ܕܢܝܐܝܠ 3
3
ܨܲܠܡܵܐ ܕܕܲܗܒ݂ܵܐ ܕܢܒ݂ܘܼܟܲܕܢܵܨܲܪ
1ܢܒ݂ܘܼܟܲܕܢܵܨܲܪ ܡܲܠܟܵܐ ܥܒ݂ܝܼܕ ܠܹܗ ܨܲܠܡܵܐ ܕܕܲܗܒ݂ܵܐ، ܪܵܡܘܼܬܹܗ ܐܸܫܬܝܼ ܝܲܡܝܼܢܹ̈ܐ، ܘܦܸܬܝܘܼܬܹܗ ܐܸܫܸܬ ܝܲܡܝܼܢܹ̈ܐ. ܘܡܘܼܩܸܡ ܠܹܗ ܒܕܸܫܬܵܐ ܕܕܘܿܪܵܐ، ܓܵܘ ܐܘܼܚܕܵܢܵܐ ܕܒܵܒܹܠ. 2ܘܢܒ݂ܘܼܟܲܕܢܵܨܲܪ ܡܲܠܟܵܐ ܫܘܼܕܸܪܹܗ ܠܓ̰ܲܡܘܼܥܹܐ ܠܣܲܛܪ̈ܵܦܹܐ، ܫܲܠܝܼܛܹ̈ܐ، ܪܹ̈ܫܵܢܹܐ، ܡܵܠܘܿܟܹ̈ܐ، ܢܵܛܪ̈ܵܢܹܐ ܕܓܲܙܵܐ، ܕܲܝܵܢܹ̈ܐ، ܝܵܕܥܵܢܹ̈ܐ ܕܢܵܡܘܿܣܵܐ، ܘܟܠܲܝܗܝ ܫܘܼܠܛܵܢܹ̈ܐ ܕܐܘܼܚܕܵܢܹ̈ܐ، ܠܹܐܬܵܝܵܐ ܠܣܝܵܡܬܵܐ ܕܨܲܠܡܵܐ ܕܡܘܼܩܸܡ ܠܹܗ ܢܒ݂ܘܼܟܲܕܢܵܨܲܪ ܡܲܠܟܵܐ. 3ܗ̇ܝܓܵܗ ܦܝܼܫ ܠܗܘܿܢ ܓ̰ܘܼܡܥܹܐ ܣܲܛܪ̈ܵܦܹܐ، ܫܲܠܝܼܛܹ̈ܐ، ܪܹ̈ܫܵܢܹܐ، ܡܵܠܘܿܟܹ̈ܐ، ܢܵܛܪ̈ܵܢܹܐ ܕܓܲܙܵܐ، ܕܲܝܵܢܹ̈ܐ، ܝܵܕܥܵܢܹ̈ܐ ܕܢܵܡܘܿܣܵܐ، ܘܟܠܲܝܗܝ ܫܘܼܠܛܵܢܹ̈ܐ ܕܐܘܼܚܕܵܢܹ̈ܐ، ܠܣܝܵܡܬܵܐ ܕܨܲܠܡܵܐ ܕܡܘܼܩܸܡ ܠܹܗ ܢܒ݂ܘܼܟܲܕܢܵܨܲܪ ܡܲܠܟܵܐ؛ ܘܟܸܠܝܹܐ ܝܗ݇ܘܵܘ ܩܵܕ݇ܡ ܨܲܠܡܵܐ ܕܡܘܼܩܸܡ ܠܹܗ ܢܒ݂ܘܼܟܲܕܢܵܨܲܪ. 4ܘܟܵܪܘܿܙܵܐ ܩܪܹܐ ܠܹܗ ܒܩܵܠܵܐ ܪܵܡܵܐ، ”ܐܸܠܵܘܟ݂ܘܿܢ ܦܝܵܫܵܐ ܝܠܹܗ ܦܩܝܼܕܵܐ، ܝܵܐ ܥܲܡܡܹ̈ܐ، ܘܐܸܡܘܵܬܹ̈ܐ، ܘܠܸܫܵܢܹ̈ܐ: 5ܒܥܕܵܢܵܐ ܕܫܵܡܥܝܼܬܘܿܢ ܩܵܠܵܐ ܕܩܲܪܢܵܐ، ܡܲܫܪܘܿܩܝܼܬܵܐ، ܩܝܼܬܵܪܵܐ، ܣܲܢܬܘܼܪ، ܟܸܢܵܪܵܐ، ܨܦܘܿܢܝܵܐ، ܘܟܠܲܝܗܝ ܐܵܕܫܹ̈ܐ ܕܙܡܵܪܵܐ، ܢܵܦܠܝܼܬܘܿܢ ܘܣܵܓ݂ܕܝܼܬܘܿܢ ܠܨܲܠܡܵܐ ܕܕܲܗܒ݂ܵܐ ܕܡܘܼܩܸܡ ܠܹܗ ܢܒ݂ܘܼܟܲܕܢܵܨܲܪ ܡܲܠܟܵܐ. 6ܘܡ̇ܢ ܕܠܵܐ ܢܵܦܹܠ ܘܣܵܓܹܕ، ܒܗ̇ܝ ܣܵܥܲܬ ܒܸܬ ܦܵܐܹܫ ܕܸܪܝܵܐ ܠܓܵܘ ܐܲܬܘܿܢܵܐ ܕܢܘܼܪܵܐ ܝܵܩܕܵܢܵܐ.“ 7ܣܵܒܵܒ ܐܵܗܵܐ، ܒܗ̇ܘ ܙܲܒ݂ܢܵܐ، ܟܲܕ ܫܡܝܼܥ ܠܗܘܿܢ ܟܠܲܝܗܝ ܐ݇ܢܵܫܹ̈ܐ ܩܵܠܵܐ ܕܩܲܪܢܵܐ، ܡܲܫܪܘܿܩܝܼܬܵܐ، ܩܝܼܬܵܪܵܐ، ܣܲܢܬܘܼܪ، ܟܸܢܵܪܵܐ، ܘܟܠܲܝܗܝ ܐܵܕܫܹ̈ܐ ܕܙܡܵܪܵܐ، ܢܦܝܼܠ ܠܗܘܿܢ ܟܠܲܝܗܝ ܥܲܡܡܹ̈ܐ، ܐܸܡܘܵܬܹ̈ܐ، ܘܠܸܫܵܢܹ̈ܐ، ܘܣܓ̣ܝܼܕ ܠܗܘܿܢ ܠܨܲܠܡܵܐ ܕܕܲܗܒ݂ܵܐ ܕܡܘܼܩܸܡ ܠܹܗ ܢܒ݂ܘܼܟܲܕܢܵܨܲܪ ܡܲܠܟܵܐ.
ܡܗܘܼܡܢܘܼܬܵܐ ܕܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ
8ܒܗ̇ܘ ܙܲܒ݂ܢܵܐ، ܩܘܼܪܒܸܢܗܘܿܢ ܓܲܒ݂ܪܹ̈ܐ ܟܲܠܕܵܝܹ̈ܐ، ܘܡܚܹܐ ܠܗܘܿܢ ܕܲܪܗܲܩ ܕܝܗܘܼܕܵܝܹ̈ܐ. 9ܓ̰ܘܼܘܸܒ ܠܗܘܿܢ ܘܐ݇ܡܝܼܪܗܘܿܢ ܠܢܒ݂ܘܼܟܲܕܢܵܨܲܪ ܡܲܠܟܵܐ، ”ܝܵܐ ܡܲܠܟܵܐ، ܠܥܵܠܡܝܼܢ ܚܝܝܼ. 10ܐܲܢ݇ܬ، ܝܵܐ ܡܲܠܟܵܐ، ܡܘܼܬܸܒ݂ ܠܘܼܟ݂ ܦܘܼܩܕܵܢܵܐ، ܕܟܠ ܐ݇ܢܵܫܵܐ ܕܫܵܡܹܥ ܩܵܠܵܐ ܕܩܲܪܢܵܐ، ܡܲܫܪܘܿܩܝܼܬܵܐ، ܩܝܼܬܵܪܵܐ، ܣܲܢܬܘܼܪ، ܟܸܢܵܪܵܐ، ܨܦܘܿܢܝܵܐ، ܘܟܠܲܝܗܝ ܐܵܕܫܹ̈ܐ ܕܙܡܵܪܵܐ، ܢܵܦܹܠ ܘܣܵܓܹܕ ܠܨܲܠܡܵܐ ܕܕܲܗܒ݂ܵܐ، 11ܘܡ̇ܢ ܕܠܵܐ ܢܵܦܹܠ ܘܣܵܓܹܕ، ܦܵܐܹܫ ܕܸܪܝܵܐ ܠܓܵܘ ܐܲܬܘܿܢܵܐ ܕܢܘܼܪܵܐ ܝܵܩܕܵܢܵܐ. 12ܐܝܼܬ ܓܲܒ݂ܪܹ̈ܐ ܝܗܘܼܕܵܝܹ̈ܐ ܕܡܘܼܬܒܲܝ ܠܘܼܟ݂ ܥܲܠ ܚܸܠܡܲܬ ܕܐܘܼܚܕܵܢܵܐ ܕܒܵܒܹܠ: ܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ. ܐܲܢܹܐ ܐ݇ܢܵܫܹ̈ܐ ܠܹܐ ܝܢܵܐ ܒܸܚܫܵܒ݂ܘܼܟ݂، ܝܵܐ ܡܲܠܟܵܐ؛ ܠܐܲܠܵܗܘܼ̈ܟ݂ ܠܹܐ ܝܢܵܐ ܒܸܦܠܵܚܵܐ، ܘܠܨܲܠܡܵܐ ܕܕܲܗܒ݂ܵܐ ܕܡܘܼܩܸܡ ܠܘܼܟ݂ ܠܹܐ ܝܢܵܐ ܒܸܣܓ݂ܵܕܵܐ.“
13ܗ̇ܝܓܵܗ ܢܒ݂ܘܼܟܲܕܢܵܨܲܪ ܒܟܲܪܒܵܐ ܘܒܚܸܡܬܵܐ ܐ݇ܡܝܼܪܹܗ ܠܡܲܝܬܘܼܝܹܐ ܠܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ. ܗ̇ܝܓܵܗ ܐܲܢܹܐ ܐ݇ܢܵܫܹ̈ܐ ܦܝܼܫ ܠܗܘܿܢ ܡܘܼܐܬܝܹܐ ܩܵܕ݇ܡ ܡܲܠܟܵܐ. 14ܓ̰ܘܼܘܸܒ ܠܹܗ ܢܒ݂ܘܼܟܲܕܢܵܨܲܪ ܘܐ݇ܡܝܼܪܹܗ ܐܸܠܲܝܗܝ، ”ܫܪܵܪܵܐ ܝܠܵܗ̇، ܝܵܐ ܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܕܠܐܲܠܵܗܝܼ̈ ܠܹܐ ܝܬܘܿܢ ܒܸܦܠܵܚܵܐ، ܘܠܨܲܠܡܵܐ ܕܕܲܗܒ݂ܵܐ ܕܡܘܼܩܸܡ ܠܝܼ ܠܹܐ ܝܬܘܿܢ ܒܸܣܓ݂ܵܕܵܐ؟ 15ܐܵܕܝܼܵܐ ܐܸܢ ܗܕܝܼܪܹܐ ܝܬܘܿܢ ܕܢܵܦܠܝܼܬܘܿܢ ܘܣܵܓ݂ܕܝܼܬܘܿܢ ܠܨܲܠܡܵܐ ܕܥܒ݂ܝܼܕ ܠܝܼ ܒܥܕܵܢܵܐ ܕܫܵܡܥܝܼܬܘܿܢ ܩܵܠܵܐ ܕܩܲܪܢܵܐ، ܡܲܫܪܘܿܩܝܼܬܵܐ، ܩܝܼܬܵܪܵܐ، ܣܲܢܬܘܼܪ، ܟܸܢܵܪܵܐ، ܨܦܘܿܢܝܵܐ، ܘܟܠܲܝܗܝ ܐܵܕܫܹ̈ܐ ܕܙܡܵܪܵܐ، ܪܵܒܵܐ ܨܦܵܝܝܼ؛ ܐܝܼܢܵܐ ܐܸܢ ܠܵܐ ܣܵܓ݂ܕܝܼܬܘܿܢ، ܒܗ̇ܝ ܣܵܥܲܬ ܒܸܬ ܦܵܝܫܝܼܬܘܿܢ ܕܸܪܝܹܐ ܠܓܵܘ ܐܲܬܘܿܢܵܐ ܕܢܘܼܪܵܐ ܝܵܩܕܵܢܵܐ. ܘܡܵܢܝܼ ܝܠܹܗ ܐܲܠܵܗܵܐ ܕܦܲܨܹܐ ܠܵܘܟ݂ܘܿܢ ܡ̣ܢ ܐܝܼܕܝܼ؟“ 16ܓ̰ܘܼܘܸܒ ܠܗܘܿܢ ܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܘܐ݇ܡܝܼܪܗܘܿܢ ܠܡܲܠܟܵܐ ܢܒ݂ܘܼܟܲܕܢܵܨܲܪ، ”ܠܹܐ ܝܘܲܚ ܣܢܝܼܩܹܐ ܐܲܚܢܲܢ ܠܡܲܕܘܼܪܹܐ ܓ̰ܘܼܘܵܒ ܐܸܠܘܼܟ݂ ܒܘܼܬ ܐܵܗܵܐ ܨܒ݂ܘܼܬܵܐ. 17ܐܸܢ ܗܲܕܟ݂ܵܐ ܝܠܵܗ̇، ܐܲܠܵܗܲܢ ܕܐܲܚܢܲܢ ܟܹܐ ܦܵܠܚܲܚ ܐܸܠܹܗ ܟܹܐ ܡܵܨܹܐ ܠܦܲܨܘܼܝܲܢ ܡ̣ܢ ܐܲܬܘܿܢܵܐ ܕܢܘܼܪܵܐ ܝܵܩܕܵܢܵܐ، ܘܡ̣ܢ ܐܝܼܕܘܼܟ݂، ܝܵܐ ܡܲܠܟܵܐ، ܒܸܬ ܦܲܨܹܐ ܠܲܢ؛ 18ܐܝܼܢܵܐ ܐܸܢ ܠܵܐ، ܗܵܘܝܵܐ ܝ݇ܕܝܼܥܬܵܐ ܐܸܠܘܼܟ݂، ܝܵܐ ܡܲܠܟܵܐ، ܕܠܐܲܠܵܗܘܼ̈ܟ݂ ܠܹܐ ܦܵܠܚܲܚ، ܘܠܨܲܠܡܵܐ ܕܕܲܗܒ݂ܵܐ ܕܡܘܼܩܸܡ ܠܘܼܟ݂ ܠܹܐ ܣܵܓ݂ܕܲܚ.“
ܐܲܠܵܗܵܐ ܦܲܨܘܼܝܹܐ ܠܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ
19ܗ̇ܝܓܵܗ ܢܒ݂ܘܼܟܲܕܢܵܨܲܪ ܡܠܹܐ ܠܹܗ ܚܸܡܬܵܐ، ܘܨܲܠܡܵܐ ܕܦܵܬܹܗ ܫܘܼܚܠܸܦ ܠܹܗ ܥܲܠ ܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ. ܓ̰ܘܼܘܸܒ ܠܹܗ ܘܦܩܝܼܕ ܠܹܗ ܠܡܲܠܗܘܼܝܹܐ ܠܐܲܬܘܿܢܵܐ ܫܲܒ݂ܥܵܐ ܬܵܩܹ̈ܐ ܒܘܼܫ ܙܵܘܕܵܐ ܡ̣ܢ ܕܦܵܐܹܫ ܗ݇ܘܵܐ ܡܘܼܠܗܝܼܵܐ. 20ܘܠܓܲܒ݂ܪܹ̈ܐ ܓܲܢ݇ܒܵܪܹ̈ܐ ܕܓܵܘ ܚܲܝܠܵܘܵܬܹ̈ܗ ܦܩܝܼܕ ܠܹܗ ܠܹܐܣܵܪܵܐ ܠܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܘܠܸܕܪܵܝܲܝ ܓܵܘ ܐܲܬܘܿܢܵܐ ܕܢܘܼܪܵܐ ܝܵܩܕܵܢܵܐ. 21ܗ̇ܝܓܵܗ ܐܲܢܹܐ ܓܲܒ݂ܪܹ̈ܐ ܦܝܼܫ ܠܗܘܿܢ ܐ݇ܣܝܼܪܹ̈ܐ ܒܫܲܠܘܵܪ̈ܲܝܗܝ، ܘܒܨܘܼܕܪ̈ܵܬܲܝܗܝ، ܘܒܟܪ̈ܲܟ݂ܝܵܬܲܝܗܝ، ܘܒܠܒ݂ܘܼܫܲܝ̈ܗܝ ܐ݇ܚܹܪ̈݇ܢܹܐ، ܘܦܝܼܫ ܠܗܘܿܢ ܕܸܪܝܹܐ ܠܓܵܘ ܐܲܬܘܿܢܵܐ ܕܢܘܼܪܵܐ ܝܵܩܕܵܢܵܐ. 22ܣܵܒܵܒ ܗܹܡܸܙܡܵܢ ܕܡܲܠܟܵܐ ܡܲܠܝܸܙܵܢܬܵܐ ܝܗ݇ܘܵܐ، ܘܐܲܬܘܿܢܵܐ ܡܘܼܠܗܝܼܵܐ ܝܗ݇ܘܵܐ ܙܵܘܕܵܐ، ܐܲܢܹܐ ܓܲܒ݂ܪܹ̈ܐ ܕܡܘܼܐܣܸܩ ܠܗܘܿܢ ܠܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܩܛܝܼܠܲܝ ܠܹܗ ܠܵܗܵܐ ܕܢܘܼܪܵܐ. 23ܘܬܸܠܘܿܢܬܲܝܗܝ ܐܲܢܹܐ ܓܲܒ݂ܪܹ̈ܐ، ܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܢܦܝܼܠ ܠܗܘܿܢ ܠܓܵܘ ܐܲܬܘܿܢܵܐ ܕܢܘܼܪܵܐ ܝܵܩܕܵܢܵܐ ܟܲܕ ܐ݇ܣܝܼܪܹܐ.
24ܗ̇ܝܓܵܗ ܢܒ݂ܘܼܟܲܕܢܵܨܲܪ ܡܲܠܟܵܐ ܦܝܼܫ ܠܹܗ ܬܗܝܼܪܵܐ، ܘܩܝܼܡ ܠܹܗ ܒܡܲܠܝܲܙܬܵܐ، ܓ̰ܘܼܘܸܒ ܠܹܗ ܘܐ݇ܡܝܼܪܹܗ ܠܪܵܘܪ̈ܒ݂ܵܢܘܼܗܝ، ”ܗܵܐ، ܠܵܐ ܬܠܵܬܵܐ ܓܲܒ݂ܪܹ̈ܐ ܦܝܼܫ ܠܗܘܿܢ ܕܸܪܝܹܐ ܠܓܵܘ ܐܲܬܘܿܢܵܐ ܟܲܕ ܐ݇ܣܝܼܪܹܐ؟“ ܓ̰ܘܼܘܸܒ ܠܗܘܿܢ ܘܐ݇ܡܝܼܪܗܘܿܢ ܠܡܲܠܟܵܐ، ”ܬܪܘܼܨܵܐ، ܝܵܐ ܡܲܠܟܵܐ.“ 25ܓ̰ܘܼܘܸܒ ܠܹܗ ܘܐ݇ܡܝܼܪܹܗ، ”ܗܵܐ، ܐܵܢܵܐ ܒܸܚܙܵܝܵܐ ܝܘܸܢ ܐܲܪܒܥܵܐ ܓܲܒ݂ܪܹ̈ܐ، ܫܸܪܝܹܐ ܒܸܚܕܵܪܵܐ ܒܓܵܘܵܐ ܕܢܘܼܪܵܐ، ܘܚܘܼܙܕܵܓܵܐ ܠܲܝܬ ܒܝܼܲܝܗܝ، ܘܚܸܙܘܵܐ ܕܗ̇ܘ ܕܐܲܪܒܥܵܐ ܒܸܕܡܵܝܵܐ ܝܠܹܗ ܠܒܪܘܿܢܵܐ ܕܐܲܠܵܗܹ̈ܐ.“
26ܗ̇ܝܓܵܗ ܩܘܼܪܒܸܢܹܗ ܢܒ݂ܘܼܟܲܕܢܵܨܲܪ ܠܬܲܪܥܵܐ ܕܐܲܬܘܿܢܵܐ ܕܢܘܼܪܵܐ ܝܵܩܕܵܢܵܐ، ܓ̰ܘܼܘܸܒ ܠܹܗ ܘܐ݇ܡܝܼܪܹܗ، ”ܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܪܹ̈ܓܵܘܵܬܹܐ ܕܐܲܠܵܗܵܐ ܥܸܠܵܝܵܐ، ܦܠܘܿܛܘܼܢ ܘܬܹܝܡܘܼܢ.“ ܗ̇ܝܓܵܗ ܦܠܝܼܛ ܠܗܘܿܢ ܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ ܡ̣ܢ ܓܵܘ ܢܘܼܪܵܐ. 27ܘܓ̰ܡܝܼܥ ܠܗܘܿܢ ܣܲܛܪ̈ܵܦܹܐ، ܘܓܘܼܪ̈ܵܢܹܐ، ܘܪܹ̈ܫܵܢܹܐ، ܘܪܵܘܪ̈ܒ݂ܵܢܹܐ ܕܡܲܠܟܵܐ، ܘܒܸܚܙܵܝܵܐ ܝܗ݇ܘܵܘ ܠܐܲܢܹܐ ܓܲܒ݂ܪܹ̈ܐ، ܕܠܵܐ ܗܘܼܟܸܡ ܠܹܗ ܢܘܼܪܵܐ ܒܓܘܼܫܡܲܝܗܝ، ܘܡܸܙܬܵܐ ܕܪܹܫܲܝܗܝ ܠܵܐ ܚܪܝܼܟ݂ ܠܵܗ̇، ܘܫܲܠܘܵܪ̈ܲܝܗܝ ܠܵܐ ܝ݇ܩܝܼܕ ܠܗܘܿܢ، ܘܪܹܝܚܵܐ ܕܢܘܼܪܵܐ ܠܵܐ ܥܒ݂ܝܼܪܹܗ ܒܝܼܲܝܗܝ. 28ܓ̰ܘܼܘܸܒ ܠܹܗ ܢܒ݂ܘܼܟܲܕܢܵܨܲܪ ܘܐ݇ܡܝܼܪܹܗ، ”ܒܪܝܼܟ݂ܵܐ ܝܠܹܗ ܐܲܠܵܗܵܐ ܕܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܕܫܘܼܕܸܪܹܗ ܡܲܠܲܐܟܹܗ، ܘܦܘܼܨܹܐ ܠܹܗ ܠܪܹ̈ܓܵܘܵܬܹܗ ܕܕܪܹܐ ܠܗܘܿܢ ܗܹܒ݂ܝܼܲܝܗܝ ܥܲܠܘܼܗܝ، ܘܫܡܝܼܛ ܠܗܘܿܢ ܗܹܡܸܙܡܵܢ ܕܡܲܠܟܵܐ، ܘܝܘܼܗ݇ܒܸܠ ܠܗܘܿܢ ܓܘܼܫܡܲܝ̈ܗܝ ܕܠܵܐ ܦܵܠܚܝܼ ܘܠܵܐ ܣܵܓ݂ܕܝܼ ܠܟܠ ܐܲܠܵܗܵܐ ܫܒ݂ܘܿܩ ܡ̣ܢ ܠܐܲܠܵܗܲܝܗܝ. 29ܘܗܲܕܟ݂ܵܐ ܒܸܦܩܵܕܵܐ ܝܘܸܢ، ܕܟܠ ܥܲܡܵܐ، ܐܘܼܡܬܵܐ، ܘܠܸܫܵܢܵܐ، ܕܐܵܡܹܪ ܚܲܒܪܵܐ ܚܸܪܒܵܐ ܥܲܠ ܐܲܠܵܗܵܐ ܕܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܩܸܛܥܵܛܹ̈ܐ ܒܸܬ ܦܵܐܹܫ ܥܒ݂ܝܼܕܵܐ، ܘܒܲܝܬܹܗ ܠܣܘܼܠܵܐ ܒܸܬ ܦܵܐܹܫ ܡܘܼܚܕܸܪܵܐ، ܣܵܒܵܒ ܠܲܝܬ ܐܲܠܵܗܵܐ ܐ݇ܚܹܪ݇ܢܵܐ ܕܡܵܨܹܐ ܠܦܲܨܘܼܝܹܐ ܗܲܕܟ݂ܵܐ. 30ܗ̇ܝܓܵܗ ܡܲܠܟܵܐ ܡܘܼܪܸܡ ܠܹܗ ܠܕܲܪ̈ܓܹܐ ܕܫܸܕܪܵܟ، ܡܝܼܫܵܟ، ܘܥܒܸܕܢܵܓ݂ܘܼ، ܒܐܘܼܚܕܵܢܵܐ ܕܒܵܒܹܠ.
လက္ရွိေရြးခ်ယ္ထားမွု
ܕܢܝܐܝܠ 3: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation