ܝܘܢܢ 1
1
ܝܵܘܢܵܢ ܒܸܥܪܵܩܵܐ ܡ̣ܢ ܩܵܕ݇ܡ ܡܵܪܝܵܐ
1ܗܘܹܐ ܠܹܗ ܚܲܒܪܵܐ ܕܡܵܪܝܵܐ ܠܝܵܘܢܵܢ ܒܪܘܿܢܵܐ ܕܐܲܡܸܬܲܝ ܒܹܐܡܵܪܵܐ، 2”ܩܘܼܡ ܙܹܠ݇ ܠܢܝܼܢܘܹܐ ܡܕܝܼܢ݇ܬܵܐ ܓܘܼܪܬܵܐ، ܘܡܲܩܘܸܚ ܥܲܠܘܼܗ̇، ܣܵܒܵܒ ܒܝܼܫܬܲܝܗܝ ܐ݇ܣܝܼܩܬܵܐ ܝܠܵܗ̇ ܩܵܕ݇ܡܝܼ.“ 3ܐܝܼܢܵܐ ܩܝܼܡ ܠܹܗ ܝܵܘܢܵܢ ܠܸܥܪܵܩܵܐ ܠܬܲܪܫܝܼܫ ܡ̣ܢ ܩܵܕ݇ܡ ܡܵܪܝܵܐ، ܘܨܠܹܐ ܠܹܗ ܠܝܘܿܦܹܐ ܘܡܘܼܫ݇ܟ̰ܸܚ ܠܹܗ ܐܸܠܦܵܐ ܒܹܐܙܵܠܵܐ ܠܬܲܪܫܝܼܫ. ܦܪܝܼܥ ܠܹܗ ܐܲܓ݂ܪܵܐ، ܨܠܹܐ ܠܹܗ ܓܵܘܘܼܗ̇ ܘܐ݇ܙܝܼܠ ܠܹܗ ܠܬܲܪܫܝܼܫ ܒܸܥܪܵܩܵܐ ܡ̣ܢ ܩܵܕ݇ܡ ܡܵܪܝܵܐ. 4ܡܵܪܝܵܐ ܕܪܹܐ ܠܹܗ ܦܵܘܚܵܐ ܚܲܝܠܵܢܵܐ ܒܝܵܡܵܐ، ܘܗܘܹܐ ܠܹܗ ܛܵܘܦܵܢܵܐ ܓܘܼܪܵܐ ܗܵܕܵܐ ܕܐܸܠܦܵܐ ܐ݇ܬܹܐ ܠܵܗ̇ ܠܸܫܡܵܛܵܐ. 5ܙܕܝܼܥ ܠܗܘܿܢ ܡܲܠܵܚܹ̈ܐ، ܘܟܠ ܚܲܕ ܡܘܼܩܘܸܚ ܠܹܗ ܠܐܲܠܵܗܹܗ. ܘܕܪܹܐ ܠܗܘܿܢ ܒܝܵܡܵܐ ܛܲܥܢܵܐ ܕܝܼܗ݇ܘܵܐ ܓܵܘ ܐܸܠܦܵܐ ܠܩܲܠܩܘܼܠܹܐ ܝܘܼܩܪܘܼܗ̇. ܘܝܵܘܢܵܢ ܨܸܠܝܵܐ ܝܗ݇ܘܵܐ ܠܣܵܗܡܵܐ ܬܲܚܬܵܝܵܐ ܕܐܸܠܦܵܐ، ܘܕܡܝܼܟ݂ ܠܹܗ ܘܛܠܝܼܥ ܠܹܗ. 6ܩܘܼܪܒܸܢܹܗ ܠܟܸܣ ܠܹܗ ܐܸܠܦܵܪܵܐ ܘܐ݇ܡܝܼܪܹܗ، ”ܩܵܡܘܿܕܝܼ ܛܠܝܼܥܵܐ ܝܘܸܬ؟ ܩܘܼܡ ܘܩܪܝܼ ܠܐܲܠܵܗܘܼܟ݂، ܩܵܘܡܵܐ ܕܬܲܚܡܸܢ ܐܲܠܵܗܵܐ ܒܘܼܬ ܕܝܼܲܢ ܘܠܵܐ ܛܵܠܩܲܚ.“ 7ܗ̇ܝܓܵܗ ܐ݇ܡܝܼܪܗܘܿܢ ܐ݇ܢܵܫܵܐ ܠܚܲܒ݂ܪܹܗ، ”ܬܹܝܡܘܼܢ ܕܵܪܲܚ ܦܸܫܟܹ̈ܐ ܕܝܵܕܥܲܚ ܒܘܼܬ ܡܵܢܝܼ ܝܠܹܗ ܐܵܗܵܐ ܓܘܼܢܚܵܐ ܥܲܠܲܢ.“ ܗܲܕܟ݂ܵܐ ܕܪܹܐ ܠܗܘܿܢ ܦܸܫܟܹ̈ܐ، ܘܢܦܝܼܠ ܠܹܗ ܦܸܫܟܵܐ ܠܝܵܘܢܵܢ. 8ܘܐ݇ܡܝܼܪܗܘܿܢ ܐܸܠܹܗ، ”ܐ݇ܡܘܿܪ ܐܸܠܲܢ، ܒܘܼܬ ܡܵܢܝܼ ܝܠܹܗ ܐܵܗܵܐ ܓܘܼܢܚܵܐ ܥܲܠܲܢ؟ ܡܘܿܕܝܼ ܝܠܹܗ ܫܘܼܠܘܼܟ݂؟ ܡ̣ܢ ܐܲܝܟܵܐ ܝܘܸܬ ܒܹܐܬܵܝܵܐ؟ ܐܲܝܢܝܼ ܝܠܹܗ ܐܲܬܪܘܼܟ݂؟ ܘܡ̣ܢ ܐܲܝܢܝܼ ܐܘܼܡܬܵܐ ܝܘܸܬ ܐܲܢ݇ܬ؟“ 9ܐ݇ܡܝܼܪܹܗ ܐܸܠܲܝܗܝ، ”ܥܸܒ݂ܪܵܝܵܐ ܝܘܸܢ ܐܵܢܵܐ، ܘܡ̣ܢ ܡܵܪܝܵܐ ܐܲܠܵܗܵܐ ܕܫܡܲܝܵܐ ܐܵܢܵܐ ܟܹܐ ܙܵܕܥܹܢ، ܕܥܒ݂ܝܼܕ ܠܹܗ ܝܵܡܵܐ ܘܒܸܪܙܵܐ.“ 10ܙܕܝܼܥ ܠܗܘܿܢ ܐܵܢܝܼ ܐ݇ܢܵܫܹ̈ܐ ܙܕܘܼܥܬܵܐ ܓܘܼܪܬܵܐ، ܘܐ݇ܡܝܼܪܗܘܿܢ ܐܸܠܹܗ، ”ܡܘܿܕܝܼ ܥܒ݂ܝܼܕ ܠܘܼܟ݂ ܐܵܗܵܐ؟“ ܣܵܒܵܒ ܝ݇ܕܝܼܥ ܠܗܘܿܢ ܕܡ̣ܢ ܩܵܕ݇ܡ ܡܵܪܝܵܐ ܒܸܥܪܵܩܵܐ ܝܗ݇ܘܵܐ، ܣܵܒܵܒ ܡܘܼܕܸܥܵܐ ܝܗ݇ܘܵܐ ܐܸܠܲܝܗܝ. 11ܗ̇ܝܓܵܗ ܐ݇ܡܝܼܪܗܘܿܢ ܐܸܠܹܗ، ”ܡܘܿܕܝܼ ܥܵܒ݂ܕܲܚ ܐܸܠܘܼܟ݂ ܕܫܵܠܝܵܐ ܝܵܡܵܐ ܐܸܠܲܢ؟“ ܣܵܒܵܒ ܝܵܡܵܐ ܚܲܡܬܘܼܢܹܐ ܝܗ݇ܘܵܐ ܘܡܲܚܫܘܼܠܵܐ ܒܘܼܫ ܚܲܠܘܼܢܹܐ. 12ܐ݇ܡܝܼܪܹܗ ܗ̇ܘ ܐܸܠܲܝܗܝ، ”ܫܩܘܿܠܘܼܢ ܐܸܠܝܼ ܘܪܲܦܹܝܡܘܼܢ ܠܝܼ ܓܵܘ ܝܵܡܵܐ، ܘܒܸܬ ܫܵܠܝܵܐ ܝܵܡܵܐ ܐܸܠܵܘܟ݂ܘܿܢ. ܣܵܒܵܒ ܒܝܼܕܵܥܵܐ ܝܘܸܢ ܕܒܘܼܬ ܕܝܼܝܼ ܐ݇ܬܹܐ ܠܹܗ ܐܵܗܵܐ ܡܲܚܫܘܼܠܵܐ ܓܘܼܪܵܐ ܥܲܠܵܘܟ݂ܘܿܢ.