ܩܘܗܠܬ 12
12
1ܘܕܟ݂ܘܿܪ ܠܒܵܪܝܵܢܘܼܟ݂ ܒܝܵܘܡܵܢܹ̈ܐ ܕܥܠܲܝܡܘܼܬܘܼܟ݂، ܗܲܠ ܕܠܹܐ ܝܢܵܐ ܐ݇ܬܝܼܹܐ ܝܵܘܡܵܢܹ̈ܐ ܕܒܝܼܫܬܵܐ، ܝܲܢ ܡܸܛܝܹܐ ܫܸܢܹ̈ܐ ܕܐܵܡܪܹܬ، ܠܲܝܬ ܠܝܼ ܒܝܼܲܝܗܝ ܒܘܼܣܵܡܵܐ. 2ܗܲܠ ܕܠܵܐ ܚܘܼܫܟܸܢܹܗ ܫܸܡܫܵܐ، ܘܒܲܗܪܵܐ ܘܣܲܗܪܵܐ ܘܟܵܘܟ݂ܒܹ̈ܐ، ܝܲܢ ܠܵܐ ܕܝܼܪܗܘܿܢ ܥܲܝܒܹ̈ܐ ܡ̣ܢ ܒܵܬ݇ܪ ܡܸܛܪܵܐ. 3ܒܝܵܘܡܵܐ ܕܫܵܓ݂ܫܝܼ ܢܵܛܘܿܪܹ̈ܐ ܕܒܲܝܬܵܐ، ܘܦܵܝܫܝܼ ܡܘܼܟܸܦܹܐ ܐ݇ܢܵܫܹ̈ܐ ܕܚܲܝܠܵܐ، ܘܒܵܛܠܝܼ ܛܲܚܵܢܝܵܬܹ̈ܐ ܣܵܒܵܒ ܒܨܝܼܪܗܘܿܢ، ܘܚܲܫܟܸܢܝܼ ܚܵܙܝܵܢܝܵܬܹ̈ܐ ܒܟܵܘܵܬܹ̈ܐ، 4ܘܦܵܝܫܝܼ ܕܒ݂ܝܼܪܹܐ ܬܲܪ̈ܥܵܢܹܐ ܒܥܵܠܘܿܠܵܐ، ܟܲܕ ܒܵܨܹܪ ܩܵܠܵܐ ܕܓܵܪܘܿܣܬܵܐ، ܘܪܵܥܹܫ ܐ݇ܢܵܫܵܐ ܒܩܵܠܵܐ ܕܨܸܦܪܵܐ، ܘܦܵܐܹܫ ܡܘܼܟܸܦܵܐ ܩܵܠܵܐ ܕܟܠܲܝܗܝ ܒܢܵܬܹ̈ܐ ܕܙܡܵܪܵܐ، 5ܐܘܼܦ ܡ̣ܢ ܕܘܼܟܵܢܹ̈ܐ ܪ̈ܵܡܹܐ ܙܵܕܥܝܼ، ܘܣܵܗܡܵܢܘܼܝܵܬܹ̈ܐ ܗܵܘܝܼ ܒܐܘܼܪܚܵܐ، ܘܦܵܩܹܚ ܐܝܼܠܵܢܵܐ ܕܫܲܓ݂݇ܕܵܐ، ܘܗܵܘܹܐ ܟܵܪܬܵܐ ܩܲܡܨܵܐ، ܘܒܵܛܠܵܐ ܟܵܒܵܪ ܕܛܘܼܪܵܐ، ܣܵܒܵܒ ܒܹܐܙܵܠܵܐ ܝܠܹܗ ܒܲܪܢܵܫܵܐ ܠܒܲܝܬܵܐ ܕܥܵܠܲܡ ܕܝܼܹܗ، ܘܒܸܬ ܚܵܕܪܝܼ ܒܥܵܠܘܿܠܵܐ ܥܵܒ݂ܕܵܢܹ̈ܐ ܕܬܵܥܙܝܼ، 6ܗܲܠ ܕܠܹܐ ܝܠܹܗ ܦܝܼܫܵܐ ܩܛܝܼܥܵܐ ܚܲܒ݂ܠܵܐ ܕܣܹܐܡܵܐ، ܘܦܝܼܫܬܵܐ ܛܒ݂ܝܼܚܬܵܐ ܛܵܣܵܐ ܕܕܲܗܒ݂ܵܐ، ܘܦܝܼܫܬܵܐ ܬܒ݂ܝܼܪܬܵܐ ܬܲܠܸܡܬܵܐ ܥܲܠ ܥܲܝܢܵܐ ܕܡ̈ܝܼܵܐ، ܘܦܝܼܫܵܐ ܛܒ݂ܝܼܚܵܐ ܓܸܓ݂ܠܵܐ ܥܲܠ ܒܹܐܪܵܐ، 7ܘܒܸܬ ܕܵܐܹܪ ܥܲܦܪܵܐ ܠܐܲܪܥܵܐ ܐܲܝܟ݂ ܕܝܼܗ݇ܘܵܐ، ܘܪܘܼܚܵܐ ܒܸܬ ܕܵܝܪܵܐ ܠܟܸܣ ܐܲܠܵܗܵܐ ܕܝܘܼܗ݇ܒ݂ܵܐ ܠܹܗ.
8”ܣܪܝܼܩܘܼܬܵܐ ܕܣܪ̈ܝܼܩܘܼܝܵܬܹܐ،“ ܒܹܐܡܵܪܵܐ ܝܠܹܗ ܟܵܪܘܿܙܵܐ، ”ܟܠ ܣܪܝܼܩܘܼܬܵܐ ܝܠܹܗ.“
ܚܘܼܬܵܡܵܐ ܕܨܒ݂ܘܼܬܵܐ
9ܘܙܵܘܕܵܐ ܡ̣ܢ ܐܵܗܵܐ، ܟܲܕ ܚܲܟܝܼܡܵܐ ܝܗ݇ܘܵܐ ܟܵܪܘܿܙܵܐ، ܡܘܼܠܸܦ ܠܹܗ ܝ݇ܕܲܥܬܵܐ ܠܥܲܡܵܐ، ܘܬܘܼܚܡܸܢܹܗ، ܘܨܘܼܚܨܹܐ ܠܹܗ، ܘܡܘܼܠܚܸܡ ܠܹܗ ܡܲܬܠܹ̈ܐ ܪܵܒܵܐ. 10ܛܥܹܐ ܠܹܗ ܟܵܪܘܿܙܵܐ ܠܡܲܫ݇ܟ̰ܘܼܚܹܐ ܗܹܡܸܙܡܵܢܹ̈ܐ ܕܒܲܣܝܼܡܘܼܬܵܐ، ܘܟܬܝܼܒ݂ܬܵܐ ܬܪܘܼܨܬܵܐ، ܕܝܼܠܵܗ̇ ܗܹܡܸܙܡܵܢܹ̈ܐ ܕܫܪܵܪܵܐ.
11ܗܹܡܸܙܡܵܢܹ̈ܐ ܕܚܲܟܝܼܡܹ̈ܐ ܐܲܝܟ݂ ܙܸܩܬܹ̈ܐ ܝܢܵܐ، ܘܟܘܼܢܵܫܲܝܗܝ ܐܲܝܟ݂ ܡܝܼܚܹ̈ܐ ܡܸܚܝܹ̈ܐ؛ ܦܝܼܫܹܐ ܝܢܵܐ ܝܘܼܗ݇ܒܹܐ ܡ̣ܢ ܚܲܕ ܪܵܥܝܵܐ. 12ܘܒܘܼܫ ܙܵܘܕܵܐ ܡ̣ܢ ܐܲܢܹܐ، ܒܪܘܿܢܝܼ، ܦܘܼܫ ܙܗܝܼܪܵܐ، ܕܠܲܝܬ ܦܪܵܩܬܵܐ ܠܠܸܟܬܵܒ݂ܵܐ ܣܸܦܪܹ̈ܐ ܪܵܒܵܐ، ܘܩܪܵܝܬܵܐ ܪܵܒܵܐ ܡܲܓ̰ܗܵܝܬܵܐ ܕܦܲܓ݂ܪܵܐ ܝܠܵܗ̇.
13ܐܵܗܵܐ ܝܠܵܗ̇ ܚܲܪܬܵܐ ܕܚܲܒܪܵܐ، ܟܠ ܡܸܢܕܝܼ ܦܝܼܫ ܠܹܗ ܫܡܝܼܥܵܐ: ܡ̣ܢ ܐܲܠܵܗܵܐ ܙܕܸܥ، ܘܦܘܼܩܕܵܢܘܼ̈ܗܝ ܢܛܘܿܪ، ܣܵܒܵܒ ܐܵܗܵܐ ܝܠܵܗ̇ ܟܠܹܗ ܕܒܲܪܢܵܫܵܐ. 14ܣܵܒܵܒ ܠܟܠ ܦܘܼܠܚܵܢܵܐ ܐܲܠܵܗܵܐ ܒܸܬ ܡܲܥܒܸܪ ܒܕܝܼܘܵܢ، ܥܲܠ ܟܠ ܫܘܼܠܵܐ ܛܸܫܝܵܐ، ܐܸܢ ܨܦܵܝܝܼ ܘܐܸܢ ܣܸܪܝܵܐ.
လက္ရွိေရြးခ်ယ္ထားမွု
ܩܘܗܠܬ 12: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation