ܕܢܝܐܝܠ 10
10
ܕܵܢܝܼܐܹܝܠ ܒܸܚܙܵܝܵܐ ܚܸܙܘܵܐ ܕܐ݇ܢܵܫܵܐ
1ܒܫܹܢ݇ܬܵܐ ܕܬܠܵܬ ܠܟܘܿܪܸܫ، ܡܲܠܟܵܐ ܕܦܵܪܸܣ، ܚܲܒܪܵܐ ܦܝܼܫ ܠܹܗ ܓܸܠܝܵܐ ܠܕܵܢܝܼܐܹܝܠ، ܕܦܝܼܫ ܠܹܗ ܩܸܪܝܵܐ ܫܸܡܹܗ ܒܸܠܛܫܵܨܲܪ، ܘܫܲܪܝܼܪܵܐ ܝܗ݇ܘܵܐ ܚܲܒܪܵܐ، ܘܒܚܲܝܠܵܐ ܓܘܼܪܵܐ ܦܘܼܪܡܹܐ ܠܹܗ ܚܲܒܪܵܐ، ܘܗܘܹܐ ܠܵܗ̇ ܠܹܗ ܦܲܪܡܵܝܬܵܐ ܒܚܸܙܘܵܐ.
2ܒܐܵܢܝܼ ܝܵܘܡܵܢܹ̈ܐ ܐܵܢܵܐ ܕܵܢܝܼܐܹܝܠ ܗܘܹܐ ܠܝܼ ܒܸܥܒ݂ܵܕܵܐ ܐܸܒ݂ܠܵܐ ܬܠܵܬܵܐ ܫܵܒ݂ܘܿܥܹ̈ܐ ܡܸܠܝܹ̈ܐ. 3ܡܹܐܟ݂ܘܼܠܬܵܐ ܒܲܣܝܼܡܬܵܐ ܠܵܐ ܐ݇ܟ݂ܝܼܠ ܠܝܼ، ܘܒܸܣܪܵܐ ܘܚܲܡܪܵܐ ܠܵܐ ܥܒ݂ܝܼܪܹܗ ܠܦܘܼܡܝܼ، ܘܡܫܵܚܵܐ ܠܵܐ ܡܫܝܼܚ ܠܝܼ، ܗܲܠ ܕܬܘܼܡܸܡ ܠܗܘܿܢ ܬܠܵܬܵܐ ܫܵܒ݂ܘܿܥܹ̈ܐ ܡܸܠܝܹ̈ܐ.
4ܘܒܝܵܘܡܵܐ ܕܥܸܣܪܝܼ ܘܐܲܪܒܥܵܐ ܒܝܲܪܚܵܐ ܩܵܕ݇ܡܵܝܵܐ، ܐܵܢܵܐ ܗܘܹܐ ܠܝܼ ܥܲܠ ܣܸܦܬܵܐ ܕܢܲܗܪܵܐ ܓܘܼܪܵܐ، ܕܝܼܠܹܗ ܕܸܩܠܲܬ، 5ܘܡܘܼܪܸܡ ܠܝܼ ܥܲܝܢܝܼ̈ ܘܚܙܹܐ ܠܝܼ، ܘܗܵܐ، ܚܲܕ ܐ݇ܢܵܫܵܐ ܠܒ݂ܝܼܫܵܐ ܟܸܬܵܢܵܐ، ܘܚܲܨܹܗ ܐ݇ܣܝܼܪܵܐ ܒܕܲܗܒ݂ܵܐ ܨܸܦܝܵܐ ܕܐܘܼܦܲܙ. 6ܘܦܲܓ݂ܪܹܗ ܐܲܝܟ݂ ܬܲܪܫܝܼܫ، ܘܦܵܬܹܗ ܐܲܝܟ݂ ܚܸܙܘܵܐ ܕܒܸܪܩܵܐ، ܘܥܲܝܢܘܼ̈ܗܝ ܐܲܝܟ݂ ܠܲܡܦܹܝܕܹ̈ܐ ܕܢܘܼܪܵܐ، ܘܕܪ̈ܵܥܢܵܢܘܼܗܝ ܘܐܲܩܠܵܬܹ̈ܗ ܐܲܝܟ݂ ܡܲܒܝܲܢܬܵܐ ܕܢܚܵܫܵܐ ܡܪܝܼܩܵܐ، ܘܩܵܠܵܐ ܕܗܹܡܸܙܡܵܢܘܼ̈ܗܝ ܐܲܝܟ݂ ܩܵܠܵܐ ܕܟܸܢܫܵܐ.
7ܘܚܙܹܐ ܠܝܼ ܐܵܢܵܐ ܕܵܢܝܼܐܹܝܠ ܒܢܲܦ̮ܫܝܼ ܠܚܸܙܘܵܐ، ܘܐ݇ܢܵܫܹ̈ܐ ܕܝܼܗ݇ܘܵܘ ܥܲܡܝܼ ܠܵܐ ܚܙܹܐ ܠܗܘܿܢ ܠܚܸܙܘܵܐ، ܐܸܠܵܐ ܪܲܬܪܲܬܬܵܐ ܓܘܼܪܬܵܐ ܢܦܝܼܠ ܠܵܗ̇ ܥܲܠܲܝܗܝ، ܘܥܪܝܼܩ ܠܗܘܿܢ ܠܛܲܫܘܼܝܹܐ ܓܵܢܲܝܗܝ. 8ܘܐܵܢܵܐ ܦܝܼܫ ܠܝܼ ܫܒ݂ܝܼܩܵܐ ܒܢܲܦ̮ܫܝܼ، ܘܚܙܹܐ ܠܝܼ ܐܵܗܵܐ ܚܸܙܘܵܐ ܓܘܼܪܵܐ، ܘܠܵܐ ܦܝܼܫ ܠܹܗ ܫܒ݂ܝܼܩܵܐ ܒܝܼܝܼ ܚܲܝܠܵܐ، ܘܚܸܩܪܝܼ ܛܠܝܼܩ ܠܹܗ، ܘܠܵܐ ܗܘܹܐ ܠܹܗ ܒܝܼܝܼ ܚܲܝܠܵܐ. 9ܘܫܡܝܼܥ ܠܝܼ ܩܵܠܵܐ ܕܗܹܡܸܙܡܵܢܘܼ̈ܗܝ، ܘܟܲܕ ܫܡܝܼܥ ܠܝܼ ܩܵܠܵܐ ܕܗܹܡܸܙܡܵܢܘܼ̈ܗܝ، ܐܵܢܵܐ ܢܦܝܼܠ ܠܝܼ ܘܛܠܝܼܥ ܠܝܼ ܟܲܕ ܦܵܬܝܼ ܠܐܲܪܥܵܐ.
10ܘܗܵܐ، ܐܝܼܕܵܐ ܕܩܝܼܪܵܗ̇ ܒܝܼܝܼ، ܘܩܲܡ ܡܲܓ̰ܘܸܓ̰ܵܐ ܠܝܼ ܥܲܠ ܒܘܼܪ̈ܟܵܟܝܼ ܘܥܲܠ ܠܲܚܬܹ̈ܐ ܕܐܝܼܕܝܼ̈. 11ܘܐ݇ܡܝܼܪܹܗ ܐܸܠܝܼ، ”ܝܵܐ ܕܵܢܝܼܐܹܝܠ، ܐ݇ܢܵܫܵܐ ܪܵܒܵܐ ܡܘܼܚܸܒܵܐ، ܦܲܪܡܝܼ ܗܹܡܸܙܡܵܢܹ̈ܐ ܕܐܵܢܵܐ ܗܲܡܙܘܼܡܹܐ ܝܘܸܢ ܥܲܡܘܼܟ݂، ܘܟܠܝܼ ܥܲܠ ܟܠܵܝܬܘܼܟ݂، ܣܵܒܵܒ ܐܵܕܝܼܵܐ ܦܝܼܫ ܠܝܼ ܫܘܼܕܪܵܐ ܠܟܸܣ ܠܘܼܟ݂.“ ܘܟܲܕ ܗܘܼܡܙܸܡ ܠܹܗ ܥܲܡܝܼ ܐܵܗܵܐ ܚܲܒܪܵܐ، ܟܠܹܐ ܠܝܼ ܪܲܬܪܘܼܬܹܐ. 12ܘܐ݇ܡܝܼܪܹܗ ܐܸܠܝܼ، ”ܠܵܐ ܙܵܕܥܹܬ، ܕܵܢܝܼܐܹܝܠ، ܣܵܒܵܒ ܡ̣ܢ ܝܵܘܡܵܐ ܩܵܕ݇ܡܵܝܵܐ ܕܝܘܼܗ݇ܒܸܠ ܠܘܼܟ݂ ܠܸܒܘܼܟ݂ ܠܦܲܪܡܘܼܝܹܐ، ܘܠܡܲܡܟܘܼܟܹܐ ܓܵܢܘܼܟ݂ ܩܵܕ݇ܡ ܐܲܠܵܗܘܼܟ݂، ܦܝܼܫ ܠܗܘܿܢ ܫܡܝܼܥܹܐ ܗܹܡܸܙܡܵܢܘܼ̈ܟ݂، ܘܐܵܢܵܐ ܐ݇ܬܹܐ ܠܝܼ ܒܘܼܬ ܗܹܡܸܙܡܵܢܘܼ̈ܟ݂. 13ܐܝܼܢܵܐ ܪܹܫܵܐ ܕܡܲܠܟܘܼܬܵܐ ܕܦܵܪܸܣ ܟܸܠܝܵܐ ܝܗ݇ܘܵܐ ܠܕܲܠܩܘܼܒ݂ܠܝܼ، ܥܸܣܪܝܼ ܘܚܲܕ ܝܵܘܡܵܢܹ̈ܐ، ܘܗܵܐ، ܡܝܼܟ݂ܵܐܹܝܠ، ܚܲܕ ܡ̣ܢ ܓܘܼܪ̈ܵܢܹܐ ܪܹ̈ܫܵܝܹܐ ܐ݇ܬܹܐ ܠܹܗ ܠܗܲܝܘܼܪܝܼ، ܣܵܒܵܒ ܐܵܢܵܐ ܦܝܼܫܵܐ ܝܘܸܢ ܗ݇ܘܵܐ ܬܵܡܵܐ ܠܟܸܣ ܡܲܠܟܹ̈ܐ ܕܦܵܪܸܣ. 14ܘܐܵܕܝܼܵܐ ܐ݇ܬܹܐ ܠܝܼ ܠܡܲܦܪܘܼܡܘܼܟ݂ ܡܸܢܕܝܼ ܕܒܸܬ ܩܲܘܸܡ ܠܥܲܡܘܼܟ݂ ܒܚܲܪܬܵܐ ܕܝܵܘܡܵܢܹ̈ܐ، ܣܵܒܵܒ ܗܹܫ ܚܸܙܘܵܐ ܩܵܐ ܕܲܥܬܝܼܕ ܝܼܠܹܗ.“
15ܘܟܲܕ ܗܘܼܡܙܸܡ ܠܹܗ ܥܲܡܝܼ ܐܲܝܟ݂ ܕܐܲܢܹܐ ܗܹܡܸܙܡܵܢܹ̈ܐ، ܡܘܼܬܸܒ݂ ܠܝܼ ܦܵܬܝܼ ܠܐܲܪܥܵܐ، ܘܠܸܫܵܢܝܼ ܕܒ݂ܝܼܩ ܠܹܗ. 16ܘܗܵܐ، ܐܲܝܟ݂ ܕܡܘܼܬܵܐ ܕܒܲܪ ܐ݇ܢܵܫܵܐ ܒܸܕܩܵܪܵܐ ܥܲܠ ܣܸܦܘܵܬܝܼ̈، ܘܦܬܝܼܚ ܠܝܼ ܦܘܼܡܝܼ ܘܗܘܼܡܙܸܡ ܠܝܼ، ܘܐ݇ܡܝܼܪܝܼ ܠܗ̇ܘ ܕܟܸܠܝܵܐ ܝܗ݇ܘܵܐ ܠܒܲܠܩܘܼܒ݂ܠܝܼ، ”ܝܵܐ ܡܵܪܝܼ، ܡ̣ܢ ܥܸܠܬܵܐ ܕܚܸܙܘܵܐ ܕܝܼܪܗܘܿܢ ܥܹܝܩܘܼܘܝܼ̈ ܥܲܠܝܼ، ܘܠܵܐ ܦܝܼܫ ܠܹܗ ܒܝܼܝܼ ܚܲܝܠܵܐ. 17ܘܕܵܐܟ݂ܝܼ ܡܵܨܹܝܢ ܐܵܢܵܐ ܪܹܓܘܼܟ݂ ܗܲܡܙܸܡܸܢ ܥܲܡܘܼܟ݂، ܝܵܐ ܡܵܪܝܼ؟ ܘܗܵܐ ܡ̣ܢ ܐܵܕܝܼܵܐ ܠܲܝܬ ܒܝܼܝܼ ܚܲܝܠܵܐ، ܘܢܫܲܡܬܵܐ ܠܵܐ ܦܝܼܫ ܠܵܗ̇ ܫܒ݂ܝܼܩܬܵܐ ܒܝܼܝܼ.“ 18ܗ̇ܝܓܵܗ ܡܘܼܙܝܸܕ ܠܹܗ ܘܕܩܝܼܪܹܗ ܒܝܼܝܼ، ܗ̇ܘ ܕܐܝܼܬ ܗ݇ܘܵܐ ܠܹܗ ܚܸܙܘܵܐ ܕܒܲܪܢܵܫܵܐ، ܘܩܲܡ ܚܲܠܸܢܝܼ. 19ܘܐ݇ܡܝܼܪܹܗ، ”ܠܵܐ ܙܵܕܥܹܬ، ܐ݇ܢܵܫܵܐ ܪܵܒܵܐ ܡܘܼܚܸܒܵܐ، ܫܠܵܡܵܐ ܐܸܠܘܼܟ݂، ܚܲܠܸܢ، ܘܚܲܠܸܢ.“ ܘܟܲܕ ܗܘܼܡܙܸܡ ܠܹܗ ܥܲܡܝܼ، ܦܝܼܫ ܠܝܼ ܚܘܼܠܸܢܵܐ، ܘܐ݇ܡܝܼܪܝܼ، ”ܗܲܡܙܸܡ، ܝܵܐ ܡܵܪܝܼ، ܣܵܒܵܒ ܩܲܡ ܚܲܠܸܢܸܬ ܠܝܼ.“ 20ܘܐ݇ܡܝܼܪܹܗ، ”ܗܵܐ، ܟܹܐ ܝܵܕܥܹܬ ܩܵܡܘܿܕܝܼ ܐ݇ܬܹܐ ܠܝܼ ܠܟܸܣ ܠܘܼܟ݂؟ ܘܐܵܕܝܼܵܐ ܒܸܬ ܕܵܝܪܹܢ ܠܸܦܠܵܫܵܐ ܥܲܡ ܓܘܼܪܵܐ ܕܦܵܪܸܣ، ܘܟܲܕ ܐܵܢܵܐ ܒܸܦܠܵܛܵܐ، ܘܗܵܐ، ܓܘܼܪܵܐ ܕܝܵܘܵܢ ܒܸܬ ܐܵܬܹܐ. 21ܐܸܠܵܐ ܒܸܬ ܡܲܕܥܸܢܘܼܟ݂ ܡܸܢܕܝܼ ܕܝܼܠܹܗ ܪܫܝܼܡܵܐ ܒܟܬܵܒ݂ܵܐ ܕܫܪܵܪܵܐ، ܘܠܲܝܬ ܚܲܕ ܕܚܲܠܸܢܝܼ ܕܲܠܩܘܼܒ݂ܠ ܕܐܲܢܹܐ، ܫܒ݂ܘܿܩ ܡ̣ܢ ܡܝܼܟ݂ܵܐܹܝܠ ܪܹܫܵܘܟ݂ܘܿܢ.
လက္ရွိေရြးခ်ယ္ထားမွု
ܕܢܝܐܝܠ 10: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation