܠܡܵܐ ܐܝܼܬ ܒܠܸܒܵܐ ܕܚܵܪ̈ܛܵܢܹܐ ܕܒܝܼܫܬܵܐ،

ܐܝܼܢܵܐ ܠܡܵܠܘܿܟܹ̈ܐ ܕܫܠܵܡܵܐ ܚܲܕܘܼܬܵܐ.

21ܠܹܐ ܬܵܦܩܵܐ ܒܙܲܕܝܼܩܵܐ ܗܸܟ̃ ܒܝܼܫܬܵܐ،

ܐܝܼܢܵܐ ܪ̈ܲܫܝܼܥܹܐ ܡܸܠܝܹܐ ܝܢܵܐ ܣܸܪ̈ܝܵܬܹܐ.

22ܛܲܡܐܘܼܬܵܐ ܝܢܵܐ ܠܡܵܪܝܵܐ ܣܸܦܘܵܬܹ̈ܐ ܕܕܘܼܓܠܵܐ،

ܐܝܼܢܵܐ ܟܹܐ ܒܵܣܡܵܐ ܠܹܗ ܒܥܵܒ݂ܕܵܢܹ̈ܐ ܕܫܪܵܪܵܐ.

23ܐ݇ܢܵܫܵܐ ܝܵܕܘܿܥܵܐ ܟܹܐ ܟܲܣܹܐ ܝ݇ܕܲܥܬܵܐ،

ܐܝܼܢܵܐ ܠܸܒܵܐ ܕܣܲܟ݂ܠܹ̈ܐ ܟܹܐ ܩܵܪܹܐ ܠܣܲܟ݂ܠܘܼܬܵܐ.

24ܐܝܼܕܵܐ ܕܚܲܦܛܵܢܹ̈ܐ ܟܹܐ ܗܵܘܝܵܐ ܗܲܟܡܵܢܬܵܐ،

ܐܝܼܢܵܐ ܐܝܼܕܵܐ ܪܦܝܼܬܵܐ ܟܹܐ ܗܵܘܝܵܐ ܠܫܘܼܚܪܵܐ.

25ܬܸܫܘܸܫܬܵܐ ܟܹܐ ܡܲܟܸܦܵܐ ܠܹܗ ܐ݇ܢܵܫܵܐ،

ܐܝܼܢܵܐ ܚܲܒܪܵܐ ܛܵܒ݂ܵܐ ܟܹܐ ܡܲܚܕܹܐ ܐܸܠܹܗ.

26ܙܲܕܝܼܩܵܐ ܟܹܐ ܡܗܲܕܹܐ ܠܚܲܒ݂ܪܹܗ،

ܐܝܼܢܵܐ ܐܘܼܪܚܵܐ ܕܪ̈ܲܫܝܼܥܹܐ ܟܹܐ ܡܲܚܠܸܛܵܐ ܠܗܘܿܢ.

27ܐܝܼܕܵܐ ܪܦܝܼܬܵܐ ܠܹܐ ܛܵܘܝܵܐ ܨܲܝܕܘܼܗ̇،

ܐܝܼܢܵܐ ܥܘܼܬܪܵܐ ܕܚܲܦܛܵܢܵܐ ܛܝܼܡܵܢܵܐ ܝܠܹܗ ܩܵܬܹܗ.

28ܒܐܘܼܪܚܵܐ ܕܙܲܕܝܼܩܘܼܬܵܐ ܐܝܼܬ ܚܲܝܹ̈ܐ،

ܘܒܫܒ݂ܝܼܠܘܼܗ̇ ܠܲܝܬ ܡܵܘܬܵܐ.

လက္ရွိေရြးခ်ယ္ထားမွု

ܡܬܠ̈ܐ 12: ABTAB

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ အေၾကာင္းကို ပို၍ သင္ယူပါ။