“ 13ܘܒܟܠܹܗ ܐܵܗܵܐ ܛܪܹܐ ܠܗܘܿܢ ܐܵܢܝܼ ܐ݇ܢܵܫܹ̈ܐ ܒܚܲܝܠܵܐ ܠܸܕܝܵܪܵܐ ܠܒܸܪܙܵܐ، ܐܝܼܢܵܐ ܠܵܐ ܡܨܹܐ ܠܗܘܿܢ، ܣܵܒܵܒ ܝܵܡܵܐ ܒܘܼܫ ܚܲܡܬܘܼܢܹܐ ܝܗ݇ܘܵܐ ܘܒܸܫܓ݂ܵܫܵܐ. 14ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܒܹܐܡܵܪܵܐ، ”ܝܵܐ ܡܵܪܝܵܐ، ܦܲܪܦܘܼܠܹܐ ܝܘܲܚ، ܠܵܐ ܫܵܒ݂ܩܹܬ ܡܵܝܬܲܚ ܒܘܼܬ ܫܩܵܠܬܵܐ ܕܚܲܝܹ̈ܐ ܕܐܵܗܵܐ ܐ݇ܢܵܫܵܐ. ܠܵܐ ܡܲܬܒܸܬ ܥܲܠܲܢ ܕܸܡܵܐ ܙܲܟܵܝܵܐ، ܣܵܒܵܒ ܐܲܢ݇ܬ، ܝܵܐ ܡܵܪܝܵܐ، ܥܒ݂ܝܼܕ ܠܘܼܟ݂ ܕܵܐܟ݂ܝܼ ܕܒܣܝܼܡ ܠܵܗ̇ ܠܘܼܟ݂.“ 15ܗ̇ܝܓܵܗ ܫܩܝܼܠ ܠܗܘܿܢ ܝܵܘܢܵܢ ܘܪܘܼܦܹܐ ܠܗܘܿܢ ܓܵܘ ܝܵܡܵܐ، ܘܫܠܹܐ ܠܵܗ̇ ܝܵܡܵܐ ܡ̣ܢ ܠܸܫܓ݂ܵܫܵܐ. 16ܗ̇ܝܓܵܗ ܙܕܝܼܥ ܠܗܘܿܢ ܐܵܢܝܼ ܐ݇ܢܵܫܹ̈ܐ ܙܕܘܼܥܬܵܐ ܓܘܼܪܬܵܐ ܡ̣ܢ ܡܵܪܝܵܐ، ܘܡܘܼܩܪܸܒ݂ ܠܗܘܿܢ ܕܸܒ݂ܚܵܐ ܠܡܵܪܝܵܐ ܘܢܕܝܼܪܗܘܿܢ ܢܸܕܪܹ̈ܐ. 17ܐܝܼܢܵܐ ܡܵܪܝܵܐ ܗܘܼܕܸܪܹܗ ܚܕܵܐ ܢܘܼܢܵܐ ܓܘܼܪܬܵܐ ܠܸܒܠܵܥܹܗ ܝܵܘܢܵܢ؛ ܘܗܘܹܐ ܠܹܗ ܝܵܘܢܵܢ ܒܟܹܪ݇ܣܵܐ ܕܢܘܼܢܵܐ ܬܠܵܬܵܐ ܝܵܘܡܵܢܹ̈ܐ ܘܬܠܵܬܵܐ ܠܲܝܠܵܘܵܬܹ̈ܐ.
လက္ရွိေရြးခ်ယ္ထားမွု
ܝܘܢܢ 1: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation